Yowana 13

Yeesu koosya abheeyigisibhwa bhaaye amaguru

1Mbe bhunu ichikukuru ya Okwambuka yaariga ichaari kukinga, Yeesu ꞉aasombookeeywe ati, omwanya gwaye gwa okusooka ku‑chaaro kunu okusubha kw‑Isemwene gwakinga. Yeesu aariga eendere abhaanu bhaaye bha ku‑chaaro kunu, ka wone ꞉aabheendere muno okukingira okufwa kwaye.

2Yeesu na abheeyigisibhwa bhaaye bhaariga nibharya ebhiryo bhya keegoro. Omwanya ogwo, Syetaani#13:2 Syetaani. Ku‑meeresyo amaafu, ringira mu‑Meeresyo inguru ya Emisango Emikomeeye. aariga aamarire okukongya Yuuda, omwana wa Simooni Isikariyooti, korereki aromere Yeesu iniku. 3Yeesu ꞉aamenyere ati Esemwene ꞉aamuyaaye obhuturo bhwa okutunga ebhiinu bhyone. Ka wone, aariga amenyere ati ꞉aasookere ku‑Nyamuwanga, na ati arisubha ku‑Nyamuwanga. 4Mbe, omwanya gunu bhaariga nibharya, Yeesu ˆnaasooka ku‑nenda, ˆneemereeguru, ˆnaafuura omwingiro gwaye, ˆnaagega orupande ˆneebhoya mu‑chibhunu. 5Neeya, ˆnaasuka amanji mw‑itubha. Mbe, ˆnaamba okwosya abheeyigisibhwa bhaaye amaguru na okugafwafuuta na orupande orwo.

6Omwanya gunu Yeesu ꞉aakingire ku‑Simooni Peetero, Peetero ˆnaamubhuusya ati, “Raatabhugenyi, naawe oweenda okunyosya amaguru?” 7Yeesu ˆnaamusubhya ati, “Gunu enikora woori anu, awe utakugusombookerwa, nawe owuja okugusombookerwa omwanya gunu oguuja.” 8Peetero ˆnaamubhwira ati, “Awe utakutura wuri noorwo na akatyari okunyosya amaguru!” Yeesu ˆnaamusubhya ati, “Araabha utakwenda anye nikwosye amaguru, utakutura okubha na obhumwi na anye rindi.” 9Simooni Peetero ˆnaamusubhya ati, “Raatabhugenyi awe, araabha ni kutyo, siga okunyosya amaguru era, tari nuunyosye mabhoko gaani na omutwe gwani wone.” 10Yeesu ˆnaamusubhya ati, “Omuunu unu oogere, atakwendwa okwoga rindi, nawe keendwa okwiyosya amaguru era. Oyo eerere chimwi. Emwe muri bheeru, tari wumwi weemwe niwe atari mweru.” 11Yeesu aariga amenyere unu kaja okumuromera iniku, nikwo okukora ꞉aayikire ati, “Owumwi weemwe atari mweru.”

12Yeesu ejire aamara okwosya abheeyigisibhwa bhaaye amaguru, ˆnaafwara omwingiro gwaye, ˆneenyanja nabho rindi ku‑nenda, ˆnaabhabhuusya ati, “Angu, mwasombookerwa echikorwa chinu naabhakorera? 13Emwe omumbirikira ati, ‘Omwiyigisya,’ ka wone omumbirikira ati, ‘Raatabhugenyi.’ Omukora kisi okumbirikira kutyo, kwa okubha nikwo kutyo niri. 14Araabha anye, unu niri Mwiyigisya na Raatabhugenyi weemwe, naabhoosya amaguru, emwe wone ni bhusibhusi mubhega nimwosyanya amaguru. 15Naabheeresya echijekekanyo, korereki emwe wone mubhega nimukora rwa kutyo anye naabhakorera. 16Ni chimari enibhabhwira ati, omugaya atakutura okubha omukuru okukira omwami waaye, ka wone unu kaatumwa atakutura okubha omukuru okukira unu kaamutuma. 17Araabha mwasombookerwa ejo, mbe Nyamuwanga kaja okubhayaana amabhando mukajikora rwa kutyo naabhabhwira.

18“Nitakwayika ejo inguru yeemwe bhoone. Nimenyere bhanu nisorere okubha abheeyigisibhwa bhaani. Nawe ni bhusibhusi jikuumire jinu jikaamirwe mu‑Bhikaame Ebhyeru ati, ‘Omuunu unu aari naarya aamwi na anye, niwe aayinduka okubha omusoko waani.’#13:18 Ringira Ijabhuri 41:9. 19Naabhabhwira ejo joone jichaari okukorekana, korereki omwanya gunu jirikorekana, mwikirisye ati, ‘Anye Niwe.’#13:19 Anye Niwe. Nikwo kutyo Nyamuwanga ꞉eemenyesiisye mu‑Ndagano ya Kara. Ringira Okwimuka 3:14; Iisaya 43:10. 20Ni chimari enibhabhwira ati, omuunu woonewoone unu kaakuma unu anye nitumire, kaankuma anye. Nyabhuriko, unu kaankuma anye, kaakuma unu ꞉aantumire.”

Yeesu kaayika inguru ya unu kaja okumuromera iniku

(Mataayo 26:20‑25; Maariko 14:17‑21; Ruuka 22:21‑23)

21Yeesu ejire aayika emisango ejo, ˆnaasurumbara muno mu‑mwoyo gwaye, ˆnaayika abhwerubhweru ati, “Ni chimari enibhabhwira ati, umwi mw‑imwe arintuura mu‑mabhoko ga abhasoko.” 22Mbe, abheeyigisibhwa bhaaye nibhaamba kuringirana, kwa okubha bhatamenyere ati niga unu Yeesu kaayikira. 23Aariga ari‑wo omwiyigisibhwa umwi, unu Yeesu aariga eendere muno. Omwiyigisibhwa oyo, omwanya gwa okurya, aariga eenyanjire ayeeyi muno na Yeesu. 24Mbe, Simooni Peetero ˆnaakorera echibharikisyo omwiyigisibhwa oyo, ˆnaamubhwira ati, “Bhuusya Yeesu kaayikira ga agati yeeswe.” 25Mbe, omwiyigisibhwa oyo ˆneeyekeka ku‑Yeesu, ˆnaamubhuusya ati, “Raatabhugenyi, niga?” 26Yeesu ˆnaamusubhya ati, “Ni unu enija okuyaana akabhaara ka omukaate kanu enija okwinyirisya mu‑rutubha.” Mbe, ˆnaagega akabhaara ka omukaate ˆneenyirisya mu‑rutubha, ˆnaayaana Yuuda, omwana wa Simooni Isikariyooti. 27Yuuda ejire aaramira akabhaara ka omukaate ako, awoawo Syetaani ˆnaamwingira. Mbe, Yeesu ˆnaamubhwira ati, “Gunu oweenda okukora, nuugukore bhwangu!” 28Nawe atari‑wo noorwo umwi mu‑bhaanu bhanu bhaariga nibharya, unu ꞉aasombookeeywe isonga ya Yeesu okwayika emisango ejo. 29Okubha Yuuda niwe aariga ˆnaabhiika isagwa ya jipirya, abhandi ꞉bheetogeeye ati Yeesu ꞉aabhwiriiye Yuuda ati, agure ebhiinu bhinu bhyariga nibhikenwa mu‑chikukuru ya Okwambuka, amwi ati, agende ayaane abhataka jipirya. 30Mbe, Yuuda ejire aamara okuramira akabhaara ka omukaate ako, awoawo ˆnaawuruka anja. Omwanya ogwo yaariga iri ngeta.

Yeesu kaayaana abheeyigisibhwa bhaaye echiraagiro echiyaaya

31Mbe, Yuuda ejire aawuruka anja, Yeesu ˆnaabhwira abheeyigisibhwa bhaaye ati, “Woori rikusyo ryani, anye Omwana wa Omuunu, riri yeeyi okubhonekana abhwerubhweru. Noorwo rikusyo rya Nyamuwanga erija okubhonekana abhwerubhweru okutura kw‑anye. 32Araabha rikusyo rya Nyamuwanga eribhonekana okutura kw‑anye, mbe Nyamuwanga wone aryeresya abhaanu rikusyo ryani, anye Omwana wa Omuunu. Ka wone kaja okukora kutyo bhwangu.

33“Emwe abhaana bhaani abheendwa, nichaari aamwi na emwe katungu katooto era. Murinyenja, nawe rwa kutyo ꞉naabhwiriiye abhatangasya bha Abhayawudi, nikwo kutyo woori nibhabhwira emwe wone ati, anu enigenda, emwe mutaritura okuuja‑wo. 34Woori, enibhayaana echiraagiro echiyaaya. Enibharagirira ati, ‘Mwendane. Rwa kutyo anye nibheendere, nyabhuriko emwe wone mwendane.’ 35Araabha mukeendana, niwo abhaanu bhoone abhaja okumenya ati muri bheeyigisibhwa bhaani.”

Yeesu kaayika ati Peetero arimwigaana

(Mataayo 26:31‑35; Maariko 14:27‑31; Ruuka 22:31‑34)

36Mbe, Simooni Peetero ˆnaabhuusya Yeesu ati, “Raatabhugenyi awe, owuja aaki?” Yeesu ˆnaamusubhya ati, “Enija anu awe woori utakutura okunduubha, nawe omwanya gunu oguuja owuja okunduubha.” 37Peetero ˆnaamubhuusya ati, “Raatabhugenyi, kurwa ki nitaamiibhwe okukuruubha woori? Anye niikirisiisye noorwo okufwa inguru yaawo!” 38Yeesu ˆnaamusubhya ati, “Angu, chimari wiiteeye‑wo okufwa inguru yaani? Ni chimari enikubhwira ati, rikookorome richaari okukookoroma, owubha waanyigaanire kasatu.”

Currently Selected:

Yowana 13: jit

Highlight

Copy