Yohana 10
10
1Chakaka, chakaka, niwajowela, Uyu ayingila lepa pa ndyango wa kiwaya kya mambelele, koma akwela mungi mungi, ayii mwifi ni ndugu. 2Leka yuayingila pa ndyango ayii wakudima wawe mambelele. 3Nu yualindalila pa ndyango andindulila; na mambelele gayufwana njowelo yake: na agakemela mambelele gake mwene lihina kwa lihina, na agenda nago kunja. 4Baho apisiti gake goha, agalongolela, na mambelele gankisa yombe: pakuya gamanya njowelo yake. 5Leka ngeni yagankise lepa, koma yagantile: pakuya gamanya lepa njowelo yake ya ngeni. 6Ngongo iyi Yesu akawatawalili: leka wakawalalili lepa malowe maki gala akalongili nawo.
7Mumu Yesu akajowiti kwa wombe kawili, Chakaka, chakaka, niwajowela, Nenga niyii ndyango wa mambelele. 8Woha awa wakachiti palongolo pa nenga wayii wifi na walugu: koma mambelele gakawayufwini lepa. 9Nenga niyii ndyango: mundu wona ayingila pa nenga, yayokoke, na yayingile na yapite, na yapakolele pa lililo. 10Mwifi ahicha lepa, lema nausi ayiwile ngani, ni kudumula, ni kuyananga: nenga nikachiti nausi waye nako kulama, na waye nako kulutila. 11Nenga niyii wa kudima nnofu: wakudima nnofu awika wumi wake pa mhalo wa mambelele. 12Wa kumpembelela, nakuya wakudima mwene, mambelele nakuya gake mwene, alolalela kilugu kihicha, na agaleka mambelele, ni atila, ni kilugu kigakamula, ni kigayambanisa: 13pakukita wa kumpembelela ayii, ni nakuya kwa yombe kwa mambelele. 14Nenga niyii wakudima nnofu; ni nigamanya gangu, na gangu ganimanya nenga, 15ngati umu Dadi animanya nenga, na nenga nimmanya Dadi; nu wumi wangu niwuwika pa mhalo wa mambelele. 16Na mambelele gangi niyii nago, aga nakuya ga kiwaya iki: na gaga kawili nilinganila kugatola, ni yagayufwane njowelo yangu; ni yagaye lipuga limo, wakudima yumo. 17Ndawa iyi Dadi anigana nenga, pakuya niwika wumi wangu, nausi niwutole kawili. 18Pa waka mundu wa kuninyaka uwu, koma niwuwika nenga namwene. Niyii ni chengo kya kuwuwika, ni niyii ni chengo kya kuwutola kawili. Luwimbi ulu nikayupiti kuhuma pa Dadi wangu.
19Kukayili kawili mapatukano pa waYehudi kwa ndawa ya malowe aga. 20Leka wa mahele wa wombe wakajowiti, Ayii ni daimon, ni ayii wakupenga; kiki munjufwanila? 21Wangi wakajowiti, Aga nakuya malowe ga mwene daimon. Daimon ahotola ati kudindula miho ga wakukoyoka miho?
22Bahalapala likayili ligono likulungu lya kuwika pa sima pa Yerusalem: 23lukayili lukumbi lwa mbepo; nu Yesu akayili mu kugendagenda mu hekalu pa lufuka lwa Solomon. 24Mumu waYehudi wakansyungutili, ni wakajowiti kwa yombe, Mpaka lili utikangachakisa? Wona uyii Kristo, utitawile pa kwelu. 25Yesu akawahigiti, Nikawatawili, ni mukela lepa: makitiko aga nikita pa lihina lya Dadi wangu, gaga ganilungamakila nenga. 26Koma mwenga mukela lepa, ndawa muyilepe pa mambelele gangu. 27Mambelele gangu gayufwana njowelo yangu, ni nigamanya, na ganikisa nenga: 28na nigapela kulama kwa miaka; ni yagasowe lepa miaka ni miaka, na pa waka mundu yaganyake pa kiwoko kyangu. 29Dadi wangu, yuakanipili aga, ayii nkulungu kulutila woha; na pa waka wakuhotola kuganyaka pa kiwoko kya Dadi. 30Nenga nu Dadi tiyii yumonga. 31WaYehudi wakatondwili maganga kawili nausi wantumalile yombe. 32Yesu akawahigiti, Niwalasiti makitiko ga mahele manofu kipitile kwa Dadi; kwa ndawa ya lili lya aga munitumalila maganga? 33WaYehudi wakamhigiti, Tikutumalila lepa maganga kwa ndawa ya likitiko linofu, koma ndawa ya blasfemia; ni ndawa wenga, pakuya mundu, wikita Mulungu. 34Yesu akawahigiti, Si yilembiki pa torah yinu, Nenga nikajowiti, Muyii wakamulungu? 35Wona akawakemili wakamulungu wala likawafikili lilowe lya Mulungu (ni lilembo lihotola lepa kuwopoleka), 36wila munjowa uyu Dadi akambalisi ni kuntuma mu ndima, Ukita blasfemia; pakuya nikajowiti, Niyii na Mwana wa Mulungu? 37Wona nikita lepa makitiko ga Dadi wangu, musikela pa nenga. 38Leka wona nigakita, haka mulemiti kunikela, mugakele makitiko aga: nausi mumanyaye ni kuwalalila kukita Dadi ayii mugati mwangu, nu nenga mugati mwa Dadi. 39Wakalonditi kunkamula kawili: ni akapititi mu mawoko mwawe.
40Ni akabiti kawili lisi lila lya Yordan pandu pala akayili mu kubatisa Yohana pa kutumbula; na akahweliti kuko. 41Na wingi wakamhichili yombe; ni wakajowiti, Yohana akakiti lepa kiwalalilo: leka goha akajowiti Yohana ga uyu gayii ga chakaka. 42Na wingi wakakeliti pa yombe bahalapala.
Currently Selected:
Yohana 10: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
