Matius 28

Kawanuꞌano Yesus.

28:1-10

Mrk 16:1-8; Luk 24:1-12; Yoh 20:1-10

1Nopalusi oleono Sabat, saowalano kamentae ne oleono Ahadhi, Maria Magdalena bhe Maria sigaoꞌano dokalamo daꞌumondo kobuhuno Yesus. 2Gahaꞌa tambaꞌomo nandoo luali moꞌosa, mbaꞌinomo seemie malaꞌekatino Ompu nosampu nomaiꞌao te surugaa, nokala nodole kontu kasongkono kobuhu maka nengkoha te wawo. 3Ulano nokotilanga pasae bhibhito, pakeano nopute peda kambano kapa. #28:3 Sakotuꞌuno: nopute peda salju. 4Tantara dhumagano ne itu nohengkuda kateꞌindo sampe dotiwata pasaꞌida mie mate.

5Tamaka malaꞌekati amaitu nopugaumo ne hobhineꞌi anaꞌa ambano, “Hintimiu, koise moteꞌiomua! Ingka apandeꞌaane ondofiomu Yesus tikantaiꞌano te sau salipu. 6Miinamo bhe anoa ne ini. Nowanumo maiꞌao ne mate pedamo pugauno endefiꞌini. Mai ondoeꞌomu kandoleꞌano. 7Aitu lasao kalaomu maka fohatoomu anaguhuꞌino putae Yesus nowanumo maiꞌao ne mate. Anoa nopaꞌindulukikoomu we Galilea. Ne tatu mohaemoomu. Tandaiꞌeomu, ingka padamo afohatoangkoeꞌomu inia.”

8Dofetingke peda naꞌa, lasao dohunsa kobuhu naꞌa bhe dotende damohato anaguhuꞌino. Ponamisindo doteꞌi tamaka doꞌia dua sepaliꞌa. 9Gahaꞌa tambaꞌomo nosumpuida Yesus bhe nofeabhada ambano, “Kabarakati so hintimiu.” Lasao domaꞌotie, dosudhu dohako aꞌeno bhe dotaohao sombado. 10Nopugaumo dua Yesus ambano, “Koise moteꞌiomua, kala fohatoomu bhahitieꞌiku dakumala we Galilea, ne tatu damoha kanaumo.”

Pahando Sahano Agama.

28:11-15

11Tangasano hobhineꞌi saꞌituini we laano sala, tantara dhumagano dosulimo we kota detula-tulaꞌao kosasawiꞌae kumadhadhiaꞌano naꞌa ne meangkaꞌindo imamu. 12Pada dopugau-gau bhe kamungkulaꞌi dobhotuꞌaomo tantara maitu dowaꞌanda dhoi dofekabhahie, 13bhe dopugauanda ambado, “Pugauꞌomu putae anaguhuꞌino dosoꞌo maeatino Yesus tangasano moodomu. 14Ane nametingke gubernur, madaꞌo tamohatoe insaodi so nomaluꞌao lalono, keana nokakenda-kenda handamiu.” 15Tantara maitu doalamo dhoi anaꞌa maka defolele peda kaowilindo kamungkulaꞌi saꞌituini. Tula-tulamo anaꞌa lumeleꞌano ne miendo Yahudi taꞌampamo haꞌoleo ini.

Pahinta daefolele Bhihita Metaa

28:16-20

16Pada aitu anaguhuꞌino ompulu seemieno dokalamo we Galilea, te kabhawo toka nefotantuno endefiꞌini. 17Hato dowoha Yesus ne itu, dosudhumo dotaohao sombado, tamaka nandoo dua poibhahano. 18Yesus nomaꞌotidamo bhe nopugau ambano, “Sabhaha kuasa te surugaa bhe we dhunia ini nowaꞌa kanaꞌe Amaku. 19Dadiꞌanomo kalaomu, owadaomu sabhaha bansano liwu daembali anaguhuꞌiku. Kadiudaomu, weo neano Ama bhe Ana bhe Rohino Lahataꞌala. 20Foinaꞌudaomu damangkafi sabhaha pahinta nefohatoꞌaoku ne hintimiu. Maka tandaiꞌeomu, sadhia apobhaiangkoomu ampa kafetompaino dhamani.”

Currently Selected:

Matius 28: mnbSD

Highlight

Copy