Matius 21

Yesus doꞌia-iaꞌe we kota Yerusalem

21:1-11

Mrk 11:1-10; Luk 19:28-38; Yoh 12:12-15

1Yesus bhe anaguhuꞌino domaꞌomo we Yerusalem. Dohato we liwuno Betfage te kabhawono Zaitun, Yesus notudumo anaguhuno dohodua damaꞌindulu. 2Nofohatoda ambano, “Kalaomu we liwu te wise watu, ne itu lasao mohaomu seꞌulu keledai hobhine dotapue bhe anano ne owano. Lenseomu katapuno maka tonda kanaꞌeomu se ini. 3Ane bhe so meenano, tatobhoosimoomu putae nofaraluuꞌe Ompu, ingka pae naomponaa namosuliemo dua.”

4Aini nokadhadhia mbali nokoꞌulaꞌao bhoasaono Lahataꞌala nefosampeno anabii peda aini,

5“Fohatodaomu mieno kotano Sion,

‘Ondoeꞌomu! Omputomiu nomaiꞌikoomu.

Nomalu lalono, nosawi ne keledai,

anano keledai meangkuno wowoꞌo.’ ” #Yes 61:11; Zak 9:9

6Anaguhuꞌino maitu dokalamo, doangkafi peda netuduꞌaono Yesus. 7Hato dosuli detondamo keledai hobhine bhe anano. Pada aitu towuno keledai naꞌa dolempesianemo pakeando maka Yesus nengkoha te wawono. 8Dobhahi sepaliꞌa mie dotalesao pakeando ne kaangkaꞌa. Nandoo dua mekapesino haꞌando sau maka dotalesaane ne kaangkaꞌa. 9Mie bhahi maꞌinduluno bhe mangkano kundo doꞌia-iaꞌe ambado,

“Hosana, sampuꞌano Daud!

Notibarakati humatono weo neano Ompu.

Hosana, pudhi kaitaomu Ompu Lahataꞌala te wawono wawo!” #Mzm 118:25-26

10Sanopesua weo kotano Yerusalem, mieno kota tadohialelemo ambado, “Laꞌae bhahaa mie aini?” 11Mie bhahi maitu dotobhoosi ambado, “Ainiꞌaemo anabii Yesus maiꞌaono we liwuno Nasaret, we kadieno Galilea.”

Yesus nogihasi podaoano weo Lambuno Lahataꞌala

21:12-17

Mrk 11:15-19; Luk 19:45-48; Yoh 2:13-16

12Pada anaꞌa Yesus nopesuamo weo kadeteno Lambuno Lahataꞌala, maka nogihasi sabhaha mie podaoano ne itu. Medhando mebhase-bhaseno dhoi bhe bhangko-bhangkondo mahaasono dhaadhaha nobhansualeda. 13Yesus nofohatoda ambano, “Nandoo tibuhino weo Kitabi peda aini, ‘Lambuku dakumonae lambu kasambaheaꞌa, tamaka hintimiu habueꞌomu mbali lia kaꞌonuꞌando mie modai.’ ” #Yes 56:7; Yer 7:11

14Pada aitu domaimo mie kabunto bhe kakempa ne Yesus weo Lambuno Lahataꞌala naꞌa, maka nofekaꞌosada. 15Tamaka neangkando imamu bhe pande-pande Kitabi nohehewu sepaliꞌa lalondo dowoha sabhaha giu timenteꞌaono nehabuno Yesus maitu. Sedhuluꞌa dua kahehewuno lalondo mbaꞌinomo kaana-anaꞌi weo Lambuno Lahataꞌala dopokakei-kei ambado, “Hosana, sampuꞌano Daud!” 16Dopugaumo ne Yesus ambado, “Fetingkee bhahaa pugaundo kaana-anaꞌi ini?” Ambano Yesus, “Afetingkee. Miinaꞌo basaeꞌomua gahaꞌa aeati peda aini, ‘Padamo mefontaa-ntaa kaana-anaꞌi bhe anaꞌi nandoo tumitino so mefoampeno lagu-lagu kapudhi.’ ” #Mzm 8:2 17Pada nopugau peda aitu, Yesus nohunsadamo, nokala te liwuno Betania maka noodo ne itu.

Yesus nebhatataꞌiao puꞌuno ara

21:18-22

Mrk 11:12-14, 20-26

18Nandoo hangko-hangkowine Yesus nosulimo toha we kota, gahaꞌa noꞌahomo. 19Ne wiwino kaangkaꞌa naꞌa Yesus nowohamo puꞌuno ara. Nokalamo nofeꞌondoe, gahaꞌa miina nakobhakea, taꞌo hoo. Nopugaumo ne sau maitu ambano, “Hintu ini paemo kobhakea suhue dhamani.” Puꞌuno ara aitu lasao nokekele. 20Dowoha kadhadhia aitu anaguhuꞌino tadomente bhe dopugau ambado, “Peda ae puꞌuno ara maitu tadua nokekelemo?” 21Ambano Yesus, “Amohatokoomu, kotu-kotuꞌu ane marasaeaꞌomu bhe paise poibhahaomu, tetewei mooliomu dua mehabuomu peda nehabuku ne puꞌuno ara maitu. Bhahamoa suano kaowu taꞌo anaꞌa, tamaka mahingga pugauꞌomu ne kabhawo aini, ‘Sangke wutomu maka oho wutomu we teꞌi’, tetewei nakumadhadhia. 22O ae maka dua nemesalomiu weo sambaheamiu, tetewei umawaeꞌomu, sumanomo kotu-kotuꞌu parasaeaꞌomu.”

Dofeenaꞌao kuasano Yesus

21:23-27

Mrk 11:27-33; Luk 20:1-8

23Yesus nopesuamo toha weo Lambuno Lahataꞌala. Tangasano nofofoinaꞌu ne itu domaimo neangkaꞌindo imamu bhe kamu-kamungkulaꞌindo Yahudi dofeena ambado, “O ae gahaꞌa kaengkohaꞌano kuasa mehabu sabhaha timenteꞌaono maitu? Nofopooliko laꞌae bhahaa?” 24Yesus tanotobhoosida ambano, “O Idi ameena dua. Ane tumobhoosi kanauꞌomu, amohatoangkoeꞌomu dua kaengkohaꞌano kuasaku. 25Nomaiꞌao ne amai bhahaa kuasano Yohanes nofokadiu? Nomaiꞌao ne Lahataꞌala bhahaa nomaiꞌao ne manusia?” Pada aitu dopuga-pugaumo sapada-pada andoa, ambado, “Ane damugauꞌomu nomaiꞌao ne Lahataꞌala tetewei namugau, ‘Noafa gahaꞌa miina marasaeaꞌaneomua?’ 26Tamaka ane damugauꞌomu nomaiꞌao ne manusia, beano daoteꞌiomu mie bhahi, kapaꞌamo kosasawindo mie doabhi Yohanes maitu seemie anabii.” 27Pada aitu dotobhoosimo ne Yesus ambado, “Miina tamandeꞌaanea.” Ambano dua Yesus, “Ane peda itu, paise dua amohatokoomua kaengkohaꞌano kuasaku aehabu sabhaha timenteꞌaono maitu.”

Kapalendano dohodua anaꞌi

21:28-32

28Ambano toha Yesus, “Peda amai fekihimiu ane peda aini? Nandoo seemie ama bhe ana moꞌaneno dohodua. Nokalamo ne anano titiisa maka nopugau ambano, ‘Anaku, seꞌoleo itu kala kahadhaa kaita te kaampono angguru.’ 29Anano naꞌa notobhoosi, ‘Uumbe ama’, tamaka miina nakumalaa. 30Pada aitu amando naꞌa nopugaumo dua ne aino peda pugauno ne isano saꞌituini. Anano naꞌa tanotobhoosi, ‘Akiido akumalaa’, tamaka gahaꞌa nososo lasao nokala. 31Laꞌae bhahaa anaꞌi hoduano maitu mangkafino kapoindalono amando?” Dotobhoosimo mie andoa naꞌa ambado, “Membalino ai.” Ambano Yesus, “Amohatokoomu, kotu-kotuꞌu mealaꞌino sewa bhe karambole damaꞌindulu damesua weo Kafopahintaꞌano Lahataꞌala bhe hintimiu ini. 32Kapaꞌamo Yohanes nomai nofotiwohaangkoomu kaangkaꞌano dadi metaa, tamaka miina marasaeaꞌeomua, gahaꞌa mealaꞌino sewa bhe karambole doparasaeaꞌe. Tamaka hintimiu, mahinggamo wohaeꞌomu peda maitu, miina sumosoomua, miina dua marasaeaꞌomua.”

Kapalendano kumahadhaano te kaampono angguru

21:33-46

Mrk 12:1-12; Luk 20:9-19

33“Fetingkeomu dua kapalenda aini. Nandoo seemie kafeompuꞌa nelengka kaampo, nokantisaane angguru maka nopagalae fato-fatowalaꞌae. Neseliane dua bhe kantobha kaefeoꞌano angguru bhe nefoeheane kapala kaedhaganiꞌa. Pada aitu neponambomo mie so kumahadhaano kaampo naꞌa, maka nokala we koliwuno.

34Nomaꞌo tempono foꞌonuꞌano pehapi, netudumo bhatuano dokala te kumahadhaano naꞌa damala dawuno kafeompuꞌando. 35Tamaka kumahadhaano maitu tadohako bhatuano naꞌa; sigaꞌa dopepekida, sigaꞌa dopongkoda, sigaoꞌano dobhatumbulianda kontu. 36Pada aitu kafeompuꞌa naꞌa notudumo dua bhatuano sigaoꞌano, sedhuluꞌa dua kabhahindo. Tamaka andoa ini dohabuda dua peda sabhangkaꞌindo maꞌinduluꞌano. 37Panda-pandano kafeompuꞌa naꞌa notudumo anano. Weo fekihino, ‘Anaku ini daengatie.’ 38Tamaka gahaꞌa sadowoha anano kafeompuꞌando, kumahadhaano maitu dopugaumo sapada-pada andoa, ambado, ‘Ananomo ini so kohakuꞌaono kahunsaꞌaono. Dopongkoeꞌanaomu, neanomo kahunsaꞌaono somo intaodiomu.’ 39Lasao dohakoe, doꞌohoe we kundo ala maka dopongkoe.

40Nahumato kokaampono naꞌa, namafaꞌianda bhahaa kumahadhaano maitu?” 41Dotobhoosie ambado, “Mie modai naꞌa namongkoda. Kaampono naeponamboane dua mie sigaoꞌano so maꞌane dawuno nahumato tempono foꞌonuꞌano pehapi.” 42Ambano Yesus, “Miinaꞌo basaeꞌomua gahaꞌa tibuhino weo Kitabino anabii peda aini,

‘Kontu neꞌohondo mefelambuno,

gahaꞌa nembalimo sandi bhalano.

Kapedaꞌano naꞌa hampano kuasano Ompu,

wohaꞌano giu timenteꞌaono.’ #Mzm 118:22-23

43Dadiꞌanomo, amohatokoomu, hakumiu weo Kafopahintaꞌano Lahataꞌala namalae Lahataꞌala, maka namaꞌandae bansano liwu sigaoꞌano so dhumalangino pahintano. 44[Mondawuno te wawono kontu aitu naowita, nendawutino kontu aitu naopuho.]”

45Dofetingke sabhaha kapalendano Yesus naꞌa, neangkaꞌindo imamu bhe miendo Farisi dolosangie, ingka andoamo nepulaoꞌaono maitu. 46Dadiꞌanomo dokopatudhu dahumakoe tamaka doteꞌi mie bhahi, kapaꞌamo mie bhahi maitu doabhi Yesus seemie anabii.

Currently Selected:

Matius 21: mnbSD

Highlight

Copy