Galatia 3
3
1Mwenga wa Galatia wahimu, nani akawatagiti, pa mwenga Yesu Kristo akalasiki pa lulanga wakuwambika pa msalaba? 2Iki kyakape nilonda kwiyigalisa pa mwenga, Mukayupiti Roho kipitile pa makitiko ga torah, pangi pa kuyufwana kwa kiyitakiso? 3Wila muyii wakuhimuka wiwi? mukatumbuliki mwa Roho, yamumalakasike hino mwa nyama? 4Wila mukayufwini mahumbuso goha waka? wona chakaka mukagayufwini waka. 5Mumu uyu wakuwapela Roho, na akita fya mbafu pa mwenga, wila afikita kipitile pa makitiko ga torah, pangi pa kuyufwana kwa kiyitakiso? 6Umu Ibrahim akankeliti Mulungu, na kukawalangiki kwa yombe pa kugoloka. 7Mumu mumanye kukita wala pa kiyitakiso, wawa wana wa Ibrahim. 8Leka lilembo apa likaweni palongolo kukita Mulungu agolokesa Mihuku pa kiyitakiso, likawandisi evangel kwa Ibrahim palongolo, kujowa, Pa mwenga wa mihuku woha yawapelewe kihomo. 9Mpaka wala wa kiyitakiso wapeliwi kihomo pamonga nu Ibrahim mwene kiyitakiso. 10Pakuya woha wayii pasi pa makitiko ga torah, wayii pasi pa kulapalakisa: pakuya galembiki, Wakulapalasika wayi woha nukuhwela pa goha gala galembiki pa kitabu kya torah, kugakita. 11Leka pa torah pa waka mundu apisika nnofu pa Mulungu: pakuya, Wakugoloka yawalame kipitile pa kiyitakiso; 12na torah nukuya pa kiyitakiso; koma, Uyu agakita aga yalame nago. 13Kristo akatikombwili kipitile pa kulapalakisa kwake torah, wakukitika kulapalasika pa mihalo ya tenga: pakuya galembiki, Wakulapalasika ayi yoha uyu apagakiki pa libihi: 14nausi pa Mihuku yakiyingile kihomo kya Ibrahim mwa Kristo Yesu; nausi tiyupe kilago kya Roho pa kiyitakiso.
15Walongo, nilongela kwa ndingo wa wandu: Kilagano, haka wona kiyii kya mundu, koma pala kiyitikaliki, pawaka mundu ahotola kukikita kya waka, pangi kuyonjakesa pa kila. 16Leka filago fikajowiki kwa Ibrahim, nu kwa mbeyu yake. Akajowiti lepa, Kwa mbeyu sila, ngati kwa singi; koma ngati kwa yimonga, Na kwa mbeyu yako, yuyu Kristo. 17Leka hino nijowa, Kilagano kiyitikaliki palongolo nu Mulungu, torah, yila yikawoniki panyuma pa miaka mia ncheche na makumi gadatu, yikiwusa lepa, kukita kilago kiye kya waka. 18Pakuya kuyingila lipwela wona kuyii pa torah, nukuya pa kilago: koma Mulungu akampili Ibrahim pa kilago. 19Mumu kiki torah? Yikawikiki ndawa ya fyakupatukana, mpaka mbeyu yayiye kwa yila kukakitiki kilago; yikawikiki pa ndila ya wakamalaika pa kiwoko kya wa pagati. 20Leka wa pagati nukuya wa yumonga, koma Mulungu ayii yumonga. 21Mumu torah yipindika filago fya Mulungu? Kisiya wiwi: pakuya wona torah yikapelekiwi yakuhotola kulamisa, chakaka kugoloka ngakukayili pa torah. 22Koma lilembo lidinditi ngani fyoha pasi pa sambi, nausi kilago kya pa kiyitakiso mwa Yesu Kristo kipelewe kwa wala wakukela.
23Leka kiyitakiso kikona nakuhicha, tikadindiki pasi pa torah, wakudindika pa kiyitakiso kila yakifunukulike panyuma. 24Kwa iki torah yikayili yakutiwula kutitola kwa Kristo, nausi tigoloseke pa kiyitakiso. 25Koma hino kifiki kiyitakiso tenga nakutama kawili pasi pa wakuwula. 26Pakuya woha muyii wana wa Mulungu pa kiyitakiso mwa Yesu Kristo. 27Pakuya mwawoha wa mwenga mukabatasiki mwa Kristo mukamfwatiti Kristo. 28Nukuhotola lepa kuya mYehudi, pangi mGriki, haka mbanda nu nkamba, haka ngosi ni ndala: pakuya muyii yumonga mwa Kristo Yesu. 29Na wona muyii wa Kristo, muyii kawili mbeyu ya Ibrahim, wakuyingila lipwela kwa ndingo wa kilago.
Currently Selected:
Galatia 3: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.