Ruuka 2

Okwibhurwa kwa Yeesu

(Mataayo 1:18-25)

1Ku-nsiku giyo egya okwibhurwa Yowana, Kayijaari#2:1 Kayijaari. Ringira riingʼana rinu mu-Mangʼana Amakomeeye. Aguusito ꞉aaragiriiye ati, abhaanu bhoone kutyo abha mu-bhutungi bhwaye bhagende okubharwa. 2Okubharwa kunu ꞉kwariga kuri kwa okwamba, na ꞉kwabheeye-wo bhunu Kureeniyo ꞉aariga ari mutungi wa Siiriya. 3Mmbe, abhaanu bhoone kutyo mbagenda okubharwa mu-misi gyebhwe.

4Yuusufu woone ˆnaasooka mu-musi gwa Naajareeti mu-kyaro kya Gariraaya, ˆnaariinya okugenda Ebhuyawudi mu-musi gwa Bhetereemu, kwa okubha Bhetereemu nigwo omusi gwa omukama Dawudi, na Yuusufu ꞉aariga ari wa mu-ruganda rwa Dawudi. 5Bhunu Yuusufu ꞉aagendaga okubharwa, ꞉aariga ari amwi na Maryamu. Yuusufu ꞉aariga amubhusisiishe obhuko. Na Maryamu ꞉aariga ari na inda. 6Bhunu ꞉bhaariga bhari Bhetereemu ayo, Maryamu ˆnaayikya okwibhura, 7ˆneebhura omwana mumura owa obhubhere, ˆnaamufundikira mu-ngibho, ˆnaamumaamya mw-iriisisho rya giingʼombe, kwa okubha ꞉bhataanyoorere owa okumaama mu-nyumba gya abhagenyi.

Abhareefi abhataka era maraayika ˆnaabhaaja-ko

8Abhareefi ꞉bhaariga mbaangarira giingʼondi gyebhwe mw-itete ayeeyi na Bhetereemu, iri mu-ngeta. 9Kimwi mbataka era maraayika wa Raatabhugenyi Nyamuwanga ˆnaabhaaja-ko. Na obhugungyo bhwa Raatabhugenyi Nyamuwanga mbubhamirikira mbaara gyone kutyo, mboobhaya muno. 10Nawe maraayika uyo ˆnaabhabhwira ati, “Musige okuubhaya! Naabhareetera amangʼana amajomu ganu agaaja okujomisha muno abhaanu bhoone kutyo. 11Kwa okubha, reero inu mu-musi gwa Dawudi, eebhurwa Omwerusi weemwe. Na Omwerusi uyo niwe Kiriisitu#2:11 Kiriisitu. Ringira riingʼana rinu mu-Mangʼana Amakomeeye. Raatabhugenyi. 12Na ekimenyegesho kya gayo nikyo kinu, omuuja okunyoora omwana omujaare amaamiibhwe mw-iriisisho rya giingʼombe, afundikiiywe gingibho.”

13Ayoayo mbibha-wo ebhiwumbi bhya maraayika bheejaabho okusooka mu-rwire mbabha amwi nawe mbaamba okukumangya Nyamuwanga ati,

14“Agungibhwe Nyamuwanga iiguru mu-rwire.

Na omurembe gubhe mu-kyaro

ku-bhaanu bhanu abhajomisha Nyamuwanga!”

15Bhaamaraayika bhayo ꞉bheejire bhaasubha mu-rwire, abhareefi mbaaikana ati, “Kigende Bhetereemu, kirore gayo Raatabhugenyi aakibhwira.”

16Mmbe, mbagenda bheewutire, mbayika ku-Maryamu na Yuusufu, mbarora omwana omujaare amaamirega mw-iriisisho rya giingʼombe. 17꞉Bheejire bhaamara okurora omwana uyo, mbabhwira abhaanu amangʼana goone kutyo aga omwana uyo ganu maraayika ꞉aabhabhwiriiye. 18Na bhunu abhaanu ꞉bhoonguuywe gayo ꞉bhaabhwiriiywe na abhareefi bhayo, mbaruguura muno. 19Nawe, Maryamu ˆnaagabhiika goone kutyo mu-mutima gwaye, ˆnaageeganiirishaga. 20Kimwi, abhareefi bhayo mbasubha enu mbakumangyaga Nyamuwanga na okumugungya ku-goone kutyo ganu ꞉bhoonguuywe na okurora, kwa okubha, amangʼana goone kutyo ꞉gaabheeye rwa kutyo ꞉bhaabhwiriiywe na maraayika.

21Bhunu omwana uyo ꞉aayikiishe orusuku rwa munaana, mbamusaara, mbamutoga riisiina Yeesu. Niryo riisiina rinu maraayika urya ꞉aariga amutogere, bhunu nyiramwene ꞉aariga akyari okugega inda.

Yeesu kaasirwa mw-iyekaru

22Kimwi, orusuku nduyika runu Maryamu ꞉aariga ayikiishe akabhaga ka okwiyesha#2:22a Okwiyesha. Ringira riingʼana Okwera mu-Mangʼana Amakomeeye. kwaye rwa kutyo ebhiraagiro bhya Musa#2:22b Musa. Ringira riingʼana rinu mu-Mangʼana Amakomeeye. ꞉bhyeendaga akore,#2:22c Ringira Abharaawi 12:2-8. ˆnaagenda na Yuusufu, mbasira Yeesu Yerusareemu#2:22d Yerusareemu. Ringira riingʼana rinu mu-Mangʼana Amakomeeye. mw-iyekaru, bhamutuure mu-mabhoko ga Raatabhugenyi Nyamuwanga. 23Kwa okubha, ꞉gaakaamirwe ku-bhiraagiro bhya Raatabhugenyi ati, “Omwana wa obhubhere owa ekimura eesire aawurwe atuurwe mu-mabhoko ga Raatabhugenyi Nyamuwanga.”#2:23 Ringira Obhungʼaanyi 13:2, 13:12, 13:15. 24Amwi na gayo, ꞉bhaariga bheendere bhasooshe ekimweso#2:24a Ekimweso. Ringira riingʼana Emigabho mu-Mangʼana Amakomeeye. kinu ekyaikwa ku-bhiraagiro bhya Raatabhugenyi ati, “Musooshe ekimweso kya nguuti ebhiri, amwi ati, mureete amaana gabhiri aga ginguuti gya iibhara.”#2:24b Ringira Abharaawi 12:8.

25Na Yerusareemu ayo ꞉aariga ariwo omuunu wumwi, riisiina ryaye ˆnaatogwa Siimiyooni. Siimiyooni uyo ꞉aariga ari murengeresi, na ꞉aariga ari muungwa ku-Nyamuwanga, enu ˆnaarindiriraga okurora obhwerusi bhwa Nyamuwanga ku-Bhaijirayeeri. Mwoyo Omutaakatiifu ꞉aariga ari amwi nawe, 26na ꞉aariga amubhwiriiye ati, atarifwa akyari okurora Kiriisitu wa Raatabhugenyi Nyamuwanga. 27Na bhunu abheebhusi bha Yeesu ꞉bhaamusirire mw-ibhanja rya riiyekaru, insonga bhakore kutyo ebhiraagiro ebhiragirira, Siimiyooni woone ˆnaatangasibhwa na Mwoyo Omutaakatiifu eengire muyo. 28Kimwi ˆnaaramira omwana Yeesu, enu ˆnaakumyaga Nyamuwanga ati,

29“Awe Raatabhugenyi, Omukuru wa bhyone kutyo,

woori ukanyiikirisiishe

anye omujuuma waawo,

nifwe na omurembe,

kwa okubha gayo ꞉waambwiriiye nigo naarora.

30Woori neerorera obhwerusha bhwawo,

31bhunu ꞉waatuuye-wo mu-meeso ga abhaanu

bha ebhyaro bhyone kutyo.

32Obhwerusha bhuyo ni bhweru

bhwa okweresha injira yaawo

ku-bhanu bhatari Bhayawudi,

na okuyaana abhaanu bhaawo

Abhaijirayeeri obhugungyo.”

33Amangʼana gayo Siimiyooni ꞉aaikiraga omwana uyo, ngaruguusha esemwene na nyiramwene. 34Kimwi Siimiyooni ˆnaabheendera iinonkwe, ˆnaabhwira Maryamu nyira mwana, ˆnaaika ati, “Iitegeeresha! Omwana unu arengerwe ati arigwisha Abhaijirayeeri bhaafu, na ariimusha Abhaijirayeeri abhandi bhaafu. Na atuuywe-wo okubha ekibharikisho kinu kiriremwa na abhaanu, 35okuyikira anu ganu ꞉gaariga ngeeyibhisa mu-myoyo gyebhwe garituurwa ku-bhweru. Woone uriwutaasibhwa muno mu-mwoyo gwawo muna usomerwe na ekiraawa.”

36Yerusareemu ayo ꞉aariga ariwo omuragi wumwi, mukwekuru muno, riisiina ryaye ˆnaatogwa Ana, omuyara wa Faanweri, owa riiyito rya Asheeri. Ana ꞉aamarire myaka mungati era na omurume waaye, kimwi omurume waaye ˆnaafwa. 37꞉Aasigaaye ari mukimari, ˆnaayikya ekura rya myaka makumi munaana na ena. ꞉Aariga eekaaye mw-iyekaru atakusooka-mo ˆnaasaasaamaga mu-mwisi na mu-ngeta na okwiyima ebhyokurya. 38Bhunu Ana ꞉aayikire ku-mwana uyo, ˆnaamba okukumya Nyamuwanga, ˆnaaika amangʼana ga omwana uyo ku-bhaanu bhoone kutyo bhanu ꞉bheesigaga ati Nyamuwanga arituurya Yerusareemu.

39Bhunu Yuusufu na Maryamu ꞉bhaariga bhaamarire okukuumisha goone kutyo ganu ebhiraagiro bhya Raatabhugenyi ꞉bhyeendaga, mbasubha eweebhwe mu-musi gwa Naajareeti, mu-kyaro kya Gariraaya. 40Omwana ˆnaakura, ˆnaakomeera, ˆnaabha na obhwenge, na ꞉aariga ˆnaayaanwa iinema na Nyamuwanga.

Yeesu ari mw-iyekaru

41Abheebhusi bha Yeesu ꞉bhaariinyagishaga okuja Yerusareemu ku-nsikukuru gya Ipaasaka#2:41 Ipaasaka. Ringira riingʼana rinu mu-Mangʼana Amakomeeye. myaka gyone. 42Bhunu Yeesu ꞉aariga ari mwana wa myaka ekumi na ebhiri, mbagenda nawe okuriingʼaana na gintungwa gyebhwe. 43Bhunu insikukuru ꞉yaariga yaawooye, abheebhusi bha Yeesu mbasubha iika, nawe omwene ˆnaasigara Yerusareemu ayo. Abheebhusi ꞉bhataamenyere ati ꞉aariga asigaaye, 44꞉bhaatogaga ati ꞉aariga ari amwi na abheejaabho bhunu ꞉bhaasubhaga iika. Bhunu ꞉bhaagwisiishe riisuubha bhabheeye ku-njira, mbaamba okumwagara agati wa abhasaani na abhayiiri bheebhwe. 45Bhunu ꞉aabhabhurire, mbasubha Yerusareemu enu mbamwagaraga.

46Orusuku rwa akasatu mbamunyoora mw-ibhanja rya riiyekaru, eekaayega agati wa abheeyigisha abha ebhiraagiro, ꞉aariga ˆnaabheetegeeresha, ˆnaabhabhuushaga amabhuusho. 47Abhaanu bhoone kutyo bhanu ꞉bhoonguuywe kutyo ꞉aariga ˆnaaika, mbaruguurira muno obhwenge bhwaye na amasubhyo gaaye. 48Bhunu abheebhusi bhaaye ꞉bhaamurorere, bhoone mbaruguura muno. Nyiramwene ˆnaamubhwira ati, “Omwana waani unu, kubhaki waakikorera kutya? Anye na esomwana kyariga kyayayire, nkikwagaraga muno!”

49Yeesu ˆnaamusubhya ati, “Kubhaki mwariga muunyaagara? Mutakumenya ati niisire okubha mu-nyumba ya Raata?” 50Abheebhusi bhaaye ꞉bhataasombookeeywe riisubhyo riyo. 51Gayo ꞉geejire gaawa, mbagenda bhoone kutyo iika Naajareeti, Yeesu ˆnaabhoongwaga. Gayo goone kutyo ꞉gaakorekere, nyiramwene ꞉aagabhiikaga mu-mutima gwaye. 52Yeesu ˆnaagenderera okukura omubhiri na obhwenge, na okujomisha Nyamuwanga na abhaanu.

Currently Selected:

Ruuka 2: kya

Highlight

Copy