Markus 3

Yesus nefekaꞌosa mie ne oleono Sabat

3:1-6

Mat 12:9-14; Luk 6:6-11

1Palusi anaꞌa Yesus nopesuamo toha weo lambu kasambaheaꞌa. Ne itu nandoo seemie nokepe limano sembali. 2Nandoo dua mie moti-motindano Yesus, bhahaꞌi kaowu mie amaitu namekaꞌosae dua ne oleono Sabat; patudhundo damoꞌalae. 3Yesus nopugaumo ne mie mokepeno lima maitu ambano, “Mai, meehe-ehe te wise ini!” 4Pada aitu Yesus nofeenadamo ambano, “Weo tubhono agamantoomu nembali dehabu ae gahaꞌa ne oleono Sabat? Habu metaa kaa habu modai? Dafofodadi kaa dafopongko?” Tamaka andoa maitu miina dakodiua.

5Yesus noꞌamaha poowa nofolilianda matano, tamaka nobhelaanda dua lalono hampano katuꞌano fotundo. Pada aitu nopugaumo ne kepe saꞌituini ambano, “Fonsoho limamu!” Mie aitu nofonsoho limano, gahaꞌa lasao noꞌosa. 6Pada anaꞌa miendo Farisi maitu dolimbamo, lasao dokala dopugau-gau bhe mieno kolaki Herodes so damongkoꞌao Yesus.

Dobhahi mie nefekaꞌosano Yesus

3:7-12

7Yesus bhe anaguhuꞌino dofogaati wutondo we wiwino teꞌino Galilea. Dobhahi sepaliꞌa mieno Galilea mangkafino Yesus. Dobhahi dua maiꞌaono we kadieno Yudea, 8maiꞌaono we Yerusalem, maiꞌaono we kadieno Idumea, maiꞌaono we sewetano umeleno Yordan, bhe maiꞌaono dua we kadieno Tirus bhe Sidon. Kahatoꞌando mie bhahi ini, mbaꞌinomo dofetingke sabhaha giu nehabuno Yesus. 9Yesus notudumo anaguhuꞌino daefontaa-ntaaꞌane bhangka so kasawiꞌano, kapaꞌamo o mie dobhahi sepaliꞌa, bhahaa dodhumpuhaane. 10Nobhahi sepaliꞌa nefekaꞌosa mie mosakino, sampe mie mosakino dopodhumpu-dhumpuhao domaꞌoti Yesus dakumadampaeꞌao. 11Taenomo mie nepesuakino seetani dowoha Anoa, dosudhu ne wiseno bhe dokei, “Hintumo Anano Lahataꞌala.”

12Tamaka Yesus noꞌeleꞌaanda sepaliꞌa seetani andoa naꞌa damohato mie sigaoꞌano, bhahaꞌi laꞌae Anoa maitu.

Yesus nepili doompulu hodua anaguhuꞌino

3:13-19

Mat 10:1-4; Luk 6:12-16

13Pada anaꞌa Yesus nofonimo te kabhawo, maka nosaliꞌi mie so nepilino. Andoa naꞌa dokalamo se Anoa, 14maka nefotantu doompulu hodua so pobhaiane. Andoa ini notududa daefolele Bhihita Metaa. 15Yesus nowaꞌanda dua kuasa daefolimba seetani.

16Neando anaguhu nepilino ompulu hoduano maitu: Simon, nokonae dua Petrus, 17Yakobus, anano Zebedeus, bhe Yohanes kakutaꞌano Yakobus, andoa ini nokonada dua Boanerges, maꞌanano domansolumbu, #3:17 Maꞌanano Boanerges sakotuꞌuno anano guntu. 18Andreas, Filipus, Bartolomeus, Matius, Tomas, Yakobus anano Alfeus, Tadeus, Simon miendo Zelot, #3:18 Miendo Zelot naꞌa dokopatudhu damobebasi witeno Israel maiꞌao ne kafopahintaꞌano Roma. 19bhe Yudas Iskariot. Anoamo ini mowano Yesus ne limando kaewa.

Yesus dosangkatie nepake kuasano seetani

3:20-30

Mat 12:22-32; Luk 11:14-23

20Nopalusi anaꞌa Yesus nosulimo se lambu. Mie bhahi domaimo toha dopofoꞌo-foꞌonu, sampe Yesus bhe anaguhuꞌino miinamo datolala daomaa. 21Dofetingke peda anaꞌa, domaimo bhahitieꞌino damalae, kapaꞌamo ambado, “Ingka nobheemo.”

22Pande-pande Kitabi maiꞌaono we Yerusalem dopugaumo dua ambado, “Anoa ini nopesuakiemo Beelsebul, Kafeompuꞌando seetani. Dadiꞌanomo ane nefolimba seetani nepake kuasano Kafeompuꞌando seetani.”

23Yesus nosaliꞌimo mie bhahi maitu, maka nopugau nepakeanda kapalenda. Ambano, “Nameda amai gahaꞌa Kafeompuꞌando seetani naefolimba seetani? 24Ane mie neowano seemie omputo pae daseꞌise, liwu aitu pae natumahaa. 25Pedamo dua aitu, ane mie weo lambu seꞌonu pae daseꞌise, tamaka sadhia dapogiha-giha, polambu aitu pae natumahaa. 26Ane Kafeompuꞌando seetani namewangi wutono, o seetani dapoewa-ewangi, teteweimo kuasano seetani pae natumahaa, naosalimo.

27Pae naembali daepesuaki lambuno mie moꞌosa darumampasi arataano, ane pae datumapu kadeki kolambuno. Mada datumapue, makaneꞌo naembali darumampasi arataano.

28Amohatokoomu, kotu-kotuꞌu kosasawiꞌae dhosa bhe sabhaha kafekaꞌaebundo manusia, naembali natiꞌamponi. 29Tamaka ane dofekaꞌaebu Rohino Lahataꞌala, pae sepaliꞌa natiꞌamponia. Kapaꞌamo kafekaꞌaebu medando aitu, dhosa suhue dhamani.” 30Kapugauꞌano peda naꞌa mbaꞌinomo nandoo mugauno, “Anoa ini nopesuakie seetani.”

Inano bhe bhahitieꞌino Yesus

3:31-35

Mat 12:46-50; Luk 8:19-21

31Pada anaꞌa dohatomo inano bhe bhahitieꞌino Yesus. Andoa deehe-ehe we simbalino lambu, maka detudu mie dalumoꞌoi Yesus. 32Wakutuu anaꞌa dobhahi mie mengkoha-ngkohano dolibu-libue. Ambado mie maitu, “Guru, inamu bhe bhahitieꞌimu we simbalino lambu, doꞌondofiko.”

33Yesus tanotobhoosida ambano, “Laꞌae gahaꞌa inaku? Laꞌae bhahaa bhahitieꞌiku?” 34Nofolilimo matano ne mie lumibu-libue maitu maka nopugau, “Ainiꞌadamo inaku bhe bhahitieꞌiku. 35Laꞌae-laꞌae meangkano ne pahintano Lahataꞌala, anoamo itu bhahitieku moꞌane, bhahitieku hobhine, anoamo itu dua inaku.”

Currently Selected:

Markus 3: mnbSD

Highlight

Copy