Maariko 7
7
Amaragiriro ga abhakaruka
(Mataayo 15:1-9)
1Kimwi Abhafarisaayo na abheeyigisha abharebhe abha ebhiraagiro bhya Musa bhanu ꞉bhaasookere Yerusareemu, mbasangira anu Yeesu ꞉aariga ari. 2Mbarora abheeyigira bha Yeesu abhandi mbarya ebhyokurya na amabhoko amanaabhi,#7:2 Mbarya ebhyokurya na amabhoko amanaabhi. Abhayawudi ꞉bhaariga bhari na gintungwa gyebhwe ku-bhwisaabhi bhwa amabhoko bhakeenda okurya. ꞉Bhaariga mbeesaabha kutyo insonga bheesooshe-ko obhunaabhi. Ringira riingʼana Obhunaabhi mu-Mangʼana Amakomeeye. insonga yeende-ko ni ati, ꞉bhaaryaga bhateesaabhire amabhoko okuyikira ku-bhikokora. 3Abhafarisaayo na Abhayawudi bhoone kutyo ꞉bhaariga bhatakurya bhateesaabhire okuyikira ku-bhikokora, na okukora kutyo ꞉bhaariga mbaseeta amaragiriro ga abhakaruka bheebhwe. 4Na bhunu ꞉bhaasookaga mw-igusisho, bhateeyosiishe ꞉bhaariga bhatakurya. Na ꞉gaariga gariwo amaragiriro agandi ganu ꞉bhaariga bhagwatiiye, aga okwosha ebhikombe, ebhifurira na gimbakuri.
5Niwe Abhafarisaayo na abheeyigisha bha ebhiraagiro bhya Musa bhayo, mbabhuusha Yeesu ati, “Kubhaki abheeyigira bhaawo bhatakuseeta amaragiriro ga abhakaruka bheeswe, abharya na amabhoko amanaabhi?”
6Yeesu ˆnaabhasubhya ati, “Bhabheeyi emwe! Nyamuwanga ꞉aaikire kimari iiguru yeemwe, rwa kutyo omuragi Isaaya ꞉aakaamire ati,
‘Ekibharo kya abhaanu bhanu ku-anye,
ni kya mu-kanwa era,
nawe emitima gyebhwe giri areera na anye.
7Abhandamya bhusa,
kwa okubha kinu abheeyigisha ni
maragiriro ga abhaanu era.’#7:6-7 Ringira Isaaya 29:13.”
8Yeesu ˆnaagenderera okubhabhwira ati, “Emwe omusiga ekiraagiro kya Nyamuwanga, museeta amaragiriro ga abhaanu.
9“Yee! Ati omurema ebhiraagiro bhya Nyamuwanga, insonga mugwate aga abhakaruka bheemwe! 10Nyamuwanga ꞉aaragiriiye okuturira ku-Musa#7:10a Musa. Ringira riingʼana rinu mu-Mangʼana Amakomeeye. ati, ‘Uyaane abheebhusi bhaawo ekibharo.’#7:10b Ringira Obhungʼaanyi 20:12; Ekiyiityo kya Ebhiraagiro 5:16. ˆNaaika kweki ati, ‘Omuunu woonewoone unu kaafuma abheebhusi bhaaye, akomerwe.’#7:10c Ringira Obhungʼaanyi 21:17; Abharaawi 20:9. 11Nawe emwe, omwiyigisha ati ni kujomu era omuunu okubhwira abheebhusi bhaaye ati, ‘Ebhiinu bhinu nikabhasakiiye, ni Koribhani,’ insonga ya riingʼana riyo ni ati, bhisoosiibhwe ku-Nyamuwanga. 12Okwiyigisha kutyo, okukora abhaanu bhasige okusakira kiinu abheebhusi bheebhwe, 13enu mujeera Riingʼana rya Nyamuwanga ku-nsonga ya okuseeta amaragiriro ga abhakaruka bheemwe abha kara. Na omukora amangʼana maafu ganu agasusana na ganu.”
Ganu agasooka mu-mutima nigo aganaabhiyasha
(Mataayo 15:10-20)
14Yeesu ˆnaabhirikira kweki riisangi rya abhaanu, ˆnaabhabhwira ati, “Munyiitegeereshe, musombookerwe amangʼana gaani. 15Kitariwo kiinu kinu ekiingira mu-muunu nkimukora anaabhiyare. Tari, ni ganu agasooka mu-mutima gwa omuunu, nigo agakora omuunu ˆnaabha munaabhi. [16Omuunu unu ari na amatwi ga okuungwira, ˆnoongwe kujomu.]”
17Bhunu ꞉aamarire okwiyigisha, ˆnaasiga riisangi rya abhaanu ˆneengira mu-nyumba, abheeyigira bhaaye mbamubhuusha iiguru ya ekirengekanyo kiyo. 18ˆNaabhabhwira ati, “Emwe mwone mutari na bhwenge? Mutakumenya ati ekiinu kyonekyone kinu kitari mu-muunu, kikamwingira, kitakutura okumukora abhe munaabhi? 19Kwa okubha kitakumwingira mu-mutima, ekitura mu-nda era, nkiyitiingʼana nkigenda emwira.” Yeesu okwaika kutyo, ꞉eesiishe ebhyokurya bhyone kutyo, bhiriibhwega.#7:19 ꞉Eesiishe ebhyokurya bhyone kutyo, bhiriibhwega. Ringira riingʼana Okwera mu-Mangʼana Amakomeeye. 20ˆNaagenderera okwaika ati, “Kinu ekisooka mu-mutima gwa omuunu, nikyo ekikora omuunu ˆnaabha munaabhi. 21Mu-mutima nimwo obhusooka obhwiganiirisha obhubhiibhi, obhutaasi bhwa ameega, 22obhwifi, obhwiti bhwa abhaanu, amajomerwa amabhiibhi, obhusindi, injeejemo, obhwimi, orwango, amafumo, ekyene na obhutengʼo. 23Amabhiibhi gayo goone kutyo agasooka mu-mutima gwa omuunu, na nigo agakora omuunu ˆnaabha munaabhi.”
Obhwikirisha bhwa omugasi unu atari Muyawudi
(Mataayo 15:21-28)
24Yeesu na abheeyigira bhaaye mbasooka Gariraaya ayo, mbagenda mu-bhyaro bhya Tiiro na Sidooni. Yeesu ˆneengira mu-nyumba, ꞉aariga atakwenda abhaanu bhamenye ati ariwo. Nawe ꞉ataaturire kwiyibhisa. 25-26Tiiro eyo ꞉aariga ariyo omugasi unu ꞉aariga atari Muyawudi. ꞉Aariga asookere Foyinike mu-kyaro kya Siiriya. Omuyara wa omugasi uyo ꞉aariga awungirwe ekiwi. Bhunu omugasi uyo ꞉oonguuywe era, ati Yeesu ari eyo, ˆnaamuuja-ko, ˆnaamwifukamira, ˆnaamusabha asooshe ekiwi ku-mwana waaye.
27Yeesu ˆnaamubhwira ati, “Siga abhaana bheegute okwamba, itari kujomu okugega ebhyokurya bhya abhaana nuweesera gimbwa.”#7:27 Okugega ebhyokurya bhya abhaana nuweesera gimbwa. Nyaaika iyo insonga yeende-ko ni ati, Abhayawudi bhanyoore bhusakisi okwamba, bhanu bhatari Bhayawudi bhakyari okubhunyoora. 28Nawe omugasi uyo ˆnaamusubhya ati, “Yee Raatabhugenyi, nawe gimbwa gyone, egirya ebhyokurya bhya abhaana bhinu ebhigwa ansi kw-igari.”
29Yeesu ˆnaamusubhya ati, “Ku-nsonga ya riingʼana riyo waaika riyo, subha iika ewaawo, omuyara waawo ekiwi kyamusookere-ko.” 30Omugasi uyo ˆnaasubha iika, ˆnaanyoora omwana waaye amuunyire ku-bhuriri, ekiwi kyamusookere-ko.
Yeesu kaawosha omujibhi
31Niwe Yeesu ˆneemuka kweki na abheeyigira bhaaye mbasooka Tiiro, ˆnaatura agati wa ekyaro kya Sidooni, ˆnaagenda mu-kyaro kya Dekapoori aturiiye ayeeyi na gimbibhi gya omwaro gwa Gariraaya. 32Dekapoori eyo ꞉aariga ariyo omuunu unu ꞉aariga ari mujibhi na okuungwa kwone atakuungwa. Abhaanu abharebhe mbamureeta ku-Yeesu, mbamwisaasaama amutuurire-ko amabhoko, amuwoshe. 33Yeesu ˆnaamusoosha mw-isangi rya abhaanu, ˆnaagenda nawe omwene era, ku-mbarika. ˆNaatuura ebhyara bhyaye mu-matwi ga omuunu uyo. ˆNaafubhura amafwefwe ku-kyara kyaye, ˆnaamuyaka ku-rurimi. 34ˆNaaragamira ku-rwire, ˆneesha omwika mureera, ˆnaamubhwira ati, “Efata,” insonga yeende-ko ni kwaika ati, “Iiguka.” 35Ayoayo, muunu uyo ˆneeguka amatwi na orurimi, ˆnaamba okuungwa na okuroma kujomu.
36Yeesu ˆnaakomeeresha riisangi rya abhaanu ati, bhaasiga okubhwira omuunu woonewoone amangʼana gayo. Nawe kutyo ꞉aabhagaanyaga, nikwo kutyo ꞉bhaariga mbagenderera okuraasha amangʼana gayo. 37Mbaruguura muno, mbaaika ati, “Goone kutyo ganu aakora ni majomu. Kaawosha abha amatwi, mboongwa, na abhajibhi mbaroma!”
Currently Selected:
Maariko 7: kya
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved
