TĨĨGI WERE 40

Josef ti daŋgay

1Blam fẽẽre sen wo mo deŋ ɓuy, ti wurpo, je ma wãã wããre yii ma hãge ne waŋn wo de je ma wãã wããre hoole ma hãge ne hẽn mbuɗ wo jiili ne pan tiŋ ɓaara waŋ Ejipte. 2Jiili waŋ Farawoŋ kal cege ɓe ne jar kluuri se ɓogn wo ti, je ma wãã wããre yiin lay, je ma wãã wããre hoolen lay. 3À kal laa rage wo ti daŋgay see waŋ ma wãã wããre soode mani waŋ wo no, ti ngel maga Josef de maʼ jag ni mo lay no. 4Waŋ ma wãã wããre sooden wo la kaŋ Josef gor rage saara nà le ti daŋgay ni mbage. Josef hay ti joŋre ti ɓaara.

5Ti wurpo nen suŋgu po boŋ, je wãã wããre hoolen wo de je wãã wããre yii mani waŋ Ejipte maga hay wo de maʼ jag ti daŋgay mo no lwaʼ wo ɓog ɓuy. Ma wosela ɓuy mono naage wer ɓe sare. 6Josef a ɓiŋ ɓaara de jag toŋ ko rage, ko nà saara go de car jiili. 7Á kal wii jag jar kluuri mani Farawoŋ maga hay wo ti daŋgay ni pan tiŋ ɓaara ni ga : Diŋ wer may ga nen ɓay wara ma sen de ɓlagge no ɓa? 8Á kal wo fer wããre ne hẽn ga : Wùr lwaʼa, day jobo bay naa wer ɓe go ne wur wa. Josef wii ra ga : Ɓoɗ wer fẽẽre wo nà diŋ ma Baa ga ge? Bag we blam lwaʼge ɓayn me ɗa.

9Waŋ ma wãã wããre yiin la kal bag blam lwaʼgen ne Josef so ga : Ɓil lwaʼge ɓin mono, koo tlalum hay yaŋ pel ɓi kaʼa. 10Koo tlalum mokay jag doo ɓe swaʼa. De maga á jaw wo so mono, á kal fuɗgi, blam ɓe kal joŋ leʼge le go de ruggi. 11Wehãn yii mani Farawoŋ hay doo ɓi kay. Ndi kal hoo leʼge tlalum no, ndi hãã ɓil wehãn no, ndi hãn ne Farawoŋ ɓi coo doo. 12Josef kal wiigi ɓe ga : Ɓodge wer ɓe mono : Jag doo tlalum ma swaʼn diŋ naw swaʼa. 13Naw gwaʼ swaʼ Farawoŋ fer yaŋ maŋ ti ɓo ciŋ, kaŋ mo yaŋ ti ngel joŋre ɓo no, ndo hã wehãn yii yaŋ ne Farawoŋ doo doo maga ndo hay joŋge ɓe tum no no, de maga ndo hay diŋ je wãã wããre yii mono. 14Ama, ni ndo ɗig ti ti ɓi, de maga ndo daʼ see ɓo we no, ndi kam ndo joŋ ɓil de el see ɓi, fer wããre ɓi ne Farawoŋ, joŋ nen ɓoʼ mege go ɓi tiŋ sen lam no. 15Werga à baa me le go ɓi sir ni jar Hebre wo, day bà lam pa no, ndi bay de joŋ mopo maga à ɓoʼ me ti daŋgay ti re ɓe wa hase.

16Je kluu ma wãã re hoolen ko ga á ɓod wer ɓe de el ti ɓaŋ mani bloo lan bagla mono, raw wii Josef ga : Ma ɓin ti lwaʼge ɓin mono, hoole pẽẽ ma depuy hay de kaŋge ti ɓi ti yããge swaʼa. 17Ɓi yããge ma ciŋ tawn mono, fen maga je wãã re hoolen joŋn ne Farawoŋ mokay hay go ɓil ɓe ni ɓuy. Ama weere dweere kal wo age rege ɓe go ti yããgen ti ɓi taʼa. 18Josef ga ɓodge wer lwaʼge ɓon mono : Yããge ma swaʼn diŋ naw swaʼa. 19Naw gwaʼ swaʼ Farawoŋ maŋge ti ɓo yaŋ ciŋ hãã dedaŋ moge, á ɓal mo yaŋ go ciŋ jag koo day weere dweere rege wo này ɓo yaŋ go.

20Wur naw ma de swaʼn ga diŋ naw few biŋgi waŋ Farawoŋ mono, á kal joŋ few ma kluu ne weere jõõre ɓen wo ɓuy. Á kal maŋ ti je kluu ma wãã re yiin wo de je kluu ma wãã wããre hoolen wo go ciŋ yoo weere jõõre ɓen wo no. 21Á fer kaŋ je kluu ma wãã wããre yii wo ti ngel ɓe, je ma sen la kal hã wehãn yiin ne Farawoŋ doo. 22Ama à raw ɓal je kluu ma wãã wããre hoolen go ciŋ jag koo doo maga Josef hay ɓod wer ɓe nono. 23Je kluu ma wãã wããre yiin ɗig ti ti Josef gà. Á yãã ti go.

Currently Selected:

TĨĨGI WERE 40: TUP

Highlight

Copy