Yowana 2

Obhuregesi mu‑musi gwa Kaana

1Mbe, jejire jaatura siku ebhiri, nibhukorekana obhuregesi mu‑musi gwa Kaana, mu‑mukoowa gwa Gariraaya. Mu‑bhuregesi obhwo, nyiramwene Yeesu wone aariga ari‑wo. 2Yeesu na abheeyigisibhwa bhaaye wone bhaariga bhakokerwe mu‑bhuregesi obhwo. 3Echifuufu cha emijabhiibhu chejire chaawa, nyiramwene Yeesu ˆnaamubhwira ati, “Abhagenyi bhaamara echifuufu choone.”#2:3 Bhaamara echifuufu choone. Mu‑siku ejo, jaariga jiri swaro muno ku‑bheene obhuregesi echifuufu okubhaweera bhwangu mu‑chikukuru. Ku‑meeresyo amaafu inguru ya echifuufu, ringira Echifuufu mu‑Meeresyo inguru ya Emisango Emikomeeye. 4Omwene ˆnaasubhya nyiramwene ati, “Maayi, ogwo ogunsaasa ki anye? Omwanya gwa okukora emirimu jaani guchaari kukinga.” 5Niwo nyiramwene ˆnaabhwira abhakosi ati, “Omusango gwonegwone gunu araabhabhwire, mugukore.”

6Mbe, gaariga gari‑wo amatuumo gataanu na rimwi ga amanji ganu gaariga gakonjerwe kwa amabhuyi. Abhayawudi bhaariga nibhatuura mu‑matuumo omwo amanji ga okukuumisisya jitungwa jeebhwe ja okwiyesya. Bhuri tuumo ryariga niriijusibhwa kwa ebhibhuyu bhitaanu amwi bhitaanu na chimwi. 7Mbe Yeesu ˆnaabhwira abhakosi bharya ati, “Mwijusye amanji mu‑matuumo omwo.” Abheene nibheejusya amanji jabhijabhi. 8Neeya, Yeesu ˆnaabhabhwira ati, “Woori, mutaye amanji matyari mu‑matuumo omwo, musirire omukuru wa obhuregesi.” Abheene wone nibhakora kutyo. 9Omukuru wa obhuregesi ˆnaarabha amanji, ˆnaasombookerwa ati, gayinduuywe okubha echifuufu! Omwene ꞉ataamenyere anu echifuufu echo ꞉chaasookere, nawe abhakosi bhanu ꞉bhaatayire amanji mu‑matuumo murya ꞉bhaamenyere. Niwo ˆnaabhirikira omutwasi. 10Omutwasi ejire aakinga, omukuru wa obhuregesi ˆnaamubhwira ati, “Bhuri muunu unu kaakora obhuregesi kaatangataga okwamba okuyaana abhagenyi echifuufu cha ekisi. Abhagenyi bhaakanywa, nibheeywa, niwo kaareeta echifuufu chinu chitari cha ekisi. Nawe awe waareeta echifuufu cha ekisi muno ku‑bhuteero!”

11Yeesu ꞉aakorere echibharikisyo echo mu‑musi gwa Kaana mu‑mukoowa gwa Gariraaya. Echo nicho echibharikisyo cha okwamba chinu ꞉aakorere okweresya rikusyo ryaye, na abheeyigisibhwa bhaaye nibhamwikirisya. 12Obhuregesi bhwejire bhwawa, Yeesu ˆnooromoka okugenda mu‑musi gwa Kaperinaawumu ari aamwi na nyiramwene, abhatooto bhaaye, na abheeyigisibhwa bhaaye. Nibheekara eyo siku nooto.

Yeesu kaabhirimya abhasuruuja mw‑Iyekaru rya Nyamuwanga

(Mataayo 21:12‑13; Maariko 11:15‑17; Ruuka 19:45‑46)

13Mbe, ichikukuru ya Okwambuka#2:13 Ichikukuru ya Okwambuka. Ichikukuru inu ni ichikukuru ya Abhayisirayeeri inguru ya okwichuka kutyo Nyamuwanga ꞉aachunguuye bhasaaja weebhwe okusooka mu‑bhugaya mu‑chaaro cha Miisiri. Obhuchungusi obhwo ꞉bhwakorekeene omwanya gwa Muusa. Ku‑meeresyo amaafu, ringira Okwambuka mu‑Meeresyo inguru ya Emisango Emikomeeye. ya Abhayawudi yaariga niirebherera okukinga, kurwa ejo, Yeesu ˆnaagenda Yerusareemu. 14Ejire aakinga, ˆneengira mu‑rubhuga rwa Riyekaru rya Nyamuwanga.#2:14a Riyekaru rya Nyamuwanga. Ku‑meeresyo amaafu, ringira Riyekaru mu‑Meeresyo inguru ya Emisango Emikomeeye. Ejire eengira omwo, ˆnaasongʼana abhaanu bhanu bhaariga nibhagusya jiingʼa, jinaama, na ebhiguuti inguru ya okusoosya echoogo.#2:14b Echoogo. Ku‑meeresyo amaafu, ringira mu‑Meeresyo inguru ya Emisango Emikomeeye. Abhaanu abhandi bhaariga bheenyanjire nibhayingyaga jipirya ja okukorera emirimu mw‑Iyekaru.#2:14c Nibhayingyaga jipirya ja okukorera emirimu mw‑Iyekaru. Bhuri jipirya jaariga jiteeyire okukorera emirimu mw‑Iyekaru, nawe, jinu jeekirisibhwaga ni ja Echiyawudi era. 15Yeesu ejire aarora ejo, ˆnaayosya omujaridi gwa jingoye, ˆnaabhirimya bhoone bhanu bhaariga nibhagusya ebhiinu mu‑rubhuga rwa Riyekaru, aamwi na jinaama na jiingʼa. Ka wone, ˆnaajuguna eyo jipirya ja bhanu bhaariga nibhajiyingya na okugaramura jimeeja jeebhwe. 16Niwo ˆnaabhwira bhanu bhaariga nibhagusya ebhiguuti ati, “Musoosye munu ebhiinu bhinu! Musige okukora inju ya Raata waani okubha eguriro!” 17Abheeyigisibhwa bhaaye bhejire bhoongwa ejo, nibheechuka emisango jinu jikaamirwe mu‑Bhikaame Ebhyeru ati, “Eryenda ryani inguru ya inju yaawo ni ryafu muno, na erija okundeetera orufu.”#2:17 Ringira Ijabhuri 69:9.

18Abhatangasya bha Abhayawudi bhejire bhaarora jinu Yeesu aakora, nibhamubhuusya ati, “Owuja okukora echibharikisyo ki okweresya ati uri na obhuturo bhwa okukora emisango ejo?” 19Yeesu ˆnaabhasubhya ati, “Mufumye Riyekaru rinu, na anye niriryumbaka rindi ku‑mwanya gwa siku esatu.”#2:19 Ringira Maariko 15:29. 20Niwo abheene nibhamubhwira ati, “Riyekaru rinu ꞉ryombakirwe omwanya gwa miguuga makumi gana na etaanu na gumwi! Awe owutura kutiki okuryumbaka ku‑mwanya gwa siku esatu era?” 21Nawe Yeesu aariga atakwayikira inguru ya Riyekaru eryene, tari aariga aayikire inguru ya omubhiri gwaye omwene. 22Mbe, Yeesu bhunu ꞉aasuurukire okusooka mu‑bhafuuwe, abheeyigisibhwa bhaaye nibheechuka emisango jinu ꞉aayikire. Kurwa ejo, nibheekirisya Ebhikaame Ebhyeru, na emisango jinu Yeesu ꞉aayikire.

Yeesu kaamenya jinu jiri mu‑myoyo ja abhaanu bhoone

23Omwanya gunu Yeesu aariga ari Yerusareemu mu‑chikukuru ya Okwambuka, abhaanu bhaafu ꞉bhaamwikirisiisye, kwa okubha ꞉bhaarorere ebhibharikisyo bhinu aariga ˆnaakora. 24Nawe Yeesu ꞉aamenyere ati bhatari bheeyikanyibhwa, kwa okubha ꞉aamenyere jinu jaariga jiri mu‑myoyo jeebhwe. 25Omwene ꞉ateendere omuunu woonewoone okumubhwira jinu abhaanu bheeganirisyaga, kwa okubha ꞉aamenyere joone jinu jaariga jiri mu‑mwoyo gwa bhuri muunu.

Currently Selected:

Yowana 2: jit

Highlight

Copy