TĨĨGI WERE 42

Jakob laa jar ni ɓe wo wo Ejipte

1Jakob kal koge ga coore ble yaŋ wo Ejipte. Doo kay nono á wii jar ni ɓe wo ga : Nday ko diŋ kããra? 2Á day ga ndi laa nà ga coore ble yaŋ wo Ejipte. See we wo ni, wo we yeege le ne naa ni, nen maga naa mo laɓ go wa, naa hay we sugi. 3Hẽẽre Josef wo hwal kal wo cegaɗge wo go Ejipte ma yee coore ble. 4Jakob laa dayge men Benjame woge wer hẽẽre Josefn wo gà has, doo hẽẽne maga day la re po ma tigriŋ daʼn wo ni pa. 5Jar ni Israyel kal wo woge yee coore ble yoo jar maga hay wo woge yeɗge mo lay no, werga koŋnen hay go de leʼge ɓi sir Kanaane.

Josef joŋ hẽẽre ɓen wo doo maga se ko ra gà nono

6Josef hay wãã wããre sir no. Hay yeɗ coore ble go ne jar ɓi sir ni ɓuy diŋ se. Hẽẽre Josefn kal wo nduugi leʼ monɗra de jel nen ɓaara gesiŋ ne hẽn pele. 7Josef ko hẽẽre ɓen wo, saara kal leɗ monɗra ne hẽne. Ama á kal joŋ see ɓe waare pel ɓaara, á wãã wããre ne hara de carge pãã, wii ra ga : Nday a le gene? Á kal wo fer wããre ne hẽn ga : Le ɓi sir Kanaan, wùr a yee rege. 8Josef ko hẽẽre ɓen wo no, ama ma ɓaara saara kon gà. 9Josef kal ferge ɗiggi ti lwaʼge maga se hay lwaʼ ti ɓaara mono, day á wii ra ga : Nday diŋ jar age ko sirn koge. Nday a koge diŋ ga nday daʼ dehugli sirn nen ɓaŋ honla. 10Á kal wo fer wããre ne hẽn ga : Baywa waŋ ɓi, weere jõõre ɓon a wo yeege diŋ coore ble. 11Wùr ɓuy diŋ jar ni jobo boŋ. Wùr wãã diŋ wããre ma nen seŋ mbe, weere jõõre ɓon bay wo diŋ jar ko ngel wa. 12Á wii ra ga : Bay po wa. Nday à koge diŋ ngel hugli maga wo ɓi sirn lam no. 13Á kal wo fer wããre ga : Wùr weere jõõre ɓon wùr diŋ jar ni jobo boŋ hwal ti ɓog le ɓi sir Kanaan. Day ma klee wùrn yaŋ le de gwaʼge liŋ see pan wùri, ma po boŋ sen bay wa so. 14Josef kal fer wããre ne hara ga : Ndi hay wii we patala ga ge, nday diŋ jar ko ngele. 15Mokay diŋ faage maga à lam nday ge de ɓe mono. Ndi haʼ go ti caw Farawoŋ, nday laa ge go ti ngel mo taʼ la gà hayga nday baa hẽn ɓay ma kleen we le gà no. 16Ɓoʼ we jobo yoo ɓay boŋ ma woge kiɗ hẽn ɓayn le. Ma ɓayn mo lay no, nday raw ti daŋgay. À lam ge nen wããre ɓay yaŋ ma koge ga hayga nday wãã mbay nà diŋ cwãy no. Bay wa no, ti ɗúu caw Farawoŋ nday diŋ jar ko sir no. 17Á kal joŋge ga hoo ra ɓuy ti daŋgay naw swaʼa.

18Wur naw ma de swaʼn mono Josef wii ra ga : Mokay diŋ fen maga nday joŋn ge mono, maga nday mo hay sugi, werga ndi joŋ hẽẽne Baa. 19Hayga nday wãã mbay go nà de nen seŋ no, daga hẽn ɓay po mo gwaʼ ti daŋgay yoo ɓayn la ni boŋ. Ma ɓayn see we, hoo we coore ble doo ɓay ma woge hã rege ne jar ni ɓay wo, 20day ni nday baa we hẽn ɓay ma kleen le, nen maga à mo daʼ wer go ne wããre ɓay no, day nday mo daɗ húulí wa. Á kal wo joŋge doo sen nono.

21Á wii wo kããra ti yoo ɓaara ga : Doosen nono, naa joŋ ɓlagge see hẽn naa no, werga naa ko hẽẽne maga hay caa ne ɓil mono, de maga á hay wii naa ga naa mo ko decoo se, naa laa dayge laa wããre ɓen gà mono! Diŋ wersen ga bon sen daʼ naa mokay so no. 22Ruben kal maŋ wããre wii ra ga : Ndi hay wii nday go ga? Ga Joŋ we weln de re ma kay wa ga? Day nday laa dayge laage ɓe gà. Mokay so no, à fer wii cíi ɓe doo naa so. 23Á hay bay wo de koge ga Josef de laage ɓe wa, werga a hay fer jag ɓaara go ferge. 24Á kal yaʼge wo go see ɓaara ma raage.

Jar ni Jakob fer wo ɓi sir Kanaan

Á kal ferge le fer wããre ne hara, blam ɓe á kal baa Simeyoŋ, baŋn de cen de nen ɓaara. 25Josef kal wããge ga : Bag ndar ɓaaran go ne hara de coore ble, day ni laa solay wosela wo ne hẽn ɓi ndar ɓen ni, hã rege ma ti faage ne hara ni. À kal joŋge doo sen nono. 26Á kal wo hoo coore ble ɓaara ti gerhẽẽ ɓaaran wo kal wo rawge. 27Jobo yoo ɓaara kal bul jag ndar ɓen go ma hã hãã ne gerhẽẽ ɓen ti ngel maga naw baa ra ni mono, á kal daʼ solay ɓen go de ɓoʼge jag ndarn la tiʼ i. 28Á wii hẽẽre ɓen wo ga : Á fer solay ma ɓin me, á mo tiʼ jag ndar ma ɓin no. Doo kay nono, jiili ɓaara kal daŋ rage go. Á kal wo mbaara mbraw ɗiggi sen ti holaŋ ɓaara mbraw so, day wo ga : Baa joŋ sen see naa diŋ may pala?

29Á fer wo le see pan ɓaara Jakob ɓi sir Kanaan, kal wo bag blam wããre maga hay daɗ ra le mo ɓuy no, á wiin wo ga : 30Bloo maga diŋ waŋ wããre sirn mono, á ruu wùr ga wùr diŋ jar age ko sir no. 31Wùr kal wiigi ɓe lay ga : Wùr wãã mbe go ne hẽn mokay diŋ nen wããre tuu lay, wùr bay diŋ jar age ko sirn wa. 32Wùr jar ni pan wùr ɓuy wùr hwal ti ɓoge. Ma boŋn bay wa so, ma kle wùrn patala yaŋ le de gwaʼge see pan wùr ɓi sir Kanaan. 33Bloo se maga diŋ je wããre sirn la kal fer wããre ne wùr ga : Mokay diŋ fen maga ndi lam ge nday ma koge ga nday wãã mbay go nà de nen seŋ mono. Men we hẽn ɓay po biŋ ɓi la boŋ, hoo we fẽẽre ma woge hãge ne jar ni ɓay wo, see we ni nday baa we hẽn ɓay ma kleen le me. 34Diŋ doo kay ga ndi ko ge yaŋ ga nday bay diŋ jar age ko sirn wa, day wããre ɓayn mbe go de nen seŋ. Ndi hã ge hẽn ɓayn yaŋ ne nday ni nday seege mbay yaŋ ɓi sirn la hãy.

35De maga á wo wo lag fẽẽre ma ɓi ndarn wo go so mono, wosela ɓuy kal daʼ suŋgu ɓen wo de saʼge ɓil ɓe ni. Á kon wo ɓuy de pan ɓaara, hẽẽne kal joŋ rage. 36Pan ɓaara Jakob wii ra ga : Nday kiɗ caa nen ɓi go see weere ɓin wo ɓuy so. Josef bay wa so, Simeyoŋ bay wa so, nday baa ge Benjame! Á mo deŋ ɓuy ferge leʼge nà me ti. 37Ruben wii pan ɓe ga : Ni ndo ii mbo weere ɓi ma ɓogn wo go, hayga ndi fer we le de Benjame gà no. Han mbo me doo, ndi fer ge mbi yaŋ le de ɓe. 38Jakob day ga : Wel ɓin cegaɗ ge wo go wer ɓay ni gà werga hẽn ɓen huu go, á gwaʼ boŋ. Hayga re po daʼn we wo ti faage ni no, nday joŋ ge diŋ may la. Nday laa ge riŋ ɓi ma de puyn wo nen lawge ni jar húulí wo.

Currently Selected:

TĨĨGI WERE 42: TUP

Highlight

Copy