BOTHUBO 38
38
Judah ngo Tamar
1Tipa ghuloki lo Judah ye pa thiküzümi qhive no Adullammi lakhi, khuu je Hirah keno pa lau iqive. 2Tilau Judah no Canaanmi lakhi khuu je Shua keno, pa nga ithulu. Pa no li luve no pama kikivive, 3eno li no mishiluve no anu lakhi punu ke pa je Er kuve tsü. 4Li no itaghi mishive no anu lakhi punu, eno li no pa je Onan kutsü. 5Itaghi li no mishive eno anu lakhi punu ke pa je Shelah kutsü. Kughou li no pa punu keno, Judah ye Chezib lo ae.
6Judah no pa nu anoghiu Er ghenguno anipu luve tsü, li je ye Tamar. 7Ikemu Judah nu anoghiu Er ye Ampeu zülo küsakügha shive, eno Ampeu no pa pithive. 8Tithiu Judah no Onan vilo pi, “O mu nipu valuve lo eno li lau angu makho ghi putsülo, eno o mu tikughuko saputhulo.” 9Ikemu Onan no atikughuko ye paw kumo nanie pi ithi ae. Ikehu kugho kughomu pa no pa mu nipu lau wu kelo pa ye aphizü ayeghi lo peleve che, tishianguno pa mu tikughuko tsü moniye ke. 10Pa no kiu shi keno ti ye Ampeu zülo kixikila shive, ikehu Ampeu no pa ghi pithive. 11Tileno Judah no pa mukishiu Tamar vilo pi, “I nu Shelah no kichimi shimoke kutolo o pu kilo chimemi shi ngo aghilo”—kughengu pa ye Shelah ghi pa mu noqo toi thive nani küghashi msave ke. Ikehu Tamar no wuno li papu kilo ngove.
12Ado hami thiu Shua nonga Judah nipu thive. Kughou Judah no alovekughuno luve keno, pa eno Adullammi pa küsau Hirah pama Timnah lo pa mbe mhi tsache kemi lau iqho. 13Kughou Tamar vilo, “O ngu ye Timnah lo pa mbe mhi ghoniye iqho cheni,” ipi keno 14li no chimemi phimini xaqhive agi künhaphi pesü li nhapuve, eno Enaim ikulo lalo iqave, ti ye Timnah laghi küdau ke. Kughengu Shelah ye kichimi shive keu li no ithi ae, ikemu li pelo pa sasü külau pemo kehue. 15Judah no li ithulu kelo, li ye kütüqhalimi lakhi küghashi pa ye kümsüve, kughengu li no agi küzüve ke. 16Pa no alaphe lo li küdau kugho ighi no pi, “Ighilo, I no o sasü kikivini,” kughengu li ye pa mukishiue pi pa ye ithimoe. Li no pi, “O pelo I lau ighilu penike no ye kiu I tsüni kea?” 17Pa no khochile, “I no atsü-aqu loji lono ane lhothe lakhi o tsü puwuni.” Eno li no pi, “Nono tipau tsüpuwu moke kutolo, tsala nono ashoqhi lakhi I tsülu aye—” 18Pa no pi, “Kiu shoqhi o tsüni kea?” Li no khochile, “Ow jedapu nguthi eno o chekha ngo o u lo aqheküsü akeu.” Ikehu pa no tipaqo li tsüve no li sasü kikivive, eno pa vecheo li ye mishiluve. 19Tishino li ye ithu no wuve, eno li no agi künhaphi lhaqhive no chimemi phimini pepuve.
20Kughou Judah no totimi u lono ashoqhi shi püakeu luchile penike Adullammi pa küsau launo aneti tsü puwu keno, pa ye li phumlave. 21Pa no tile timiqo vilo ighiju, “Achineki kütüqhaliu khuu Enaim laghi phivilo acheni keno, li ye khile ani kea?” Panongu no pi, “Achineki kütüqhaliu khumu hile achemoe.” 22Ikehu pa no Judah lau ideighi no pi, “Ni ye li ithumlavae. Tile timi akeqo no pi, ‘Achineki kütüqhaliu khumu hile achemoe.’” 23Judah no khochile, “Li pelo anhemgha liw toi qhiluve pelo, tikumo aye, nikujo junuqhi niae. Julo, ane lhothe hipau I no tsüpuwu kemu nono li phumlave ke.”
24Aqhi küthüa thiu, Judah vilo ishi pi, “O mukishiu Tamar ye küqüvae. Li ye küqüve keu lono mishivae.” Eno Judah no pi, “Li saipeghi lo, eno pitiqhive lo.” 25Li saipe chekelo, li no pangu vilo asütsa tsüpuwu, “Anhemgha hipaqo timi khuuw keno ni ye tipau nga mishi anie.” Eno li no pi, “Kimiyeno jedapu nguthi, achekha, eno aküsü hipaqo ye khuuw keno kimchiju lo.” 26Tile Judah no tipaqo kimchi luve no pi, “Li ye I nguno alau achipiue, kughengu I no I nu Shelah li tsümove ke.” Tithiu pa ye khilemu li lau wu kithe move.
27Kughou li küaküzü do ighive keno, li polo anu kinikishe aghive. 28Eno li no apunu küsü dolo akelo, lakhino au chhopipe, eno hikujuu no ayeho kuhu pesü pa u lo tsüghave tsüno pi, “Hipau no atüghüu shi ipeghi.” 29Ikemu pa no pa u sünhe chile akelono julo, pa thiküzüu no ipeghive. Eno li no pi, “Kishino nou no vexü ipeghive akela!” Tighenguno pa je Perez#38:29 Akiqi ye vexü kuvetsü. 30Ado hami thiu pa thiküzüu ghi ayeho kuhu au lo tsügha pusü ipeghive, eno pa je pesü Zerah kuvetsü.
Currently Selected:
BOTHUBO 38: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
