Mattayo 24
24
1Nu Yesu akapititi mu hekalu, na akayili mukubita mwanja; na wanafunsi wake wakanchilili kundasa majengeko ga hekalu. 2Leka akahigiti kuwajowela, Muwona lepa ifi fyoha? Chakaka niwajowela, Yalilekeke lepa liganga panani pa liganga ili lyangabomoleka pasi.
3Leka pakutama yombe panani pa kidunda kya Miseituni, wakanchilili wanafunsi wake pa mweya, kujowa, Utitawalile, findu ifi yafiye ndali? na kiki kiwalalilo kya kuhicha kwako baho, ni kya kumalakila kwa miaka? 4Nu Yesu akahigiti ni kuwajowela, Mulolaye wicho mundu asiwasowesa mwenga. 5Pakuya wingi yawahiche pa lihina lyangu, kujowa, Nenga niyii Kristo; ni yawasowese wa mahele. 6Leka yamuyufwane fya ngondo nu mbili sya ngondo: mulolaye mukotoke kuwinisiwa mwoyo: pakuya ngafikayili kuya; koma kumalakisa kwakona. 7Pakuya mhuku yauwuke kubelelela mhuku, nu utwa kubelelela utwa: na yauye ulali ni finyukunyuko pangi pangi. 8Leka ifi fyoha ndumbulo ya mahumbuso. 9Bahalapala yawawafumbule kwa mahumbuso, ni yawakome mwenga: ni yamuye wakuwipalika ni mihuku yoha ndawa ya lihina lyangu. 10Na bahalapala yawakuwasike wingi, na yawafumbulane yungi ni njini, ni yawawipilane. 11Na yawayimuke wingi wakulweta wa mageya, ni yawasowese wingi. 12Na ndawa usokosi yaufuluke, kiganano kya wingi yakisisime. 13Leka uyu ayumalakila mpaka pa kumalakisa, yuyu yayokoleke. 14Na evangel iyi ya utwa yayiwandasike pa ndima woha kwa ulungamakiso kwa mihuku yoha; na bahalapala yauyiche umalilo.
15Mumu apa yamukiwone kyakuwipisa kya mahami, kila kikajowiki ni wakulweta Daniel, kiyimile pandu papakape (yula asoma amanyaye), 16bahalapala wala wayii pa Yudaya wakimbilile ku fidunda: 17uyu ayii panani pa king’ango asiselela kutola fya mu nyumba mwake: 18na yula ayii pa ngunda asikilawukila panyuma kutola mwingila wake. 19Leka ling’aho kwa wala wayii ni neme na kwa wala wayongesa pa magono galagala. 20Leka musalaye kukita kukimbila kwinu kusitama lukumbi lwa kipepo, haka pa ligono lya sabato: 21pakuya bahalapala yaliye lihumbuso likulungu, ili nakuwoneka lepa kitumbulile ndumbulo ya ndima uwu mpaka hino, haka yaliwoneke lepa kawili. 22Na wona galema kukepakeka magono gala, nyama iyi yoha ngayiyokoliki lepa: koma ndawa ya wala wakuhagulika magono gagala yagakepakeke. 23Bahalapala wona mundu yawajowele, Lola, apa Kristo, pangi, Uku; musinjitakila. 24Pakuya yawayumuke waKristo wa mageya, na wakulweta wa mageya, na yawalase fiwalalilo fikulungu ni finyantiti; mpaka kusowesa, wona yihotoliki, wakuhagulika nawombe. 25Lola, niwatawalili palongolo. 26Mumu wona yawatawalile mwenga, Lola, ayii pa mapululu; musipita: Lola, ayii pa fimbetula; musikela. 27Pakuya ngati umu mbamba yipita kihumile ku mpungu, ni kuwonakela mpaka ku chombe; wiwila yakuye kuyicha kwake Mwana wa adam. 28Payi poha payii ntufi, bahalapala manyansimula yagakokane pamonga.
29Leka hino apa, panyuma pa mahumbuso ga magono gagalagala, lijuwa yalilekeleke lwisi, nu mwesi nakumulika lepa lulangalila lwake, ni ndondo yasigwe kuhumila kunani, ni mbafu sya kunani yasipugane: 30na bahalapala yakiwoneke kiwalalilo kya Mwana wa adam kunani: na bahalapala misafi yoha ya pa ndima yayipumunde pa kifimba, na yawambone Mwana wa adam ni ayicha pa mafundi ga kunani pamonga ni mbafu ni kukwisika kukulungu. 31Na yatume wamalaika wake ni mbata ngulungu, na yawakokanise pamonga wakuhagulika wake kihumile mbepo ncheche, kihumile songo sya kunani mpaka songo siyini.
32Leka mwiyigalise kuhuma pa nkuyu ngongo yake: apa lutafi lwake luyii lulegalefu, ni mahamba gake gatuka, muwalalila kukita kifuku kiwandamila; 33wiwila nu mwenga kawili, baha yamuwone findu ifi fyoha, muwalalile kukita ayii papipi, pa ndyango pene. 34Chakaka niwajowela, Kihogosi iki nakulutila lepa, mpaka baha findu ifi fyoha yafipate kuya. 35Kunani nu ndima yakulutile ngani, koma malowe gangu nukulutila ngani lepa. 36Leka ligono lililalila nu saa yake pawaka mundu wa kumanya, haka wamalaika wa kunani, haka Mwana, lema Dadi wakape. 37Ni ngati umu pa magono ga Noah, wiwila yakuye kufika kwake Mwana wa adam. 38Pakuya ngati pa magono gala palongolo pa liwumbu wandu wakayili kulya na kunywa, kutuwula ni kutuwukisa, mpaka pa ligono lila pala Noah akayingili mu ligalawa, 39na wakawalalili lepa mpaka pala machi ga liwumbu gakachiti ni kuwakukulula woha; wiwila yakuye kuyicha kwake Mwana wa adam. 40Bahalapala yawaye wawili pa ngunda; yumonga atoleka, ni yumonga alekeka: 41wadala wawili pa lwala kusiaga; yumonga atoleka, ni yumonga alekeka. 42Mumu mutame miho: pakuya mumanya lepa ligono wuli yahiche Bambo winu. 43Koma mumanya iki, kukita wona mwene nyumba ngamanyiti lukumbi wuli lwa kulindilana yahiche mwifi, ngatemi miho, leka ngaayitakili lepa nyumba yake kubomoleka. 44Ndawa iyi mwenga kawili muye tayari: ndawa pa saa yila muholalela lepa ahicha Mwana wa adam. 45Nani ati ayii mbanda wakukeleka nu wa luhala, yula bambo mundu ambikiti panani pa wa pa nyumba yake, kuwapela kyakulya kyawe pa lukumbi lwake? 46Anya kihomo mbanda yula, uyu bambo mundu pa kuhicha yankolele akita wila. 47Chakaka niwajowela, kukita yambike panani pa fyoha fila ayii nafyo. 48Koma wona mbanda yula mbifu yatawile mu mwoyo wake, Bambo wangu asyela; 49na yatumbule kuwatowa wawanda wayini, na yalye ni yanywe pamonga na wakugala ugimbi; 50yayiche bambo wa mbanda yula ligono lyangaholalela yombe, na pa saa yila awalalila lepa, 51na yampingule pagati, ni kumbika lilundu lyake pamonga na wakwikangalakisa: pala yakuye kulila ni kugogodola mino.
Currently Selected:
Mattayo 24: MGS1937
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1937.
