ZAWHÂNA 18

Zisu apaphasaina nata patuna

(Mat 26.47-56; Mka 14.43-50; Lka 22.47-53)

1Cha biezy cha a rei khai nahta, a pachupazy chhaota pua ei ta, Kidaraw chavah chaka ei ta. Cha liata sadô y ta, Zisu cha a pachupazy chhaota sadô liana cha a ngia ei ta. 2Zisu ta a pachupazy cha liata â hmô tyhpa vâ ei ta, a patusatuhpa Zudâh chhao ta cha su cha a pahno. 3Chatanachata Zudâh cha theihthai beizy nata Phârisaihzy tawhta pheisaih sahlao nata hyutuhpazy a chhi ta, meiôhzy, meireizy, chaihraizy chabapa ta, cha su lâ cha vawh ei ta. 4Zisu cha a chô liata hmo a tlô awpa zydua pahno thlâh hapa ta, pua ta ama hnohta, “Ahy nama tlua?” tah ta. 5Âmo ta a chhy ei ta, “Nâzari Zisu,” tah ei ta. Zisu ta ama hnohta, “Keima he ei châ,” tah ta. A patusatuhpa Zudâh cha ama hry liata a duah ta. 6Zisu ta, “Keima he ei châ,” a tahpa nahta, ama hnôh lâ a sy ei ta, alei liata pao khai ha ei ta. 7Zisu ta, “Ahy nama tlua?” tahpa ta âmo cha hiahri chanei ta. Âmo ta, “Nâzari Zisu,” tah ei ta. 8Zisu ta a chhy ta, “Keima he ei châ, tahpa ei cha chho ha ei kha zaw. Keima nâ tluapa nama châ khiahta cha, he sahlao he pathlie teh u,” tah ta. 9Cha cha a bie reipa, “Nâ ta eina piepazy chi pakha hmah pahlei va na,” a tahpa kha a vaw tlô nawpa ta a châ. 10Chatawhcha Saimaw Pity ta a zaozi phia ta, theihthai beichaipa chakaotuhpa chhawh ta, a nakao chachâh lâ pathai ha ta. Chakaotuhpa moh cha Malku a châ. 11#Mat 26.39; Mka 14.36; Lka 22.42Zisu ta Pity hnohta, “Zaozi kha a paih liata khô teh, Paw ta nyu eina piepa he ei doh awpa châ vei ma?” tah ta.

Zisu theihthai beizy hmiakô liata

(Mat 26.57-58; Mka 14.53-54)

12Pheisaih sahlao nata ama hyutuhpa nata Zuzy hyutuhpazy ta Zisu cha patu ei ta, chahry ei ta. 13Cha kô liata theihthai beichaipa Kaiphâ puhpa cha Anâ a châpa vâta, Zisu cha Anâ lâ a chhi tua ei ta. 14#Zhn 11.49,50Kaiphâ cha phopi vyuhpa ta chyhsa pakha thipa a pha via, tahpa ta Zuzy hnohta pachâna a vaw pietuhpa kha a châ.

Pity ta Zisu â paphasai

(Mat 26.69-70; Mka 14.66-68; Lka 22.55-57)

15Saimaw Pity cha Zisu pazi ta, a pachupa hropa pakha chhao ta Zisu cha pazi hra ta. Cha pachupa cha theihthai beichaipa hmia pahnopa a châpa vâta, theihthai beichaipa o dôhpachhôh tlyhmia lâ Zisu hnohta a ngia ta. 16Pity deikua cha khôtho lâ ochhi kiapâh liata a duah ta. Pachupa hropa, theihthai beichaipa hmia pahnopa cha pua ta, ochhi vaituhpa laihsa kei chho ta, chatanachata Pity cha a ngiakhei ta. 17Ochhi vaituhpa laihsa ta Pity hnohta, “Nâ chhao he, he chyhsa pachupazy hry liata a hlao hrapa châ va chi mâ?” tah ta. Pity ta, “Châ va na,” tah ta. 18A chasi kawpa vâta, chakaotuhpazy nata hyutuhpazy cha meihei ta mei patih ei ta, a duah hmahta mei a aih ei ta. Pity chhao, a dua hmahta ama hnohta a aih hra ta.

Theihthai beichaipa ta Zisu bie a hiahri

(Mat 26.59-66; Mka 14.55-64; Lka 22.66-71)

19Theihthai beichaipa ta Zisu cha a pachupazy thâtih nata a pachunazie hiahri ta. 20Zisu ta a chhy ta, “Vâtlâh pahnopa ta khizawpi hnohta bie reih tyh na ta, Zu chyhsa zydua a hmaohpakhyna pakhyna ozy nata Achhyna o liata khâ ei pachu tyh kha zaw. Arulâta khâpa hmah reih va na. 21Khazia kei eina hiahri chi? Ama hnohta bie ei reipa a theituhpazy hiahri châh chi. Âmo ta ei bie reipa cha ama pahno mâh tâh,” tah ta. 22Cha bie cha a rei khai nahta, a kiapâh liata a duahpa hyutuhpa pakha ta Zisu cha chabaih ta, “Kha hawhta ma theihthai beichaipa nâ chhy?” tah ta. 23Zisu ta a chhy ta, “Biedoleipa a reihpa ei châ khiahta cha, biedoleipa cha pahnokheituhpa châ la, ei reipa cha biedopa a châ khiahta cha, khazia eina chabaih chi?” tah ta. 24Chatawhcha Anâ ta Zisu cha chahryna chôta theihthai beichaipa Kaiphâ lâ paphao ta.

Pity ta Zisu â paphasai heih

(Mat 26.71-75; Mka 14.69-72; Lka 22.58-62)

25Saimaw Pity cha a dua hmahta mei a aih ta, “Nâ chhao he a pachupazy hry liata a hlaopa châ hra va chi ma?” tah ei ta. Pity ta, “Châ va na,” tahpa ta a papha ta. 26Theihthai beichaipa chakaotuhpa pakha, Pity ta a nakao a pathai hapa chhôhkhapa ta, “A hnohta sadô liata ei cha hmôpa kha châ va chi ma?” tah ta. 27Pity cha a papha heih ta, awh khoh pâ ha ta.

Zisu Pilâ hmiakô liata

(Mat 27.1-2,11-14; Mka 15.1-5; Lka 23.1-5)

28Zisu cha Kaiphâ o tawhta râhvaotuhpa o lâ a chhi heih ei ta. Mydi kari châ ta. Zuzy deikua cha râhvaotuhpa o liata a ngia leipa ei ta. Amâ ngia khiahta cha, pathaih leipa châ aw ei ta, Zawpakhô pati ama nie thei lei awpa vâta amâ ngia leipa a châ. 29Pilâ cha zawpi yna lâ kei pua ta, ama hnohta, “He chyhsa chô liata khâpa biepeipa ma nama hnei?” tah ta. 30Âmo ta a chhy ei ta, “He chyhsa he moleipa châ leipa sala, nâ lâ a vaw chhi aw ma pi,” tah ei ta. 31Pilâ ta ama hnohta, “Nâmo ta a chhi u la, nama ryhpa hawhta a thâtih pachia teh u,” tah ta. Zuzy ta a hnohta, “Chyhsa thie theina biehneina hnei ma pi,” tah ei ta. 32#Zhn 3.14; 12.32Cha cha Zisu ta a thinazie awpa kyh a reipa hawhta a vaw tlô nawpa ta a vaw ypa a châ. 33Pilâ cha a o lâ a ngia heih ta, Zisu cha aw ta, a hnohta, “Zuzy Beipa na châ ma?” tah ta. 34Zisu ta a chhy ta, “Cha kyh cha nâma lôhthai ta na reipa ma, mohropa ta ei thâtih ama cha chhopa tawhta a reihpa ma na châ?” tah ta. 35Pilâ ta a chhy ta, “Kei cha Zu chyhsa ma ei châ? Na chiheihzy cheingei nata theihthai beizy ta kei lâ ama cha vaw hlâpa na châpa he. Khâpa hmo ma na tao haw?” tah ta. 36Zisu ta a chhy ta, “Ei khinarâh cha he khizaw khinarâh châ vei. Ei khinarâh cha he khizaw khinarâh châ sala, Zuzy lâta hlâpa ta ei y lei nawpa ta, nâ chakaotuhpazy ta amâ dyuh ha aw. Ei khinarâh cha he liata y vei,” tah ta. 37Pilâ ta a hnohta, “Cha khiah, abei ma na châ?” tah ta. Zisu ta a chhy ta, “Nâ ta abei na châ eina tah chi cha zaw. Biehmeiseihpa pahnosa awpa ta a pihpa châ na ta, biehmeiseihpa pahnosa awpa ta khizaw lâ â zupa ei châ. Ahy rai bie hmeiseihpa liata a ypa maihta ei bie ama zyh tyh,” tah ta. 38Pilâ ta a hnohta, “Bie hmeiseihpa cha khâpa maw?” tah ta.

Cha bie cha Pilâ ta a rei khai nahta, Zuzy lâta pua heih ta, ama hnohta, “Khâpa hmah a moleina hmô va na. 39Châhrasala Zawpakhô kyhchhi nota taozietyhpa nama hneipa hawhta, chyhsa pakha ei cha papuapa aw ei. Zuzy Beipa he cha papuapa aw ei sah la nama khoh ma?” tah ta. 40Châhrasala ao paro ngaitapa ta awh heih ei ta, “Kha chyhsa kha papua leipa la, Bârabâ kha papua teh!” tah ei ta. Bârabâ cha hraotuhpa a châ.

Currently Selected:

ZAWHÂNA 18: MARVBSI

Highlight

Copy