Maariko 16
16
Okusuuka kwa Yeesu
(Mataayo 28:1-8; Ruuka 24:1-12; Yowana 20:1-10)
1Bhunu Insabhaato ꞉yaawooye, Maryamu Magidarena, Maryamu nyiramwene Yakobho, na Sarome, mbagura ebhirange, bhagende okuyaka omubhiri gwa Yeesu. 2Ekya obhwoyo#16:2 Ekya obhwoyo. Abhayawudi bheeki abhooya ekya Akasansabha. Ekya obhwoyo ni rusuku rwebhwe orwa okwamba orwa obhwoyo. mu-ruguru, bhunu riisuubha ꞉ryariga ndyamba okuwuruka, mbagenda mu-mbiiyira ya Yeesu. 3Bhunu ꞉bhaariga bhari mu-njira, mbaamba okubhuushaanya ati, “Niga unu kaaja okukisoosisha-wo riigina rirya ku-muryango gwa imbiiyira?” 4Nawe bhunu ꞉bhaayikire, mbarora riigina riyo risiringisiibhwe, riri ku-mbarika, na ꞉ryariga riri enene muno.
5Bhunu ꞉bheengiiye mu-mbiiyira, mbarora omumura wumwi eekaaye ebhuryo mu-mbiiyira, afwayega ngibho nyeru, mboobhaya. 6Omumura uyo ˆnaabhabhwira ati, “Musige okuubhaya. Nimenyere ati omwagara Yeesu Omunaajareeti, unu ꞉aasungirwe ku-musarabha. Aasuukire, atariwo anu! Muringire anu bhaariga bhamumaamiishe. 7Mmbe, mugende mubhwire abheeyigira bhaaye, munomuuno Peetero, ati ‘Yeesu aabhatangatira okugenda Gariraaya. Eyo niyo muraamurore rwa kutyo ꞉aariga abhabhwiriiye.’#16:7 Ringira Maariko 14:28.” 8Niwe mbaruguura mbaamba okuyarara. Mbawuruka mu-mbiiyira, mbabhirima. ꞉Bhataabhwiriiye muunu woonewoone, kwa okubha ꞉bhaariga bhoobhayire muno.
Yeesu keeyeresha ku-Maryamu Magidarena
(Mataayo 28:9-10; Yowana 20:11-18)
[9Bhunu Yeesu ꞉aasuukire mu-ruguru Ekya obhwoyo, ˆneebhuura ku-Maryamu Magidarena, unu ꞉aariga amusoosiishe-ko bhiwi mungati. 10Maryamu Magidarena ˆnaagenda, ˆnaabhwira abheeyigira bha Yeesu amangʼana, abheene ꞉bhaariga bhakyamuririra. 11Nawe bhunu ꞉bhoonguuywe ati Yeesu ariwo ni muworu, ati Maryamu aamurora, ꞉bhateekirisiishe.
Yeesu keeyeresha ku-bheeyigira abhandi
(Ruuka 24:13-35)
12Orusuku ruyoruyo, Yeesu ˆneeyeresha ku-bheeyigira bhaaye abhabhiri. Abheeyigira bhayo ꞉bhaariga bhari mu-njira, mbagenda mu-masambu. ꞉Bhataamumenyere, kwa okubha ꞉aariga ˆnaasusaga kundi. 13Bhunu ꞉bhaamumenyere, mbasubha okubhwira abheejaabho, nawe abheene ꞉bhateekirisiishe.
Yeesu keeyeresha ku-bheeyigira ekumi na wumwi
(Mataayo 28:16-20; Ruuka 24:36-49; Yowana 20:19-23; Ebhikorwa bhya Abhatumwa 1:6-8)
14Yeesu ˆnaamara ˆneeyeresha ku-bheeyigira bhaaye ekumi na wumwi. Bhunu ꞉bhaariga mbarya, ˆnaabhagonya ku-nsonga ya obhukomeeye bhwa emitima gyebhwe, kwa okubha ꞉bhaaremere okwikirisha amangʼana ga abheejaabho bhanu ꞉bhaamurorere bhunu ꞉aasuukire mu-bhafuuye. 15Niwe ˆnaabhabhwira ati, “Mugende mu-bhyaro bhyone kutyo, muraasishe abhaanu bhoone kutyo Amangʼana Amajomu. 16Omuunu woonewoone unu keekirisha ˆnaabhatiisibhwa, keerusibhwa. Nawe, unu atakwikirisha, ariramurirwa. 17Bhanu bheekirisiishe, bharikora ebhimenyegesho bhinu kutya, Kw-isiina ryani bharibhirimya ebhiwi mu-bhaanu, bhariromera mu-nyaaika iinyaaya, 18bharigwata ebhisoro, bharinywa kyonekyone kinu ekiita, kitaribheeta. Bharituura amabhoko geebhwe ku-bharwaye, abharwaye mbawora.”
Yeesu keemusibhwa okugenda mu-rwire
(Ruuka 24:50-53; Ebhikorwa bhya Abhatumwa 1:9-11)
19Bhunu Raatabhugenyi Yeesu ꞉aamarire okubhabhwira gayo, ˆneemusibhwa okugenda mu-rwire, ˆneekara ebhuryo ku-Nyamuwanga. 20Abheeyigira bhaaye mbeemuka ayo. Mbagenda okuraasha Amangʼana Amajomu woonewoone enu ꞉bhaagendaga. Raatabhugenyi Yeesu ˆnaakoraga emirimu amwi nabho, ˆnaabhayaana amanaga ga okukora ebhimenyegesho, okweresha ati amangʼana ganu abharaasha ni kimari.]
Currently Selected:
Maariko 16: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved
