Galatia 4
4
1Koma nijowa kukita wa kuyingila lipwela pa lukumbi luyi lwoha ayii nkeke, nukulekana kandu nu mbanda, haka bambo wa fyoha ayii; 2koma ayii pasi pa wakulolalela na makapitao mpaka pa ligono lya kuwulika nu dadi. 3Wiwi tenga nati pala tikayili wakeke, tikakitiki wawanda pasi pa fya ndumbulo fya ndima: 4koma pala kifwilanilo kya lukumbi kikafiki, Mulungu akampeliki Mwana mundu, wakuhogoleka nu ndala, wakuhogoleka pasi pa torah, 5nausi awayokola wala wakayili pasi pa torah, kukita tiyupe utamo wa wana. 6Na pakuya mwenga muyii wana, Mulungu akampeliki Roho wa Mwana mundu pa mioyo yinu, kukuwa, Abba, Dadi. 7Mpaka yauye lepa kawili mbanda, koma mwana; na wona mwana, wakuyingila lipwela kawili kwa Mulungu.
8Leka bahalapala, pakuya wangali kummanya Mulungu, mukayili pa uwanda kwa wala wangali wakamulungu pa utamo wawe: 9koma hino mukapatiti kummanya Mulungu, leka mbanga kumanyika nu Mulungu, mung’anamukila wuli kufiyegamila fya ndumbulo fya waka, pa fila mulonda kufitamila uwanda pa kawili? 10Mugoha magono, ni miesi, nu ngumbi, ni miaka. 11Niyogopa pa mwenga, pangi natonditi pa mahengo waka kwa mwenga.
12Niwapembesa walongo, muye ngati tenga, umu niyii ngati mwenga. Mukanikitili lepa kindu kiwifu: 13koma mumanya kukita kwa ndawa ya ulegelefu wa mbili nikawandisi evangel kwa mwenga pa kutumbula: 14ni kila kikayili ligeseko kwa mwenga pa nyama yangu mukakihepiti lepa, mukafunyiti lepa; koma mukaniyupiti ngati malaika wa Mulungu, ngati Kristo Yesu. 15Mumu kuliku kusengusa kwinu kula? pakuya niwalasila ulungamakiso kukita, wona yihotoleka, ngamukolombwili miho ginu ni kunipela. 16Wiwi wila nakitiki wa mitumba winu, pakukita niwajowela fya chakaka? 17Wawawonela mwenga wifu, nukuya munofu; lepa, walonda kuwadindisa nausi muwakise awa. 18Kiyii kinofu kwalalukila pa kindu kinofu pa lukumbi luyi lwoha, si kwakape apa niyii baha kwinu. 19Wana wangu wachoko, niyii kwinionganionga pa kuwahogola pa kawili, mpaka Kristo yaawumbike pa mwenga, 20ena, nganilonditi kutama baha kwinu hino, ni kung’anamusa kajoweko kangu; pakuya niganagana pa mwenga.
21Munijowele, mwenga mulonda kutama pasi pa torah, nukuyufwana torah? 22Pakuya yilembiki kukita Ibrahim akayili na wana wawili, yumonga pa mbanda nu yumonga pa nkamba. 23Koma uyu pa mbanda akahogoliki kwa ndingo wa nyama, leka yula pa nkamba pa kilago. 24Findu ifi fiyii fya lusumu: pakuya awa wayii filagano fiwili; yumonga kihumile pa kidunda Sinai, kuwahogola wana kwa uwanda, yuyu Hagar. 25Leka Hagar uyu ayii kidunda Sinai pa Arabia, iki kihwanakiso kya Yerusalem ya hino: pakuya ayii pa uwanda na wana mundu. 26Koma Yerusalem panani yiyii yakamba, yila nayombe nyongolo wa tenga. 27Pakuya yilembiki,
Usangaluke, ngida, wangahogola;
Ululute ni ukwese, wenga wanganionga‐nionga pa kuhogola:
Pakuya wana wa ngida wayii wa mahele kulutila yula ayii nu ngwanamundu.
28Leka tenga, walongo, kwa ndingo wa Isaak, tiyii wana wa kilago. 29Leka ngati umu bahalapala yula akahogoliki kwa ndingo wa nyama akamhyungiti yula akahogoliki kwa ndingo wa Roho, wiwi hino kawili. 30Koma kiki lijowa lilembo? untage kunja mbanda nu mwana mundu: pakuya mwana wa mbanda yayingile lepe lipwela pamonga na mwana wa nkamba. 31Mumu, walongo, tiyii lepa wana wa mbanda, koma wa nkamba.
Currently Selected:
Galatia 4: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.