LUG 13
13
Yeso ga jar ɓoɗ jag we go ga, á huɗ gi wo go
1Le ti wur sen, jar po raw wo age riŋ Yeso ti jar Galile maga Pilad id ra go ti wur maga á hay wo siɗ jag ne Baa mono. 2Yeso raw riŋ rage ga : Nday ɗig ga jar Galile maga á id ra go mo deŋ, sen wo diŋ jar ma de ɓlagge daŋ jar Galile ma lan wo ɓuy yawla? 3Bay wa hase, ama hayga nday de see ɓay nday coo ɗiggi ɓay ma de ɓlaggen we de deele tigriŋ ga no, nday huɗ gi go ɓuy doo jar Galile sen wo no lay. 4Day jar ma hwal ti nenmaʼ maga tiŋ ma de gẽẽre maga à ɗen ga Silowe hay leʼ ne hara ti, id ra go, nday ɗig ga á wo de ɓlagge daŋ jar ma ɓi leege Jerusalem ma lan wo ɓuy? 5Ndi de riŋ nday ga : bay wa hase. Hayga nday de see ɓay nday coo ɗiggi ɓay ma de ɓlaggen we de deele tigriŋ ga no, nday huɗ gi go ɓuy doo saara no lay.
Jagjõõ ma de ngaɓ ge de gum maga laa leʼ ge ga mono
6Blam sen Yeso raw riŋ rage de jagjõõ ga : Jobo hay peɗ gum ɓil pay ɓe, á kal rawge kiɗ leʼ ge ɓe, ama á laa daʼ ge ɓe de leʼge gà. 7Blam sen á raw riŋ je joŋre payn ga : ko nen ɓo, kiŋgi wara swaʼ ndi de a ge kiɗ leʼge gum mo kaʼ la tum, ndi bay daɗ ge wa. Caa ne go. Á yãã ngel go de koɗ ga kaʼ wer may? 8Ama je joŋren raw ɗe ge ɓe ga : Waŋ, men mbo tagla ɗa pa, ndi tee tuu ti jeŋ ɓe ɓuy ndi lag ge mbiiri fẽẽre wer ɓe lay. 9Wersen ni á leʼ yaŋ deebo layblaʼ la, hayga á leʼ we ga pa, ni ndo caan yaŋ go kway.
Yeso pẽẽ wãy po go wur Saba no
10Yeso hay had ge ti wurpo ɓi tiŋ tosge wur Saba no. 11Paga wãy po yaŋ ni de cege kiŋgi hwal ti nenmaʼa, wãy sen de sõõ ti, sõõ baa groro wãyn go, wãyn bay kãã ge ma naa ti go ciŋ draʼ wa. 12Yeso wo ko ge ɓe mokay, á raw ɗe ge ɓe le ga : Wãy, ndo pog we go jag cege ɓo no. 13Á raw kaŋ doo ne wãyn ti, wãyn raw ɗob ge go ni tuuseŋ, á raw tĩĩ wer togoɗ Baa. 14Ama waŋ ma wãã re tiŋ tosgen raw sõõ ɓil ti re maga Yeso pẽẽ wãyn go wur Saban mono. Á raw riŋ ngaɓan wo ga : Naw yaŋ hiiraʼ maga à joŋ joŋre wur sen wo. Wo we pẽɗ jar go diŋ de wur sen wo no, bay wur Saban wa. 15Yeso raw riŋgi ɓe ga : Nday jar bag bii jar no. Ti wur Saban, wosela ɓuy yoo ɓay pog bloodày ɓe go, noga gerhẽẽ ɓe go ma woge de ɓe ti bii. 16Day, wãy se maga diŋ moo Abraham, ga Manhúulí hay saʼ ne hãã kiŋgi hwal ti nenmaʼ mo yeʼe, bay nen pog ge go jag saale sen wur Saban wa an ne? 17Wããre Yeson raw mbuɗ sõõre jar hee ɓen wo ɓuy, ama ngaɓa jar ma lan wo ɓuy ɓil ɓaara raw go joŋ ge feh ti joŋre maga Yeso joŋ ne de el mono.
Jagjõõ ma de ngaɓ ge de mbèere mandufi
(Mat 13.31-32; Mark 4.30-32)
18Yeso raw wãã ge ga : twaywaŋ mani Baan de maŋ may ɓa? Ndi mo ngaɓn de may se la? 19Á de maŋ mbèere mandufi, á go meʼ has debaŋ, jobo mbug ne ɓi pay, á raw tĩĩ gi le go, raw kol ge go diŋ koo maga dweere á wo kaŋ tiŋ ti doo ɓe wo.
Jagjõõ ma de ngaɓge de defõõre no
(Mat 13.33)
20Yeso raw wããge pa ga : Ndi mo ngaɓ twaywaŋ mani Baan de maŋ may ɓa? 21Á de maŋ defõõre maga wãy maŋ ne tay nen ɓe de coo de ngaɓ ge ti mundoore doo ɓog ti dwee, hãã se wo go ur coo ma de cããgen go ɓuy nono.
Jag jiŋ ma kwereŋ no
(Mat 7.13-14,21-23)
22Yeso de wo ge Jerusalem, á raw hee ge raŋ ɓi leegen wo de progren wo had jare. 23Jobo raw ɗe ge ɓe ga : Ɓa Waŋ, jar maga daʼ ge wo see ɓaara á wo rab koɗ ge? Yeso raw fer wããre ne hẽn ga : 24Ɓred we ma laa ge jagjiŋ ma kwereŋ no, ndi de riŋ we ge ga jar debaŋ liw gi wo laa ge yaŋ ni, day kãã ge wo gà.
25Taw maga pan tiŋ wo ur gi ciŋ, tẽg jag tiŋ go de lakel mokay, wo daʼ we go de caa nen nen faale, blam sen nday raw tĩĩ wer mbar jagjiŋ ɗe ɗúu ga : Waŋ, Waŋ, bul jagjiŋ go ne wùr, bul jagjiŋ go ne wùr, á raw riŋ we le ga : Ndi bay de ko ngel maga nday a le ni mo wa. 26Blam sen nday raw riŋgi ɓe ga : Wùr hay rege, hay jo ge ɓiŋ ɓo, ndo hay had jar ti faage ɓi leege ni wùr lay ga? 27Á raw ferge we pa ga : Ndi ko ngel maga nday a le ni mo gà. Yaʼ we wo go see ɓi hãã nday jar joŋ ɓlaggen wo mo ɓuy no. 28Blam sen nday raw tĩĩ wer rag ge so saŋ ɓay so. Werga nday ko ge Abraham, Isag, Jakob wo de jar ndar nen wããre Baa go wo ɓuy de lagge ti twaywaŋ mani Baa no, ma ɓay á nii gi we go siigi. 29Jar debaŋ ndar ge wo yaŋ le nen were, le nen wur bolaw, le nen ɓaŋ gloŋhwede, le nen ɓaŋ ni wãybane, day lag ge wo yaŋ rege ti twaywaŋ mani Baa no. 30Wersen jar po wo patala diŋ jar ma blam taw wo, kol ge wo diŋ jar ma pel taw wo no, day jar maga wo patala diŋ jar ma pel taw wo mo lay no, kol ge wo diŋ jar ma blam tawn lay.
Yeso da jar Jerusalem wo debaŋ
(Mat 23.37-39)
31De wur sen, Farisiyẽẽ maapo raw wo yaʼge see Yeso riŋ gi ɓe ga : Men ngel ma lam go, see go ti ngel ma tigriŋ, werga Herod da ga se ii mo go. 32Yeso raw riŋ rage ga : See we riŋ je ma de maŋ baygama sen ga : Ndi niɗ sõõre wo go, ndi de joŋ joŋre pẽɗge jar cege wo go wara, toŋ, day we wur síilí ma de swaʼn ndi taw ge joŋre sen go. 33Ama nen da ga ndi mo maŋ mbi faage ɓin seege wara toŋ, hãã go pelnew, gahãyla de el ɓen da ga á mo ʼwar je ndar nen wããre Baa go ti ngel tigriŋ wa, say á mo wo ʼwar ge ɓe Jerusalem.
34Yeso raw rage ga : Jar Jerusalem, jar Jerusalem, nday jar maga nday id jar siɗ wããre ma jag Baa wo go, id jar maga Baa lag ra le see ɓay go de húulì no. Ndi hay da debaŋ ga ndi tay jar ɓay wo le ɓiŋ ɓi doo ga man kag tay weere ɓe wo le graŋ ɓen no, ama nday laa day ge gà. 35De ele, jobo gwaʼ ge ɓi tiŋ ɓay ga so has. Ndi de riŋ we ge ga nday ko ge nen ɓi ga so has, hãã go ti wur maga nday wo ge wãã ge ga : Daga Baa mo woo je maga le de a ge ti jag Waŋkluu mo caw no mono.
Currently Selected:
LUG 13: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
