ZAWHÂNA 19

Zisu Khaipâ awpa ta pathlupa a châ

(Mat 27.15-31; Mka 15.6-20; Lka 23.13-25)

1Pilâ ta Zisu cha a chhi ta, pachheisa ta. 2Pheisaihzy ta hloh lakho tao ei ta, Zisu cha pakho ei ta, poh saihlawpa pabu ei ta. 3A kiapâh lâ a vy ei ta, “Zuzy Beipa, eimâ châ naoh na!” tah ei ta, chabaih ei ta. 4Pilâ cha pua heih ta, ama hnohta “Moh teh u, khâpa hmah a thaileichâna hmô va na tahpa nama pahno nawpa ta, nâmo lâ ei vaw chhi hih,” tah ta. 5Zisu cha hloh lakho a khopa nata poh saihlawpa a bupa ta vaw pua ta. Pilâ ta ama hnohta, “Moh teh u, he chyhsa hih!” tah ta. 6Theihthai beizy nata hyutuhpazy ta Zisu ama hmôpa nahta, “Khaipâ teh, Khaipâ teh!” tahpa ta awh ei ta. Pilâ ta ama hnohta, “Nâmo ta a chhi u la, khaipâ teh u, kei la thailei a châna khâpa hmah hmô va na,” tah ta. 7Zuzy ta a chhy ei ta, “Ryhpa miakha hnei pi ta, Khazohpa Sawchapawpa ta â taopa vâta, cha ryhpa hawhta a thi awpa a châ,” tah ei ta. 8Cha bie cha Pilâ ta a thei nahta, chi via rili ta. 9A o lâ a ngia heih ta, Zisu hnohta, “Khataih lâta chyhsa ma na châ?” tah ta. Châhrasala Zisu ta a chhy khoh leipa ta. 10Pilâ ta a hnohta, “Na chho aw va chi mâ? Châ pathlie theipa châ na ta, châ khaipâ theipa ei châ tahpa pahno va chi mâ?” tah ta. 11Zisu ta a chhy ta, “Chô lâ tawhta biehneina piepa na châ vei khiahta la, ei chô liata khâpa biehneina hmah hnei va chi. Chavâta nâ lâta nâ vaw hlâtuhpa moleina he a lai via,” tah ta.

12Cha khai tawhta, Pilâ ta Zisu cha pathlie a chhuah ta. Châhrasala Zuzy ta, “He chyhsa he na pathlie khiahta la, Kaisarâ viasa châ va chi. Âmosasyh ta bei ta â taopa maih Kaisarâ amâ dyuh tyh,” tah ei ta. 13Cha biezy cha Pilâ ta a thei nahta, Zisu cha a chhi ta. Pilâ cha Lô Daosâh,#19.13 “Lô Daosâh” cha sie nawpa, palao nawpa nata ryurei nawpa châta alô hmâpa ta alei nata siphiah hlâta â sâh viapa ta daopa a châ. Hebrai reih ta Kâbathâ ama tahpa, ryureina dyuchhai liata a tyuh ta. 14Cha noh cha Zawpakhô kyhchhi Pachynoh châ ta, nohchhô dawh kha rachhôh a châ. Pilâ ta Zuzy hnohta, “Moh teh u, nama Beipa hih!” tah ta. 15Âmo ta, “Pahleipadia teh, pahleipadia teh, khaipâ teh!” tahpa ta awh ei ta. Pilâ ta ama hnohta, “Nama Beipa he ei khaipâ aw ma?” tah ta. Theihthai beizy ta a chhy ei ta, “Kaisarâ leipa ta bei hropa hnei ma pi,” tah ei ta. 16Chatanachata Zisu cha khaipâ awpa ta, Pilâ ta âmo hlâ ha ta.

Khaipâna

(Mat 27.32-44; Mka 15.21-32; Lka 23.26-43)

17Zisu cha a chhi ei ta, a kraws a piapa ta, Luh Ru Su, Hebrai reih ta Kôlkôthâ ama tahpa Kalvari tlâh lâ sie ta. 18Cha liata khaipâ ei ta, chyhsa hropa pano chhao, a kâ chavei chachâh ta khaipâ hra ei ta. Zisu cha a liah liata y ta. 19Pilâ ta châ roh ta, kraws pawhmao liata tawh ta, châ tawpa cha, “Nâzari Zisu, Zuzy Beipa,” tahpa ta ropa a châ. 20Zisu khaipâna su cha khihpi kiapâh châ ta, châropa cha Hebrai reih, Rawma reih nata Krikâh reihzy ta ropa a châpa vâta, Zu chyhsa hluhpi ta reih thei ei ta. 21Zu theihthai beizy ta Pilâ hnohta, “‘Zuzy Beipa,’ tahpa ta roh leipa la, ‘He chyhsa heta Zuzy Beipa ei châ â tah,’ tahpa ta roh teh,” tah ei ta. 22Pilâ ta a chhy ta, “Ei ropa cha ei ropa a châ,” tah ta.

23Pheisaihzy ta Zisu cha ama khaipâ khai nahta, a chysiazy la ei ta, su palih ta pachhaih ei ta, pheisaih pakha ta su kha chyu a la ei ta. A viahkao rytho chhao la ei ta. Viahkao rytho cha bieh leipa, a pawhmao tawhta a chhâna taihta a sa ta sapa a châ. 24#Hla 22.18Chavâta, “Hrie khah ei suh u, ahy ma a to aw tahpa nuby tlao a dao ei suh u,” tah ei ta. Biehrai ta,

“Ei chysiazy a rai ei ta,

Ei viahkao châta nuby amâ dao,”

a tahpa kha a â ki thei nawpa ta, he hmo he a vaw tlôpa a châ. 25Zisu kraws kiapâh liata a nô nata a nô narônô, Klôpâ lapinô Mâri nata Mâri Mâdali zy a duah ei ta. 26Zisu ta a nô nata pachupa kyh a pachâpa a kiapâh liata amâ duapa a hmô nahta, a nô hnohta, “Ei nô, moh teh, na sawchapawpa khawh!” tah ta. 27Chatawhcha pachupa hnohta, “Moh teh, na nô khawh!” tah ta. Cha daihti tawhta pachupa chata Zisu nô cha a o lâ a chhi ha ta.

Zisu thina

(Mat 27.45-56; Mka 15.33-41; Lka 23.44-49)

28 # Hla 69.21; 22.15 Cha khai tawhta, Zisu cha hmo to a tlô paki khai hapa pahno ta, Biehrai paki nawpa ta, “Ei dâh a phi,” tah ta. 29Cha liata beihrai miakha kresawhti thaopa ta a biepa y ta, cha liata ti pasysana nypa ta hisaw tho chiah liata pataoh ei ta, a hmao kaw papha ei ta. 30Kresawhti thaopa a pachâh khai nahta, Zisu cha, “Â ki haw,” tah ta, a luh a bôh ta, a thlahpa pathlie ha ta.

Zisu kâ liata amâ chô

31Pachynoh châ ta, rizy cha Pahânoh ta kraws liata y thlâh awpa a châ leipa vâta, cha Pahânoh cha noh rônahpa châ tlôh ta, Zuzy ta Pilâ hnohta ama pheizy thliepa ta, ama ri cha la ha awpa ta a haw ei ta. 32Pheisaihzy a vy ei ta, Zisu hnohta ama khaipâpa tytuapa nata ahropa pheizy thlie ei ta. 33Zisu kô vaw tlô ei ta, a thi hapa ama hmô nahta, a pheizy cha thlie khao leipa ei ta. 34Pheisaih pakha ta a kâ liata asei ta a chô ta, thisaih nata ti thlai vaw pua ta. 35Cha hmo cha, mo ta a hmôtuhpa cheingei ta a reipa a châ. A hmo pahnopa cha a do ta, biedopa a reihpa a châ tahpa chhao ano liata â pahno. Cha bie cha nâmo chhao ta namâ ngiapâ thei nawpa ta reipa a châ. 36#Pua 12.46; Maluh 9.12; Hla 34.20Biehrai ta, “A ru miakha hmah thliepa châ aw vei,” tahpa ta a reipa kha â ki thei nawpa ta, cha hmozy cha a vaw tlôpa a châ. 37#Zkr 12.10; Biep 1.7Biehrai bie hropa chhao ta, “Amâ chôpa cha ama moh aw,” a tah hra.

Zisu pabuna

(Mat 27.57-61; Mka 15.42-47; Lka 23.50-56)

38Cha hmozy hnôhlâ ta, Arimathai khihpa Zawsi ta Zisu ri cha la awpa ta Pilâ hiah ta, Pilâ ta pasai ta. Zawsi cha Zisu pachupa pakha châ hra ta, Zuzy a chipa vâta arulâta ngiapâtuhpa a châ. A vy ta, a ri cha la ta. 39#Zhn 3.1,2Zâ ta Zisu lâ a vypa Nikadima chhao khata, myrâ nata alôs pahlaopa ropahâhpa saikhua kha a cheipa ta vawh hra ta. 40Zisu ri cha la ei ta, Zuzy pabunazie hawhta ropahâhpazy chhaota poh rih dipa ta pahly ei ta. 41Ama khaipâna su liata sadô miakha y ta, cha sadô liana cha ahy hmah pabu mâh leina thlâ thiehpa y ta. 42Zuzy Pachynoh châ ta, a kiapâh liata thlâ a ypa vâta, cha liata Zisu cha pabu ei ta.

Currently Selected:

ZAWHÂNA 19: MARVBSI

Highlight

Copy