TĨĨGI WERE 39

Josef wo go Ejipte

1À raw kolge wo go de Josef Ejipte, Potifar, waŋ soode ma gor ti Farawoŋ ma Ejipten wo no, kal yeege ɓe doo jar Ismayel maga hay cegaɗ wo wo go de ɓe ni mono. 2Manwur hay de ɓe, horog kal maŋ blam ɓe. Á kal hayge liŋ ni je Ejipte pan tiŋ ɓe no. 3Pan tiŋ ɓen kal koge ga Manwur de ɓe, day Manwur de wùu se de fẽẽre, de maga se joŋ mo po ɓuy mono. 4Josef kal koge nen pan tiŋ ɓen de ele, maga kal kaŋge ɓe ti joŋre ɓe, kaŋn wãã wããre tiŋ ɓe, kal hã fẽẽre ɓe maga se hay de ɓaara ne hẽn doo ɓuy. 5De maga Potifar kaŋn ti tiŋ ɓe no, ti fẽẽre ɓen wo ɓuy no kay tuu mono, Manwur kal kaŋ bosaʼ ne tiŋ je Ejipten ti, wer Josefe. Bosaʼ ma Manwur kal joŋge ti fẽẽre maga se de ɓaara mo ɓuy no, maga wo liŋ ni, de maga sen wo le go mbásga mo ɓuy. 6Á kal tob fẽẽre ɓe maga se de ɓaara ɓuy go ne Josef doo, ma ɓen gwaʼ diŋ ga se re jag se diŋ hoole tawa. Paga Josef hay de jawre wejõõ debaŋ, hay woo nen debaŋ lay.

7Blam fẽẽre sen wo mo deŋ ɓuy, day ti wurpo wãy pan tiŋ ɓen la kal leʼ nen ne Josef ti.

8Á day ga : Suu de ɓi! Se day kal wii wãy pan tiŋ ɓen ga : Pan tiŋ ɓin bay ko mopo ma tigriŋ liŋ see ɓi la ni wa, á hã fẽẽre ɓe maga se de ɓaara mo ɓuy go me doo. 9Á bay dedaŋ me ge kluu liŋ mo taʼ la wa, day á bay go de maŋ jag ɓi ti mopo wa lay, say diŋ ndo boŋ, werga ndo diŋ wãy ɓe. Ndi joŋ ge ɓlagge ma se kluu mokay joŋge see Baa ɓin ne? 10De maga á mbe de baa wùu tum ti wããre sen ne Josef ane, Josef laa dayge suugi ɓiŋ ɓe gà laa dayge woge see ɓe gà. 11Wurpo Josef kal tiŋma ti joŋre ɓe, day jar maga hay wo liŋ ni mono, jobo bay liŋ ni boŋ wa lay. 12Se kal yoʼge de õõbe ɓen cam wiin ga : Suu de ɓi! Á kal men õõben go ne hẽn doo ni, kal daŋge wo go de ɗee siigi. 13De maga se wo koge ga á men õõben ne se doo, daŋ wo go de ɗee siigi mono, 14Á kal ɗe jar ma liŋ ni ɓen wo le day wii ra gana : Ko we ɗa, á baa je Hebren le mo deŋ ma mbuɗ foo naa no. Bloo mo deŋ á nduu ɓiŋ ɓi ga se suu de ɓi, diŋ ga ndi raw ngar jag go jag ciŋ kloŋ. 15De maga á wo koge ga ndi go de maŋ gẽẽge ciŋ, day ndi de ngar jag mono, á kal men õõbe ɓen go ɓiŋ ɓi ni kal daŋge go de ɗee siigi. 16Á kal laa õõbe Josefn ɓiŋ ɓe lag ga hãã pan tiŋ ɓen mo a ge liŋ ɗa. 17Doo kay nono, á kal fer wããre ne hẽn doo kay so ga : Gebee je Hebre maga ndo baan le ne naa mono, nduu see ɓi ga se mbuɗ foo ɓi. 18Doo maga ndi kal maŋ gẽẽge go ciŋ, ndi kal ngar jagge, á kal men õõbe ɓen ti jeŋ ɓi ni, kal daŋge go de ɗee siigi. 19De maga á laa wããre wãy ɓe maga wãã ne hẽn ga : Mokay diŋ fen maga gebee ɓon joŋ me de ɓe mokay no mono, pan tiŋ Josefn leʼ go de waŋ plaŋgadaŋ tuu. 20Á baa Josef ɓoʼ ti daŋgay, ti ngel maga daŋgay mani waŋn hay wo de maʼ jag ni mono, á ɓoʼn ti daŋgay ni.

21Manwur hay de Josefe, á kal joŋ de el ɓen ti ɓe. Á kal joŋ ge ga Josef mo ko de el nen waŋ ma wãã re daŋgay wo no. 22Waŋ ma wãã re daŋgayn kal kaŋ Josef gor daŋgay ma ɓuy maga hay wo ti daŋgay ni mono. 23Waŋ ma wãã re daŋgayn wo bay de kaŋ ɗiggi ko fen ma doo Josefn wa has ɓuy, werga Manwur hay de ɓe. Joŋre ɓe maga á hay joŋge ɓuy mono, Manwur hay kayge ɓe ni.

Currently Selected:

TĨĨGI WERE 39: TUP

Highlight

Copy