ZAWHÂNA 20

Thyuheihna

(Mat 28.1-10; Mka 16.1-8; Lka 24.1-12)

1Hâta noh hmiatua chaipa liata, Mâri Mâdali cha mydi khih a pavâ hlâta thlâ lâ vawh ta, alô cha thlâ tawhta â pasie hapa hmô ta. 2A râ ta, Saimaw Pity nata pachupa hropa Zisu ta kyh a pachâpa lâ vawh ta, ama hnohta, “Abeipa kha thlâ tawhta thaoh ha ei ta, khataih liata ma ama pazia tahpa pahno khao ma pi,” tah ta. 3Pity cha pua ta, pachupa hropa chhaota thlâ lâ pangai ei ta. 4A râ khoh ei ta, pachupa hropa ta Pity cha chhao ta, thlâ cha tlô tua ta. 5A bôh ta, moh ta, poh rihdipazy cha a y thlâh hapa ta hmô ta, châhrasala a chhôh lâ a ngia leipa ta. 6Saimaw Pity chhao a hnôh lâta vaw tlô ta, thlâ chhôh lâ a ngia ta, poh rih dipazy cha a y thlâh hapa ta hmô ta. 7A luh liata hruna poh a ypa deikua cha, poh rih dipazy hry liata y leipa ta, chaty chiehpa ta su hro liata a ypa hmô ta. 8Pachupa hropa, thlâ a tlô tuapa chhao kha a ngia hra ta, hmô ta, zo ha ta. 9Athihpa hry tawhta a thyu heih awpa a châ tahpa Biehrai bie ama pahno mâh leipa vâta ama zo leipa a châ. 10Chatanachata pachupazy cha ama o lâ chyu a di ha ei ta.

Mâri Mâdali hnohta Zisu â luah

(Mka 16.9-11)

11Mâri cha thlâ khôtho liata chana chôta a duah ta, chana chôta a bôh ta thlâ chhôh lâ za moh ta. 12Vâlyuhchâpa pano poh diehpa a bupa ta, Zisu ri paziana su liata, pakha a luh lâta, pakha a phei lâta amâ tyuh thlâh hapa za hmô ta. 13Âmo ta a hnohta, “Chanô, khazia na cha?” tah ei ta. Ano ta ama hnohta, “Ei Beipa siekhei ha ei ta, ama paziana pahno khao va na,” tah ta. 14Cha bie cha a rei khai nahta, a hnôh lâ a heih ta, Zisu cha a vaw duah thlâh ha ta, châhrasala Zisu a châ tahpa pahno leipa ta. 15Zisu ta a hnohta, “Chanô, khazia na cha? Ahy na tlua?” tah ta. Sadô mokhâhtuhpa khiah ma tah ta, a hnohta, “Pâpuh, Zisu ri kha na la hapa a châ khiahta cha, khâpa su liata ma na so tahpa na chho teh, ei la pakhua ha aw,” tah ta. 16Zisu ta a hnohta, “Mâri,” tah ta. Mâri cha a vaw heih ta, a hnohta Hebrai reih ta, “Râbawni!” tah ta, cha cha Pachutuhpa tahna a châ. 17Zisu ta a hnohta, “Na patu khah y, Paw lâ kiah mâh va na. Ei unawhzy lâ vawh la, ama hnohta, ‘Ei Paw nata nama Paw, ei Khazohpa nata nama Khazohpa lâ ei kiah aw,’ a tah na tahpa ta kei chho mah y,” tah ta. 18Mâri Mâdali cha vawh ta, pachupazy hnohta, “Abeipa cha ei hmô haw,” tah ta, Zisu ta a hnohta bie a reipazy cha âmo chho ta.

A pachupazy hnohta Zisu â luah

(Mat 28.16-20; Mka 16.14-18; Lka 24.36-49)

19Cha noh, hâta noh hmiatuapa zâlâ ta, Zuzy chipa vâta pachupazy yna ochhizy cha khaw ei ta. Zisu cha a vy ta, ama hry liata a vaw duah ta, ama hnohta, “Nama chô liata thlalôhna y mawh sy,” tah ta. 20Cha bie cha a rei khai nahta, a ku nata a kâ zy âmo pahmô ta. Abeipa cha ama hmô nahta, pachupazy cha a ly ngaita ei ta. 21Zisu ta ama hnohta, “Nama chô liata thlalôhna y mawh sy. Paw ta kei eina tuapa hawhta, kei ta nâmo ei cha tuah ei,” tah heih ta. 22Cha biezy cha a rei khai nahta, âmo cha a hu so thlu ta, ama hnohta, “Thlahpa Pathaihpa hnei teh u. 23#Mat 16.19; 18.18Chyhsa moleina namâ ngiahthaipa maih, a ngiahthaipa châ aw ei ta, chyhsa moleina namâ ngiahthai leipa maih, a ngiahthai leipa ama châ aw,” tah ta.

Thawma zo leina

24Zisu â vy nota, pahrawh hleinozy hry liata a hlao hrapa, Maphieh ama tahpa Thawma cha, ama hnohta y leipa ta. 25Pachupa hropazy ta a hnohta, “Abeipa eima hmô haw,” tah ei ta. Châhrasala ano ta ama hnohta, “A ku thua khaina hmahdawzy kha hmôpa ta, thua khaina hmahdawzy cha ei kudy ta hriapa ta, a kâ liata ei ku ei chapao ha tua leipa ta la, zo aw va na,” tah ta.

26Noh charie a châ tawhta, a pachupazy cha o chhôh liata y heih ei ta. Thawma chhao ama hnohta y hra ta. Ochhizy khaw hapa a châ tarawpa ta, Zisu cha a vy ta, ama hry liata a vaw duah ta, ama hnohta, “Nama chô liata thlalôhna y mawh sy,” tah ta. 27Thawma hnohta, “Na kudy ta vaw hria la, ei kuzy he moh tua. Na ku vaw paza la, ei kâ liata vaw chapao tua. Zo leipa ta y leipa la, zo mah y,” tah ta. 28Thawma ta a chhy ta, a hnohta, “Ei Beipa nata ei Khazohpa!” tah ta. 29Zisu ta a hnohta, “Nâ la eina hmôpa vâ chi ta a ngiapâpa châ chi ta, hmô leipa ta a ngiapâpazy cha ama nohlao na,” tah ta.

Zawhâna châbu ta â chhuahpa

30Zisu cha pachupazy hmiakô liata hmonoâh hropa hluhpi tao ta, chazy cha he châbu liata ropa châ vei. 31Zisu cha Mesia, Khazohpa Sawchapawpa châ ta, ngiapâna vâta ano moh ta hrona nama hnei thei nawpa ta, he châbu he ropa a châ.

Currently Selected:

ZAWHÂNA 20: MARVBSI

Highlight

Copy