Ruuka 1

Insonga ya okukaama ekitabho kinu

1Awe Tewofiro owa ekibharo, abhaanu bhaafu bheekomeesiishe okukaama amangʼana ganu ꞉gaakorekere ewaasu enu. 2꞉Bhaakaamire rwa kutyo ꞉kyatondeeywe na abhaanu bhanu ꞉bheeroreeye amangʼana gayo okusooka ku-bhwambiro bhwa emirimu gya Yeesu mu-kyaro anu, abhaanu bhayo ni bhanu ꞉bhaariga mbaraasha amangʼana ga Yeesu. 3Anye noone naamarire okubhuusirisha kujomu kutyo ꞉gaakorekere okusooka ku-bhwambiro, kyakora naarora ati, ni kujomu nikukaamire obhwima bhwago, 4insonga ubhe na ekimari kya amangʼana ganu ꞉woonguuywe.

Obhuragi bhwa okwibhurwa kwa Yowana Omubhatiisha

5Bhunu Yerode Omukuru#1:5a Yerode Omukuru. Ringira riingʼana rinu mu-Mangʼana Amakomeeye. ꞉aariga ari mukama wa Ebhuyawudi, ꞉aariga ariwo omushengesi#1:5b Omushengesi. Ringira riingʼana Abhashengesi mu-Mangʼana Amakomeeye. wumwi, riisiina ryaye ˆnaatogwa Jaakariya, owa mw-ikemba rya omushengesi Abhiya.#1:5c Abhiya. ꞉Aariga ari mushengesi wa kara, ku-kabhaga ka Iimuuma ya Kara. Mukaaye ꞉aariga ˆnaatogwa Jaabheeti. Bhoone kutyo ꞉bhaariga bhari bha mu-ruganda rwa omushengesi Aruuna. 6Abhabhiri bhayo ꞉bhaariga bhari bharengeresi mu-meeso ga Raatabhugenyi Nyamuwanga, na ꞉bhaariga mbaseeta ebhiraagiro bhyaye bhyone kutyo, na gintungwa gyaye, bhatakugiyabha. 7꞉Bhaariga bhatari na mwana, kwa okubha Jaabheeti ꞉aariga ari mugumba, na ꞉bhaariga bhakokooye muno.

8Rusuku rumwi, mu-nsiku gya riikemba rya Jaakariya okukora emirimu gya obhushengesi mw-iyekaru#1:8 Mw-iyekaru. Ringira riingʼana Riiyekaru mu-Mangʼana Amakomeeye. rya Nyamuwanga. 9Okuriingʼaana na gintungwa gya abhashengesi Jaakariya ˆnaagwirwa inkuura eengire Ataakatiifu mw-iyekaru rya Nyamuwanga, amutuutire obhubhaani. 10Mmbe, bhunu ꞉aatuutaga, abhaanu bhaafu ꞉bhaariga bhasangire mw-ibhanja rya riiyekaru, mbasaasaamaga Nyamuwanga.

11Kimwi, Jaakariya ari mw-iyekaru muyo, ˆnaataka era maraayika#1:11 Maraayika. Ringira riingʼana rinu mu-Mangʼana Amakomeeye. wa Raatabhugenyi Nyamuwanga ˆnaamuuja-ko. Maraayika uyo ꞉aariga ayambaaye orubhaara rwa ebhuryo bhwa riishengero rya okutuutira obhubhaani. 12Jaakariya ꞉eejire aamurora, ˆnaatitibhara, ˆnoobhaya muno. 13Nawe maraayika uyo ˆnaamubhwira ati, “Awe Jaakariya, siga okuubhaya! Nyamuwanga oonguuywe obhusaasaami bhwawo. Mukaawo Jaabheeti kaaja okukwibhurira omwana omumura, riisiina urimutoga Yowana. 14Okwibhurwa kwa omwana uyo kurikora mujomerwe, na abhaanu abhandi bhaafu bharijomererwa muno okwibhurwa kwaye, 15kwa okubha kaaja okubha muunu mukuru mu-meeso ga Raatabhugenyi. Omwana uyo atarinywa bhwarwa bhwonebhwone bhurya kajaanende, na okwambira okwibhurwa kwaye, aribha ˆneejushwa Mwoyo Omutaakatiifu.#1:15 Mwoyo Omutaakatiifu. Ringira riingʼana rinu mu-Mangʼana Amakomeeye. 16Na arisubhya Abhaijirayeeri bhaafu ku-Raatabhugenyi Nyamuwanga weebhwe. 17Omwoyo gwaye na obhuturo bhwaye bhuririingʼaana na obhwa omuragi Eriya. Aritangatira Raatabhugenyi insonga amutuurire-wo abhaanu.#1:17 Ringira Maraaki 4:5. Omwene arigwatanya abhaana na bheesemwene bhoongwane. Na arikora abhaanu abhakana bhabhe na obhwenge rwa abhaanu abharengeresi mu-meeso ga Nyamuwanga.”

18Jaakariya ˆnaabhuusha maraayika uyo ati, “Ni kiinuki kinu kiriinyeeresha ekimari kya amangʼana gayo, kwa okubha anye na mukaani kyakokooye?” 19Maraayika uyo ˆnaamusubhya ati, “Ni anye Gaabhuryeri, ni anye omujuuma wa Nyamuwanga. Antumire niije nikubhwire amangʼana amajomu ganu. 20Nawe kwa okubha utakwikirisha amangʼana gaani, owubha mujibhi, na utaritura okwaika, okuyikira anu amangʼana ganu garikuumira mu-kabhaga kaago, niwe uryaika!”

21Abhaanu bhanu ꞉bhaariga mbarindirira Jaakariya awuruke okusooka Ataakatiifu, mbaruguura kutyo ꞉aakoorere muyo. 22Mmbe, ꞉eejire okusooka muyo, ꞉ataaturire okubhaaikya, nawe ˆnaamba okubheeresha kijibhi. Kimwi abhaanu mbamenya ati, aarora ebhiroro mw-iyekaru rya Nyamuwanga. ˆNaagenderera okubha mujibhi.

23Mmbe bhunu ꞉aamarire ginsiku gyaye egya okukora emirimu mw-iyekaru rya Nyamuwanga, ˆnaagenda iika. 24Mukaaye Jaabheeti ˆnaagega inda, ˆnaamara meesi gataanu ˆneeyibhisaga, ˆnaaikaga ati, 25“Raatabhugenyi niwe aankoreeye kutya! Noone aayiitire, na aansoosiishe-ko ginswaro mu-bhaanu.”

Obhuragi bhwa Yeesu okwibhurwa

26Bhunu inda ya Jaabheeti yaayikiishe meesi gasansabha, Nyamuwanga ˆnaatuma maraayika Gaabhuryeri mu-musi gwa Naajareeti, mu-kyaro kya Gariraaya, 27ku-muyarajuma wumwi, riisiina ryaye ˆnaatogwa Maryamu. Maryamu uyo ꞉aariga abhusiibhwe obhuko na omurume wumwi, riisiina ryaye ˆnaatogwa Yuusufu, owa mu-ruganda rwa omukama Dawudi.#1:27 Dawudi. Ringira riingʼana rinu mu-Mangʼana Amakomeeye. 28Kimwi maraayika uyo ˆnaagenda ku-Maryamu, ˆnaamubhwira ati, “Enikukeesha, awe unu uyaaywe iinema! Raatabhugenyi ari amwi na awe.”

29Maryamu ꞉eejire oongwa amangʼana ga maraayika uyo, omwoyo gwaye ngutitibhara muno, ˆneebhuusha ati, “Bhunu ni bhukeeshaki?” 30Nawe maraayika uyo ˆnaamubhwira ati, “Awe Maryamu, siga okuubhaya! Nyamuwanga akuyaaye iinema. 31Iitegeeresha! Woori owuuja okugega inda, wiibhure omwana omumura, riisiina ryaye urimutoga Yeesu. 32Aribha muunu mukuru, na aribhirikirwa omwana wa Unu ari iiguru wa bhyone kutyo. Raatabhugenyi Nyamuwanga arimukora abhe mutungi ku-kitebhe kya omukama Dawudi, jaaji waabho. 33Aritunga abhaanu bha oruganda rwa Yakobho kajaanende. Obhukama bhwaye bhutariweera.”

34Maryamu ˆnaabhuusha maraayika uyo ati, “Ganu garibha kutiki, anye nikyari muyarajuma?” 35Maraayika ˆnaamusubhya ati, “Mwoyo Omutaakatiifu arikwikira, na obhuturo bhwa Nyamuwanga Unu ari iiguru wa bhyone kutyo bhuribha iiguru waawo rwa riirengeesi. Mmbe, omwana uyo uriibhura, aribha mwana omusorwa ku-Nyamuwanga, na aribhirikirwaga ati, Omwana wa Nyamuwanga. 36Iitegeeresha! Omuyiiri waawo Jaabheeti ari na inda ya meesi gasansabha, nawe ni mukwekuru, na ꞉aariga ˆnaaikwa ati ni mugumba, 37kwa okubha ku-Nyamuwanga ritariwo engʼana rya kumutama.” 38Maryamu ˆnaamusubhya ati, “Anye niri mujuuma wa Raatabhugenyi, gabhe ku-anye rwa kutyo waaika.” Kimwi maraayika uyo ˆnaagenda.

Maryamu kaagenda okukeesha Jaabheeti

39Mu-nsiku giyogiyo, Maryamu ˆnaagenda bhwangubhwangu ku-Jaabheeti, mu-musi gumwi gwa ku-bhiima bhya Ebhuyawudi. 40Bhunu ꞉aayikire eyo, ˆneengira ewa Jaakariya, ˆnaakeesha Jaabheeti. 41Jaabheeti ꞉eejire oongwa obhukeesha bhwa Maryamu, omwana unu ꞉aariga ari mu-nda yaaye ˆnaagoma. Ayoayo, Jaabheeti ˆneejushwa Mwoyo Omutaakatiifu, 42kimwi ˆnaamura obhuraka ˆnaaika ati, “Ni awe uyaaywe giinonkwe okukira abhagasi bhoone kutyo! Na omwana unu uriibhura, woone ni muunu wa nonkwe! 43Anye nniga, nyira Raatabhugenyi weeswe aaje okunkeesha? 44Bhunu noongwa obhukeesha bhwawo era, ayoayo omwana unu ari mu-nda yaani aajomerwa, ˆnaagoma. 45Nyakara awe unu wiikirisiishe ati, gayo Raatabhugenyi akubhwiriiye garikuumira!”

Orwimbo rwa Maryamu

46Maryamu ˆnaaika ati,

“Omutima gwani ogukumangya Raatabhugenyi,

47enijomererwa Nyamuwanga, Omwerusi waani,

48kwa okubha, aayiitire anye omujuuma waaye,

ku-bhutobhu bhwani.

Okwambira woori, abhaanu bha amakura goone kutyo

bharibha mbanyaika ati, niri na giinonkwe.

49Nyamuwanga wa obhuturo aankoreeye amangʼana ga okuruguusha.

Riisiina ryaye ni iitaakatiifu.

50Ekigongo kyaye kiri ku-bhaanu bha amakura goone kutyo

bhanu abhamuungwa.

51Nawe, abhaanu bhoone kutyo bhanu ꞉bheekumangyaga mu-mitima gyebhwe,

abhanyaraganyiishe na obhuturo bhwa amabhoko gaaye.

52Agwisiishe abhatungi okusooka ku-bhitebhe bhyebhwe bhya obhutungi,

ˆneemusha abhatobhu.

53Eegutiishe bhanu bhari na omweko, amangʼana amajomu,

nawe, abhaniibhi, abhabhirimiishe mabhoko ageene.

54Asakiiye omujuuma waaye Ijirayeeri,

ˆnaayiita okufwira ekigongo

55Bhurayimu na abhaanu bhoone kutyo

abha oruganda rwaye kajaanende,

rwa kutyo ꞉aariga amuragire

na bhaajaaji bheeswe abhandi.”

56Mmbe, Maryamu ꞉aamarire mukangwa meesi gasatu ari ewa Jaabheeti, ˆnaamara ˆnaasubha ewaaye.

Okwibhurwa kwa Yowana Omubhatiisha

57Bhunu ginsiku gya Jaabheeti egya okwibhura ꞉gyayikire, ˆneebhura omwana omumura. 58Abheekashaanya bhaaye na abhayiiri bhaaye ꞉bheejire bhoongwa kutyo Raatabhugenyi ꞉aamufwiriiye ekigongo, mbajomerwa amwi nawe.

59Bhunu omwana uyo ꞉aayikiishe orusuku rwa munaana, mbaja okumusaara, mbeenda bhatoge omwana uyo ati Jaakariya, riisiina rya esemwene mwana. 60Nawe nyiramwene ˆnaarema, ˆnaaika ati, “Uri! Kaatogwa Yowana.” 61Mbamusubhya ati, “Ndora mu-bhayiiri bheemwe atariwo unu kaatogwa riisiina riyo?” 62Kimwi, mbabhuusha esemwene, kijibhi, abhabhwire riisiina rinu keenda okutoga omwana waaye. 63ˆNaabhasabha akabhaawu, ˆnaakaama-ko ati, “Riisiina ryaye, ni Yowana.” Bhoone kutyo mbaruguura. 64Ayoayo, orurimi rwaye ndugajuka, ˆnaamba okuroma kweki, ˆnaakumyaga Nyamuwanga. 65Abheekashaanya bhaaye bhoone kutyo mbaruguura muno, amangʼana gayo ngaswerana mu-kyaro kyone ekya ku-bhiima bhya Ebhuyawudi. 66Abhaanu bhanu ꞉bhoonguuywe amangʼana gayo, ꞉bheebhuushaga ati, “Omwana unu aribha muunuki?” Kwa okubha ꞉bhaarorere kutyo obhuturo bhwa Raatabhugenyi ꞉bhwariga bhumuriko.

Orwimbo rwa Jaakariya

67Jaakariya, esemwene omwana uyo, ˆneejushwa Mwoyo Omutaakatiifu, ˆnaasoosha obhuragi ati,

68“Agungibhwe Raatabhugenyi Nyamuwanga wa Ijirayeeri!

Kwa okubha aaja okutaarira abhaanu bhaaye na okubhatuurya.

69Aakiyaana Omwerusi okusooka mu-ruganda rwa omujuuma waaye Dawudi,

Omwerusi unu ari na obhuturo,

70rwa kutyo ꞉aabhwiriiye abharagi bhaaye abhataakatiifu okwambira kara.

71꞉Aakiragire ati, arikyerusha mu-bhasoko bheeswe,

na mu-mabhoko ga bhanu abhakibhiiyirirwa.

72꞉Aaikire ati, aryabhira bhaajaaji,

ariyiita iimuuma#1:72 Iimuuma. Ringira riingʼana rinu mu-Mangʼana Amakomeeye. yaaye iitaakatiifu.

73Kwa okubha ꞉aarayiriiye jaaji Bhurayimu ati,

74arikyerusha mu-mabhoko ga abhasoko bheeswe,

insonga kimukorerega emirimu kitakuubhaya,

75nkikoraga ganu geesire mu-meeso gaaye, kyerere emitima nsiku gyone kutyo.

76Omwana waani awe, uribhirikirwaga ati, omuragi

wa Nyamuwanga Unu ari iiguru wa bhyone kutyo.

Kwa okubha uritangatira Raatabhugenyi,

insonga anyoore umuroosisiishe injira.

77Uribhwira abhaanu bhaaye ati bharyerusibhwa,

okuturira okwabhirwa ebhikayo bhyebhwe,

78okuriingʼaana na ekigongo kya Nyamuwanga weeswe.

Obhwerusha bhwaye okusooka mu-rwire bhuriija

79okumirikira bhoone kutyo bhanu bhari mu-kisuute,

na riirengeesi rya orufu.

Arikitangasha ku-njira ya omurembe.”

80Omwana uyo Yowana ˆnaakura, ˆnaakomeera mu-mwoyo gwaye, ˆnaagenda okwikara mw-ibhara, okuyikira anu ꞉aayikiishe-wo ginsiku, ˆnaarobhoka ku-Bhaijirayeeri.

Currently Selected:

Ruuka 1: kya

Highlight

Copy