TĨĨGI WERE 38

Juda wo de Tamare

1Ti wur sen ni mono, Juda kal yaʼ see ɓe go see hẽẽre ɓen wo, kal naa see ɓe wo go see bloo po ma Adullam maga á ɗen ga Hira. 2Wo ni mono, Juda raw ko may ma je Kanaan po maga á ɗen ga Suwa. Á kal dage ɓe wãy, kal woge ɓiŋ ɓe. 3Se kal maŋ ɓiili, kal biŋ wele, se kaŋ ɗúu ne hẽn ga Er. 4Se kal maŋ ɓiili tigriŋ pa, kal biŋ wel maga se ɗen ga Onan. 5Á kal biŋ wel tigriŋ pa, maga se ɗen ga Sela. Juda hay de tiŋ Kesib de maga wãyn biŋ mono.

6Juda kal dage ne jag mbarga ɓe Er diŋ wãy maga á ɗen ga Tamar. 7Er, jag mbarga Judan la hay de ɓlagge nen Manwuri, Manwur raw ʼwarge ɓe go. 8Doo kay no no, Juda riŋ Onan ga : Wo ɓiŋ wãy wegeman ɓo no, doo bãy ɓo no no, jor cẽw ne wegeman ɓo no. 9Onan go de koge ga sen joŋge diŋ cẽw se ga lay, leʼ woge ɓiŋ wãy wegeman ɓen mokay to go gesiŋ nen siri, nen maga se mo jor cẽw ne wegeman sen wa. 10De maga á joŋ doo kay no mono, sen kal coge jag Manwur gà Manwur kal ʼwarge ɓe go. 11Doo kay no no, Juda wii moo ɓe Tamar ga : Wo hayge dewur liŋ ni pan ɓo, hãã wel ɓi Sela mo gẽẽ go ɗa. Á wããn doo kay no mono, diŋ doo hẽẽne maga Sela mo huu go doo hẽẽre ɓen wo no wa so. Tamar kal rawge, wo hayge liŋ ni pan ɓe.

12Naw raw mbe go so, may ma Suwa wãy Juda kal go huugi. De maga Juda coɓ mbe go so mono, á kal ɗiigi wo go Timna see jar maga hay wo caw fũy sããre ɓen wo, á wo de bar ɓe Hira je Adullam no. 13À kal woge wii Tamar ga : Ko ɗa moo ɓo yaŋ go woge Timna caw fũy sããre ɓe wora. 14Doo kay no no, á kal naa õõbe dewur ɓen wo go, kal klew õõbe go ti ɓe ɓuy, wo hayge jag faage Enayim ti faage Timna. Werga á ko Sela hay kol mbe go kluu ama, à laa dayge hã sege ne hẽn wãy gà mono.

15Juda ko ne, kal wãã ɓen ga á joŋ diŋ wãy figliw werga á hay yoŋ nen ɓe go. 16Á kal yiŋgi ɓe ti faage ni tuu day ga : Naa see ndi wo ni ɓo. Werga á hay ko doo ɓe ga á la diŋ moo sen gà : Moo ɓen day ga : Ndo hã mayse me ma woge see ɓi mo ne? 17Á kal fer wããre ne hẽn ga : Ndi baa fǐi yaŋ le mo yoo horog ɓin wo no. Moo ɓen day ga : Ndo kaŋ mopo me wer ɓe taŋgu maga ndo hãge fǐin le mono? 18Á kal fer wããre ne hẽn ga : Ndi kaŋ ge mo diŋ may? Moo ɓen day ga : Kase ɓon wo de saale ɓon wo de graw ma doo ɓo no. Á kal hã rage ne hẽne. Blam ɓe se kal woge see ɓe, á kal maŋ ɓiili de ɓe. 19Á kal urgi go ciŋ kal mbe rawge so, hog õõbe ma nen ɓen go, fer laa õõbe dewur ɓen mbe so.

20Juda kal coŋ fǐin le ne bar ɓe je Adullamn ma hãge ne wãyn so, ma yãã fẽẽre maga hay wo de kaŋge mo so no. Ama á daʼn gà. 21Á wii jag jar ma ti ngel wo ni ga : Wãy figliw maga hay hayge ti faage Enayim lam no, á gen la? Á kal wo fer wããre ne hẽn ga : Wùr bay bà de ko wãy figliw po la wa ɓuy yaw. 22Á kal ferge ɓiŋ Juda wiin ga : Ndi daʼn gà day jar ma ti ngel wo ni draʼ wãã wo ga, wãy figliw po bay la wa ɓuy yaw. 23Juda ga : Á mo ɗaw sog ne! Naa kaŋ wer see naa fege ti wa. Ko ɗa ndi hay ɓoʼ ndo wo de fǐin mono, day ndo daʼn gà.

24Few joŋ go blam sen swaʼ no kay, á kal nduugi wii Juda ga : Tamar moo ɓon leʼ go ti figliw, day á daʼ ɓiili go jag figliw ɓen ni. Juda day ga : Baan le go ni roɗn go. 25De maga à le go de baage ɓe mono, á kal wii moo ɓen wo ga : Bloo maga fẽẽren mokay diŋ ɓe mono, maŋ ɓiili ɓi diŋ se. Ndi kam ndo Kasen wo mokay de saale no, de grawn diŋ ma wo la? 26Juda kal ko rage day ga : Á bay de joŋ ɓlagge dedaŋ mege wa, werga ndi hãn ne wel ɓi Sela gà. Blam ɓe Juda wo see ɓe gà so.

27De maga wur biŋgi ɓe á go so mono, ko nà hay ɓil ɓe diŋ weere gèere wo.

28De maga á de biŋgi mono, maapo boŋ kal hee doo le go. Wãy ma de ko biŋ naaren kal ɗaw doo ɓe le go. Wãy ma de ko biŋ naaren kal ɗaw doo ɓe, kal saʼ saale ma de sẽẽ yiŋyiŋ ne hẽn doo, day ga : 29Ma kay la kal le go taŋgu. Ama á kal fer doo ɓe wo go, hẽn ɓen kal kalge le go. Doo kay nono wãy ma ko biŋ naaren day ga : Sen diŋ ywaale may ga ndo caan mokay la ne! Á kal kaŋ ɗúu ne hẽn ga Perets. 30Blam ɓe hẽn ɓen kal kalge le go de saale ma de sẽẽ yiŋyiŋ doo, á kal kaŋ ɗúu ne hẽn ga Serag.

Currently Selected:

TĨĨGI WERE 38: TUP

Highlight

Copy