Jenesis 44
44
Josepbë titono kabo flawi tlatle
1Na bu wafi hi mëtla na Josepbë lo tafa lëglelëkefëtlebë wege home gali tlole, “Ju ebë enënebë musu mëta hi wesibi sisike eletëmemo. Houme fwa asa sike eletëme, ëfomume etometemome. Na ju bubë hi wesibi glome kë mohweijabë baliti, musu ëfo mëta sike ekoutëmeme. 2Na ju bobë lale titono silva kabo nagifu nëbabë musu ëfo mëta tuku eletleme. Na bubë hi wesibi këna glo tëglebë baliti mata sike egletleme.” Na bu melatle Josep fene gali tlole. 3Na olë feti tëbe na wege ho bolijahanime sei tlagume. Na buna donki klelina iniwa mutuja. 4Na bu kë tako lifate kile mëtla. Na kakë hana mutuja na Josep bubë wege home gali tlole, “Ju kë enëneme hokweinawa esogo elagume. Na ju esune egujuwelëmena metakune eglomeme, ‘Sebo sobona yonane nanëla kwe sobo fëyeme gëglë eletënane. 5Sobo bobë eso hobë lale titono silva kabo fëyeme tokli eletelone. Bobë eso ho tu këna hi lëlekëfe. Kë kabo, lowene hwi mago kabo. Bu kë kabo hwi lolokwefë na bu melowene lalëlekëfe, wesibi tokwafe fata mëglemefe. Sobo fëyeme tëbo enitonë.’ ”
6Na Josepbë wege ho bume esune tlëme na Josepbë gali këme gali tlome. 7Bu gali tafu mëtëtatla, “Masiwafe, ju seme blawa fëyeme so etatënane. Sebo këha melë hana nëglame. 8Ju seme walowene eletëna. Sebo Kenan life mago kë tigisiyabë na musu ëfome këhwi toglomabë baliti watehweitëyo. Ju walowene eletëme sebo nëgali gali ho. Ju habelë lowene lalene, jubë eso hobë silva na gol tokli nëgletlameha. Weye. Hanane mu. 9O eso ho, ju sebobë musu hohwi etagwi. Na ju kë kabo li hobë musu mëta hwi eoglëna kwe kë home mogo nalë satëkle etle. Na ju seme fli kalabusu etaname na sebo jume manawa wege nëgletëyobë ho fata nëletëyome.”
10Na bu gali tafu tëtatëme, “Sobobë gali lalemu. Bo kë kabo li hobë musu mëta hwi noglotelëna kwe bume fwa kalabusu nogotlëme na bobë wege manawa fa lotleme. Na kwe fliye, egitome.” 11Na hokweinawa bubë musu life mëta gogwa motokouja na musu ëfo totohwa mëtëtaguma. 12Na Josepbë wege ho kabo hohwi tëtagutë. Bu abwa nëbabë musu afina hohwi tëtatle na këme keibë nëbabë musu, këme keibë nëbabë musu hohwi tëtagutë. Na nagifu nëbabë Benjaminbë musu yaweme hohwi tëtatle. Na kë kabo Benjaminbë musu mëta hwi tolë. 13Na bolijahani kë wesibi hwi motlëya na klelego memetla. Na bubë ëho këme kaka mototoma, bu tako manibo mëtletlame nëgeme. Na bubë musu, donki kleli matawa gogwa mëtla. Na ita lifatewa mutuja.
14Judana bolijahanina, Josepbë lowa tutuhu motula, Josep lo mëta mana tafa tle. Na bu tako uli memëtletla na Josepbë elebo lime lamëtitigotlawa. 15Na Josep gali tlome, “Sobo bobë lale titono silva kabo fëyeme tokli elone. Sobo lowene hana elone, bo kwe melë ho nëtabë, wesibi ëho mëglebë, eli bo kë wesibi hwi noglomëme.”
16Na Juda gali tafu tëtatle, “O eso ho, sebo jume habë gali noglëyomene. Sebo kë tëbo wesibi habëna sle nogotlamene. Goto bu sebobë tëbo wesibi waolafa lotome. O eso ho, kë ho bu jubë kabo toklime kë fa lëgëtabë, kalabusu egotleme. Kwe bume fwa nane, seme iniwa kalabusu egëtaname. Na sebo jume manawa wege nëgletëyobë ho fata nëletëyome.”
17Na Josep gali tlome, “Hanane mu, bo melë hana nëgelëme. Kë ho, bubë musu mëta kabo kë hwi loglëbë, bume fwa kalabusu nogotlëme na buwa manawa wege lëgletenë ho fata lëleme. Sobo fli kwe blijaya belë lalowa egitome.”
Juda Benjaminbë afloko fa logotlebëme gali tlole
18Na Juda Josep belë tuju na gali tlole, “Aiyoo, eso ho ju bobë gali aholokwane enonë. Bo jume lalowa gali noglëmene. Bo walowene nelë, ju tako eso homu, eso ho Fero fenene. Ju bome wame asa enonë. 19O eso ho, ëtani ju seme metakune latlona, ‘Sobobë blijayana, blijahanina mana tafa mëlane o hanane?’ 20Na sebo gali tolëyo, ‘Negalife. Sebobë aya mana tafa lële na bu filemimu. Na sebobë nagifu keinëba mana tafa lële. Bolijaya filemimu tëtabe na bota mana fu totle. Na kë nëbabë bolijaha wagli tle, buwa tafa lële. Na këme nëgeme bolijaya bume tako tole lalëletle.’ 21Na eso ho, ju seme megali latlona, ‘Sobobë nagifu keinëba bome elesutënamo, bo bume hwi nanoglolëme.’ 22Na sebo jume gali metafu tëtatëyo, ‘Kë nëba bolijayame asa kile malotle. Bu bolijayame kile logotlena kwe bolijaya tako manibo fwa gli lëgleme.’ 23Kwe ju seme gali tlona, ‘Sobobë nagifu keinëba eglesulo jwa nëgena kwe sobo bome ita hana hwi egloname, hanane mu.’
24Na sebo aya belë titia na ju seme kë gali toglonabë gali bume të tëtatla. 25Na tokwafe aya gali tlona, ‘Sobo eimome na fli hi wesibi, balitina glo emoletëname.’ 26Na sebo gali tlola, ‘Sebo hana nigimëyame. Sebobë nagifu keinëba bume nëglelula jwa nëglana kwe sebo kë home hana hwi noglolame. Anë, sebobë keinëbame nëglelulana kwe sebo kë eso home hwi noglolame.’ 27Na sebobë aya megali tlona, ‘Sobo walowene elo, bobë mëse Resel iko nëbale tële wafata totometenë. 28Na jowa nëba bome wakile tëtanë na bo melowene nanelë, waluju mago kleli bume watëkle totle. Bo ita hwi hana nololë. 29Na sobo li nëba bo mago eglemulona na bume alëgeme tëbo mogotlana kwe bo tako manibo fwa gli negelëme, bo filemi ho nëgeme.’
30-31O eso ho, sebo nagifu keinëba ebë life mëta kile nëglana, na sebowa nigitiyana, na sebobë aya kë nëbame hwi jwa loglolena kwe bu gli lëgleme. Bu kë nëbame tako tolemu lalëletle. Sebobë aya filemimu na sebo kë nëba nëglelula jwa nëglana kwe sebo bume tëboha nogotlame. Na bu tako manibome fwa gli lëgleme. 32Na bo ayame wagali sle tlolë. Na bo megali latlolë, ‘Bo ululu sle nugujuwetlëme na bo ju belë hana nëglesulëna kwe bobë wesibiwa. Na bobë kë manibo unaunalëme mana lëbekefëtenëme.’ 33Na bo metole nanelë, kë nëba manawa wege lëgletëbë ho fata hana lëgleme, bowa fata nëgletëme. Bu kwe bolijahanina matitiya. 34Kë nëba bona hana nëgëyeuna kwe bo aya belë ita hana nuguwime. Bo bubë manibo hwime tole hana nëlëyo.”
Currently Selected:
Jenesis 44: NCE
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
