ZAWHÂNA 21
21
Pachupa pasari hnohta Zisu â luah
1Cha hnôhlâ ta Zisu cha a pachupazy hnohta Taibiria Tipo liata a luah heih ta, hetana heta â luah. 2Saimaw Pity, Maphieh ama tahpa Thawma, Kâlili chyhsa Kena khihpa Nâthaniah, Zebâdi sawchapawzy nata a pachupa hropa panozy chhaota hmaohkha ta y ei ta. 3#Lka 5.5Saimaw Pity ta ama hnohta, “Nga patu awpa ta ei sie aw,” tah ta. Âmo ta a hnohta, “Keimo chhao na hnohta eima vaw sie hra aw,” tah ei ta. Chatanachata balyh kiahpa ta sie ei ta, cha zâ cha khâpa hmah patu leipa ei ta.
4Khih pavâ chy ta, Zisu cha raphyu liata a duah ta. Châhrasala pachupazy ta Zisu a châ tahpa pahno leipa ei ta. 5Zisu ta ama hnohta, “Viasa saih u, ngasa a chyhta chhâ nama hnei ma?” tah ta. Âmo ta a chhy ei ta, “Hnei ma pi,” tah ei ta. 6#Lka 5.6Zisu ta ama hnohta, “Balyh kâ chachâh lâ liata sao vawh teh u, nama patu aw,” tah ta. Ama sao cha vawh ei ta, nga a hluh ngaitapa vâta, sao cha a daophi thei leipa ei ta. 7Zisu ta kyh a pachâpa pachupa khata Pity hnohta, “Abeipa a châ huh!” tah ta. Saimaw Pity cha rai hria awpa ta a chysia pahluh ha ta, Abeipa a châ tahpa a theipa nahta, a chysia thlai a ky ta, tipo lâ a zaw ta. 8Pachupa hropazy ta nga ta a biepa sao cha a daophi ei ta, Zisu yna lâ balyh ta pangai ei ta. Ngiahkâ tawhta a hla tu leipa, dy za no rachhôhpa liata a ypa ama châ.
9Ngiahkâ ama pua nahta, cha liata meihei ta mei patipa hmô ei ta, a chô liata ngasa raopa nata viahchhâ y ta. 10Zisu ta ama hnohta, “Nga nama patupa kha a chyhta vaw cheih teh u,” tah ta. 11Saimaw Pity cha balyh kiah ta, nga laipazy ta a biepa sao cha ngiahkâ lâ a daophi ta, nga a aopa cha a zydua ta 153 a châ. Cha tlu ta hluh hra sala, sao cha a hrie vei. 12Zisu ta ama hnohta, “A vy u la, my pati vaw nie teh u,” tah ta. Pachupa ahy hmahta, “Ahy ma na châ?” tahpa ta hiahri ngâh veih ei, Abeipa a châ tahpa pahno ha tlôh ei ta. 13Zisu cha a vy ta, viahchhâ la ta, ama hnohta pie ta, cha hawhna chata ngazy chhao la ta, ama hnohta pie hra ta. 14Cha cha athihpa hry tawhta a thyu heih tawhta, Zisu ta pachupazy hnohta â luahna ei thôhna a châ.
Ei mietakuzy pasa teh
15My pati ama nie khai nahta, Zisu ta Saimaw Pity hnohta, “Saimaw, Zawhâna sawchapawpa, hezy#21.15 He liata “Hezy hlâta kyh eina pachâ via chi ma?” tahpa he, “He pachupazy kyh na pachâpa hlâta kyh eina pachâ via chi ma?” tahna tlyma, “He pachupazy ta kyh eina pachâpa hlâ ei ta, nâ ta kyh eina pachâ via chi ma?” tahna tlyma, “He hmozy (sao nata ngazy) kyh na pachâpa hlâna heta kyh eina pachâ via chi ma?” tahna tlyma a châ thei. hlâna heta kyh eina pachâ via chi ma?” tah ta. Pity ta a hnohta, “Y, Abeipa, kyh ei cha pachâ tahpa na pahno,” tah ta. Zisu ta a hnohta, “Ei mietakutawzy pasa teh,” tah ta. 16A ei nona ta Zisu ta Pity hnohta, “Saimaw, Zawhâna sawchapawpa, kyh eina pachâ chi ma?” tah ta. Pity ta a hnohta, “Y, Abeipa, kyh ei cha pachâ tahpa na pahno,” tah ta. Zisu ta a hnohta, “Ei mietakuzy mohôh teh,” tah ta. 17A ei thôhna ta Zisu ta Pity hnohta, “Saimaw, Zawhâna sawchapawpa, kyh eina pachâ chi ma?” tah ta. Pity cha Zisu ta a ei thôhna ta, “Kyh eina pachâ chi ma?” a tahpa vâta, a pachârôh ta, a hnohta, “Abeipa, ato pahno chi ta, kyh ei cha pachâpa chhao na pahno na,” tah ta. Zisu ta a hnohta, “Ei mietakuzy pasa teh. 18Hmeiseihta ta, hmeiseihta ta ei cha chho, na hawti nota cha na chai a saih chi ta, na khona lâ maih na sie tyh. Na pitloh tita deikua cha, na kuzy pazawh aw chi ta, mohropa ta na chai cha saih aw ei ta, na kho leina lâ amâ châ daophi aw,” tah ta. 19Pity cha kheihawhta thipa ta ma Khazohpa a parônahsa aw tahpa palâsa nawpa ta, Zisu ta cha biezy cha a reipa a châ. Cha biezy cha a rei khai nahta, Pity hnohta, “Na zi teh,” tah ta.
Pachupa kyhpachâpa
20 #
Zhn 13.25
Pity cha a heih ta, Zisu kyhpachâpa pachupa, zâ pati nie nota a chachôhna a hniehpa ta ano lâ a heih ta, “Abeipa, châ patusa awpa cha ahy ma a châ?” a tahtuhpa khata a vaw zipa hmô ta. 21Pity ta ano cha a hmô nahta, Zisu hnohta, “Abeipa, hao chyhsa hao zaw, kheihta a châ aw?” tah ta. 22Zisu ta a hnohta, “Ano cha ei vy heihna taihta hroh awpa ta a khohpa rai châ aw sah la, cha cha na pachâ awpa a châ ma? Nâ cha na zi thlâh ha teh!” tah ta. 23Cha bie cha unawhzy hry liata pathâh ta, cha pachupa cha a thi lei awpa hawhta reipa a châ. Châhrasala Zisu ta pachupa cha a thi lei awpa kyh Pity hnohta reih leipa ta, “Ano cha ei vy heihna taihta hroh awpa ta a khohpa rai châ aw sah la, cha cha nâma pachâ awpa a châ ma?” a tahpa a châ. 24Cha pachupa cha, he biezy a pahnotuhpa nata a rohtuhpa he a châ. A bie pahnopa cha biedopa a châ tahpa eima pahno.
25Hmo hropa hluhpi Zisu ta tao ta. Cha zydua cha roh khaipa châ mawh sala, châbu ro awpazy cha khizaw ta â tlôh na ta pangiasa va na.
Currently Selected:
ZAWHÂNA 21: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
