Jenesis 45
45
Josep bolijahanime gali tlome, bo fëye hone
1Na Josep bolijahanime tako manibo tletëme kwe bubë wege hobë li mëta yeme tole hana tle. Këme nëgeme bubë wege home gali tlome, “Sobo iniwa lo mago totoho ekako.” Na totoho mëtëkaka na buwa bolijahanime tafa tlelëme. Na bu Hibru galina gali tlome, “Bo Josep, sobobë keinëba.” 2Na Josep feilawa ye tle. Na Isip life mago oneho kë ye lego aholokwane mutula. Na kë ye tëglebë gali Isip lifate mago eso home gali mutujuwelëla. 3Josep gali tlome bolijahanime, “Bo Josep. Bobë aya wagli tlene o mana tafa lële.” Na bolijahani bubë gali yafe aholokwane motlola kwe bu tako uli memëtletla na bu gali tafu hana mëtëtatla. 4Na kwe Josep bolijahanime gali tlome, “Sobo loliwa esijo.” Na bu loliwa mutuja. Na bu gali tlome, “Bo Josep, sobobë keinëba. Ëtani sobo bome Isip life mago home yo tlomo, bubë wege manawa fa nanëgëtatemëme, na baliti glo telo. 5Kwe sobo ëtani bome kë tëbo tëgëtanabë wesibime tutune asa elo na welili asa elo. Bo some kofayame hana tëbo nogotome. Goto buwa jine tlënë. Some ebë life elë nogoutatëyobëme, onehome nëgaitamë nanëgelëme. Foneme gigli jwa namëglame. 6Na kë life mëta hi wesibi jwa tlibutu tële wamutuju. Kwe hi wesibi jwa tlibutu tobali mana mebokwe, na bu nuju mago hi wesibi hana wawa mëglame. 7Na Goto bu bome, nogoutatëyobëme jine telëbakënë, some nëgaito nanëgelëme, sobo foneme gigli jwa naegelome. Na sobobë nëbaletono unaunalëme natafa mokoutëyome. 8Kwe ebë lifewa sobowa jine tlëna nane. Wëye. Goto buna jine tlënë. Na bome aniji tlonë, eso ho Ferome lale lale lowene nëglëlëbëme. Oneho, eso ho Ferobë lo mëta kë tafa mëglabë, na bu, bome eso home tafa nëgletemëbëme anijimotlona. Na bo Isip lifebë iniwa onehobë eso home tafa nëletemë.
9Na sobo aya belë hokweinawa eitome na megali eglolome, ‘Jubë nëba Josep mana lëtabe na bu megali lalële, Goto bome Isip lifebë eso home aniji tlonë. Na ju bo belë hokweinawa esi. 10Na jubë nëbalename na blijafujuniname iniwa elesumeme. Na ju mëmë kleli na sipsip kleli na bulmakau kleli name na sobobë iniwa wesibi fli etobaklome. Na bomëta esijome. Na Gosen lifeku mëta tafa elome, bobë li mëta. 11Na ju Gosen life mëta tafa eglena, bo jume tafa nanëglelëme. Hi wesibi jwa tlibutu tobali mana mëbe. Na bo metole nanelë, ju na jubë nëbale foneme gigli hana mëglame na sobobë kleli mata foneme gigli hana mëgleme, bo some tafa nëglelëyome nëgeme.’ ” 12Na Josep bolijahanime gali tlome, “Sobo, seme Benjaminna, hwi sle elona na lowene sle eletëname, bo Josep, bo some ekë gëgali nëlelëyo. 13Na sobo ayame megali eglolome, ‘Josep Isip life mëta eso home tafa lële.’ Na lebutako wesibi sobo kë hwi eglomobë ayame mata gali etujuwelolome. Na sobo hokweinawa eitome na bume elesutëname.”
14Josep gëgali wayawe tlole, na bolijamo Benjaminme yena hwë tlële. Na Benjamin mata hwë tlële na ye mëtlelëgo. 15Na Josep fli bolijahanime yena hohwë tokou na bubë ahinome mëmëtle tëkoutëme. Bu melë wafi tle na bolijahani bume gëgali mëtlelëla.
16Na Josep bolijahani kë mitigisiyabë gali eso ho Fero belë fe tuletle. Bu na bubë wege hona, tako fleflesu memëtletëma. 17Na eso ho Fero Josepme megali tlole, “Ju blijahanime megali eglomeme, ‘Sobobë wesibi donki kleli matawa gogwa eolome na Kenan lifewa ita eitome. 18Na sobobë aya na ilawa mago ho bo belë elesumome, na bo some Isip lifebë lale lifemu yo nanëglëyome, na sobo lebutako lale hi wesibi hi naegelome.’ 19Na ju blijahanime mata megali eglomeme, ‘Sobo Isip life mago kalë loha wesibi, wesibi hos kleli kë asë mëglelëmebë, glo elome na sobobë lifewa ehoujome. Na sobobë one na nëbale na blijaya kë mëta tafa melame na këna elesumome. 20Na sobo lebutako wesibi asa ehweijo. Na sobo kë hune egelobë wesibi asa lowene eletemo. Matëbemu. Bo some Isip life mago lale wesibi nëglëyome.’ ”
21Na Jekopbë bowenenino, melë mëtla eso ho Fero fene gali tlome. Na Josep kalë loha wesibi, wesibi tlëme eso ho Fero fene gali tle. Na alëgeme hi mëglabë hi wesibi mata tlëme. 22Na bu bolijahanime tiho ëho tlëwagume. Kwe Benjaminme tobali tiho ëho na silva baliti 300 tlële. 23Na Josep Isip life magobë lale wesibi, 10 iko donki kleli matawa gogwa toletëme na kë donki kleli bolijayame telëkakle. Na bu witi liji, na bletë nage, na fli lale hi wesibi, na fli 10 tamo donki kleli matawa gogwa tole, na bolijayame mata telëkakle. Bu migisiyana, alëge mëta hi namëkekëyame. 24Na Josep bolijahanime jine telëkakëmena na gali tlome, “Sobo sobolalo alëgeme momata asa ekoujo.”
25Na bu Isip life kile mototla. Na mititiya. Na bu bolijaya Jekop belë Kenan lifewa fwa mutula. 26Na bu megali motlola, “Josep gli hana tle, hanane mu, mana tafa lële. Na ëje Isip life onehome eso home tafa lëletëme.” Na Jekop klelego metle. Na boblo totome. Na gali tlome, “Sogë lalo.” 27Kwe bu iniwa wesibi Josep kë gali toglomebë bolijayame gali motlola. Na Jekop kalë loha wesibi, wesibi Josep kë jine tëglëmebë hwi tlome. Na manibona sle tle. 28Na Jekop gali tle, “Negalimu. Bobë nëba Josep mana tafa lëlefe! Bo Josep belëme hokweinawa nuwime. Na hwi nujuwelëlëme na mana gli nelëme.”
Currently Selected:
Jenesis 45: NCE
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
