Ruuka 3
3
Ameeyigisho ga Yowana Omubhatiisha
(Mataayo 3:1-12; Maariko 1:1-8; Yowana 1:19-28)
1Ku-mwaka gwa ekumi na etaanu ogwa obhutungi bhwa Kayijaari Tibheeriyo, Pontiyo Piraato weeki, ꞉aariga ari mutungi wa Ebhuyawudi. Na Yerode Antipa,#3:1 Yerode Antipa. Ringira riingʼana rinu mu-Mangʼana Amakomeeye. ꞉aariga ˆnaatunga Gariraaya. Na waamuwaabho unu ꞉aatogwaga Firipo, weeki ꞉aariga atungire ekyaro kya Itureya, na ekya Turakooniti. Na Risaniya, ꞉aariga ˆnaatunga ekyaro kya Abhirene. 2Anaasi na Kayafa, bheeki nibho ꞉bhaariga bhari abhashengesi#3:2 Abhashengesi. Ringira riingʼana rinu mu-Mangʼana Amakomeeye. abhakuru.
Mu-kabhaga kayo, Yowana omwana wa Jaakariya, ꞉aariga abheeye mw-ibhara. Mmbe, mw-ibhara eyo Nyamuwanga ˆnaamuyaana iingʼana. 3Yowana ˆneeyinda ekyaro kyone kutyo ekya ku-ngego ya oruuji rwa Yorodaani enu ˆnaaraashaga iingʼana iyo. ˆNaabhwiraga abhaanu ati, “Munuge ebhikayo bhyemwe muyindukire ku-Nyamuwanga, mubhatiisibhwe, Nyamuwanga abhaabhire ebhikayo bhyemwe!” 4Rwa kutyo ꞉gaakaamirwe mu-kitabho ekya amangʼana ga omuragi Isaaya, ati,
“Omuunu kaamura obhuraka mw-ibhara ˆnaaika ati,
‘Muroosishe Raatabhugenyi injira,
mwimye anu kaaja okutura,
5amateka goone kutyo garisiikirwa,
ebhiima na ebhisuumwa bhyone kutyo bhirinyaraganywa,
anu ekiikire ariimibhwa, anu kaayaraata aritereresibhwa,
6niwe abhaanu bhoone kutyo bharirora obhwerusha
okusooka ku-Nyamuwanga.’”#3:4-6 Ringira Isaaya 40:3-5.
7Mmbe, Yowana ˆnaabhwira abhaanu bhanu ꞉bhaamujiiye-ko abhabhatiishe, ˆnaaika ati, “Orwibhuro rwa ebhisoro emwe! Ni kimari indamuro okusooka ku-Nyamuwanga iriija, niga abhabhwiriiye muyiikenge? 8Ikabha kimari ati munugire ebhikayo bhyemwe, mmbe ebhikorwa bhyemwe bhisusane na okunuga kwemwe okwa ebhikayo, mwasiga kutoga ati muryaabhirwa kwa okubha ati muri rwibhuro rwa Bhurayimu.#3:8 Bhurayimu. Ringira riingʼana rinu mu-Mangʼana Amakomeeye. Enibhabhwirira abhweru ati, Nyamuwanga kaatura okuyaana Bhurayimu abhaana okusooka ku-magina ganu. 9Nyamuwanga aatuuye imbasa ku-masina ga amati, keenda arore amatwasho amajomu ku-mati kuyo, akarema okugarora-ko kaagatema ˆnaageesa mu-muriro!”
10Abhaanu ꞉bhaariga bhasangire ku-ngego ya oruuji ayo. Abhaanu bhayo mbabhuusha Yowana ati, “Mmbe! Woori kikoreki?” 11Weeki ˆnaabhasubhya ati, “Omuunu akabha na ngibho ebhiri, agabhire-ko unu atari nayo. Na omuunu akabha na ebhyokurya, woone naagabhire-ko bhanu bhari na omweko.” 12Abhatobhesha bha riigooti#3:12 Abhatobhesha bha riigooti. Ringira riingʼana rinu mu-Mangʼana Amakomeeye. bhoone mbamuuja-ko mbeenda abhabhatiishe. Mbamubhuusha ati, “Angu Omwiyigisha, eswe kyone kikore kutiki?” 13ˆNaabhasubhya ati, “Mukatobhesha riigooti mwasiga okutobhesha okukira riigooti rinu eryendwa.” 14Abhasirikare bhoone mbamubhuusha ati, “Eswe kyone kikore kutiki?” Weeki ˆnaabhasubhya ati, “Mwasiga okuteesha omuunu ebhiinu bhyaye, mwasiga okubheeyeresha omuunu, mwiswe na emiyeero ginu omuramira.”
15Ku-nsiku giyo, abhaanu ꞉bhaariga bhari na obhwisige bhunene, mbeebhuushaga mu-mitima gyebhwe raabhe Yowana niwe ꞉aariga ari Kiriisitu. 16Nawe Yowana omwene ˆnaabhasubhya ati, “Kimari anye enibhabhatiisha mu-manji, nawe ariija unu ari na amanaga okunkira anye, unu anye noone niteesire kusurumura gingoye gya ebhikwirya bhyaye! Omwene, niwe aribhabhatiisha na Mwoyo Omutaakatiifu, na omuriro. 17Agwatiriiye orungo rwaye, keenda okweyerera ekibhuga kya okuwurira obhuro. Obhuro obhujomu kaabhutuura mu-kitara kyaye, nawe inkuunyu ariyookya mu-muriro gunu gutakusimá.”
18Yowana ꞉aabhabhwiriiye amangʼana agandi maafu aga ebhirengekanyo, ˆnaabhagaanyaga okukora amabhiibhi, ˆnaabhakomeeresha muno, ˆnaabharaasishaga Amangʼana Amajomu#3:18 Amangʼana Amajomu. Ringira riingʼana rinu mu-Mangʼana Amakomeeye. aga Nyamuwanga. 19Kimwi Yowana ˆnaagonya omukama Yerode Antipa, kwa okubha Yerode ꞉aagegere Yerodiya, omugasi wa waamuwaabho, ˆnaamugabhura. Yowana ˆnaamugonya kw-ingʼana riyo, na ku-mabhiibhi agandi goone kutyo ganu ꞉aariga ˆnaakora. 20Niwe, Yerode ˆneeyongesha mabhiibhi gaaye, ˆnaabhoya Yowana mu-jeera.
Yeesu kaabhatiisibhwa
(Mataayo 3:13-17; Maariko 1:9-11)
21Bhunu Yowana ꞉aariga akyari okubhoywa, abhaanu bhaafu ꞉bhaamujaga-ko okubhatiisibhwa, Yeesu woone ˆnaabhatiisibhwa. Na bhunu ꞉aariga ˆnaasaasaama orwire ndwiguka. 22Mwoyo Omutaakatiifu ˆnaamwikira rwa inguuti, obhuraka mbusooka mu-rwire, mbwaika ati, “Ni awe Omwana waani omwende! Ni awe owunjomisha!”
Oruganda rwa Yeesu
(Mataayo 1:1-17)
23Bhunu Yeesu ꞉aambire emirimu gyaye egya okuraasha riingʼana, ꞉aariga ari na myaka muna makumi gasatu. Abhaanu ꞉bhaariga mbatoga ati ꞉aariga ari omwana wa Yuusufu,
Yuusufu wa Eri.
24Eri wa Mataati.
Mataati ꞉aariga ari mwana wa Raawi.
Raawi wa Meeriki.
Meeriki wa Yanayi.
Yanayi ꞉aariga ari mwana wa Yuusufu.
25Yuusufu wa Mataatiya.
Mataatiya wa Amoosi.
Amoosi wa Nawumu.
Nawumu wa Ejiri.
Ejiri wa Nagayi.
26Nagayi wa Maati.
Maati ꞉aariga ari mwana wa Mataatiya.
Mataatiya wa Seemeyi.
Seemeyi wa Yosoweki.
Yosoweki ꞉aariga ari mwana wa Yooda.
27Yooda wa Yowanani.
Yowanani wa Reesa.
Reesa wa Jerubhabheri.
Jerubhabheri wa Sherateeri.
Sherateeri ꞉aariga ari mwana wa Neeri.
28Neeri wa Meeriki.
Meeriki wa Aadi.
Aadi wa Koosamu.
Koosamu wa Erimaadamu.
Erimaadamu ꞉aariga ari mwana wa Eeri.
29Eeri wa Yoshuwa.
Yoshuwa wa Eriyejeeri.
Eriyejeeri wa Yoorimu.
Yoorimu wa Mataati.
Mataati ꞉aariga ari mwana wa Raawi.
30Raawi wa Siimiyooni.
Siimiyooni wa Yuuda.
Yuuda wa Yuusufu.
Yuusufu wa Yonamu.
Yonamu ꞉aariga ari mwana wa Eriyakimu.
31Eriyakimu wa Mereya.
Mereya wa Meena.
Meena wa Matata.
Matata wa Naasani.
Naasani ꞉aariga ari mwana wa Dawudi.
32Dawudi wa Yese.
Yese wa Obheedi.
Obheedi wa Bhowaaji.
Bhowaaji wa Sarumooni.
Sarumooni ꞉aariga ari mwana wa Naashoni.
33Naashoni wa Aminadaabhu.
Aminadaabhu wa Adimiini.
Adimiini wa Ariini.#3:33 Ariini. Amakaamo agandi aga Ekiyunaani aga kara gatari na riisiina riyo.
Ariini wa Yejirooni.
Yejirooni wa Peereesi.
Peereesi ꞉aariga ari mwana wa Yuuda.
34Yuuda wa Yakobho.
Yakobho wa Isaaka.
Isaaka wa Bhurayimu.
Bhurayimu wa Teera.
Teera ꞉aariga ari mwana wa Naawori.
35Naawori wa Serugi.
Serugi wa Regawu.
Regawu wa Peregi.
Peregi wa Ebheri.
Ebheri ꞉aariga ari mwana wa Saara.
36Saara wa Keenani.
Keenani wa Arifwakisaadi.
Arifwakisaadi wa Sheemu.
Sheemu wa Noowa.
Noowa ꞉aariga ari mwana wa Raameeki.
37Raameeki wa Meetuseera.
Meetuseera wa Enooki.
Enooki wa Yaredi.
Yaredi wa Mayarareri.
Mayarareri ꞉aariga ari mwana wa Keenani.
38Keenani wa Enooshi.
Enooshi wa Seeti.
Seeti wa Adaamu.
Adaamu wa Nyamuwanga.
Currently Selected:
Ruuka 3: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved
