Galatia 1
1
1Paolo, apostolo (nukuya kuhuma pa wandu, haka pa ntenga wa mundu, koma pa Yesu Kristo, nu Mulungu Dadi, uyu akansyusiti pa wakufwa), 2na walongo woha awa wayii pamonga nu nenga, kwa makanisa ga pa Galatia: 3Neema kwinu ni kindamba kuhuma pa Mulungu Dadi, nu Bambo witu Yesu Kristo, 4uyu akipeliki mwene pa mihalo ya sambi situ, nausi atifuwule pa miaka iyi ya usokosi, kwa ndingo wa kilondo kyake Mulungu witu nu Dadi: 5kwa yombe kukwisika kwa miaka ni miaka. Amen.
6Nikangacha ndawa muyii kwipatula nyata nuyombe akawakemili pa neema ya Kristo mpaka pa evangel ya ntundu wungi; 7yila nukuya yingi: lema wayii wangi wakuwahumbusa, na walonda kung’anamula evangel ya Kristo. 8Koma haka tenga, haka malaika kipitile kunani, ngawawandasili evangel yingi lema yila tikawawandasili mwenga, aye wakutegewa. 9Ngati umu tikajowili palongolo, ni hino nijowa kawili, Mundu wona awawandasila evangel yingi lema yila mukayiyupiti, aye wakutegewa. 10Pakuya hino nikopesa wandu, pangi Mulungu? pangi nilalukila kuwaganisa wandu? wona nikayili kuwaganisa wandu mpaka hino, nganiyili lepe mbanda wake Kristo.
11Pakuya niwamanyisa, walongo, panani pa evangel yikawandasiki nu nenga, kukita nukuya kwa ndingo wa wandu. 12Pakuya haka pa mundu nikayiyupiti lepa, haka nikayiyigalisi lepa, koma kuluta pa mafunukuliko ga Yesu Kristo. 13Pakuya mukayufwini matamilo gangu ga mwandi pa dini ya waYehudi, umu kulutila nyamhope nikahyungiti kanisa lya Mulungu, ni kukayula ngondo pa lila: 14ni nikayili wa kulongosa pa dini ya waYehudi kulutila wingi wa magono gangu pa nsafi wangu, pakuya namwene wa wifu kulutila muni kwa mawungu ga wakadadi wangu. 15Koma pala ikanganisi Mulungu, yula akanipatwili kipitile pa luleme lwa mawo, 16ni akanikemili pa neema yake, kumfunukula Mwana mundu pa nenga, nausi nimbwandise pa wa Mihuku; hino apa nikalongili lepa na nyama nu mwasi: 17haka nakweliti lepa ku Yerusalem kwa wala wakayili maapostolo palongolo pa nenga: koma nikawukiti kiyingalile Arabia; na nikakilawiki kawili ku Damasek.
18Panyuma pake kugona miaka yidatu nikakweliti ku Yerusalem kuwonangana ni Kefa, ni nikahweliti nako magono kumi nu mhano. 19Leka yungi wa maapostolo nikambweni lepa, lema Yakobo ndongo wa Bambo. 20Ni panani pa aga niwalembela mwenga, lola, pa miho ga Mulungu, nideta lepa. 21Panyuma pake nikachiti pa milima ya Suria ni Kilikia. 22Ni nikayili wangali kumanyika pa kyene kya makanisa ga pa Yudaya gala gakayili mwa Kristo: 23koma wakayili mu kuyufwana waka, Yula watihyungiti mwandi hino awandisa kiyitakiso kila akakaywili ngondo nakyo mwandi; 24na wakayili mu kumkwisa Mulungu pa nenga.
Currently Selected:
Galatia 1: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.