LUG 14
14
Yeso pẽẽ je cegè go
1Ti wurpo Yeso wo liŋ ni je kluu Farisiyẽẽ wo rege wur síilí ma iggi. Jar maga wo ni, raw wo lagge er Yeso eŋ lagge. 2Paga je maga cege fad se go ne hẽn yaŋ pel ɓe ni. 3Yeso raw maŋ wããre, kal riŋ jar ma pel jar had jar de wããre Baa wo de Farisiyẽẽ wo ga : Wããre Baa hã faage noga bay hãge ne jobo ma pẽẽ jobo go wur Saba wa yawla? 4Ama á laa wo day ge fer wããre ne hẽn gà. Blam sen Yeso raw maŋ je cegèn, raw pẽẽ ge ɓe go, kal men ge ɓe mbe raw ge so. 5Blam sen Yeso raw riŋ rage ga : Hayga wel jobo noga bloodày jobo yoo ɓay la leʼ we ɓi gutug no, á raw maŋ ge ɓe go ciŋ deparday, hayba wur Saban layblaʼ ga? 6Ama á laa wo kãã ge ma fer wããre ne hẽn ti re sen ga hase.
Á ɗe mo we le rege yoo jar no, baa see ɓo kay, tem ti koo wa
7Yeso wo ko ge ga jar maga à ɗe ra le kiɗ wo diŋ ngel hay le ma de woore daŋge mokay, á raw wãã jagjõõ sen ne hara ɓuy ga : 8Jobo ɗe mo we re doo ɓoʼ ge wãy ti bii no, ni ndo mo raw wo hay ge diŋ ti ngel hayle ma de woore daŋgen wa. Ti ga á le de ɗe je maga á joŋ sõõre ɓe de daŋ moge le layblaʼ no, 9je maga ɗe we le mo ɓog ɓuy kal age wii moge so ga : Men ngel sen la ne je ma la no. Blam sen sõõre raw joŋ moge, ndo raw ferge wo go blam taw so. 10Ɗawa ɓen á ɗe mo we no, see wo hay ge ti ngel hayle ma blam taw no, nen maga je ɗe mogen le mo a, ma riŋ moge ga : Bar ɓi, yaʼ le go ciŋ ti ngel hayle ma de woore daŋge la. Wersen wããre sen joŋ yaŋ diŋ re ma ra ɗúu ɓo go yoo jar maga joŋ ge wo ti ngel ɓiŋ ɓo ni mo ɓuy no. 11Werga wosela ɓuy maga yaŋ ra ɗúu see ɓe go ciŋ, Baa fer ge ɗúu ɓe go gesiŋ, day wosela maga yaŋ fer ti see ɓe gesiŋ, Baa raw ra ɗúu ɓe go ciŋ lay.
12Blam sen Yeso raw riŋ je maga ɗen le ga : Ndo leʼ hã rege we ne jar de jag toŋ, noga de law no, bar ɓo wo, hẽẽre ɓo wo, kawre ɓo wo, jar leege ɓo ma de horog wo, ɓuy ɗe le diŋ saara tawa wa. Kaŋ ɗiggi ɓo ga á ɗe wo mo yaŋ toŋ lay, day ndo daʼ ge poɗge yaŋ ti fen maga ndo hãn go mo lay wa. 13Ama ndo leʼ joŋ fẽẽre rege we wur few no, ɗe le diŋ jar coo wo, jar maga wo go de gayre, jar leŋre wo, de jar rẽwre. 14Ni ndo woo yaŋ, werga á daʼ ge wo mopo ma poɗ moge gà, day Baa wo ge poɗ moge ti wur maga jar ma joŋ re de deele ti ngel ɓe wo wo go laage ciŋ tenen mono.
Jagjõõ ma de ngaɓ ge de rege maga jobo joŋ ne jar debaŋ mono
(Mat 22.1-10)
15Jobo yoo jar ma de lagge jag rege ɓiŋ Yeso wo coʼ sug wããre sen mokay raw riŋ Yeso ga : Woore ti je maga woge rege ti twaywaŋ mani Baan mono. 16Yeso raw riŋgi ɓe ga : Jobo joŋ rege debaŋ, raw ɓoɗ soole ne jar ti ɓe debaŋ lay. 17Wur re gen wo kos ge mokay, á raw ɓoʼ wejõõ ɓe ɗe jar maga se hay ɓoɗ soole ne hara ga : a we le, fẽẽren kneʼ we go patala ɓuy so. 18Á raw wo kaŋ kiŋ go ɓuy. Je ma taŋgun raw riŋ wejõõ bloon ga : Ndi yee pay le la, da ga ndi mo wo ko ge ɓe, ndi kam mo, men faage me. 19Je ma tigriŋ raw riŋgi ɓe pa ga : Ndi yee bloore deere soŋre le la jag jag dwee, ndi wo gus had rage ɗa, ndi kam mo, men faage me. 20Ma tigriŋ raw riŋgi ɓe pa ga : Ndi de maŋ wãy, diŋ wersen ndi kãã ma woge gà. 21Wejõõn raw ferge de wããre sen ne pan tiŋ ɓe no. Pan tiŋ raw tĩĩ gi go de waŋ, raw riŋ wejõõn ga : See deparday ti ngel lumo wo, ti largaʼ faage ɓi leege, a le de jar coo wo, de jar maga wo go de gayre, jar rẽwre wo, de jar leŋre wo me. 22Wo ig gi blam sen no meʼ kay, wejõõn raw ferge le wãã ge ga : Waŋ, ndi daʼ jar we doo ga ndo wããn no, ama ngel yaŋ de gwaʼ ge ni ɗa pa. 23Pan tiŋ raw riŋ we jõõ ɓen ga : See ti faage ma woge ɓi payren wo, horge jarn le lagge tiŋma de waŋ, maga tiŋ ɓin mo baa go de jare. 24Ndi de riŋ we ge ga jobo boŋ kãã ma gus rege ɓin yoo jar maga ndi hay ɓoɗ soole ne hara taŋgu mo ga so hase.
Faage maga jobo kol diŋ je ma wer Yeso de ɓe
(Mat 10.37-38)
25Jar raw wo maŋ blam Yeso ngaɓa debaŋ. Yeso raw mbuɗ nen ɓe le blam riŋ rage ga : 26Je maga yaŋ a ge see ɓi bay caa hee de pan ɓe, de man ɓe, de wãy ɓe, de weere ɓe wo, de weregeman ɓe, de mayregeman ɓe wo, hayba diŋ se de ti ngel see ɓe draʼ, bay caa hee de see ɓe no, á kãã ma kol ge je ma wer ɓi gà. 27Je maga hã ɓil ɓe go ga se mo huu mbe go ti re ɓi gà day maŋ blam ɓi we gà no, kãã ma kol ge je ma wer ɓi gà. 28Hayga jobo yoo ɓay da we ga se boo tiŋ ma de gẽẽre, á raw hayge gesiŋ kee fẽẽre maga se joŋ joŋre tiŋ de ɓe go, ma ko ge ga solay kãã yaŋ ma taw joŋre sen mbe go yawla. 29Hayga á joŋ we no ga, á ɓoʼ wer ɓe we, day blam sen se kãã we ma taw joŋre tiŋ we go ga no, jar maga ko ge wo tiŋ mo ɓuy, feg ge wo ti ɓe, 30ga bloo sen la tĩĩ werga se boo tiŋ lay, ama egre ɓe laa kãã ge ma taw joŋre ɓe go ga mo pa ɓa. 31De ngaɓ ge degaʼa, hayga waŋ po da we ga se wo dur gi de waŋ ma tigriŋ no, á raw hayge gesiŋ taŋgu, er re sen ga se kãã yaŋ mbe ma woge de jar ndar hwal, dur je hee ɓe se ga le de a ge yiŋ gi ɓe de jar wer ndar doo ɓog mbe mo yawla. 32Hayga á ko we ga egre se bay debaŋ wa no, á raw laa jar soole wo se waŋ ma lan, de maga á yaŋ le go hãã ɗa mono, wii gi ga yoo saara mo hay jam. 33Wersen, Yeso raw wãã ge ga : Yoo ɓay ɓuy je maga tob fẽẽre ɓe wo we go ɓuy ti re ɓi ga no, kãã ma kol ge je ma wer ɓi gà.
Cuu diŋ fen ma de ele
(Mat 5.13; Mark 9.50)
34Cuu diŋ fen ma de ele, ama hayga cõõre ɓen à we go no, jobo kãã ma ferge ɓe de cõõre ga so. 35Á joŋ mopo ma de el ne sir ga lay, bay ma sõʼ ngel po wa lay, á raw laa ge ɓe wo go faale tiŋ. Hayga jobo yaŋ de sug ma laa ge ɓe no, á mo coʼ sug ɓe de ele.
Currently Selected:
LUG 14: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
