TĨĨGI WERE 41

Lwaʼge mani Farawoŋ wo no

1Kiŋgi wo maŋge ɓog mono Farawoŋ kal lwaʼge. Á hay de oole jag maarog deŋe. 2Maare deere ma de goɓre de woore renam kal wo laage le go nen maaroge, kal wo yaʼge rege ti jeŋ bii tiʼ i. 3Blam ɓe maare deere ma tigriŋ wo de bay woore de ngogre kal wo laage le go nen maaroge, kal wo lagge ti jeŋ ɓaara jag maarog no. 4Maare deere ma de bay woore de ngogren wo la kal wo re ma de goɓre de wooren wo go. Farawoŋ kal mbe go pũygi so. 5Á fer leʼ naa, se fer lwaʼ lwaʼge ma de ɓog pa. 6Heege kaʼ boŋ, coore ma de ndar ti de woore laa wo ti le go see ɓe renam. Blam ɓe coore ma de bay woore de cwẽd ti go de roɗge doo leege ma nen wer kal wo laa ti le wer ɓaara. 7Coore ma de laa ti de bay woore de cwẽdgen wo la kal wo lig ma de ndar ti de wooren wo go. Farawoŋ kal pũygi go. Mo kay diŋ lwaʼgen so.

8Ngel wo go teege mono ɗiggi Farawoŋ hãy go, á kal ɗe jar joŋ maaji ma ɓi sir Ejipten wo le de jar ɓe ma de ko reen wo le ɓuy. Farawoŋ kal bag blam lwaʼge ɓen wo ne hara. Ama jobo kãã ma ɓod wer ɓaara go ne Farawoŋ boŋ gà. 9Doo kay nono, waŋ ma kluu ma wãã wããre yiin kal maŋ wããre wii Farawoŋ so ga na : Ndi fer wara ɗiggi ti ɓlagge ɓi no. 10Jiili Farawoŋ hay cen ti weere jõõre ɓen wo no. Á hay joŋ nen baa me ge, ɓoʼ me ti daŋgay ɓi tiŋ mani waŋ jar koɗ sooden wo no. Wùr de waŋ ma wãã wããre hoole no. 11Wùr kal lwaʼge nen suŋgu po wurpo boŋ. Wosela yoo wùr ɓuy, à hay nen ɓod wer lwaʼge ɓe maga á hay lwaʼn go ne hẽne. 12Wel jar Hebre po hay yaŋ see wùr ni, diŋ gebee waŋ ma gor ti sooden wo no. Wùr bag blam lwaʼge wùrn wo ne hẽne, á ɓod wer ɓaara go ne wùri. 13Fẽẽre sen joŋ ge wo nen joŋge doo maga á ɓod wer ɓaara ne wùr no lay. Farawoŋ fer kaŋ mege ti ngel joŋre ɓi no, á ɓal waŋ ma wãã wããre hoolen go ciŋ.

Josef naa wer lwaʼge mani Farawoŋn wo go

14Farawoŋ joŋ nen ɗe Josef le. À kal ɓoʼge ɓe le go ti daŋgayn deparday. Á kal cẽẽ ti go, coo õõbe ti ɓe, kal woge ɓiŋ Farawoŋ. 15Farawoŋ wii Josef ga : Ndi lwaʼa. Jobo bay de kããge ma ɓod wer ɓe wa. Day ndi laa ga ndo ɓod wer lwaʼge maga á bag blam ɓe we ne ndo mono. 16Josef kal fer wããre ne Farawoŋ ga : Bay diŋ ndi wa! Fer ge wããre ma de el ne Farawoŋ diŋ Baa.

17Farawoŋ kal wii Josef so ga : Lwaʼge ɓin mokay no. Ndi de oole jag maarog deŋ. 18Ko nà maare deere ma de goɓre renam, de này see ko wo wo de woore, ɗii wo le go ciŋ nen maaroge, kal wo yaʼge koɗge ti jeŋ maarog tiʼ i. 19Maare deere ma tigriŋ wo renam, ko wo wo debay woore de hãã debaŋ, de ngogre, bay wo de này see wa, kal wo ɗiigi le wer ɓaara. Ndi bay bà de ko te debay woore ma sen mokay ɓi sir Ejipte la wa. 20Day ma debay woore debay này seen re wo ma de goɓre ma taŋgun wo go. 21Á kal wo lig rage go ɓil ɓaara, day ndo ko ra doo ga saara bay de lig mo po wa nono. Ndo ko ra á wo mbaara ti ngel ɓaara debay woore doo maga saara hay taŋgu nono. 22Day ndi kal pũygi go. Nen lwaʼge tigriŋ, ndi kal ko laage ti coore de woore renam de ruggi laa wo le go see heege po boŋ. 23Laage ti coore ma tigriŋ renam bay mbèere nen de kreʼge go de roɗge go doo leege ma nen wer kal wo le jorge wer ɓaara. 24Laage ti coore ma de kreʼgen kal wo lig ma de laa ti de wooren wo go. Ndi bag blam ɓe ne jar joŋ maajin wo, ama jobo kãã ma ɓod wer ɓe go me gà.

25Josef wii Farawoŋ ga : Lwaʼge maga Farawoŋ lwaʼn mono á diŋ mopo boŋ. Baa kaŋ nen Farawoŋ go ti fen maga se joŋn ge mono. 26Maare deere ma de woore renamn wo diŋ kiŋgi renam, laage ti coore ma de woore renamn wo diŋ kiŋgi renam. Á diŋ lwaʼge po boŋ. 27Maare deere ma de ngogre debay woore maga ɗii wo le wer ma taŋgun wo diŋ kiŋgi renam. Day laage ti coore ma bay mbèere maga go de roɗge doo leege ma nen wer wo diŋ kiŋgi renam de koŋne. 28Ti ngel sen doo maga ndi wããn ne Farawoŋ la no no, Baa kaŋ nen Farawoŋ go ti fen maga se joŋn ge mono. 29Ko ɗa, kiŋgi joŋge yaŋ renam fẽẽre joŋge mbe ɓi sir Ejipte la ɓuy deŋ. 30Kiŋgi ma de koŋne a ge wo le blam ɓe renam, day ti yããge fẽẽre ma debaŋ maga hay mo deŋ go ɓuy, koŋne re ge sirn go ɓuy. 31Koŋne maga a ge le mono, á joŋ ge de egre debaŋ, hãã à ko ge fẽẽre ma debaŋ maga hay ɓi sirn mo deŋ gà so. 32Doo maga lwaʼgen dog Farawoŋ ɓog mono sen diŋ mo ma kaŋ nen ga Baa le go de saʼ wããre se no, day á joŋn ge go deparday. 33Patala daga Farawoŋ mo baa jobo de ti, de ko re, mo kaŋn ciŋ ti sir Ejipte. 34Daga Farawoŋ mo hoo jar joŋre po wo, mo lag ra tay ma de dwee fẽẽre maga à daɗn ge ɓi sir Ejipte mo ɓuy nen kiŋgi maga fẽẽre mbe de sen deŋ ɗa mono. 35Daga á mo baa jag fẽẽre maga á daɗ ra nen kiŋgi se ma de el maga a ge wo le mono. Daga à mo tay ti coore ble ciŋ nen ɓo ɓi leege ma Ejipten wo ɓuy, ma ɗogge. 36Sir Ejipte joŋ ge yaŋ de rege ciŋ de baa jag lag ɗogge nen kiŋgi ma renam maga koŋnen ni mono, nen maga koŋnen mo re sirn go wa.

Josef kol diŋ Minisdir ma Farawoŋ

37Wããre sen mokay co jag Farawoŋ de weere jõõre ɓen wo ɓuy. 38Farawoŋ wii ra ga : Naa daʼ mbe jobo yaŋ doo je ma yeʼ la ga de Nenterse Baa? 39Farawoŋ wii Josef ga : De maga Baa kaŋ nen ɓo ti sen mo kay, jobo ma de ti, de ko re lay doo ndo nono daʼ gà. 40Ndo joŋ ge nen hayge ti tiŋ mani ɓin diŋ ndo. Jar sir ɓin ɓuy hoo ge wo sug ti wããre maga ndo wãɗ ge ra mono. Go de kaŋ mege ciŋ ti ɓo diŋ paale waŋn tawa. 41Farawoŋ wii Josef ga : Ko nen ɓo, ndi hã sir Ejipte mo doo ɓuy ndo wãã wããre ɓe. 42Farawoŋ naa boo ma ti wedoo ɓen le, heen ne Josef ti wedoo. Á kal laa õõbe lẽẽ ma kefkef ne hẽn ti, hee redew boo biŋni ne hẽn soole. 43Á kal hayge ɓe ciŋ ti pus maga de seege wer ɓe tuu mo no. Day á ngar jag pel ɓe so ga : Laa kõyõgre! Diŋ doo kay nono, ga Farawoŋ hã wããre sir Ejipte ne hẽn doo. 44Á wii Josef pa ga : Ndi diŋ Farawoŋ! Ndo hã faage mopo we gà no, jobo maŋ doo ciŋ gà lay, maŋ ɓaale ɓi sir Ejipte la gà has lay. 45Farawoŋ kal kaŋ ɗúu ne Josef ga : Safnat-Payeneyag. Á kal hã Asnad may mani Poti-Feran je siɗ jag ma Onn ne hẽn wãy. Josef kal rawge raŋ sir Ejipte. 46Kiŋgi Josef hay doo swaʼa, de maga á wo pel Farawoŋ waŋ Ejipte mono. Á kal men Farawoŋ go, raŋ sir Ejipte go ɓuy.

47Nen kiŋgi ma renam ma nen ngel maga fẽẽre mbe deŋ mono, sir joŋ fẽẽre debaŋ. 48Josef tay ti fẽẽre maga joŋ wo nen kal sen wo ɓi sir Ejipte mo ɓuy. Á kal lag fẽẽre rege ciŋ ɓi leegen wo, ɓi leege ma honla se laa fẽẽre maga hay joŋ wo ɓi pay ma ti jeŋ ɓe ni karra mono ni. 49Josef tay coore ble doo duguɗgi ma jag maarog nono, hãã à kol men keege ɓe, werga ngaɓa ɓe hay bay tinoo wa so.

50Taŋgu kiŋgi koŋnen wo mono, Asnad may mani je siɗ jag ma Onn hay biŋ weere ne hẽn ɓoge. 51Josef kaŋ ɗúu ne ma taŋgun ga Manase, werga á ga : Baa joŋ ga ti ɓi mo yãã gaali ɓin wo go, de tiŋ mani pan ɓi no. 52Á kal kaŋ ɗúu ma de ɓogn ga Efrayim, werga á ga : Baa kol me je tesge ɓi sir maga ndi nen lawge ni mono.

53Kiŋgi maga fẽẽre mbe nen ɓe deŋ ɓi sir Ejipte cegaɗ wo go. 54Kiŋgi maga koŋnen joŋ nen ɓaara tĩĩ wo wer doo maga Josef hay wããn go no so mono. Koŋne kal leʼge go ɓi sir wo ɓuy. Ama ɓi sir Ejipte ɓuy mo lay no, rege hay yaŋ mbe lay. 55De maga koŋnen laa doo we ne sir Ejipte see lay no, jarn kal laa roo ne Farawoŋ ti ma daʼ rege. Farawoŋ wii jar Ejipte wo ɓuy ga : See we see Josefe, ni nday joŋ we fen maga á wããn ne nday mono. 56Koŋnen hay go de suuli ɓi sirn ɓuy. Josef kal bul jag ngel hã rege ne jarn wo go ɓuy, yeɗ coore ble ne jar Ejipte wo. Koŋnen yaɗ wer ciŋ ɓi sir Ejipte. 57Day le go ɓi sir wo ɓuy tuu, à nduu yee coore ble nà Ejipte, see Josefe, werga koŋnen hay go ɓi sir wo ɓuy de egre debaŋ.

Currently Selected:

TĨĨGI WERE 41: TUP

Highlight

Copy