MÂKA 14

Zisu thie amâ chhuah

(Mat 26.1-5; Lka 22.1-2; Zhn 11.45-53)

1 # Pua 12.1-27 Zawpakhô nata thinô pahlao leipa Viahchhâ Kyhchhi tlô hlâ noh nona liata, theihthai beizy nata ryhpa pachutuhpazy ta Zisu cha dôpakhei ta patupa ta, ama thie thei nawpa kyh tlua ei ta. 2Châhrasala, “Kyhchhi chhôh ta la châ khah sy. Chataleipatala zawpi a patypamâ pathlei aw na,” tah ei ta.

Zisu Bethâni liata sathawthupa a châ

(Mat 26.6-13; Zhn 12.1-8)

3 # Lka 7.37,38 Bethâni liata phawhpa Saimaw o liata pati a dôh hai nota, chanô pakha ta spinâ suapa ta taopa alabastâ sathaw sôh ngaitapa ôh vaw cheih ta, sathaw ôh cha pakei ta, Zisu luh liata bao ta. 4Cha liata a ypa thokha cha ama hiehâh kaw ta, “Khazia ma sathaw ropahâhpa a pahryuh thlâhthli tly? 5He sathaw he dinâri za thôh hlâta hluh via ta zuah theipa châ ta, cha cha dyhchhiepazy piepa châ sala, a pha via awpa tlai,” tah ei ta. Chavâta chanô cha thata reipachhie ei ta. 6Zisu ta, “Chanô he kheihta hmah tah khuh vy. Khazia nama patypamâ? Ei chô liata hmo phapa a taopa a châ hih. 7#Ryhpa 15.11Dyhchhiepazy cha nama hnohta khâ a ypa châ ei ta, nama khona maihta ama châta hmo pha nama tao thei. Kei deikua cha, nama hnohta khâ a y awpa châ va na. 8Chanô heta a tao theipa a tao hih. Pabu awpa ta ei pôhpa he sathaw a thu chhieliepa a châ. 9Hmeiseihta ta ei cha chho ei, khizaw zydua liata thâtihpha ama chhona su lia maihta, he chanô hmotaopa he ano a thei thlâh nawpa ta ama reih lymâ hra aw,” tah ta.

Zudâh ta Zisu â paphasai

(Mat 26.14-16; Lka 22.3-6)

10Pahrawh hleino hry liata a hlao hrapa Zudâh Iskari ta Zisu patusa awpa ta theihthai beizy lâ vawh ta. 11Cha kyh cha theihthai beizy ta ama thei nahta, a ly kaw ei ta, Zudâh Iskari hnohta tâkâ pie awpa bie a taih ei ta. Zudâh cha Zisu patusa awpa ta rypaohna tlua ta.

Zisu zawpakhô kyhchhi a tao

(Mat 26.17-25; Lka 22.7-14,21-23; Zhn 13.21-30)

12Thinô pahlao leipa Viahchhâ kyhchhi noh, noh hmiatua chaipa, zawpakhô mietakutaw ama thie tyhna noh liata, a pachupazy ta a hnohta, “Khataih liata ma Zawpakhô pati na nie nawpa châ chhuahdy paw sih la na khoh?” tah ei ta. 13A pachupazy hry liata pano tuah ta, ama hnohta, “Khihpi liata a kei ngia u la, chyhsa pakha tibeih a chabapa ta châ tyh aw ei ta, ano cha nama pazi aw. 14Â ngiana o hneituhpa hnohta, ‘Pachutuhpa ta, “Ei pachupazy chhaota zawpakhô pati ei nie nawpa chhôhpadâhpa khataih liata a y?” a tah,’ nama tah aw. 15A o chô lâta chhôhpadâhpa laipa, tobi chiehpa nata a mâ chiehpa cha pahmô aw ei ta, cha liata eima châta zawpakhô pati cha namâ chhuahdy aw,” tah ta. 16Pachupazy cha pua ei ta, khihpi cha kei tlô ei ta, ama hnohta a reipa hawh tlai ta hmô ei ta, zawpakhô pati cha a chhuahdy ei ta.

17Zâlâ a vaw châ nahta, Zisu cha pachupa pahrawh hleinozy chhaota a vy ta. 18#Hla 41.9Tlâhkhai liata dôh ei ta, ama nie hai nota, Zisu ta, “Hmeiseihta ta ei cha chho ei, nama hry liata pakha, ei hnohta a nie hrapa tlai ta einâ paphasai aw,” tah ta. 19Ama pachârôh kaw ta, pakha pakha ta a hnohta, “Kei ei châ ma?” tah ei ta. 20Zisu ta ama hnohta, “Pahrawh hleino hry liata pakha, beikoh ei chapaolâhpa he a châ. 21Chyhsa Sawchapawpa cha, a thâtih ropa hawh tlai ta a sie aw. Châhrasala Chyhsa Sawchapawpa a patusatuhpa cha a hu a po na! Cha chyhsa cha pih leipa sala, a châta a pha via awpa tlai,” tah ta.

Abeipa tlâhkhai

(Mat 26.26-30; Lka 22.15-20; 1 Kaw 11.23-26)

22Ama nie hai nota, Zisu ta viahchhâ la ta, byhnâ a aw khai nahta, eichheih ta, ama hnohta pie ta, “Nie teh u. He he ei sapa a châ,” tah ta. 23Chatawhcha nyu la ta, alyna bie a rei khai nahta, ama hnohta pie ta, ama zydua ta doh ei ta. 24#Pua 24.8; Zer 31.31-34Zisu ta ama hnohta, “He he ei thisaih, chyhsa hluhpi châta a lohpa biehrai thiehpa#14.24 He liata “biehrai thiehpa” tahpa he hlâno kuropa Biehrai thokha liata “thiehpa” tahpa he a hlao vei. a châ. 25Hmeiseihta ta ei cha chho ei, Khazohpa khinarâh liata a thiehpa ta ei dona noh a tlô hlâlei la, kre zôh patheipa tawhta doh heih khao aw va na,” tah ta.

Pity ta â paphasai awpa kyh a chhochhielie

(Mat 26.31-35; Lka 22.31-34; Zhn 13.36-38)

26Hla ama sa khai nahta, Ôli Tlâh lâ sie ei ta. 27#Zkr 13.7Zisu ta ama hnohta, “‘Mietaku vaituhpa tu aw na ta, mietakuzy ama pai aw,’ tahpa ropa hawhta, nama zydua ta nama pao khai aw. 28#Mat 28.16Châhrasala pathyupa ta ei y tawhta, nama hmia lâta Kâlili râh lâ ei sie aw,” tah ta. 29Pity ta a hnohta, “Ama zydua ta pao khai hra ei sala, kei la pao aw va na,” tah ta. 30Zisu ta a hnohta, “Hmeiseihta ta ei cha chho, tazâ tlai heta, awh ei no a kho hlâta, ei thôh einâ paphasai aw chi,” tah ta. 31Pity ta pachyu ngaitapa ta, “Na thina liata thi hra awpa chhao ta, châ paphasai cheita aw va na,” tah ta. Ama zydua ta cha hawhta reih chyu ei ta.

Kesemani lia thlah a chhâ

(Mat 26.36-46; Lka 22.39-46)

32Kesemani ama tahpa lâ sie ei ta. A pachupazy hnohta, “Thlah ei kei chhâ chhôhta, he liata a vaw tyuh chy muh vy,” tah ta. 33A hnohta Pity nata Zâmie nata Zawhâna a chhi ta, Zisu cha nôpopa ta a pachârôh ngaita ta. 34Ama hnohta, “Ei thlahpa a pachârôh ngaita ta, thina taihta a châ. He liata vaw y u la, vaw vaih teh u,” tah ta. 35A chyhta kei chakâ via ta, alei liata a khu lâta pao ta, tao theipa a châ khiahta cha, cha dawh chata ano khô awpa ta thlahchhâ ta. 36“Abâ,#14.36 “Abâ” (Krikâh reih ta Abba) cha “Ei Paw” tahna a châ. ei Paw, nâma châta la, ato tao theipa a châ. He nyu he kei tawhta pasie ha mah y. Châhrasala keima rei châ leipa sala, nâma rei tlao châ mawh sy,” tah ta. 37A vy ta, Pity nata Zâmie nata Zawhâna zy cha a vaw mô thlâh ha ei ta. Pity hnohta, “Saimaw, nâ mô ha mâ? Dawh kha chhao vaih thei va chi ma? 38Reipasaona liata namâ ngia lei nawpa ta a vaih u la, thlahchhâ teh u. Thlahpa ta la hoh ta, sapa deikua a dadieh,” tah ta. 39Vawh ta thlahchhâ heih ta, a rei hmopa pyly reih heih ta. 40A vy heih ta, mokuh ama saih thei leipa vâta, a vaw mô thlâh ha heih ei ta, â chhy nawpa chhao pahno veih ei. 41A ei thôhna ta vaw kua heih ta, ama hnohta, “A pahâ ei chi ta ma namâ mô thlâh ha chy? Â daih ha bâ, a daihti a vaw tlô haw. Moh teh u, Chyhsa Sawchapawpa he moleipazy ku liata hlâpa a châ ha bâ hih. 42Thyu teh u, sie ei suh u. Moh teh u, nâ patusatuhpa â vaw hnia ha huh,” tah ta.

Zisu ama patu

(Mat 26.47-56; Lka 22.47-53; Zhn 18.2-11)

43Bie a rei hai no tlai ta, pahrawh hleino hry liata a hlao hrapa Zudâh cha vaw tlô pâ ha ta. A hnohta theihthai beizy nata ryhpa pachutuhpazy nata machâzy nata zawpizy cha zaozi nata thothu a cheipa ta vaw tlô hra ei ta. 44A patusatuhpa ta, “Ei pahnâpa cha nama patu khohpa cha a châ aw. Patu u la, a phapa ta vaihpa ta a chhi muh vy,” tahpa ta ama hnohta ngiana vaw pie chhielie ha ta. 45A vaw tlôpa nahta, Zisu cha thlai pangai ta, a hnohta, “Pachutuhpa!” tah ta, Zisu cha a pahnâ ta. 46Chatanachata Zisu cha chahnao chakhipa ta, patu ha ei ta. 47A kiapâh liata a duahpazy hry liata pakha ta a zaozi phia ta, Theihthai Beichaipa chakaotuhpa cha chhawh ta, a nakao pathai pathlah ha ta. 48Zisu ta ama hnohta, “Zaozi nata thothuzy a cheipa ta ma, hraotuhpa patupa hawhta na patu awpa ta nama vaw pua? 49#Lka 19.47; 21.37Achhyna o liata noh to pachupa ta nama hnohta y tyh na ta, na patu leipa ei chi ta. Châhrasala Biehrai bie a vaw tlô nawpa ta, he hmo he a ypa a châ,” tah ta. 50Chatawhcha pachupa zydua cha Zisu a paphasaipa ta, a râsai khai ha ei ta.

51Satlia pakha cha, poh rih dipa chysia deita a tobipa ta Zisu cha zi ta. Ano cha patu ei ta, 52châhrasala a poh rih dipa chysia cha siesaipa ta, thluahruapa ta a râ ha ta.

Zisu ryureina hmiakô liata

(Mat 26.57-68; Lka 22.54-55,63-71; Zhn 18.12-14,19-24)

53Zisu cha Theihthai Beichaipa lâ a chhi ei ta. Theihthai bei zydua, ryhpa pachutuhpa zydua nata machâ zydua a vypakhy ei ta. 54Pity cha â hlapi ta Zisu cha pazi ta, Theihthai Beichaipa o dôhpachhôh tlyhmia taihta pazi ta. Vaituhpazy hry liata mei a aihpa ta a tyuh hra ta. 55Zisu ama thie thei nawpa ta theihthai beizy nata ryureituhpa zydua ta ano leihna tlua ei ta, châhrasala hmô leipa ei ta. 56Chyhsa hluhpi ta haipa ta leih ei ta, châhrasala ama leihna cha a lyu tlâ leipa ta. 57Thokha a vaw duah ei ta, haipa ta vaw leih ei ta, 58#Zhn 2.19“He chyhsa heta, ‘He Achhyna o, ku ta sapa he phie aw na ta, noh thôh chhôh ta Achhyna o hropa ku ta sa leipa ei padua aw,’ a tahpa eima thei,” tah ei ta. 59He liana chhao heta, ama pahnona bie a raohâh leipa ta. 60Theihthai Beichaipa cha ama hry liata a kaw duah ta, Zisu hnohta, “A chhy awpa hnei va chi ma? He chyhsazy ta ama cha leihna he khâpa ma a châ?” tah ta. 61Châhrasala a chalih thlâh ha ta, khâpa hmah a chhy leipa ta. Theihthai Beichaipa ta hiahri heih ta, “Nohlaopa Sawchapawpa Krista cha na châ ma?” tah ta. 62#Dân 7.13Zisu ta, “Ei châ na, Chyhsa Sawchapawpa he Hmotaotheina chachâh lâta a tyuhpa ta, vâ meihdo hry liata â zupa nama hmô aw,” tah ta. 63Theihthai Beichaipa cha a poh hrie ta, “Leihna hropa khâpa eimâ ngiah khao? 64#Ttn 24.16Khazohpa a reipachhienazie nama thei haw. Kheihta nama pachâ?” tah ta. Ama zydua ta ano cha thie tlâh ta rao ei ta. 65Thokha ta Zisu cha ama pachih ta pachhao ei ta, a hmia pahly ei ta, tu ei ta, a hnohta “Hrohsona bie cha phuah châh chi!” tah ei ta. Vaituhpazy ta amâ chhi pâ ta chabaih ei ta.

Pity ta Zisu â paphasai

(Mat 26.69-75; Lka 22.56-62; Zhn 18.15-18,25-27)

66Pity cha dôhpachhôh tlyhmia liata arulâta a y nota, Theihthai Beichaipa chakaotuhpa laihsazy hry liata pakha a vy ta, 67Pity mei â aihpa hmô ta, moh ta, a hnohta, “Nâ chhao he Nâzari chyhsa Zisu hnohta a ypa kha na châ hra,” tah ta. 68Pity ta a papha ta, “Na reipa cha pahno va na, a yzie pahno va na,” tah ta. Chatawhcha aikah lâ kei pua ta, awh khoh pâ ha ta. 69Chakaotuhpa laihsa ta hmô ta, a kiapâh liata â duahpazy hnohta “He chyhsa he ama hry liata a hlaopa a châ hra,” tah heih ta. 70Châhrasala a papha heih ta. Buakha y ta, a kiapâh ta â duahpazy ta Pity hnohta, “Kâlili chyhsa châ tlôh chi ta, ama hry liata nâ hlao tlai hra,” tah ei ta. 71Châhrasala chhie a sakhâh ta, bie a taih ta, “Cha chyhsa nama reipa cha pahno va na,” tah ta. 72Cha nota awhkhypa cha a einona ta thlai vaw khoh ta. Pity cha Zisu ta a hnohta, “Awh ei no a kho hlâta, ei thôh einâ paphasai aw chi,” a tahpa bie kha a vaw thei ta. Palôh keichheihpa ta cha ta.

Currently Selected:

MÂKA 14: MARVBSI

Highlight

Copy