Mataayo 24

Yeesu kaaraga inguru ya okufumurwa kwa Riyekaru rya Nyamuwanga

(Maariko 13:1‑2; Ruuka 21:5‑6)

1Yeesu ˆnaasooka mu‑rubhuga rwa Riyekaru rya Nyamuwanga. Omwanya gunu aariga ˆnaasooka omwo, abheeyigisibhwa bhaaye nibhamuruubha korereki bhamweresye kutyo jinju ja Riyekaru rya Nyamuwanga jaariga jinojooriibhwe kisi. 2Nawe Yeesu ˆnaabhabhwira ati, “Mwarora kisi jinju ejo joone? Ni chimari enibhabhwira ati, ritari‑wo ribhuyi noorwo rimwi rinu ririsigara inguru ya erindi, goone garifumibhwa!”

Yeesu kaayika inguru ya ebhinyaasyo ebhiruru

(Maariko 13:3‑13; Ruuka 21:7‑19)

3Neeya, Yeesu ˆnaagenda ku‑chiima cha Emijeyituuni, ˆneenyanja okwo. Abheeyigisibhwa bhaaye nibhamujaa‑ko bhwitebhe, nibhamubhuusya ati, “Chibhwire, emisango ejo jirikorekana rusuku ri? Ka wone, niki chinu chiribha echibharikisyo cha okusubha kwawo na echa okukinga obhuteero bhwa echaaro?”

4Yeesu ˆnaabhasubhya ati, “Mwangarire, omuunu woonewoone aasiga okubhajiga! 5Abhaanu bhaafu bhariija nibhakoreraga emirimu risiina ryani, bharyayikaga ati, ‘Anye naanye Kirisito!’ Abhaanu abho bharibha nibhajiga abhaanu bhaafu.

6“Ku‑mwanya ogwo, muribha nimuungwa emisango ja riremo na okubhubhuutwa kwa riremo. Mwasiga okuyaya, kwa okubha ejo ejikenwa jikorekane, nawe obhuteero bhwa echaaro obhubha bhuchaari okukinga. 7Echaaro chimwi chirirwana na echaaro echindi, na obhukama bhumwi bhurirwana na obhukama obhundi. Omweko na rinyamutikima rya echaaro bhirisookerera bhuri rubhaara. 8Ejo joone jiribha rwa obhwambiro bhwa obhusungu bhwa omugasi unu keenda okwibhura. 9Ku‑mwanya ogwo, abhaanu bharibhaga nibhabhanyaasya na okubheeta na abhaanu bha amaanga goone bharibhasoka kwa okubha muri bharuubhirisya bhaani. 10Niwo abhaanu bhaafu bharisiga okunduubha. Bhariromerana iniku na okusokana abheene kwa abheene.

11“Ku‑mwanya ogwo, bharibhaga nibheebhuka abharagi bhaafu bha orubheeyi, bhajige abhaanu bhaafu. 12Ka wone, eryenda rya abhaanu bhaafu ririkeeya, kwa okubha ebhibhiibhi bhiribha bhiiyongesiisye. 13Nawe omuunu woonewoone unu ariigumiirisya okukingira ku‑bhuteero, niwe Nyamuwanga arichungura. 14Ku‑bhuteero, Emisango ja Ekisi inguru ya obhukama bhwa mu‑rwire jiriraasibhwa ku‑chaaro choone. Ku‑mwanya ogwo abhaanu bhoone bharibha na omwanya gwa okuungwa obhubhambaasi obhwo, niwo obhuteero bhwa echaaro bhurikinga.

Jisiku ja ebhinyaasyo ebhinene mu‑mukoowa gwa Yuudeya

(Maariko 13:14‑23; Ruuka 21:20‑24)

15“Ku‑mwanya ogwo, murirora echiinu chinu omuragi Danyeeri ꞉aatogere ati ni chiinu cha okujabhiyasya na okunyamura.#24:15a Ringira Danyeeri 9:27, 11:31, 12:11. Echiinu echo nicho murirora chimereeguuyu ayeeru mw‑Iyekaru rya Nyamuwanga.#24:15b Ayeeru mw‑Iyekaru rya Nyamuwanga. Ku‑meeresyo amaafu, ringira Riyekaru mu‑Meeresyo inguru ya Emisango Emikomeeye. Omuunu woonewoone unu kaasoma emisango jinu, asombookerwe kisi obhugajuro bhwajo. 16Abhaanu bhoone bhanu bheekaaye mu‑mukoowa gwa Yuudeya, bhabhirimire mu‑bhiima. 17Omuunu unu aribhaga ariinyire ku‑rusara, aasiga okwika okugega ebhiinu bhyaye. 18Kutyokutyo, omuunu woonewoone unu aribhaga ari mw‑isambu, aasiga okusubha inyuma okugega rikabhuuti ryaye. 19Jiribhabhona abhagasi bhanu bharibhaga bhafugaaye na bhanu bharibhaga nibhaneenʼya mu‑siku ejo! 20Kutyo, musabhwe Nyamuwanga ati okubhirima kwemwe kusige okubha ku‑mwanya gwa imbewo induru noorwo ku‑rusuku rwa Isabhaato. 21Chimari, mu‑siku ejo, abhaanu bharibhona ebhinyaasyo bhinene muno. Ebhinyaasyo rwa ebhyo, bhichaari okusookerera okwambira ku‑bhwambiro bhwa echaaro okukingira reero inu na bhitari sookerera‑wo rwa ebhyo rindi. 22Araabha Nyamuwanga ataakageruuye omwanya gwa ebhinyaasyo ebhyo, mbe atari‑wo omuunu unu aakachungukire. Nawe Nyamuwanga arigerura omwanya ogwo, inguru ya abhasorwa bhaaye.

23“Mbe, ku‑mwanya ogwo, araabha omuunu kaabhabhwira ati, ‘Ringira, Kirisito ari anu!’ amwi ‘Ari erya!’ mwasiga okumwikirisisya. 24Bhariibhuka abharagi abhabheeyi na abhaanu bhanu bharibhaga nibheetoga ati ni Kirisito. Bharibhaga nibhakora ebhibharikisyo bhyafu na ebhiruguusyo. Kutyo, bhariregeeja okujiga abhaanu na araabha ikaturikeene, bhakaregeejere na abhasorwa bha Nyamuwanga. 25Mwiyangarire! Naatangata okubhabhwira joone ejo jichaari okukorekana. 26Araabha abhaanu bhaakabhabhwira ati, ‘Ringira, Kirisito ari mw‑ibhara erya!’ mwasiga okugenda eyo. Amwi araabha bhaakabhabhwira ati, ‘Ringira, eeyibhisire mu‑nju omwo!’ mwasiga okubheekirisisya. 27Mumenye ati okuuja kwani anye Omwana wa Omuunu, kuribha kwa okutakya. Jiribha rwa kutyo orurabhyo orubhonekana awoawo ebhuwuruka esuubha, na kwiya rumwi okukingira ebhugwa esuubha. 28Kuribha abhweru, rwa kutyo jipungu ejiikofyanya aamwi anu ityanyi inu ifuuwe iri.

Yeesu kaayikira okusubha kwaye

(Maariko 13:24‑37; Ruuka 21:25‑33, 17:26‑36)

29“Mbe, omwanya gwa jisiku ja ebhinyaasyo ogwo guritura, risuubha ririturwa‑ko echisuute, okwesi kutarisoosya obhweru rindi na jinjota jirigwa okusooka mu‑rutumba. Amanaga ago goone ga mu‑rutumba garisingisibhwa.#24:29 Ringira Iisaya 13:10, 34:4; Yoweeri 2:10.

30“Ku‑mwanya ogwo, echibharikisyo cha Omwana wa Omuunu chiribhonekana ku‑rutumba, na abhaanu bha amaanga goone bharyamba okurira kwa okuyaya. Runu niriija, abhaanu bhoone bharindora niri mu‑meere niri na amanaga na rikusyo rikuru. 31Niwo nirituma bhamaraayika bhaani. Bharibhuma muno rinyawegoona, korereki bhakumanye abhasorwa bhoone bha Nyamuwanga okusooka mbaara joone ena ja echaaro. Abhasorwa abho, bhariija okusooka ku‑bhuteero bhwa echaaro okukingira ku‑bhuteero bhwa orubhaara orundi rwa echaaro.”

32Yeesu ˆnaagenderera okwayika ati, “Mwiyigire echijekekanyo okusooka kw‑iti rya ritiini. Amatabhi gaakasebhuka na amasya gakasoosya obhwaso, niwo omumenya ati omwanya gwa ingʼubha ya okwamba gwafogeeye. 33Kutyokutyo, emwe wone mukarora joone ejo nijikorekana, mumenye ati niri yeeyi okuuja. 34Ni chimari enibhabhwira ati, riyimbo rinu ritariwaa‑wo emisango ejo joone jichaari okukorekana. 35Orutumba na echaaro bhiritura, nawe emisango jaani jitaritura wuri.

36“Nawe atari‑wo omuunu unu kaamenya orusuku noorwo isaa inu emisango ejo jirikorekana. Noorwo bhamaraayika bha mu‑rwire amwi Omwana wa Nyamuwanga bhatakumenya, tari Raata wenyere. 37Kurwa ejo, okuuja kwani, anye Omwana wa Omuunu, kuribha rwa kutyo jaariga jiri mu‑siku ja Nuuwu. 38Mu‑siku ejo, omwanya gunu ingʼubha ya induruma yaariga ichaari okugwa, abhaanu bhaariga nibharya na okunywa, bhaariga nibhatwara na okutwarwa, okukingira ku‑rusuku runu Nuuwu ꞉eengiiye mu‑ngarabha. 39Abhaanu abho, ꞉bhataamenyere ati niki chinu chirisookerera, okukingira anu induruma ꞉yeejire na okwita abhaanu bhoone. Nikwo kutyo jiribha omwanya gunu anye Omwana wa Omuunu niriija. 40Ku‑mwanya ogwo, araabha abhaanu bhabhiri bharibhaga bhari mw‑isambu, anye Omwana wa Omuunu nirigega umwi na owundi arisigara. 41Ka wone araabha abhagasi bhabhiri bharibhaga nibhaseera aamwi ku‑rubhuyi, anye Omwana wa Omuunu nirigega umwi na owundi arisigara. 42Mbe mwiyangarire, kwa okubha mutakumenya ati ni rusuku ri runu anye Raatabhugenyi weemwe niriija.

43“Nawe mumenye kisi ati, araabha omwene inju akamenyere omwanya gunu omwifi kaaja, mbe atakawongeeye wuri, korereki omwifi aasiga okuuja ˆnaafumura inju yaaye. 44Kurwa ejo, mutengeeje omwanya gwone, kwa okubha anye Omwana wa Omuunu, niriija omwanya gunu mutakwiyikanya.”

Echijekekanyo cha omugaya omwiyikanyibhwa

(Ruuka 12:41‑48)

45Yeesu ˆnaabhuusya abheeyigisibhwa bhaaye ati, “Mbe, ni mugaya ki omwiyikanyibhwa na owa obhwengeeso? Ni mugaya unu omwami waaye ateeye‑wo okubha omwangarisi wa bhagaya abhandi mu‑nju yaaye, korereki abhe ˆnaabhayaana ebhiryo ku‑mwanya gwaye. 46Rusuku rumwi, omwami waaye arisubha okusooka mu‑rugendo. Ari na ribhando omugaya unu omwami waaye arimusongʼana ˆnaakoraga rwa kutyo ꞉aamuragiriiye. 47Ni chimari enibhabhwira ati, mwami waaye arimutuura ku‑chibharo cha inguru abhe omwangarisi wa obhuniibhi bhwaye bhwone.

48“Nawe omugaya omubhiibhi ni urya keeganirisya mu‑mwoyo gwaye ati, ‘Mwami waani arikoora okusubha.’ 49Niwo ˆnaamba okubhuma abhagaya abheejaabho, na okubha omunanamba na omunywi wa obhwarwa aamwi na abhakorwa. 50Mbe, omwami waaye arisubha orusuku na isaa inu atakwiyikanya. 51Niwo omwami waaye arimuyaana jimbuma muno na okumwesa anu abheerimaanya bhari. Omwo nimwo abhaanu bhaririraga na okuguguna ameeno.”

Currently Selected:

Mataayo 24: jit

Highlight

Copy