ZAWHÂNA 14

Lâpi, biehmeiseihpa nata hrona

1 “Nama pathipalôh nôpo khah sy. Khazohpa namâ ngiapâ na, kei chhao nâ ngiapâ hra teh u. 2Ei Paw o liata yna hluhpi a y. A y vei khiahta cha, ei cha chho ha awpa ei a châ. Nama châta su a chhuahdy awpa ta ei sie aw. 3Nama châta su a chhuahdy awpa ta a sie awpa ei châpa vâta, vaw kua heih aw na ta, ei hnohta ei châ chhi aw ei. Chatanachata nâmo chhao ei yna liata nama y aw. 4Ei sie nawpa pahno ei chi ta, a lâpi nama pahno,” tah ta. 5Thawma ta a hnohta, “Abeipa, na sie nawpa pahno ma pi. A lâpi cha kheihta ma eima pahno thei aw,” tah ta. 6Zisu ta a hnohta, “Kei he lâpi nata biehmeiseihpa nata hrona ei châ. Kei liata a sie leipa cha ahy hmah Paw kô tlô thei aw vei. 7Kei he nâ pahnopa châ u la, ei Paw chhao nama pahno aw. Tahmâ tawhta deikua cha, Paw cha pahno ei chi ta, nama hmô haw,” tah ta.

8Phili ta a hnohta, “Abeipa, Paw cha miah pahmô teh, cha cha eima châta â daih na,” tah ta. 9Zisu ta a hnohta, “Phili, bohpi nama hnohta y na ta, na pahno to va chi ma? Ahy rai keima nâ hmôpa cha Paw a hmôpa a châ. Kheihtazieta, ‘Paw cha miah pahmô teh,’ na tah thlâh haw? 10Kei Paw liata y na ta, Paw keima liata a ypa kyh cha zo va chi ma? Nama hnohta bie ei reipazy he, keima biehneina ta a reihpa châ va na, keima liata a ypa Paw ta rai a hriapa tlao a châ. 11Kei Paw liata ei y na ta, Paw keima liata a ypa kyh ei reipa he na zo teh u. Cha leipa chhao ta, ei hmo taopazy chhâ he cha zo teh u.

12 “Hmeiseihta ta, hmeiseihta ta ei cha chho ei, ahy rai nâ ngiapâpa cha hmo ei taopazy he ano chhao ta a tao aw. Paw lâ ei sie awpa vâta, hezy hlâta hmo rônah viapa chhao a tao aw. 13Paw cha Sawchapawpa liata parônahsapa ta a y thei nawpa ta, ei moh ta nama hiapa maih ei tao lymâ aw. 14Khâpa rai ei moh ta nama hia khiahta cha, ei tao lymâ aw.

Thlahpa Pathaihpa â vy aw

15 “Kyh eina pachâ khiah ei chi ta cha, ei biepiepazy nama zyh aw. 16Paw lâ hiah aw na ta, chhâzaw ta nama hnohta y awpa ta, Thlapalôhtuh hropa a cha pie aw ei. 17Cha cha biehmeiseihpa Thlahpa, khizaw ta a hnei leipa a châ. Khizaw ta ano cha hmô leipa ta, pahno vei. Nâmo deikua ta cha, nama hnohta y ta, a y lymâ awpa vâta, ano cha nama pahno.

18 “Hârapa ta cha siesai aw veih ei na, nama hnohta ei vy heih aw. 19Bohpi leipa tawhta khizaw ta na hmô khao aw vei, châhrasala nâmo la eina hmô aw ei chi. Kei ei hrohpa vâta, nâmo chhao nama hroh aw. 20Cha noh liata, kei ei Paw liata y na ta, nâmo keima liata y ei chi ta, kei nâmo liata ei y tahpa nama pahno aw. 21Ahy rai ei biepiepazy hnei ta, a zyhpa cha, ano cha kyh nâ pachâtuhpa a châ. Ahy rai kyh nâ pachâpa cha ei Paw ta a kyh a pachâ aw. Kei chhao ano kyhpachâ aw na ta, a hnohta ei luah aw,” tah ta. 22Zudâh, Iskari a châ leipa ta, a hnohta, “Abeipa, khazia keimo hnohta a luah aw chi ta, khizaw hnohta nâ luah aw vei?” tah ta. 23Zisu ta a chhy ta, “Chyhsa ta kyh eina pachâ khiahta cha, ei bie zyh aw ta, ei Paw ta ano cha kyhpachâ aw ta, ano lâ a vy aw pi ta, a hnohta eima pahrâ aw. 24Kyh nâ pachâ leipa chyhsa cha ei biepiepazy zyh vei. Bie nama theipazy he kei eih châ leipa ta, nâ tuahtuhpa Paw eih a châ.

25 “Nama hnohta ei y chhôh ta he biezy he ei cha chho ei. 26Thlapalôhtuhpa, Paw ta ei moh ta a vaw tua awpa Thlahpa Pathaihpa chata, ato cha pachu aw ei ta, nama hnohta ei reipa zydua kha a cha patheisa heih aw ei. 27Thlalôhna cha sopa ei na ta, keima thlalôhna ei cha pie ei. Khizaw ta a piepa hawhta cha pie veih ei na. Nama pathipalôh nôpo leipa sala, chi hra khah sy. 28‘Sie aw na ta, nâmo lâ ei vy heih aw,’ ei cha tahpa ei kha nama pahno. Paw cha keima hlâta rônah viapa a châpa vâta, kyh nâ pachâpa nama châ khiahta cha, Paw lâta ei sie awpa cha namâ ly awpa a châ. 29Cha hmo a vaw tlô tita nama zo nawpa ta, a vaw tlô hlâta tahmâ ei cha chho ei. 30He tawhta la nama hnohta bie reih hluh thei khao aw va na, khizaw ryureituhpa a vy tlôh aw ta. Ei chô liata biehnei taraw vei, 31châhrasala Paw kyh ei pachâpa khizaw ta a pahno thei nawpa ta, Paw ta bie eina piepa hawhta ei taopa a châ. Thyu teh u, he su tawhta pua ei suh u.

Currently Selected:

ZAWHÂNA 14: MARVBSI

Highlight

Copy