Matɨyo 27

Orɨn̰ge dan̰ Jesu tumoy Piladɨ

(Marg 15:1-2; Lug 22:66; 23:1; Ja̰ 18:28)

1Dan̰ te jogɗu cururu na, ka-cay ka-bɔgɛ kɨbar nɔm bɨ, ka-muɗɔlɛ ga da Jubɨn̰əŋ bɨ, wayge gusɨge gɨ ni gɨse kɔl tɨmaydi Jesu. 2Kan saɗɨdiige bɨ orɨn̰ge danayi, dobiige kobɨ Piladɨ ba-kɨbɨ kɨlma gɨ gumu.

Judasɨ dɨɗɨ gusi

3Judasɨ ba-aye cayi Jesu le, kɨɗɨn̰ ga ban sol gɨ kɔl ƴom cayi Jesu ɨni na, bii ɨrɨme tɔgɨ lee gɨ ban say jogɨn̰ dan̰ sɨle di ni arja̰ di tɔɔ-sɨbɨ le daa bɨn̰ ka-cay ka-bɔgɛ kɨbar bɨ, ka-muɗɔlɛ ga da Jubɨn̰əŋ bɨ. 4Yen̰ hɨn̰: «Ɨŋ lee ɨsɨna, kɨya gɨ ɨŋ ay cay ungo gɨ dan̰ naji toy dobii kobɨ kalaŋ ɗe na diɗiige.» Ama kan dɨbiige cay nee yeyige hɨn̰: «Ni-gandi na dɨlani naŋ! Na kɔl kon̰!» 5Judasɨ bee sɨle di ni arja̰ le coŋ duroy ƴaa-di-da-Kumu dɨŋ bɨ, andaŋ or dɨbe gangɨ dɨɗɨn̰ gusi coŋ. 6Ka-cay ka-bɔgɛ kɨbar donge gursu le bɨ yege hɨn̰: «Gasɨn̰-kɔl nar bɔgɛ gursu di hɨn̰ wo̰ le kɨɗɨn̰ game gursu ga duroy ƴaa-di-da-Kumu dɨŋ coŋ, kɨya wa na gursu di ni kɨbar.» 7Kan wayge gusɨge bɨ orge kɨle yage gɨ da ba-gaɗe ɨmbɨlɨn̰ kɨya ɨmgɨn̰ge kɨrge. 8Na toy di hɨn̰ wo̰ ma, bɨrɨŋ gɨsɨn̰ haw kɛ kalɨn̰ ma teege yage gɨ nee le, naa yage kɨbar. 9Na toy di hɨn̰ wo̰ ma, kɔl gɨ ba-yɔɔ-kɔl-gɨ-Kumu-ba-yɔɔ Jeremi ba ye le or kɨɗɨn̰di gaŋ, ban ye tumɔ ye hɨn̰: «Kan ƴeege sɨle di ni arja̰ tɔɔ-sɨbɨ. Na kɨledi ungo gɨ te wɨn̰je gɨ da Ɨsɨrayɛl gɨ bugoŋge cay nee, gɨ ni bɔyɛ se cayi le. 10Dan̰ gursu di nee le, kan kɨlɨn̰ge yage gɨ da ba gaɗe ɨmbɨlɨn̰ hɨn̰ gɨ Ba-gulɔŋ ba ayɨn̰ te tumoyi bəŋ koldi le.»#27:10 Ayge na duroy: Zacharie 11:12-13; Jérémie 32:6-15.

Piladɨ ɨngɨrɨn̰ Jesu kɔl

(Marg 15:2-5; Lug 23:2-5,9-10; Ja̰ 18:29-38)

11Orɨn̰ge dan̰ Jesu tumoy ba-kɨbɨ kɨlma gɨ gumu. Ɨni na, ban ɨngɨrii ye hɨn̰: «Kɛ, ji na kɨlma gɨ da Jubɨn̰əŋ ga?» Ɨni na, Jesu dɨbii cay nee yeyi hɨn̰: «Na ji-bandi ba yɔ dan̰ kɨbɨn̰ han̰.» 12Ama kɨɗɨn̰ ga ka-cay ka-bɔgɛ kɨbar bɨ, ka-muɗɔlɛ ga da Jubɨn̰əŋ bɨ, poyge kɔl si cayi ɨni na, ban dɨbɨge kɔl wo̰ cay nee naŋ. 13Kɨɗɨn̰ ga nee le Piladɨ ba-kɨbɨ kɨlma gɨ gumu yeyi hɨn̰: «Kɛ, kɔl gɨ kalaŋ nɔm poyge sige can̰ kɛ le, ji ja naŋ ga?» 14Ama a cay kɔl gɨ kan ba poyge sige cayi le, Jesu dɨbii kɔl pɨna wo̰ cay nee naŋ bɨrɨŋ. Lee gɨ kɔl kay ba-kɨbɨ kɨlma gɨ gumu le gɨɗaŋ.

Bɔyɛ kɔl tɨma cay Jesu

(Marg 15:2-6-14; Lug 23:13-23; Ja̰ 18:39-40)

15Dan̰ wɔlɛ gɨ ni kɨdɨrɛ gɨ da Pakɨ gɨ da Jubɨn̰əŋ nɔm na, ba-kɨbɨ kɨlma gɨ gumu orɨn̰ dan̰ hada di ni dɨbe ba-dangay gɨ kalaŋ geyige pɨna daa, kɨya cay kɨdɨrɛ gɨ ni Pakɨ. 16Ɨni na, boy wɔlɛdi gɨ nee le ba-dangay gɨ pɨna wo̰ gɨ gusondi ye tɔgɨ woy nee, gusondi na Jesu Barabas. 17Kɨɗɨn̰ ga kalaŋ dayaŋge ɨni na, Piladɨ ɨngɨrge hɨn̰: «Kɛ na waŋ magɨŋ gey gɨ ɨŋ na dɨbii daa bɨgɨŋ ga? Barabas wala Jesu gɨ kan teeyige Kɨris ban gɨ Kumu dorii le ga?» 18Piladɨ yege kɔl gɨ nee le, na kɨya gɨ ban sol gɨ na cɨn̰-pɨɗɨma ba lɔɔ gɨ ka-cay ka-bɔgɛ kɨbar ayɨn̰ge cay Jesu bii. 19Kɨɗɨn̰ ga Piladɨ som a kɨɗɨn̰ bɔyɛ kɔl gɨŋ na, tamdi gɨygɨ yeyi hɨn̰: «Ɗɔɔ ba dɔbɛ gusɨn̰ a duroy kɔl gɨ da ungo gɨ dan̰ durɔ ɗɨngar gɨ nee gɨŋ le naŋ. Kɨya wa labɨde mɨrɨn̰tɨn̰i ləŋ duroy sɔndɛ gɨŋ tɔgɨ kol cayi.» 20Ka-cay ka-bɔgɛ kɨbar bɨ, ka-muɗɔlɛ ga da Jubɨn̰əŋ bɨ, gosɨrge dɨmdɨrdi kalaŋ ɗe na ɨngɨrge gɨ kan na ɗa Barabas daa, ama na dɨɗɨge Jesu. 21Ba-kɨbɨ kɨlma gɨ gumu jɨga ay kɔl coŋ ɨngɨrge yege hɨn̰: «Duroy kalaŋ ga sɔɔ ga kɛ le, kɛ kɨŋ gey gɨ ɨŋ na dɨra naa waŋ dɨbii daa bɨgɨŋ ga?» Kan dɨbiige cay nee yege hɨn̰: «Barabas.» 22Piladɨ jɨga ɨngɨrge yege hɨn̰: «Ma Jesu gɨ kan teeyige Kɨris ban gɨ Kumu dorii le, ɨŋ laayi na wa bɨ ga?» Kan nɔm dɨbiige cay nee yeyige hɨn̰: «Dɨɗii a cay sɨya-gɨ-dagɨli gɨŋ.» 23Piladɨ ɨngɨrge yege hɨn̰: «Hɨnga ga ɨsɨni ga ban ba lee le, na wa ga?» Ama kan wɨlalge dan̰ togɨyge yen̰ge hɨn̰: «Dɨɗii a cay sɨya-gɨ-dagɨli gɨŋ.» 24Kɨɗɨn̰ ga Piladɨ sol gɨ kɔl koyi na andaŋ hɨnga bii naŋ, ama kalaŋ geyge dɨbe do̰ ɨni na, ban ay kaŋ bɨ pɨlɨn̰ kobi cɨn̰ dɨmdɨrdi kalaŋ bɨ, ye hɨn̰: «Kɨbardi ungo gɨ nee le gɨ bɔɔ canɨ naŋ. Na kɔl kogɨŋ kɨŋ-gandi hagɨŋ!» 25Ɨni na, dɨmdɨrdi kalaŋ le jɨgage dɨbiige cay nee yeyige hɨn̰: «Ɗa ɗe kɨbardi ƴom cayni bɨ, ƴom cay karɨndɨni bɨ!» 26Kɨɗɨn̰ ga nee le, Piladɨ dor Barabas dɨbii daa bɨge bɨ, ɗe gɨ somdege Jesu dan̰ bɨraw bɨ ban dobii kobɨ kalaŋ, ɗe na gagɨliige a cay sɨya-gɨ-dagɨli gɨŋ.

Asɨgarn̰əŋ sogɨge Jesu

(Marg 15:16-20; Lug 23:11; Ja̰ 19:2-3)

27Asɨgar ga da Piladɨ tolge Jesu orɨn̰ge danayi kɨɗɨn̰ bɔyɛ kɔl gɨ da ba-kɨbɨ kɨlma gɨ gumu gɨŋ, bɨ dayge te asɨgarn̰əŋ nɔm a cayi. 28Kan torge badɨge kayi ga cay kamdɨge gaŋ gusi coŋ bɨ, dobiige badɨge ga yɨle gusi. 29Bɨ kan gaɗɨge jagɨwa-tɨrɨmbala ga ni gɨsɨm dobiige cayi bɨ, dobiige kɨlɛŋ kobi hɨn̰ jor gɨ ni tɨrɨmbala kobi gɨ bara gɨŋ bɨ. Poyge gɨbayge dugo tumoyi, sogiige yeyige hɨn̰: «Lapɨya ton̰, kɨlma gɨ da Jubɨn̰əŋ!»

30Kan tɨbiige kale gusi bɨ, ayge kɨlɛŋ le den̰ge cayi bɨ. 31Kɨɗɨn̰ ga kan sogiige hɨn̰ wo̰ coŋ ɨni na, kan dorge badɨge ga ni cay kamdɨge ga yɨle le gusi coŋ bɨ, jogɨge tobiige badɨge kayi gusi ban̰di nee. Kardi nee ɨni na, orɨn̰ge danayi kɨya gagɨliige a cay sɨya-gɨ-dagɨli gɨŋ.

Gagɨlge Jesu a cay sɨya-gɨ-dagɨli gɨŋ

(Marg 15:21-32; Lug 23:26-43; Ja̰ 19:16-24)

32Kan andaŋge orɨn̰ge danayi a kardi cay ƴaa-di-gumu dɨŋ ɨni na, kan wayge ungo gɨ pɨna wo̰ gɨ teeyige Simo, ban na ungo gɨ kan wooyge a cay ƴaa-di-gumu di Sirɛn dɨŋ. Kan usboŋge danayi bɨ ƴomiige dan̰ dɔnɔ gɨ ban na aya sɨya-gɨ-dagɨli gɨ da Jesu. 33Kan bugoŋge a kɨɗɨn̰ ga kan teegege Golgota, duroy na kɨɗɨn̰ ga ni Isi-ca. 34Ɨni na, bɨn̰ge Jesu cɛrɛ di suru gɨ polɨn̰ge dan̰ hɨnga ga ɗan̰i#27:34 Tumɔ na, na gasɨɗe ga kan bɨn̰ge ungo ɗe kɨɗɨn̰ ga kan kɨya gagɨliige na gusi na laayi tɔgɨ naŋ. bii ɗe na si. Kɨɗɨn̰ ga ban ɨlbɨ sol ɨni na, ban kan̰ sɔ coŋ. 35Kɨɗɨn̰ ga kan gagɨliige a cay sɨya-gɨ-dagɨli gɨŋ coŋ ɨni na, asɨgarn̰əŋ lobɨge badɨge kayi gosɨnɨn̰ge gusɨge dan̰ te gɨyəŋ gɨ da jɨbe ɓɛlɛ. 36Kardi nee ɨni na, kan somge dugo kɨbi kɨya gamɨn̰ kɨbi. 37Ɗe kalaŋ na solɨn̰ te kɔl gɨ kan ba dɨɗɨn̰ Jesu na, kan walge kɔl boy sɨya gɨ habɨli gɨŋ dege cay sɨya-gɨ-dagɨli gɨŋ a cayi daa yege hɨn̰: «Ungo gɨ kɛ le na Jesu, kɨlma gɨ da Jubɨn̰əŋ.» 38Gagɨldege ka-kuduroy-ɨndɨwa won̰ge sɔɔ a cay sɨya-gɨ-dagɨli gɨŋ kɨway Jesu. Pɨna a cay kobi gɨ bara gɨŋ bɨ, pɨna a cay kobi gɨ masa gɨŋ bɨ.

39Kalaŋ ga gorge te gɨyəŋ gɨŋ yagɨdiige bɨ, teege cayge nɨngɨm nɨngɨm yen̰ge hɨn̰: «Hɨn̰ wo̰ le kɔ an̰ sol.» 40Yen̰ge hɨn̰: «Ji gɨ ba male dɔsɛ ƴaa-di-da-Kumu coŋ bɨ jɔgɛ gaɗe daa duroy wɔlɛ sɨbɨ le, pɨɗa gusɨn̰ kon̰. Hɨn̰ gɨ ji naa Kurɨn̰-Kumu na, gɨsɨn a cay sɨya-gɨ-dagɨli gɨŋ dugo.» 41Ka-gɨlɨn̰ kalaŋ gasɨn̰-kɔl gɨ da Moyis bɨ, ka-muɗɔlɛ ga da Jubɨn̰əŋ bɨ, ka-cay ka-bɔgɛ kɨbar bɨ kalɨn̰ ma, sogiige yeyige hɨn̰: 42«Ban poɗɨ kalaŋ ga ɗaŋ ma ɓala pɔɗɛ gusi koyi naŋ! Ban na kɨlma gɨ da kalaŋ ga Ɨsɨrayɛl naŋ ga? Ɗa ɗe ban gɨsɨn dugo a cay sɨya-gɨ-dagɨli gɨŋ haw kɛ ɗe ani been̰ kuduroyni cayi. 43Ban bee kuduroy a cay Kumu cɔb cɔb bɨ ye hɨn̰: “Ɨŋ na Kurɨn̰-Kumu le!” Hɨn̰ gɨ Kumu na geyii na, ɗa ɗe dorii kobɨ tɨma dɨŋ haw kɛ.» 44Ka-kuduroy ɨndɨwa ga kan gagɨldɨge a cay sɨya-gɨ-dagɨli gɨŋ kɨwayi le kalɨn̰ ma, yagɨdiige hɨn̰ wo̰ bɨ.

Jesu ma

(Marg 15:33-39; Lug 23:44-48; Ja̰ 19:28-30)

45Dan̰ duroy tɨwa di ɨni ɗɨrɨj na, kɨɗɨn̰ buyoŋ ɨndi tɨlɨm. Lee gɨ dɨlɨm ƴee cay gɨsəŋ nɔm bɨrɨŋ gɨsɨn̰ tɨwa sɨbɨ di ni borundo. 46Bugoŋ jɨn̰ tɨwa sɨbɨ di ni borundo ɨni na, Jesu wɨlal dan̰ tumoyi di daa pəŋ ye hɨn̰: «Eli, Eli, lama sabaktani»#27:46 Ayge na duroy: Psaumes 22:2. duroy na «Kumu hɨnge, Kumu hɨnge, ji ɗəŋ coŋ na kɨya wa ga?» 47Kalaŋ ga pɨna duroy kalaŋ ga ɨrege kɨɗɨn̰ ga nee gaŋ le jege hɨn̰ wo̰ na, kan yege hɨn̰: «Ban te na Eli!» 48Ɨni na, kɔl gɨ kɨbɨna kɛ bɨ, ungo gɨ pɨna wo̰ duroyge gɨre or aye hɨnga ga gɨlɨn̰ hɨn̰ ja̰a̰ wo̰, dɔbɛ duroy cɛrɛ di suru gɨ dasi gɨŋ, saɗɨ kɨbɨ kɨlɛŋ gɨŋ bɨ si kɨbɨ Jesu ɗe na ƴɨbe. 49Kalaŋ ga ɗaŋ yege hɨn̰: «Dagɨŋ jaŋ ana solgɨŋ kɛ Eli le kɨya caga poɗii hayi ga?» 50Ama Jesu wɨlal dan̰ togii ɗaŋ coŋ bɨ, hɨmbɨn̰. 51Bɨ ga ma badɨge ga kan bon̰ge te kɨɗɨn̰ ga woy dan̰ cɨndɨge a duroy ƴaa-di-da-Kumu dɨŋ le,#27:51 Sɨlagɨŋ: Exode 26:31-33. sagaŋ duroy nee pɨraŋ kɨɗɨn̰ sɔɔ, daa bɨrɨŋ andaŋ dugo. Cay gɨsəŋ yɨbagdaŋ den̰ den̰ bɨ, garman̰əŋ kaydaŋ bɨ. 52Kamɨn̰aŋn̰əŋ kaydaŋ bɨ, kalaŋ ga da Kumu ga mage le, kondɨ boyge lɨbɨ bɨ. 53Kardi bɔyɛ lɨbe gɨ da Jesu na, kan andaŋge boy kamɨn̰aŋ gaŋ doŋ andɨn̰ge a Jerusalɛm cay ƴaa-di-gumu di woy dan̰ cɨndo dɨŋ, lee gɨ kalaŋ kondɨ solgege. 54Gumu gɨ da asɨgar gɨ da kalaŋ ga Rɔm bɨ, asɨgarn̰əŋ ga gamge kɨbɨ Jesu danayi bɨ le, solge cay gɨsəŋ ga sayde den̰ den̰ bɨ, hɨnga ga lee gusɨge bɨ na, hundɔrɔ leege gɨɗaŋ bɨ yege hɨn̰: «Ban gɨ kɛ le, na Kurɨn̰-Kumu leen̰ cɨndi.»

55Kandɨ kondɨ ɨrege nee sɛdɨ lam solge hɨnga ga ba lee gusɨge le. Kandɨ ga nee le na ga tumɔ ayge te kɔbɛ kardi Jesu na a cay gɨsəŋ ga Galile gaŋ, gorge danayi leen̰ge gɨye bii. 56Mari di cay gulondo na Magɨdala bɨ, Mari da Jag dan̰ Jɨsɛb ƴoyge bɨ, karɨn̰ Jebede ƴoyge bɨ woyge duroy kandɨ ga nee le.

Ɨmgege Jesu

(Marg 15:40-47; Lug 23:49-56; Ja̰ 19:38-42)

57Pa dɨm ma tɨwa kɨya ɗɔbɛ ƴee na, gɨlmi ba-wɔɔ hɨnga gɨ pɨna wo̰ gɨ teeyige Jɨsɛb ban na ungo gɨ a cay ƴaa-di-gumu di Arimate dɨŋ bugoŋ. Ban na ba-aye-cay-tɨbay Jesu bɨ. 58Ban or wan̰ Piladɨ bɨ ɨngɨrii gɨ ban na bii gundi Jesu. Ɨni na, Piladɨ ay noyi gɨ kan na biige. 59Jɨsɛb ay gundi Jesu, nongɨrdii cab cab daa dan̰a bagɨda gɨ hɨrɨwa gɨ bɛrɛ tɨrɨjɨ. 60Jɨsɛb orɨn̰ dan̰ umboŋ kamɨn̰aŋ ga hɨrɨwa ga kan hɨrɨmge gasɨbi garma gɨŋ kol cay gusi koyi. Ban orɨn̰ dan̰ gundi Jesu dɨbe nee. Kardi nee ɨni na, ban nɨngɨle garma gɨ gumu ɗe kɨbɨ umboŋ kamɨn̰aŋ gaŋ le lɨgɨn̰ kɨbɨge daa, bɨ ɗen̰ gusi or. 61Mari di cay gulondo na Magɨdala bɨ, Mari di ɗaŋ bɨ, ɨrege nee, kan somge dugo bɨlege cɨndɨge bɨn̰ kamɨn̰aŋ le.

Gamge kɨbɨ kamɨn̰aŋ

62Kardi wɔlɛ gɨ ni ƴomɨn̰ cay tɨbay kɨdɨrɛ gɨ ni Pakɨ gɨ da Jubɨn̰əŋ na, ka-cay ka-bɔgɛ kɨbar bɨ, Parɨsɨn̰an̰əŋ bɨ, orge pɨna nɔm gusi Piladɨ. 63Bɨ yeyige hɨn̰: «Ba-gulɔŋ, kuduroyni hɨn a cay kɔl gɨ ba nare kalaŋ gɨ kɛ gɨ nee le ye, kɨɗɨn̰ ga ban ban̰ dan̰ cɨndi ƴee le. Ban ye hɨn̰: “Wɔlɛ sɔɔ, sɨbɨdi bɨ na, ɨŋ kɨya bɔyɛ lɨbe.”» 64Na toy di hɨn̰ wo̰ ma aya noy bɨn̰ asɨgar kan̰ ɗe gamge kɨbɨ kamɨn̰aŋ kuɗa bɨrɨŋ gɨsɨn̰ wɔlɛ sɨbɨdi gɨŋ, ɗe ka-aye-cay-tɨbayi hasɨn̰ge gundi naŋ bɨ, yon̰ge kalaŋ ban na boy lɨbɨ duroy kalaŋ ga madɨrdaŋ gaŋ naŋ bɨ. Kan na laa hɨn̰ wo̰ na, poy di cay sɔɔdo kɨya bɨle osɨwa ɗɨn̰ poy di cay wase. 65Piladɨ yege hɨn̰: «Ka-game kɨɗɨn̰ kagɨŋ woyge nee. Ayage gɨŋ bɨ, ɗage ɗi gamge kɨbɨ kamɨn̰aŋ le kuɗa, hɨn̰ gɨ kɨŋ geyɨn̰ wo̰» 66Kan orge lɨge kɨbɨ kamɨn̰aŋ le daa kuɗa bɨ sɨlɨn̰ge kɨbɨge kɨrɛɗ kɨrɛɗ daa bɨ ɗege ka-game kɨɗɨn̰ ga da Jubɨn̰əŋ kɨbɨ nee.

Currently Selected:

Matɨyo 27: gab

Highlight

Copy