MÂKA 13
13
Achhyna o raona chhochhieliena
(Mat 24.1-2; Lka 21.5-6)
1Achhyna o tawhta a pua nahta, a pachupazy hry liata pakha ta a hnohta, “Pachutuhpa, moh tua, alôzy nata ozy he a rônah kaw dia!” tah ta. 2Zisu ta a hnohta, “He o rônahpazy he na hmô bao ma cha? Alô pachopazy he parao leipa ta miakha hmahta y aw vei,” tah ta.
Daihti chhâna ngianazy
(Mat 24.3-14; Lka 21.7-19)
3Achhyna o dady ta Ôli tlâh liata â tyu thlâh ha nota, Pity, Zâmie, Zawhâna nata Adaru zy ta arulâta bie hiahri ei ta. 4“Cha hmozy cha khati ta a vaw tlô aw? Cha hmo zydua vaw tlô nawpa daihti ngiana khâpa a y aw? Miah chho teh,” tah ei ta. 5Zisu ta ama hnohta, “Ahy hmahta ama cha dôvei lei nawpa ta a vaih teh u. 6Chyhsa hluhpi ta, ‘Krista ei châ,’ tahpa ta ei moh ta a vy aw ei ta, chyhsa hluhpi ama dôvei aw. 7Adyuhnazy nata adyuhna bie pathâhpazy nama thei tita, nôpopa ta y khuh vy. Chazy cha a vaw tlô awpa rai a châ, châhrasala chhâna la châ mâh vei. 8Phopi nata phopi a dyuh aw ei ta, khinarâh nata khinarâh amâ dyuh aw. Su hluhpi liata alozy a sih aw ta, chakâhnazy a tlô aw. Chazy cha sawzeih pasa athaona a châ.
9 #
Mat 10.17-20; Lka 12.11,12 “Châhrasala a hrohrua teh u. Ryureituhpazy cha patusa aw ei ta, pakhyna ozy liata cha chhei aw ei ta, keima vâta ryureituhpazy nata abeizy hmiakô liata a duah aw ei chi ta, ama hmiakô liata pahnotuhpa châ awpa ta namâ duah aw. 10Thâtihpha cha phopi zydua hnohta chho khai tua awpa a châ. 11Cha patupa ta ama châ chhi tita, khâpa eima reih aw tahpa ta pachâ chhie chhielie khuh vy. A daihtita liata bie vaw tlô aw ta, cha bie cha nama rei awpa a châ. A reihtuhpa cha nâmo châ leipa aw ei chi ta, Thlahpa Pathaihpa tlao a châ aw. 12Thie awpa ta, unawhpa ta a unawhpa patusa aw ta, paw ta a saw patusa aw ta, sawzy ta ama nôpawzy a dyuh aw ei ta, ama pathiesa aw. 13#Mat 10.22Chyhsa zydua ta ei moh vâta ama châ hao aw. Châhrasala achhâna taihta a tao hualuapa cha pachhapa ta a y aw.
Roryhrana pasichhihpa
(Mat 24.15-28; Lka 21.20-24)
14 #
Dân 9.27; 11.31; 12.11 “Châhrasala roryhrana pasichhihpa cha â dua lei nawpa su liata â duapa nama hmô tita, Zudia liata a ypazy cha tlâh lâ a râ mawh ei sy. A reihtuhpa ta a yzie pahno thai mawh sy. 15#Lka 17.31O chô liata a ypa ta o ry lâ chô leipa sala, a o liata hmo la awpa ta a ngia khah sy. 16Lyu liata a ypa ta a poh la awpa ta kua heih khah sy. 17Cha nohzy liata chanô sawphaohpa nata hawsaih a pyh haipazy hupo awpa rimâ cha! 18Cha hmo cha chasipaw nota a vaw tlô lei nawpa ta thlahchhâ teh u. 19#Dân 12.1; Biep 7.14Cha nohzy cha riethei pasana noh châ aw ta, cha tlatlu ta rarôh ypa cha, Khazohpa taopa#13.19 He liata “Taopa” he Krikâh reih ta ktiseos châ ta, a y leipa tawhta paysapa, Khazohpa raihria reina châ deita ta Biehrai Thiehpa ta a hmâpa biesâ a châ. leilô y tua no tawhta tahmâ taihta y beih leipa ta, y heih khao aw vei. 20Abeipa ta cha nohzy cha pachhosa leipa chhochhi sala, chyhsa ahy hmahta pachhapa ta y aw veih ei. Châhrasala chyhsa atlyhpa, a raopazy vâta nohzy cha a pachhohsapa a châ. 21Chyhsa ta nama hnohta, ‘Moh teh u, Mesia cha he liata a y,’ a tah khiahta tlyma, ‘Moh teh u, hao liata a y,’ a tah khiahta tlyma, zo khuh vy. 22Mesia pakheipazy nata hrohso pakheipazy vaw pua aw ei ta, ngiana nata hmonoâhpazy ama tao aw. Tao theipa châ sala, atlyhpazy taih ama dôvei aw. 23Nâmo deikua cha, a vaih teh u, ato ei cha chhochhielie ha ei hih.
Chyhsa Sawchapawpa avyna
(Mat 24.29-31; Lka 21.25-28)
24 #
Isai 13.10; Zôe 2.10,31; 3.15; Biep 6.12;
Isai 13.10; Ezk 32.7 “Cha nohzy liata, riethei pasana a y khai tawhta, noh pazohsapa châ aw ta, thlâpâ khaih khao leipa aw ta, 25#Isai 34.4; Biep 6.13; Zôe 2.10avâ tawhta awhsizy za tla aw ei ta, avâ hmotaotheinazy cha chalyupa a châ aw. 26#Dân 7.13; Biep 1.7Chatawhcha Chyhsa Sawchapawpa cha hmotaotheina nata rônah ngaitapa ta meihdo hry liata â zupa ama hmô aw. 27A vâlyuhchâpazy tuah aw ta, â tlyhpazy cha kaokih miapalih tawhta, alei chy chhâna tawhta avâ chy chhâna taihta a pakhy aw.
Theiku pakhona
(Mat 24.32-35; Lka 21.29-33)
28 “Theiku kô tawhta a chu teh u. A chhyh panyupa kaw paka ta, a hna a vaw thao khiahta cha, nopi â hnia haw tahpa nama pahno. 29Cha hawhna hra chata, chazy a vaw tlôpa nama hmô tita, Chyhsa Sawchapawpa cha a vaw hnia ha ta, chhikao thaby liata a y tahpa pahno teh u. 30Hmeiseihta ta ei cha chho ei, cha hmo zydua a tlô paki khai hlâlei cha, he chhâ he lei aw vei. 31Lei nata vâ a lei aw, ei biezy deikua lei aw vei.
Ahy hmahta a noh nata dawh pahno veih ei
(Mat 24.36-44; Lka 17.26-36)
32 #
Mat 24.36
“Châhrasala cha noh nata dawh cha, Paw dei leipa ta cha, ahy hmahta pahno veih ei. Vârâh liata vâlyuhchâpazy ta pahno leipa ei ta, Sawchapawpa chhao ta pahno vei. 33A daihti vaw tlô nawpa nama pahno leipa vâta, riavaihpa ta y u la, a hrohruapa ta thlahchhâ teh u. 34#Lka 12.36-38Cha daihti vaw tlô nawpa cha, chyhsa ta lâhlapi lâ khitlyh ta, a o a siesaipa cha a chakaotuhpazy ku liata soh ta, ama raihria awpa pie chyu ta, ochhi vaituhpa cha, khâ a hra thlâh ha awpa ta bie a piepa hawhta a châ. 35Chavâta a hrohrua teh u, o hneituhpa vaw tlô nawpa daihti cha, zâlâ ta ma, zâcho ta ma, awhkho ta ma, my ta ma a châ aw tahpa pahno tlôh leipa ei chi ta. 36Chataleipatala eikhapi ta a vy aw ta, namâ mô chhôh ta a cha vaw pachhai pathlei aw ei. 37Nama hnohta ei reipa he chyhsa zydua hnohta a reihpa ei châ: Riavaihpa ta y teh u,” tah ta.
Currently Selected:
MÂKA 13: MARVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
