TĨĨGI WERE 37

WÃÃRE JAKOB WO DE JAR NI ƁE

Hẽẽre Josef yee wo ne go

1Jakob kal hayge de tiŋ ɓi sir Kanan ti ngel maga pan ɓe hay joŋ de tiŋ ni mono. 2Mokay diŋ wer mani Jakob no : De maga kiŋgi Josef hwal ti renam mono, á de koɗ fǐiri yoo hẽẽre ɓen wo caw lay. Á klee lewɗeŋ caw ɓiŋ jar ni Bilha wo de jar ni Silpa naare pan ɓen wo no. Paga Josef nduɗ de wããre ɓaara ma de ɓlagge maga á wãɗn wo ne pan ɓaara. 3Israyel hay da Josef dedaŋ weere ma lan wo ɓuy werga á biŋn go nen tããbe. Á hay caa õõbe ma de yerge ne hẽne.

4Hẽẽre ɓen kon wo ga à dan dedaŋ saara mono, kal wo caa hee de ɓe. Á bay wo wãã wããre ne hẽn desãy wa.

5Josef lwaʼa, day kal age bag lwaʼge sen ne hẽẽre ɓen wo, saara yaʼ wer caa ge heen wo ciŋ pel ni tigriŋ so. 6Á wii ra ga : Coʼ we sug lwaʼge maga ndi lwaʼn mono!

7Naa ɓil pay de saɗ coore ble. Ko nà coore ble ma ɓi ma de saʼgen kal urgi go deele, ma ɓayn kal wo age cir ti ɓe, leɗ wo monɗra pel ɓe.

8Hẽẽre ɓen wiin wo ga, ndo wãã nà ga ndo joŋ waŋ ti wùri? Ndo kol diŋ je wãã wããre wùri? Á fer wo yaʼ wer caa hee wo de ɓe ciŋ pel ni dedaŋge wer lwaʼge ɓen wo de wããre ɓe no.

9Á kal lwaʼ lwaʼge ma tigriŋ pa, kal bag blam ɓe ne hẽẽre ɓen wo. Á ga : Ndi lwaʼ tigriŋ pa! Ndi ko nà wur wo de few, gér wo ni hwal ti boŋ lay leɗ wo monɗra me pele. 10Á kal bag blam ɓe ne pan ɓe wo de hẽẽre ɓen wo no. Pan ɓe kal joŋ dekwãy ne hẽn day wiin ga : Wer lwaʼge ɓo maga ndo lwaʼn nà gahãy so ne? Á nà ga ndi, man ɓo, hẽẽre ɓon wo, wùr mo á leɗ monɗra mo? 11Hẽẽre ɓen kal wo kolge de hun see ɓe, ama pan ɓe kal ɗaw fẽẽre sen wo ti ɓe.

12Hẽẽre Josefn hay raw wo koɗ fǐiri mani pan ɓaaran wo go Sikem. 13Israyel wii Josef ga : Hẽẽre ɓon wo le de koɗ horog wo go Sikem ga? Á le ɗa, ndi ɓoʼ mo ɓiŋ ɓaara. Á kal fer wããre ne hẽn ga : Ndi yaŋ la! 14Israyel wiin ga : Joŋ nen woge ko hẽẽre ɓon wo ɗa á yaŋ wo mbaara go jam yawla, day horogn yaŋ wo mbaara de el lay yawla, ni ndo fer le de wããre ɓaara me. Á ɓoʼ Josef le ti log ma Hebroŋ no, se kal rawge Sikem.

15Bloo po kal daʼge ɓe go de welge mbasga ni caw. Á wii jag ɓe ga ndo kiɗ may la? Josef kal fer wããre ne hẽn ga : 16Ndi kiɗ hẽẽre ɓin wo, ndi kam ndo sii me ɗa, á wo de koɗ horog ɓaaran nà gene? 17Bloon wiin ga : Á raw wo we ti ngel ma taʼ la, werga ndi hay laa á wãã wo ga : Naa see Dotan. Josef kal rawge wer hẽẽre ɓen wo, wo daʼ rage Dotan.

18Á kon wo le hãã caw, de maga á bay nduugi go ɓiŋ ɓaara mbaŋ ɗa mono, saara kal tay jag go ti ɓe ga á nduu we la ni saara mo ʼwarn go. 19Á wii wo kããra ga : Je lwaɗgen day le mo caw no. 20Á we le, patala naa ʼwarn we go, ni naa ɓoʼn we go ɓi gutug po. Naa wãã ge ga này ma de hãã po joŋ baan go, ni naa koge ɗa so lwaʼge ɓen kol ge wo may laybla no. 21Ruben laa wããre sen mono, á kal yããge ɓe go doo ɓaara. Á day ga : Naa taw we naw ɓen go wa. 22Ruben wii ra ga : Kaa we cíi go wa hase. Ɓoʼn we ɓi gutug ma ti puulin wo mo kaʼ no, ni nday duʼ we doo ne hẽn se wa hase. Ma ti ɗiggi ɓen hay diŋ ga se mo yããn go doo ɓaara yaa ni se fern ne pan ɓe.

23De maga Josef á go ɓiŋ ɓaara la so mono, saara jwid õõbe ɓen go ne hẽn ti, õõbe ɓe maga de lag lar pur maga hay ti ɓe mono. 24Á kal wo baage ɓe, kal wo ɓoʼge ɓe ɓi gutugi, gutug sen hay go ɓil koɗe. Bii hay bay ni wa.

25Á kal wo lagge blam ɓe rege. Á maŋ wo nen ɓaara, ko nà jar mani Ismayel wo wer kããra la didid tiʼ i, á wo le Galaad. Ti manyoŋyoŋ ɓaaran wo mono saara hay de hoo fẽẽre fõõre wo ni, bom wo de ladanum wo, ma woge Ejipte. 26Doo kay nono Juda wii hẽẽre ɓen wo ga : Sen daʼ baa may ne naa la, de maga naa ʼwar hẽn naa go, day yoŋ cíi ɓen mono? 27Á we le, naa yeen go ne jar Ismayel wo, naa baa doo ne hẽn see wa, werga á diŋ hẽn naa, diŋ tee hõõgese naa. 28Hẽẽre ɓen kal wo laa jag ɓe. Jar trere jar Madiyaŋ po kal wo heege, saara kal fũŋ Josef naan wo le go ɓi gutug no. Á kal wo yeege ɓe wo go nen boo solay doo ɓog ne jar Ismayel wo, saara raw de ɓe Ejipte.

29Ruben fer le jag gutug no, ko na, Josef bay ɓi gutugn ni wa so. Á kal ngar õõbe ma ti ɓen go, 30fer ɓiŋ hẽẽre ɓen wo ga : Weln bay ni wa so! Day ndi, ndi woge nà gen lay la? 31Á kal wo hoo õõbe mani Josef no, kal wo ii togloŋ laa wo õõben nen cíi ɓe. 32Á kal wo hã õõbe ma de laa lar purn wo ne pan ɓaara, day wãã wo ni so ga : Mokay diŋ mo maga wùr daʼ mono, kon ɗa, á mokay diŋ õõbe wel ɓon mbe yaw bay wa. 33Jakob ko ne, day ga : Á diŋ õõbe mani wel ɓi no! Này ma de hãã reen go! 34Á car nen Josef go geɗeb geɗebe! Á kal ngar õõbe ɓen wo go, kal saʼ sag ɓe de dehay, ig wolaŋ de saʼ fẽẽre ma ra wel ɓe no. 35Jar ni ɓe wo, mayre ɓen wo ɓuy á wo teŋ nen ɓe. Ama, á laa teŋ nen doo ɓaara gà. Á ga : Ndi ra mo hãʼ diŋ maga ndi mo wo daʼ wel ɓin ni jar húulì wo. Á yaʼ mbe ra wel ɓe no.

36Jar Madiyaŋ yeen wo wo go Ejipte ne Potifar, je kluu jar ma gor ti Farawoŋ wo no.

Currently Selected:

TĨĨGI WERE 37: TUP

Highlight

Copy