LUKASI 13
13
iMuhimu ɗe ya mutru uendra toɓa
1Wakati ɗe uwo ule, ɓaãdhwi ya watru waka v̄ale, wamutolea hadisi Insa itrongo yaka yapara Magalilaya Ɓilatusa aka atsanganisa idamu yawo na idamu ya masadaka wakoyatoa. 2Awadjiɓu: «Hali musufikiri amba Magalilaya wao, waka maãswifu maɓole raha na piya Magalilaya waɓaki, ha iv̄o waondesheha namuna iyo? 3Tsi jau, nisumuambiani. Ɓadi neka kamwandra toɓa, mutsoangamia piyanyu wajau. 4Au, watru kumi na wanane wale umunara wa Siloamu wawaãmidza, wawaula, musufikiri amba waka wakoso raha na piya wakazi wasalia wa Yerusalemu? 5Tsi jau, nisumuambiani. Ɓadi neka kamwandra toɓa, mutsoangamia piyanyu wajau.»
Mufano wa muri kaudza
6Atowo tsena mufano unu: «V̄uka mutru akana mufigiye#13:6 mufigiye: Uwo aina ya muri udzao mbia ziliona ngizi zijiv̄ao. Shifarantsa muri uwo uhiriwa «figuier», na mbia zawo «figue». Namusome tsena yamaeledzo ju la mufigiye hari mwa zikandre za mwiso za ishio ini. wataɓilwa hari mwa shamba la mizaɓiɓu lahe. Suku aja, akotsaha mbia, ɓadi kapara ata moja. 7Ɓas, aambia mulimizi mizaɓiɓu aka v̄ale: ‹Unu mwaha wa raru rangu nijao na utsaha mbia za mufigiye unu, wala tsisupara; ukatre; mana trini utsorumiao ishiv̄andre ya tsi ɓure?›
8Sa ile mulimizi ule amuambia: ‹Mutukufu, ulishe tsena mwaha unu. Nitsoutsimbia piya wangoni, niutriliye shitru ihodarishao#13:8 shitru ihodarishao: Shifarantsa isurongoa fumier. 9Laɓuda mbeli v̄av̄o utsodza; neka tsi namuna iyo, utsojua uukatre.› »
Insa asuzihira mutrumama aka av̄ereha
10V̄uka Suku ya Uv̄umuzi, Insa akosomedza moni mwa Nyumba ya Uswali. 11Na moni v̄ale v̄uka mutrumushe akana djini laka lamuhetsi muwaɗe, muda wa maha kumi na minane. Aka av̄ereha ata kakoshindra ata hata adziondzoa. 12Wakati Insa amuona, amuhiri, amuambia: «Mama, uɓuliwa hari mwa shifeli yaho iyo.» 13Amukadza yimihono, na sa ɗe wiyo ile aondzoha, amutukuza Mungu.
14Ɓadi dhwamana wa iNyumba ya Uswali ile atukiwa na itrongo ya Insa uzihira iSuku ya Uv̄umuzi. Aambia idunia yaka v̄ale: «V̄wa suku sita amba za ufanya hazi. Ɓasi namuje suku zizo muzihiriwe, ɓadi tsi ɗe iSuku ya Uv̄umuzi.»
15Ɓadi Raɓi amudjiɓu: «Wanyu wanafiki! Hali kula moja mengoni mwanyu iSuku ya Uv̄umuzi, waye kaɓulia inyombe yahe au ipundra yahe valani, andra inosa? 16Na mutrumama unu alio shilembwe ya Iɓrahima, aka afungwa na Shetwani muda wa maha kumi na minane, kayaka yalazimu aɓuliwa hari mwa shifungo ini Suku ya Uv̄umuzi?»
17Wakati akorongoa trongo zile, piya wale waka kinyume na waye waka waja haya; na idunia yaka v̄ale yakofurahi na piya trongo ndzitukufu zile akozifanya.
Mufano wa mbia titi rahana zititi
(Mat 13:31-32; Mar 4:30-32)
18Insa arongoa raha: «Utawalizi wa Mungu, uwo ufana na trini? Nitsojua niufanise na trini? 19Uwo ufana na mbia titi#13:19 mbia titi: iShigiriki v̄anu isurongoa aina ya mbia titi raha na zititi. Shifarantsa iyo uhiriwa moutarde. rahana zititi mutru airenga, aitsanya shambani hahe. Mwana mbia ule ameye, afanyiha koho la muri, na zinyunyi za hawani zifanya makazi marahini hawo.»
Mufano wa lalive
(Mat 13:33)
20Insa arongoa tsena: «Utawalizi wa Mungu, nitsoufanisa na trini? 21Uwo ufana na lalive mutrumama airenga, aitria hari mwa ziv̄imo traru#13:21 ziv̄imo traru: Yaãni, mukaɓala wa kilo shirini na tsano. za ngano, pare piya umuhare ule ufumuhe.»
Mufano wa mulongo mutsala
(Mat 7:13-14; 7:21-23)
22Insa uendrelea yahe na musafara wahe uendra Yerusalemu, akov̄iria malago maɓole na matiti, na usomedza. 23Ɓasi v̄wa mutru amudzisa: «Raɓi, amba watru washashi ɗe watsohuyiwao?»
Adjiɓu: 24«Namufanye djitihadi ya ungia ha uv̄ira hari mwa umulongo mutsala, mana nisumuambiani, wengi watsodjereɓu ungia, ne kawatsoshindra. 25Wakati itsokao amba monyewe inyumba ahimi, aɓala umulongo, wanyu mulio v̄ondze mutsoandrisa urema umulongo na urongoa: ‹Mutukufu, tafadali riɓuliye.›
Ɓadi atsomudjiɓuni: ‹Wami tsisumujuani v̄ahali mwala.›
26Wakati uwo mutsoandrisa urongoa: ‹Rakoɗya na unwa v̄umoja na wawe, na wawe wakosomedza mav̄areni hatru!›
27Na waye atsomuambiani: ‹Tsiji v̄ahali mwala, namunilawiye v̄anu, wanyu piyanyu marendra-mbovu!›
28V̄av̄o ɗe v̄utsokao zililo na uv̄uhura manyo, wakati mutsomuonao Iɓrahima, Isiaka, Yaãkuɓu, na piya yimitrume hari mwa Utawalizi wa Mungu, na wanyu mutsovutswao v̄ondze. 29Watru watsolawa jua la uhea na la utswa, kiɓulani na swihilini, amwesa watsorenga maɓandza moni na Utawalizi wa Mungu. 30Na v̄wa wasalia walio wa mwiso leo, watsoka wa handra meso; na v̄wa walio wa handra leo, watsoka wa mwiso meso.»
Insa asulilia iYerusalemu
(Mat 23:37-39)
31Wakati ule kamwe v̄wa ɓaãdhwi ya watru wa ishama ya Mafarisayo waja wamuambia: «Endra dzaho, ulawe v̄anu, mana Hirudu asutsaha ahuule.»
32Ɓadi awadjiɓu: «Namwendre mwamuambiye mudjandja uwo: ‹Tsami nisutoa mazetwani na utsimidza mazihiro leo na meso, na isuku ya raru, nitsomalidza.› 33Ɓadi inilazimu nike hari mwa mwendro leo, meso, na isuku yaɗunga, mana tsi trongo muparihana amba mutrume aangamiye v̄ahanu v̄wangina neka tsi ɗe Yerusalemu.
34Yerusalemu, wawe Yerusalemu uulao yimitrume na uangamidza ha mawe wao wav̄eleshewawo! Ha mara ngav̄i natsaha ningulidze watru waho mauri kuhu ingulidzao wana wahe moni na maɓawa yahe, wala kamwakuɓali! 35Ɓasi tsiyo, usuja uɓaushiwe inyumba yaho. Ɓadi nisumuambiani, kamutsoniona tsena ata mupaka ɗe uwakati mutsorongoao: ‹Naɓarikishihe uwo ajao ha lidzina la Mola.› »
Currently Selected:
LUKASI 13: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
