TĨĨGI WERE 19

Sodom wo de gomore

1Jar peele ma ɓogn wo wo dayge go Sodom de law. Lod hay go de hayle jag tiŋ Sodom yeʼe. De maga nen Lod leʼ ne hara ti mono, á raw caa pel ɓaara, kal leʼ monɗra ne hara gesiŋ de jel nen ɓe gesiŋ. 2Blam ɓe á day ga : Waŋre ɓi wo, ndi kam nday, halag we ma woge liŋ ni wejõõ ɓay no, naa we ni lagge. Yog we ɓaale ɓay go, ngel tee we go no nday hoo yaŋ go ciŋ de jag toŋ mbuh ma maŋ faage ɓay no. Jarn kal wo fer wããre ne hẽn ga baywa, wùr naa yaŋ mbe go ti ngel ma lam no.

3Ama Lod baa wùu ne hara see gum ga á mo halag wo ma woge liŋ ni se. Á kal joŋ few rege ne hara, ɓoʼ hoole pẽẽ ma bay defõõre, saara kal rege.

4Á hay bay wo de suuli seŋ wa ɗa, jar ma ɓi leege Sodom á wo yiŋ ti tiŋn go cwẽẽ, jar kluuri wo, weere kleere wo, jar ma ti cõõ tiŋn wo le ɓuy tuu. 5Á ɗe wo Lod wo day wiin wo ga : Jar maga laa wo le ni ɓo suŋ la á wo gene? Laa ra le go ne wur maga wur suɗ de ɓaara. 6Lod kal kalge le see ɓaara jag tiŋ ni, tẽg jag tiŋ le nen blam ɓe. 7Á day ga : Hẽẽre ɓi ndi kam nday, joŋ we ɓlagge wa! 8Ko we ɗa, ndi kam nday : Mayre ɓi yaŋ ɓog maga bay wo de woge see jobo wa. Kamkam, ndi hoo ra yaŋ le we la, ni nday joŋ mbay ra doo ga ɓil da nono. Ma jar ma lag wo mo no, joŋ we ra de mopo wa, werga á nduu wo lagge nencee tiŋ ɓi. 9Á day wo ga : Ɗee see ɓo go! Tigriŋ pa, saara ga : Bloon mo deŋ ur le ni naa la urgi waare day nà se nii kol see ɓe diŋ je car kiida! De ele, wùr joŋ ge ndo la de ɓlagge de daŋ rage an tawa. Á yaʼ wo wo srog Lod ma woge haw jag tiŋn go. 10Jar peelen kal wo coŋ doo, baa wo Lod wo liŋ, tẽg wo jag tiŋ no.

11Á kal wo rãã nen jar maga hay wo jag tiŋ ni wo go, jar kluuri ɓaaran wo, weere ɓaaran wo ɓuy, hãã saara gay doo lam jag tiŋn de koɗkoɗe ga saara daʼn yaŋ.

12Jarn wii wo Lod ga : Wose ɓo la pa? Yaa ɓo, mbarga ɓo, mayre ɓo wo, kaw ɓo maga ɓi leege la ɓuy kal go de ɓaara see ɓi leege sen mo taʼ la no. 13Werga wùr ɓlag ngeln mo taʼla go, doo ga ɓlagge maga à wãã ti jarn wo mo taʼ la pel Manwur mokay á de raw doo ɗawa. Manwur laa wùr le ma ɓlag ɓi leegen la go. 14Lod kal kalge go ma fer wããre sen la ne yaare ɓe maga hay de da mayre ɓe mono. Á wii ra ga : Pud we go ciŋ laa we go ti ngel mo taʼ la no, werga Manwur ɓlag ge ɓi leegen mo taʼ la go. Yaare ɓen kal wo ko ɓaaran nen ɓaara doo ga á wãɗ diŋ jag hragge po mbe koɗ nono.

15De maga ngel wo le go maŋge mono, jar peelen baa wo wùu ne Lod see gum ga : Ur go ciŋ baa wãy ɓo wo de mayre ɓo ma ɓog maga wo ɓiŋ ɓo lam no, nen maga ndo mo taw wo go wer ɓi leege ma joŋ ren mo taʼ la ni wa. 16Ama, se yõõ mbe ti caw, doo kay nono, jar kal wo ɗaw doo ɓe, se de see ɓe, wãy ɓe, de mayre ɓe ma ɓog wo no, werga Manwur hay de sãy men rage sugi. Á kal laa rage wo go, men ra wo go faale ɓi leege no. 17Blam maga á kaŋ wo glog ɓaara wo go ti jeŋ wo ni kaŋ so mono, maapo yoo ɓaara ni boŋ day ga : Ɗee jag ɓo, hay caw. Ni ndo ko nen blam ɓo wa, yaʼ ooge ti puuli la wa lay, ɗee wo go ciŋ ti húulì doo hẽẽne maga ndo mo taw go wa. 18Lod wii ra ga : O! Baywa, sen gà so Waŋkluu! 19Sen go tinoo ga ndo joŋ de el see wejõõ ɓo no, ndo naa nen kluu de el ɓon go see ɓi, de maga ndo men me tenen caw mono. Ndi hay mo hãʼ ndi de daŋ mbi yaŋ wo go ciŋ ti húulì nen maga bon sen mo daʼ de ndi gà anso, ndi de huu go! 20Ndi kam ndo, koɗa ɓi leege ma cebn wo mo taʼ no á la mbaŋ nen maga ndi daŋ wo de ɗee ni. Men me woge hayge ni, á meʼ e, ndi wo we ni no ni ndi joŋ yaŋ caw. 21Je peelen ga de ele, ndi joŋ mbi de el ma sen go see ɓo ɗa pa, ndi men ɓi leege se maga ndo wãã ti ɓe yaŋ bay duʼgi. 22Ɗee deparday ni, werga ndi joŋ ge mopo taŋgu maga ndo bay dayge ni gà. Diŋ wersen so ga à kal kaŋ ɗúu ne ɓi leege sen ga Sowar mono.

23Lod wo kalge ɓi leege Sowar mono, ni wur le de naage jag sir hãʼã.

24Doo kay nono, Manwur kal cwaa wùu ma haɓ see le yããge ti Sodom wo de Gomore, wùu maga á le see Manwuri. 25Á ɓlag ɓi leege ma sen wo go, ful ma ti ɓaŋ sen wo ni ɓuy, jar ma ɓi sir sen wo ɓuy, de koore ma gesiŋ wora. 26Wãy Lod ngiɗ nen wo blam kal kol manda go taʼa.

27Abraham kal caa ngel wo de jag toŋ mbuh, wo ti ngel maga se hay oo pel Manwur ni mono. 28Á kal maŋ nen wo nen Sodom wo de Gomor no kay, ti sir ma ti ful ma ɓaŋ sen wo wo ni no kay, á raw ko cug wo naage ciŋ deŋ doo cug maga naa le go nen wùu ma hiɓ nono. 29De maga Baa ɓlag ɓi leege ma ti fuln wo go mono, Baa fer ɗig ti ti Abraham, kal naa Lod le go jag re ma kluu se maga ɓlag ɓi leege maga Lod hay joŋ ni wo go mono.

Mayre mani Lod wo no : Tĩĩgi wer jar Mohab wo de jar Amoŋ wo

30Lod ur le go Sowar ma yaʼge hayge wo go de mayre ɓen wo ciŋ ti húulì, werga á hay joŋ hẽẽne ma hayge Sowar ni. Á raw hayge ɓi rum húulì. 31Doo kay nono, may ma kluun wii ma kleen ga : Pan naa go de tããbe, day je twar bay ti ngel la ma age see naa doo maga jar joŋ ɓuy no wa lay. 32A le naa joŋ yii, ni naa hã go ne pan naa, day naa suɗ go de ɓe nen maga wer pan naa mo gwaʼ go. 33Á kal wo hã yii go ne pan ɓaara, wursen de suŋ ni. Ma kluu kal woge suugi de pan ɓe. Pan ɓaara kon gà ɓuy. Á suu nà hunla, á ur go nà hunla, se kon gà ɓuy tuu. 34Toŋ ɓe mono, ma kluun wii ma kleen ga : Ndi suu go suu de pan ɓi. Naa hãã yii go ne hẽn suŋ la, day ni ndo wo suugi de ɓe ma men wer go ne pan naa. 35Á kal wo hã yii ne pan ɓaara de suŋ sen wursen tigriŋ pa. Ma kleen la yaʼ suugi see ɓe. Á hay ko doo ɓe gà pa. Á suu nà hunla, á ur go nà hunla, se kon gà pa. 36Mayre ma ni Lod kal wo far ɓiili go de pan ɓaara. 37Ma kluu kal biŋ wele, kal kaŋ ɗúu ne hẽn ga Mohab : Á diŋ jar Mohab wo maga yaŋ wo wara tiʼ ɗa mono. 38Ma kleen kal biŋgi twar lay, á kal ɗege ɓe ga, Ben-Ammi. Á diŋ pan jar Amoŋ wo maga yaŋ wo wara tiʼ ɗa mo lay no.

Currently Selected:

TĨĨGI WERE 19: TUP

Highlight

Copy