LUG 12

Koɗ see ɓo doo jar bag bii sen wo

(Mat 10.26-27)

1Ti wur sen jar raw tayge le debaŋ hãã kol wo car kããra ɓaale car ge. Yeso raw riŋ jar ma wer ɓen wo ga : Joŋ we see ɓay doo Farisiyẽẽ wo no wa, bag ge bii maga á bag wo bii se, á doo defõõre nono. 2Jar mo yoŋ bà wo mopo go ga kon wa yaw, jar wo ge mbaara go ko ge ɓe, jar mo wãɗ bà wo re po ga da ga jar mo laan go wa yaw, jar wo ge mbaara go laa ge ɓe. 3Wersen wããre maga nday hay wãɗ we nen suŋgu mo ɓuy no, à wo ge laage ɓe go de ceg kãge. Wããre maga nday hay sweg we ne jobo sug tiŋma de tẽg jag tiŋ ti no, à wo ge ngar jag go de ɓe ciŋ ti tiŋ kloŋ.

Jar mo joŋ hẽẽne diŋ doo Baa

(Mat 10.28-31)

4Ndi de riŋ we ge, nday bar ɓin wo, joŋ we hẽẽne doo jar ma id hõõgese ɓay wo wa, werga blam sen á kãã wo ma joŋ fen ma de daŋ sen gà so. 5Ama ndi kaŋ nen ɓay ti je maga nday mo joŋ hẽẽne doo ɓe mono, joŋ we hẽẽne doo Baa, werga á ii húulí we go, blam sen á de kããge ma ɓoʼ ge ɓe go nen wùu maga huu gà pa mono. Kidolgi ndi de riŋ we ge ga : sen diŋ je maga nday mo joŋ hẽẽne doo ɓe mo so no.

6Jar go de ko ge ɓuy ga siisii ɓog yee jir dwee. De sen ɓuy Baa bay go de yõõ ti maapo yoo ɓaara boŋ wa. 7Wersen joŋ we hẽẽne wa, hayba riŋ ti ɓay go de kee ge ɓuy, nday de daŋ jir wo nen Baa debaŋ yaw.

Wãã go pah ga ndo diŋ je Yeso

(Mat 10.32-33; 12.32; 10.19-20)

8Ndi de riŋ we ge ga je maga wãã we go ti ɓi pel jar poɗag deŋ ga se diŋ je ɓi no, wel je táabayn wãã ge yaŋ go ti ɓe pel jar peele Baa wo poɗag deŋ ga á diŋ je ɓi lay. 9Ama je maga wãã we go ti ɓi pel jar poɗag deŋ ga se ko me ga no, wel je táabayn wãã ge go ti ɓe pel jar peele Baa wo ga á kon ga lay.

10Wosela maga ɗar wel je táabayn we ga á diŋ wose lay so la we no, Baa men ɗig re ɓlagge ɓen mbe yaŋ go ne hẽn ti ane, ama je maga ɗar Nenterse ma bay ɗag we no, Baa men ɗig re ɓlagge ɓen go ne hẽn ti ga has hase.

11Ama hayga á wo ge we de ɓay ɓi tiŋ tosgen wo pel waŋren wo de jar koɗ sen wo cag wããre ɓay no, ni nday mo joŋ we hẽẽne ti wããre maga nday fer ge ne hara, noga maga nday wãã ge gahãyla wa. 12Nenterse ma bay ɗagn kaŋ ge nen ɓay yaŋ ti wããre maga nday wããn ge wo ti ngel ni mono.

Jagjõõ ma de ngaɓ ge de je horog ma de loɗge no

13Jobo yoo ngaɓan wo ni raw ɗe Yeso ga : Waŋ, riŋ hẽn ɓin ga wùr mo ɓes fẽẽre maga pan wùr men ne wùr ti taabuln go. 14Ama Yeso raw ɗe ge ɓe ga : Bar ɓi, wo se oo me je cag wããre noga je ɓes fẽẽre ɓay la? 15Blam sen á raw riŋ rage ɓuy ga : Koɗ we see ɓay doo hram horogren wo, werga jobo joŋ tenen caw bay wer horog ɓen wo wa, je sen mo hayba de horog debaŋ yaw. 16Yeso raw riŋ rage de wããre jagjõõ po pa ga : Jobo, á diŋ je horog debaŋ, pay ɓen raw joŋ fẽẽre ne hẽn debaŋ. 17Á kal wãã ge de ɓil ɓe ga : ndi mo joŋ nà diŋ may ne? Werga ngel maga ndi tay fẽẽre ɓin wo ni ɓuy bay wa mono. 18Á raw ɗiggi kal ga : yoo, ndi daʼ fen maga ndi joŋ ne we so, ndi mbug boole ɓin wo go, ndi fer bor rage kluuri daŋ maga ndi mbug ra go mono, ndi tay coore ɓin wo de fẽẽre ɓin wo ɓuy ɓil ɓaara so. 19Blam sen ɓil ɓi riŋ me yaŋ so ga : fẽẽre ɓi yaŋ patala debaŋ ma joŋ kiŋgi pur ɗa so, ig mbo see ɓo so, re mbo so, jo mbo so, joŋ mbo fruygi so lay. 20Ama Baa raw riŋgi ɓe ga : Ndo je loɗge se no, de suŋ ma waran mo kaʼ la tuu, ndo huu gi go, day blam sen fẽẽre maga ndo tay ra ma ɓo mo deŋ kol ge wo diŋ ma wosela?

21Yeso raw wãã ge pa ga : Doo sen je maga tay horog ɓen diŋ ma ɓe tawa, bay nen Baa diŋ je horog wa lay.

Wosela mo kaŋ ɗiggi ɓe diŋ ti Baa

(Mat 6.25-34)

22Yeso raw riŋ jar ma wer ɓen wo ga : Diŋ wersen ndi de riŋ we ge ga : hãy we see ɓay go ti fẽẽre maga nday re ge may ma lagge tenen la, noga ti õõbe maga nday lag ge ti ɓay mo wa. 23Werga nday tenen mo sug sug de daŋ rege wo, hõõgese ɓay de daŋ õõben wo lay. 24Ko we gããge wo ɗa la, á bay wo kab mopo wa, bay wo we mopo wa lay, ngel ma lag fẽẽre rege ɓaara bay wo wa, boole ɓaara bay wo wa, ama Baa de hã rege ne hara, diŋ se, day nday de daŋ dweeren wo debaŋ yaw. 25Wose yaŋ yoo ɓay la ga kãã ma yaʼ naw ɓe yaŋ wo ciŋ pel ni meʼ draʼ de joŋre ɓe maga se durn de see ɓe ne? 26Hayga yaŋ ga nday kãã ma joŋ fen po de see ɓay meʼ draʼ gà, day nday hãy see ɓay ti fẽẽre lan wo gahãyla? 27Ko we fuɗgi saŋgu maga tĩɗ wo wo ti puuli mo deŋ ɗa, á joŋ wo joŋre ga, ɓoɗ wo õõbe ga lay, de sen ɓuy coʼ we sug ɓay, hayba Salomoŋ de gragge ɓe ma de wooren ɓuy, woore õõbe ɓen bay de day ge go doo fuɗgi maapo yoo ɓaara no boŋ wa. 28Hayga fǐiri maga á daʼ ra wara ɓi tway, toŋ à wo go lag rage go ti wùu tuu tuu, Baa ma joŋ fuɗgi ɓaara de woore debaŋ yaw no, ni se go tinoo cwãy ga Baa lag ge õõbe ne nday ti daŋ fǐin wo yaw, nday jar se ga nday bay go de hã ɓil ɓay go ne Baa pah wa mo lag no. 29Hãy we see ɓay go tum ti fẽẽre maga nday re ge, noga nday jo ge mo wa. 30Kiɗ fẽẽre sen wo mokay tum tum diŋ jar maga bay wo ti jag Baa wa mono. Ama ma ɓay Pan ɓay go de koge ga nday de sãy fẽẽre sen wo ti. 31Kiɗ we ngel maga Baa hay Waŋ ni taŋgu ɗa, blam sen ni Baa hã fẽẽre ma lan wo ne nday ni ɓuy.

Jar ma wer Kris daɗ wo horog ɓaaran yaŋ wo wo ciŋ

(Mat 6.19-21)

32Nday horog ma mbag no,#12.32 Horog ma mbag : Diŋ jar ma wer Yeso ma hwal ti ɓog wo no. joŋ we hẽẽne wa, werga á coo jag Pan ɓay ga se lag nday waŋre ɓiŋ ɓe. 33Yeɗ we fẽẽre ɓayn wo go, hã we solay sen go ne jar coo wo. Sãɗ we diŋ ndar solay maga sõʼ go ga tay we horog ɓayn wo diŋ ciŋ ti ngel maga solay ɓlag go ga jar freŋ kãã wo ma woge see ɓe ga gogo kãã wo ma ɓlagge ɓe go ga lay mono. 34Werga ngel maga horog ɓay wo wo ni mono ɗiggi ɓay joŋ wo wo de kaŋ ge ni lay.

Weere jõõre po lag wo gor pan tiŋ ɓaara

35Lag we go de gragge ma joŋ joŋre, saɗ we jag õõbe ɓayn wo go sag ɓay, gér ɓayn mo hay wo go de doɗ ge. 36Joŋ we doo weere jõõre po wo, pan tiŋ ɓaara raw go, ga se fer ge le ɓoʼ wãy ti bii, á raw wo lagge gor ge ɓe ga á wo le ferge, á leʼ mbar jag tiŋ we ni saara mo bul jag tiŋ go hẽn tuu no. 37Weere jõõre se maga pan tiŋ ɓaaran hom le á daʼ rage gor ge ɓe woo ge wo. Laa we re sen go paha, pan tiŋ sen la raw saʼ jag õõbe ɓen go sag ɓe, raw lag rage gesiŋ ti ngel rege no, raw age lag regen ne hara, pele. 38Hayga pan tiŋ wo we le fer ge gesiɗgi suŋ, noga de wur ma honla ɓuy, de el ɓen da ga á mo á daʼ rage gor ge ɓe, á raw woo weere jõõre sen wo. 39Laa we wer wããre sen mokay de ele, pan tiŋ po yaŋ go de ko wur maga je freŋ nduu de ɓe no, á day men je freŋ le ngar ywaale gà. 40Wersen lag we go de gragge lay, werga wel je táabayn wo fer ge le la diŋ de wur maga nday bay ɗig gi ti ɓe wa mono.

Wejõõ ma de el wo de ma de ɓlagge

(Mat 24.45-51)

41Piyer raw ɗe ge ɓe ga : Waŋkluu, ndo wãã jagjõõ sen ne wùr tawa yawla, noga ne jar mbe ɓuy yawla? 42Yeso raw ferge ne hẽn ga : Wejõõ jobo maga de deele, de ti lay nen ɓo diŋ ma hon ne? Diŋ je maga pan tiŋ ɓen kaŋ ne gor tiŋ ɓe, ga á mo hã rege ne weere jõõre ma lan wo ti ngel ɓe lay mono. 43Wejõõ maga pan tiŋ ɓen wo le ferge, á daʼ ge ɓe ti joŋre sen, pan tiŋ raw woo je se no. 44Laa we go de el paha, pan tiŋ ɓen la raw kaŋ ge ɓe gor ti fẽẽre ɓe ma de el wo ɓuy so. 45Ama hayga wejõõ sen la raw we wãã ge de ɓil ɓe ga, Pan tiŋ ɓin fer le la gus ga : raw ɓoʼ ɗee mbar weere jõõre ma lan wo, mbar mayre gebeere ma joŋ joŋren wo, raw rege, raw jo yii taa go no, 46pan tiŋ ɓen wo le fer ge wur sen la diŋ de wur maga wejõõ sen la bay gor ge ɓe wa mono, pan tiŋ raw joŋ bon wejõõ sen ge de hãã debaŋ, raw hã ɓaŋ ma ɓen ne hẽn yoo jar ma hãy hãy wo.

47Wejõõ jobo maga yaŋ go de ko joŋre maga pan tiŋ ɓen da ne, mbe de sen ɓuy se day mbe go oo ge de gragge ga, day joŋ joŋre maga pan tiŋ ɓen dan mo ga lay no, á mbar ne ge debaŋ. 48Ama wejõõ jobo maga bay de ko joŋre maga pan tiŋ ɓen dan mo wa, day se raw we joŋ re ma nen mbar ge layblaʼ, á mbar ne ge mbag koɗe. Je maga Baa hã we ne hẽn pur no, Baa raw wiigi doo ɓe pur lay, je maga Baa kaŋ we ti joŋre fẽẽre wo debaŋ no, Baa raw wiigi doo ɓe ni pur debaŋ pa.

Jar car ɓil go ti re Yeso

(Mat 10.34-36)

49Ndi á ɓoʼ wùu ti tamsiri, ndi de da ge debaŋ ga á mo yãã go patala yaw. 50Batem po yaŋ maga á nen joŋ batem ɓi de ɓe, day jiili ɓi go de ndar mege debaŋ yaw, maga á mo leʼ jag go. 51Nday ɗig ga ndi mo hay a diŋ ga jar ma ti sir mo hay wo de lagge jam yawla? Bay wa, ndi riŋ we ga ndi a diŋ car ɓil jare. 52Tĩĩ wer patala tuuseŋ jar po wo liŋ ni ɓaara dwee car wo ɓil yaŋ go sar sare, swaʼ joŋ wo yaŋ jar hee ma ɓog wo no, ma ɓogn joŋ wo yaŋ jar hee ma swaʼn wo lay. 53Pan wel caa hee yaŋ de wel ɓe, wel caa hee yaŋ de pan ɓe lay, man may caa hee yaŋ de may ɓe, mayn caa hee yaŋ de man ɓe lay. Wãy caa hee yaŋ de kaa ɓe wãy wel ɓe, wãy weln caa hee yaŋ de kaa ɓe man war ɓe lay.

Fẽẽre maga á ko re see ɓaara wo

(Mat 16.2-3)

54Yeso raw riŋ ngaɓan wo lay ga : Nday leʼ we ko swaare de kaŋ ge wo nen wur bolaw, nday kal wãã ge tuuseŋ ga : Baa cwaa yaŋ, á raw cwaa ge lay. 55Nday ko leege we le a ge ɓaŋ ni wãyban, nday kal wãã ge ga : His joŋ yaŋ, se raw joŋge doo sen no lay. 56Nday jar bag bii jar no, nday de ko re se fẽẽre maga wo de joŋge gesiŋ la, nday yaŋ de ko ge se fẽẽre maga wo de joŋge le ciŋ mo pa no, day wer may ga nday bay laa wer re ma debalan la wa an la?

Wosela mo kiɗ faage ma tay jag de je hee ɓe

(Mat 5.25-26)

57Wer may ga nday de see ɓay nday bay ko re maga nday mo joŋ de deele ti ngel ɓe wa an la? 58Hayga jobo ʼwaa war mo ti pel je cag wããren wo no, day nday yaŋ wo wo ge cag wããren wer kããra ɓuy no, kiɗ we faage ga jag ɓay mo tay de kããra de maga nday wo ti faage ɗa mono, werga á wo we de ɓo pel je cag wããre la no, day je cag wããren raw hã moge go ne soode, sooden raw ɓoʼ moge ti daŋgay. 59Ndi de wãã ge go ga ndo kal ge le go ga so has, hãã ndo wo go poɗ ge, hayba siisii boŋ draʼ gwaʼ ti ɓo gà.

Currently Selected:

LUG 12: TUP

Highlight

Copy