TĨĨGI WERE 43

Jakob yiŋ jag ga Benjame mo see mbe so

1Koŋnen hay mbe jag hã põõre ne sirn doo sen lam no. 2De maga á taw wo re coore ble maga á hay hoo wo sen le ɓi sir Ejipte go taw mono, Jakob wii jar ni ɓe wo ga : Fer we yee rege le ne naa meʼ ɗa pa la! 3Juda kal fer wããre ne hẽn ga : Bloon hay wii wùr le go de el celel ga : Naa yiŋ gi gà hayga hẽn ɓay bay we wer ɓay ni wa no. 4Ti ngel sen hayga ndo wãã we ga ndo ɓoʼn yaŋ ne wùr wer no, ni wùr wo yaŋ mbe yee regen le ne ndo. 5Hayga ndo wãã we ga ndo kãã ma ɓoʼge ɓe gà has lay no, ni wùr wo gà so lay, werga bloon wãã go ne wùr ga : Naa ferge yiŋgi gà so, hayga hẽn ɓayn bay we wer ɓay ni wa no. 6Israyel day ga : Nday joŋ me de ɓlagge no maʼ nà ga le la. Nday yoʼ wããge ne bloo sen ga hẽn ɓay yaŋ pa nà gahãyla? 7Á kal wo fer wããre ne hẽn ga : Bloo sen baa wùu wii wer wùr de kawre wùr wo gum ga : Pan ɓay yaŋ mbe ɗa yawla? Hẽn ɓay yaŋ yawla? Day wùr fer wããre ne hẽn ti wiɗgi ɓen wo no. Wùr kãã yaŋ mbe go ma koge ga á wãã ge ga : Baa we hẽn ɓay le yawla?

8Juda wii pan ɓe Israyel ga : Men weln rawge wer ɓi. Nen maga wùr pudi, wùr raw, hayga naa wãã we ga naa mo hay sugi, ndo, wùri de jar ni naa wo no. Hayga naa wãã we ga naa mo laɓ go wa no. 9Ndi yããn yaŋ diŋ see ɓi. Ndo fer ge wiigi ɓe diŋ doo ɓi. Hayga ndi fer we le de ɓe ɓiŋ ɓo gà no, hayga ndi fer we kaŋge mo pel gà no, ni ndi joŋ ge mbi diŋ je ɓlagge see ɓo ma tum so. 10Á bà mo taʼ see ɓo wùr de hay yãã ti gà no, wùr hay bà go patala de woge day le go de ferge ɓaale ɓoge.

11Pan ɓaara Israyel wii ra ga : Á nà no so lay no, ãã, joŋ we so. Hoo we fẽẽre ma de ra ɗúu ma ɓi sir wo la doo ɓay, ma woge hã kado ne bloo seno. Bom meʼ lay, yõõre meʼ lay, de fẽẽre fõõre, de Ladanum, de Pistas wo de Amande wo. 12Hoo we solay doo ɓay pur ɓaale ɓoge, fer we hoo solay maga á lagn le ne nday jag sag ɓayn wo ni mono, ti ga á hay joŋ nen ɓaara joŋge laybla no. 13Baa we hẽn ɓay no, pud we go ciŋ, fer we wo ɓiŋ bloo se no. 14Daga Baa ma de Egre Ɓuyn mo joŋ ga nday mo ko decoo nen bloo se no, day á mo men hẽn ɓayn wo le ferge wer ɓay de Benjame! Ma ɓin tiga weere ɓin yeɗ wo mbaara nen ɓi go so, á yeɗ wo mbaara so!

Josef fer yiŋgi de hẽẽre ɓen wo ma ɓaale ɓoge

15Jar sen la kal wo hoo kadon doo ɓaara, hoo wo solay doo pur ɓaale ɓoge, baa wo Benjame ni lay. Á kal wo pudgi cegaɗ wo go Ejipte, wo wo pel Josefe. 16De maga Josef wo ko Benjame wer ɓaara mono, á kal wii je maga de hayle ti tiŋ ɓen ga : See de jar sen wo liŋ, ii mopo ni ɓoʼ hoole werga jar ma sug wo mono, wùr re wara de kããra de cege. 17Bloon joŋ doo maga Josef wãã ne hẽn nono, kal woge kaŋ jarn sen wo liŋ ni Josefe. 18Hẽẽne kal joŋ rage de maga à wo kaŋ rage liŋ ni Josef mono, á wo ga : Sen joŋ diŋ wer solay maga hay gwaʼ wurpo ti ma taŋgun ɓi ndar naa wo la ga à day rawge de naa mo sug no. Sen diŋ ma laage ne naa ti, day ma kol naa doo gebeere de gerhẽẽ naa wo so. 19Á Kal wo yaʼge biŋ je maga de hayle ti tiŋ mani Josef jag tiŋ, ma fer wããre ne hẽne. 20Á wo ga : Kamkam waŋ ɓi no, wùr hay cegaɗ we le go yee rege taŋgu la. 21Blam ɓe de maga wùr wo dayge, ti ngel naw mono, wùr kal bul jag ndar wùrn wo go mono, ko nà solay maga wosela hay wo de ɓe doo de ɓoʼge jag ndar ɓen ni, ti ngel põõre ɓen keɗede. Wùr le de ferge de ɓe doo wùr la. 22Wùr yaŋ mbe de age de solay ma tigriŋ doo wùr ma yee rege doo wùri. Wùr bay de ko je maga laa solayn wo ɓi ndar wùrn wo ni mo wa lay.

23Je ma de hayle ti tiŋn la kal fer wããre ne hara ga : Lag we mbay jam, joŋ we hẽẽne wa! Á diŋ Baa ɓay no. Baa mani pan ɓay laa horog ne nday ɓi ndar ɓay no. Solay ɓayn daʼ mbe ndi we. Á kal ɓoʼ Simeyoŋ le go ɓiŋ ɓaara.

24Bloo sen la kal laa rage wo liŋ ni Josefe. Á kal hã bii ne hara, saara kal yog ɓaale ɓaara go. Á kal hã hõõ ne gerhẽẽ ɓaaran wo lay. 25Á kal wo baa jag kado ɓaara wo go lag gor Josef de maga á age we liŋ de cege no, werga sug ɓaara hay laa go ga saara rege de cege ni mono. 26De maga Josef wo age liŋ mono, á kal wo hã Kado maga hay doo ɓaara ne hẽn liŋ ni, á kal wo leʼ mondra gesiŋ ne hẽn pele. 27Á kal wii jam ma see ɓaara go wii day ga : Pan ɓay ma de tããbe maga nday hay wãã ti ɓe mono, á yaŋ mbe go de ele? Á yaŋ mbe tenen caw ɗa? 28Á kal wo fer wããre ne hẽn ga : Wejõõ ɓo pan wùr yaŋ mbe de ele, á yaŋ mbe tenen caw ɗa. Á kal wo goɗomge, leʼ wo mondra. 29Josef maŋ nen ɓe, kal ko hẽn ɓe Benjamen, je ni man ɓe no, day ga : Mo yeʼ diŋ hẽn ɓay ma klee maga nday hay wãã mbay ti ɓe mono? Á day pa ga : Daga Baa mo kaŋ bosaʼ mo ti wel ɓi! 30Josef caa wããren ciŋ, doo ga sãy hẽn ɓen hay baan go debaŋ, day nen ɓe da roo. Á kal kalge tiŋma ni ɓe, yaʼ rage. 31Blam maga á yog nen ɓe go yogge á fer kalge le go, kiɗ egre ma ɗaw see ɓe day ga : Hor regen go. 32À kal hã rege go ne hẽn sare, hã go ne hẽẽre ɓen wo sare, ne jar Ejipte maga hay wo rege de ɓe go sar lay, werga jar Ejipte bay wo rege de jar Hebre wo wa, doo ga jar Ejipte wo ga á diŋ fen horge see. 33Hẽẽre Josefn kal wo lagge pel ɓe, de lagge ti ngel biŋgi ɓaara, ma kleen ti ngel kiŋgi ɓen lay. Day saara ngele, wosela er kẽẽ, mbe de ko kããra koge lag koɗ so. 34Josef kal hoo rege ma pel ɓen le ne hara, day Benjame kal daʼge pur ɓaale dwee dedaŋ ma jar lan wo no. Á jo wo, joŋ wo fruygi de ɓe.

Currently Selected:

TĨĨGI WERE 43: TUP

Highlight

Copy