Yohana 9
9
1Na pa kuluta pala akambweni mundu wa kukoyaka miho kihogolakile. 2Na wanafunsi wake wakankotiti, kujowa, Rabbi, nani akahokiti, uyu, pangi wakumhogola, ndawa ahogoliki wakukoyoka miho? 3Yesu akahigiti, Haka uyu, haka wa kumhogola wake wakahokiti lepa: koma nausi makitiko ga Mulungu galasike pa yombe. 4Ngatilinganili kuhenga mahengo ga uyu akanitumiti, pakuya musi: kilo kihicha, apa nakuya mundu ahotola kugahenga. 5Apa niyii pa ndima, niyii lulangalila lwa ndima. 6Apa akajowiti aga, akafunyiti mata pasi, nakakanditi lidupi na mata, nakambakisi lidupi na miho gake, 7nakajowiti kwa yombe, Bitaye ukakuse mu liliwa lya Siloam (pa kukokoseka, Wa kutumiwa). Mumu akawukiti, ni akakusiti, na akachiti kawili wa kulola. 8Mumu wenesi, wa wala wakandolalili mwandi, kukita akayili wa kuluwaluwa, wakajowiti, Si uyu yuatameye pasi ni kuluwa? 9Wangi wakajowiti, Yuyu ayii: wangi wakajowiti, Lepa, koma ahwanangana nako. Yuyulayula akajowiti, Nenga niyii. 10Mumu wakanjowili, Apa miho gako gadindulike wuli? 11Akahigiti, Mundu yuakemeleka Yesu akakiti lidupi, ni akanibakisi ku miho, ni akanitawalili kujowa, Bitaye ku Siloam, ukakuse: mumu nikabiti, nikakusiti, ni nikaloliti miho. 12Na wakajowiti kwa yombe, Ayii kuu yula? Ajowa, Nimanya lepa.
13Watola kwa waFarisayo yula wakukoyoka miho mwandi. 14Leka yikayili sabato ligono lyene lila Yesu akakiti lidupi, ni akadindwili miho gake. 15Mumu waFarisayo wakankotiti kawili yombe, akaloliti wuli miho. Leka akawatawalili wombe, Akalekili lidupi pa miho gangu, ni nikakusiti, ni nilola mu miho. 16Mumu wangi wa waFarisayo wakajowiti, Uyu nakuya mundu wa kwa Mulungu, pakuya agoha lepa sabato. Koma wangi wakajowiti, Ahotola wuli mundu mwene sambi kukita fiwalalilo fya ntundu uwu? Na gakayili mapatukano pa wombe. 17Mumu wanjowela wakukoyoka miho pa kawili, Ujowa wuli wenga ya yombe, pakukita akakudindulili miho gako? Na akajowiti, Wa kulweta ayii. 18Mumu waYehudi wakakeliti lepa ya yombe, kukita akayili wakukoyoka miho, ni akayupiti kulola miho, mpaka pala wakawakemili wa kumhogola wake wa yula wakulola miho, 19na wakawakotiti, kujowa, Ati uyu mwana winu ayii, uyu mujowa akahogoliki wa kukoyoka miho? mumu wuli alola hino? 20Mumu wakumhogola wake wakahigiti na wakajowiti, Timanya kukita uyu ayii mwana witu, ni kukita akahogoliki wa kukoyoka miho kihogolakile: 21leka wuli hino alolela, timanya lepa; haka nani akadindwili miho, timanya lepa: munkotaye mwene; ayii nkulungu; yalongele fya mwene wake. 22Wa kumhogola wake wakajowiti aga, pakukita wakawayogwipi waYehudi: pakuya waYehudi wakayitikasini, kukita wona mundu akeliti kukita yombe ayii Kristo, awusike pa sunagoge. 23Kwa ndawa iyi wahogosi wake wakajowiti, Ayii nkulungu; munkotaye mwene. 24Mumu wakankemili pa kawili mundu yula akayili wakokoyoka miho, na wakajowiti kwa yombe, Umpele Mulungu kukwisika: timanya tenga kukita mundu uyu ayii mwene sambi. 25Mumu akahigiti, Wona ayii mwene sambi, nimanya lepa: limonga nimanya, kukita, pakuya nikayili wa kukoyoka miho, hino nilola miho. 26Mumu wakajowiti kwa yombe, Akakutili kiki? akakudindulili wuli miho gako? 27Akahigiti kwa wombe, Nikawatawalili hino apa, na mwenga mukayufwini lepa: kiki mulonda kuyufwana kawili? na mwenga mulonda kutama wanafunsi wake ati? 28Na wakandogiti yombe, kujowa, Wenga uyii mwanafunsi wake; leka tenga tiyii wanafunsi wa Musa. 29Timanya kukita Mulungu alongeleye nako Musa: koma uyu, timanya lepa uku ahumila. 30Mumu yula akahigiti nakajowiti kwa wombe, Baha payii kinyantiti, kukita mwenga mumanya lepa ayii kuhuma kuu, na akanidundulili miho gangu. 31Timanya kukita Mulungu awayufwana lepa wanya sambi: koma mundu wona ayii wakungwilakimbo Mulungu, na akita fila alonda, yuyu anjufwanila. 32Kitumbulile kuupanga ndima yiyufwaniki lepa kukita mundu akadindwili miho ga uyu akahogoliki nkoyo. 33Wona uyu akayili lepa wa kwa Mulungu, ngahotwili lepa kukita kindu. 34Wakahigiti na wakajowiti kwa yombe, Pa sambi patupu ukahogoliki wenga, na uyii mu kutiwula tenga ati? Na wakantagiti kunja.
35Yesu akayufwini kukita wakantagiti kunja; na pakankolili, akajowiti, Ukela ati pa Mwana wa Mulungu? 36Na akahigiti, nakajowiti, Nu nani ayii, Bambo, nausi nikele pa yombe? 37Yesu akajowiti kwa yombe, Kwa naha umbweni yombe, na uyu wakulongela nu wenga ayii yuyulayula. 38Na akajowiti, Nikela, Bambo. Na akangwilikimbo. Nu Yesu akajowiti, 39Kwa kupaula nenga nikachiti pa ndima uwu, nausi wala wangalola walole miho; na wala wakulola miho waye wakukoyoka miho. 40Wangi waFarisayo wala pamonga nuyombe wakayufwini aga, na wakajowiti kwa yombe, Na tenga nati tiyii wa kukoyoka miho ati? 41Yesu akajowiti kwa wombe, Wona mukayili wa kukoyoka miho, ngamuyili lepa ni sambi: leka hino mujowa, Tilola miho: sambi yinu yihwela.
Currently Selected:
Yohana 9: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
