BOTHUBO 39
39
Joseph ngo Potiphar Nipu
1Joseph ye Egypt lo saiqive, eno Egyptmi lakhi Pharaohw hiyampemi Potiphar, ghukhemi shou kepten, no Ishmaelmi khuu no tilau pa saiqive keno pa launo Joseph qhüluve. 2Ampeu no Joseph gholo ae, eno pa ye tokulu shiuve, pa ye pa mpeu Egyptmi kilo ngove. 3Ampeu no pa gholo akeu eno pa u no mlakeu kümtsü lo tokulu shikeu pa mpeu no ithive. 4Ikehu Joseph ye pa nhethe lo kimiyeqhiyi keu ithuluve eno pa ghini shiche, pa no Joseph pelo pa kibo jukükütsüu shivepe eno pa no pighi akeu kümtsü pa shou kulhuqhive tsü. 5Pa no pa pelo pa kibo eno pa no pighi akeu kümtsü shou jukükütsüu shivepe ke ghuloki lono, Ampeu no Joseph ghenguno Egyptmi kibo hu kümghatsü; Ampeuw kükümgha ye aki lo, aluza lo, eno pa no mla keu kümtsü lo ae. 6Ikehu pa no pighi akeu kümtsü Joseph u lo qhivetsü, eno Joseph ghenguno pa ye achuqupu pa no chuni keu likhino kumo aye kiumu mlo move.
Joseph ye aju akoghe alokemi. 7Ado hami thiu pa mpeu nipu no Joseph ju alove no pi, “I sasü zülo.” 8Ikemu pa no milive no pa mpeu nipu vilo pi, “Julo, I ghenguno I mpeu ye akibo lo kiu vehumu mlomo no ani, eno pa no pighi akeu kümtsü Iw jukükütsü qholo qhive tsüae. 9Akibo hipau lo I nguno alau kije kühae, momu pa ye o likhi kumo aye kütau kiumu I launo süchileve moe, kughengu no ye pa nipu ke. Tishi aye kishino küsakügha kije eno axine hipau ni ye Alhou hebide ghi shini kea?” 10Tsalakipe li no Joseph pütsa kemu pa no li gholo züni keu momu li gholo ngoni keu ini tsümoe.
11Ikemu ghulo lakhi aki lo kiptimi khumu ngomono akelono pa ye pa kümla shiniye aki lo ighi, 12li no pa phiküzü tsüqü luve no pi, “I sasü zülo.” Ikemu pa no pa phiküzü li u lo xaqhive tsüno aki khalau poipeve. 13Pa no aphiküzü li u lo xaqhive no aki lono ipeve keu li no ithulu kemtsa, 14li no aki lo kiptimiqo kuno panoqo vilo pi, “Julo, ningu thogha niye I kimi no Hebrewmi ni gholo saghie. Pa no I sasü züniye iloghi, eno I no asütsa kuloghi lono ighae. 15I no I sütsa süqhe no ighakeu pa no chilu khavi pa ye pa phiküzü I phivilo qhive no aki khalau poipeve.” 16Tishino li no pa mpeu ighi moke kutolo pa phiküzü qhiluve, 17eno li no pa vilo atsa athoshi pi, “Hebrewmi aqemi, khuu nono ni gholo saghi keno, I thogha niye I lau ighi. 18Ikemu I no I sütsa süqhe no igha kemtsa, pa no pa phiküzü I phivilo qhive no aki khalau poipeve.”
19Anipu no pa vilo “O qeu no hitoi I peithake,” ipikeu pa mpeu no chilu khavi pa mlo shikighideve. 20Eno Joseph mpeu no pa küghaluve no akughuki, khipa-a lo akükau kughumi khatha cheni keno tile pa khathave, eno pa ye tile akughuki lo ngove. 21Ikemu Ampeu no Joseph gholo ae eno Paw iqemokeu kikimiye pa piye eno akughu kheu nhethe lo pa kimiyeqhiyi ithulu pe. 22Akughu kheu no Joseph pesü akughumi khunoqo akughuki lo akeno kümtsü shou ghatou shivepe. Kiu kiumu tile shikeu ye pa vecheo shie. 23Joseph no ghatou shikeu vehu lo akughu kheu ye kiumu alomsü moe, kughengu Ampeu no pa gholo ake. Eno pa no kiu shi keno kümtsü lo Ampeu no tokulu shilupe ke.
Currently Selected:
BOTHUBO 39: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
