Markus 7

Pahintano Lahataꞌala bhe adhatindo Yahudi

7:1-13

Mat 15:1-9

1Sepaku miendo Farisi bhe pande-pande Kitabi maiꞌaono we Yerusalem domai dopoꞌawaꞌao Yesus. 2Gahaꞌa dowohamo seemie hodua anaguhuꞌino tadohumaamo mahingga limando miina naongkilo. Maꞌanano miina daewanua ⸤ peda atorano agamando⸥ .

3Kapaꞌamo miendo Farisi, pedamo dua miendo Yahudi sigaoꞌano, miina daomaaꞌa ane miinaꞌo daewanu kadeki ⸤ peda atorano agamando⸥ . Andoa dofintahaki sepaliꞌa adhatindo kamungkulaꞌindo. 4Ane dosuli domaiꞌao we daoa, miinaꞌo kadeki naembali dohumaa, simbali padamo dofekanggela wutondo peda atorano agamando. Nobhahi dua adhati sigaoꞌano nefintahakindo, peda ibahano deꞌomesi kampohoꞌuꞌa, kampomaaꞌa bhe sabhaha katoka maiꞌaono ne tambaga.

5Dadiꞌanomo dofeenamo ne Yesus, ambado, “Noafa gahaꞌa anaguhuꞌimu miina damangkafiꞌao adhatindo kamungkulaꞌintoomu? Ingka tadohumaamo, limando miina naongkilo.”

6Yesus notobhoosidamo ambano, “Nokotuꞌumo pugauno anabii Yesaya nopulaoꞌao hintimiu ini, mie mehaaꞌulano! Kapaꞌamo nandoo tibuhino weo Kitabino peda aini,

‘Mie andoa ini dosombai kanau kaowu ne wiwindo,

tamaka totono lalondo nokodoꞌo bhe Idi.

7Miina nakoꞌuluꞌaa dosombai kanau,

mbaꞌinomo dofofoinaꞌuao pahintano manusia.’ #Yes 29:13

8Pahintano Lahataꞌala miinamo moheruaneomu, maka tafosibhalaomu adhatindo manusia.”

9Ambano toha Yesus, “Ingka kapandemiu, hunsaeꞌomu pahintano Lahataꞌala, so namatangkaꞌao adhatimiu. 10Kapaꞌamo nandoo pahintano anabii Musa, ‘Fosibhalae inamu bhe amamu. Mie meꞌawutino inano bhe amano tabeano damekamatee.’ #Kel 20:12, 21:17; Ul 5:16 11Tamaka hintimiu fofoinaꞌuomu peda aini, ‘Ane o mie nopugau ne inano bhe amano, ‘Kanandooku so atumanggoꞌao hintimiu nembalimo kapopanga so Lahataꞌala’, 12maka mie aitu paemo naoafaa ane pae natumulumi inano bhe amano.’ #7:11-12 Kapopanga medano aini dokonae korban wakutuu anaꞌa. Kanandoodo tadosambilimo putae naembali kawaꞌao so kahadhaano Ompu. Dadiꞌanomo dobebasimo ne takando doꞌondofao kamungkulando. Gahaꞌa dhoi aini miina damaꞌane Ompu, tamaka tadopakemo mbali kafaraluuno wutondo. 13Ane peda anaꞌa ingka songkoemoomu bhoasaono Lahataꞌala, songkoaneomu adhati nefintahakimiu itu. Nobhahi giu pedando itu nehabumiu.”

O giu fofekaharamuno

7:14-23

Mat 15:10-20

14Pada anaꞌa Yesus nosaliꞌimo toha mie bhahi maka nopugau ambano, “Kosasawimiu, fetingkeeꞌomu pugauku ini bhe hunsaeꞌomu weo totono lalomiu! 15O ae maka mesuaꞌano we lalondo manusia miina nafofekaharamua, tamaka o ae lumimbaꞌano maiꞌaono we lalondo manusia, aituꞌaemo fofekaharamunoa. 16[Ane dokotingala, tabeano dametingke.]”

17Nopesua kaowu weo lambu bhe nopogaati bhe mie bhahi, anaguhuꞌino dofeenaꞌaomo maꞌanano kapalenda saꞌituini. 18Yesus notobhoosidamo ambano, “Gahaꞌa, hintimiu ini miina dua lumosangieꞌomua? Miina mandeꞌaaneomua gahaꞌa oti mesuaꞌano we lalondo manusia miina nafofekaharamua, 19mbaꞌinomo miina namesuaꞌa weo totono lalo, tamaka nekansuhu weo handado maka doꞌohoe toha we dhamba.” Pugauno Yesus naꞌa nokomaꞌanaꞌao sabhaha oti nehumaa nembali dohumaaꞌea.

20Ambano toha, “O ae lumimbaꞌano nomaiꞌao we lalondo manusia, aituꞌaemo fofekaharamunoa. 21Kapaꞌamo nomaiꞌao weo totono lalondo manusia nolimba sabhaha fekihi modai peda dopokawite-wite, dosibu, dofopongko, 22domonsule, kakadau-dau, isikadhi modai, kabhohe-bhoheꞌi, nafusuu modai, kakoulano lalo, kaꞌumbu ne Lahataꞌala, kalangkeno diu bhe katuꞌano fotu. 23Kosasawiꞌae podiu modai ini nomaiꞌao we totono lalo, mekaharamunomo manusia.”

Kaparasaeano seemie hobhine maiꞌaono we koliwuno

7:24-30

Mat 15:21-28

24Maka nomaiꞌao ne itu Yesus nohope we kadieno Tirus bhe Sidon. Sahatono nopesuamo ne seꞌonu lambu mbaꞌinomo nongahe hatono maitu damandeꞌaane miendo liwu, gahaꞌa miina sepaliꞌa natifebunia. 25Ne itu nandoo seemie hobhine, anano nopesuakie seetani. Anano ini o hobhine dua. Sanofetingke Yesus nohato, hobhine aitu lasao nokala nosudhu ne wiseno. 26Hobhine anaꞌa mieno Yunani maiꞌaono we kadieno Siro-Fenesia, ⸤ suano mieno Yahudi⸥ . Anoa nesalo mpuu ne Yesus so namolimbaꞌao seetani mesuakino anano maitu. 27Yesus tanopugau ambano, “Hunsaꞌanomo kadeki anaꞌi so momaano ampa daoweꞌi, kapaꞌamo pae namantasia o roti so anaꞌi damalae maka daꞌumohoane daꞌu.”

28Hobhine anaꞌa notobhoosimo ambano, “Anoamo naꞌa Waompu, ampamo kaowu o daꞌu we pandano medha ⸤ peda insaodi ini⸥ dohumaa dua kapondawundo anaꞌi.”

29Ambano toha Yesus ne hobhine aitu, “Bahangka pedamo anaꞌa pugaumua, sulimo! O seetani nolimbamo maiꞌao ne anamu.” 30Hobhine amaitu lasao nosuli se lambuno, nohatofi anano nandoo nendole-ndole ne kaodoꞌano. O seetani nolimbamo daanumo.

Yesus nefekaꞌosa seemie kapongke

7:31-37

31Nopalusi anaꞌa Yesus nohunsamo kadieno Tirus noangka we Sidon nohope we teꞌino Galilea. Noangkai dua kadieno Dekapolis. 32Ne itu deowaanemo seemie kapongke pakade nomahasai nopugau, maka desalo natumei limano te wawono. 33Yesus noowa kapongke naꞌa nopogaatiane bhe mie bhahi, maka nofopesua wunano limano ne kohaambaliꞌae tingalano mie aitu. Pada anaꞌa nekapehamo maka nofedampa lelano mie aitu. 34Yesus nototohanamo te lani, nofeeneimbusu maka nopugau ambano, “Efata ,” maꞌanano, “Tilengkaꞌo toha!”

35Tingalano mie aitu notilengkamo, katapuno lelano notilensemo bhe nelaamo pugauno. 36Yesus noꞌeleꞌaanda sepaliꞌa pae daekapunaa ne mie sigaoꞌano, tamaka dhulu noꞌeleꞌaanda, dhulu detula-tulaane. 37Mie metingkeno tadomente bhe dotonto. Ambado, “Pahasili, ingka sabhaha giu nofekataaꞌie. O kapongke nofofetingkeda, o bhohe nofekapandeda dopugau.”

Currently Selected:

Markus 7: mnbSD

Highlight

Copy