BOTHUBO 37
37
Joseph Samo
1Jacob ye Canaan yeghi lo pa pu no inami shi achekeu yeghi lo xüache.
2Hipaqo no Jacob tikughuko.
Joseph ye ampe chighitsüni shiuve ke pa ye pa mu noqo gholono ambeloji kheae. Pa ye itimi lakhi shi pa pu nipuqo Bilhah ngo Zilpah nuliqo gholo ae. Eno Joseph no panongu papu vilo pano ghili küsa pive tsüche. 3Israel no pa nu kütami nguno alau Joseph kimiye che, kughengu pa no kitemi shive kethiuno pa punu ke. Pa no alabe jelino chijeboike phi lakhi pa ghenguno mlatsüe. 4Ikemu kughou pa mu noqo no panongu papu ye athiazümi kümtsü nguno alau pa kimiye akeu ithive keno, panongu no pa mithiuve, eno aloqiqhiyi pa pütsa mlave.
5Joseph no asamo lakhi pumo, kughou pa no pa mu noqo vilo pi keno, panongu no alau pa mithiuve. 6Pa no panoqo vilo pi, “Asamo hi I no pumo keu inilo: 7Julo, ningu ye alu lo aghi ghove keu piqhe ae, eno julo, I ghi kipiqhe no müzüchoi puthugho luve. Eno nongu ghi kipiqhe no tipau veho luve no I kipiqhe zülo pishiqhoe.” 8Pa mu noqo no pa vilo pi, “No ye kuchou no ningu shou kani kea? Ikeo no ye kuchou no ni shou ayepeni kea?” Ikehu pa samo eno pa tsa ghenguno panongu no itaghi alaushi pa mithiuve.
9Tithiu pa no asamo kütau pumo eno pa mu noqo vilo tipau pi, “Julo, I no asamo kütau pumoe. Khetsünhe, aqhi eno ayepu chighiqhaqhi no I zülo pishiqhoe.” 10Ikemu kughou pa no tipau pa pu ngo pa mu noqo vilo pi keno, pa pu no lomipi no pa vilo pi, “Nono asamo pumo keu hi ye kiu kea? Ni eno o za ngo o mu noqo ye kuchou no ighi no o zülo ayeghi lo pishiqhoni keshea?” 11Pa mu noqo ye pa ju anheshuve, ikemu pa pu no atsa hipaqo pa mlo lo qhiluve.
Joseph Jepuwuve
12Pa mu noqo ye Shechem phivilo panoqo papu mbeloji achu kümza niye wuve. 13Israel no Joseph vilo pi, “O mu noqo ye Shechem lo ambeloji achu kümza anike kumo? Ighilo, I no panoqo lau o puwuni.” Eno pa no pi, “Ni hile ani.” 14Ikehu pa no pa vilo pi, “Itehi o mu noqo eno ambeloji ye akivi shi ani kemo keno juwulo, eno asütsa I lau süghilo.” Ikehu pa no Hebron Khila lono pa phepuwuve eno pa ye Shechem lo ideighive. 15Timi lakhi no pa no aluza lo itsü cheghi keu ithulu. Timi huno pa vilo pi, “No ye kiu phucheni kea?” 16“Ni ye I mu noqo phu cheni,” ipi pa no pi. “Kimiyeno I vilo pitsülo, panongu ye khileno ambeloji achu kümza ani kea?” 17Timi huno pi, “Panongu ye chevae, kughengu panongu no, ‘Ningu Dothan lo wuveni nolo,’ ipikeu I no chilue.” Ikehu Joseph no pamu noqo pape wuno Dothan lono sholu.
18Panongu no putou no pa ithulu, eno pa no kupunu ighi mphi lono panongu no pa pithive niye küsüqeve. 19Panongu lakhino lakhi vilo pi, “Asamo kupumou hi chenie. 20Itehi ighilo, ningu pa heqhive no aqokutho lakhi lo vesüveni nolo. Tishino tüghashi yiküsa no pa tsüqhivae pi ningu no piveni, eno pa samo ye kishive nani keno nino ju tsüni.” 21Ikemu kughou Reuben no ti chilu keno, pa no panoqo u lono pa xaphe luve no pi, “Ningu pa küxü luve tsümoni.” 22Reuben no panoqo vilo pi, “Aji pele kevilo; yenguyike-a hile aqokutho lo vesüve lo, ikemu pa shou au bekevilo”—tishianguno pa no panoqo u lono xaphepe pa pu lau sachile woniye shike. 23Ikehu kughou Joseph no pa mu noqo lau ighi keno, panongu no paw chijeboike phi, alabe jelino mlakeu, khikhi pa no pepuche keno ti xaluve tsü. 24Panongu no pa küghape aqokutho lo vesüve. Aqokutho ye kümsa eno azü mu kühae.
25Tithiu panongu no chusho nike iqave. Panongu no jupuwo kelo Gilead lono Ishmaelmi aloji lakhi sayeshi lono ata, nukümtshau eno axokütsüngü pesü Egypt lo iqi cheghi. 26Tileno Judah no pa thiküzümi vilo pi, “Ni thiküzüu heqhive no pa ji küsüve keu no kiu ala ani kea? 27Ighilo, ningu Ishmaelmi vilo pa jepuwuveni, ningu u pa shou bemoni, kughengu pa ye ni thiküzüu eno ni shi ni ji ke.” Eno pa thiküzümi no pa tsa inive. 28Tithiu Midianmi lhidimi no katha ighi. Panongu no aqokutho lono Joseph sünhephe eno ghükayi shekel muku no Ishmaelmi vilo jepuwuve. Panongu no Joseph sasü Egypt lo wuve.
29Kughou Reuben no aqokutho lo ideighi no Joseph kühave aghi keu ithi keno, pa no pa kuuphi süxüve, 30eno pa thiküzümi lau ideighi no pi, “Apu kühavae, imaye niu ye khila wuni akea?” 31Tile panongu no Josephw chijeboike phi pesü ane lakhi ghiqhi no aji lono tipau pütsüve. 32Eno panongu no alabe jelino shikeu chijeboike phi pesü panongu papu lau ighi no pi, “Ningu no hi ithulue; kimiyeno hi ye o nuw chijeboike phi kemo keno kimchiju lo.” 33Pa no ti kimchi luve no pi, “Hi ye I nu phiküzüe. Lhoxü yiküsa no pa tsüqhivae. Mtsüqheino Joseph ye sütha pinyivae.” 34Tileno Jacob no pa kuuphi süxüve no yeqhiyephi pa chita lo khapuve eno pa nu ghenguno atsala kutomo mloqae. 35Pa tianuliqo no pa lokughuno tsüniye shi kemu pa no ti milive no pi, “Moe, ni ye mloqasü Kithigha lo I nu lau wuve niae.” Ikehu pa pu no pa ghenguno mloqae. 36Tishi akelo Midianmi no Egypt lo Pharaohw hiyampemi Potiphar, ghukhemi shou kepten lau Joseph jesüve.
Currently Selected:
BOTHUBO 37: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
