Liike 24

Yiezu vìerɔ́ bòo

Mat 28.1-10; Mar 16.1-8; Zãn 20.1-10

1Ɛ́ lé hɛtii zɔn ɲɛǹbín dùdù, ɛ́ ɓɛ́ hã́a ɛ́ hĩ́nà dàa hɔ̀ yurɔ́ lɛ tũnù tĩ lɛ ɛ́ ɓɛ́ hṹn sɛ́sɛ́a bɔ̀sí ɛ́ dàa van lè búi lɔ̀n. 2Ɛ́ ɓɛ́ van yú kɛ́ lé sɛ̃̀n-bɛhɔ́ lɛ hṹn hiɛ lè búi ɲunù ɛ́ bìríkɛa khie bɔ̀sí. 3Ɛ́ ɓɛ́ síɛ zɔn lè búi hũn, kɛ́ ɓɛ́ den yí zɔ mi Ɲunsɔ Yiezu nìheemu wɛ̀. 4Ɛ́ ɓɛ́ yòó dɛ̃̀ cɔũn. Ɛ́ báa bìɛ ɲu dɔ̀ lɛ zɔn pɔnkɔ̀nìɛ lɛ ɛ́ ɲiiníkɛ pán pán ɛ́ ɓen lɔ́ yú ɓɛ́. 5Ɛ́ ɓɛ́ hã́a sɔ ɛ́ zɛrɛ dɛ̃̀ ɛ́ fɛ̃́nkɛasí ɓɛ́ ɲúuhɛ̃, ɛ́ ɓɛ́ báa bìɛ ɲu sɔ ɛ́ zɔn bie lɛ́ ɓà ǹ nɛ làa: «Mí wiɛ dàá ɔ̀lɛ yìe wi ɛ̀ cɛ̀ ɓɛ̀ nìhiè tĩ́ihṹ?» 6À mí hũ̀nún wɛ̀, à vìé. Mì síɛ liení hɔ́ bòo lɛ á hàarí khɛ́ àá miɛ pɛ̃̀hṹ lɛ á dàa á wi hɔ Kalile pɛ̃̀hɛ̃ hũn, 7lɛ á dàa hàarí ɛ́ nɛ: «À nìnbírɔ Zuú ɛ́ fɔ́ɓán à dé ɓɛ́ bɔ̀konwériè núnú hũn, ɛ̀ bɛ̀ ɓáa ɔ́ lè ɓáalén dã̀anù lɔ̀n, à vìé hɔ́ sítĩnlɔ́ bɔ̀nbɔ̀tĩlán zɔn.» 8Ɛ́ ɓɛ́ hã́a sɔ síɛ lieniɛ hɔ̀ bòo lɛ ɛ́ Yiezu hàarí khɛ́ ǹ. 9Ɛ́ ɓɛ́ zɔn lɔ́ lé búi hũn ɛ́ cɔ́ van munkɛa hɔ̀ bòo lɛ wɔ́ míkùi ɛ́ lɛ́ ɓɛ́ kɛ̀ránzɛ̀ɓɛ̀ pírú àá nìcóoní ǹ, àá ɓɛ́pe nìnbirìe lɛ hṹn wi àá ɓɛ́ ɓɛ́kùi ǹ. 10Ɓɛ̀pe lɛ hàarí van bie hɔ bòo lɛ ɛ́ wɔ́ ɛ́ lɛ́ ɓɛ́ tɔnkɛriè ǹ, ɛ́ hàarí iè Maari Madelɛnɛ àá Zaanɛ àá Zaake ɓà nín Maari àá hɛ̃́ɓuà dɔ̀. 11Kɛ́ ɓɛ́pe tɔnkɛrie ɛ́ lienikɛa ɛ̀ ɓɛ̀ nɛ hɔ iè bɛ̃́nbṹ-yáamu biehĩ́ ɛ́ ɓɛ́ hã́a sɔ ɛ́ bie, ɛ́ ɓɛ́ yí dɛsĩ̀ ɓà ǹ wɛ̀. 12Kɛ́ Piɛre den hĩ́nà zɔ̀ van lè búi lɔ̀n. Á van zɔn mii húi, ɛ̀ hɔ̀ iè pɔnkɔ̀-níhĩ́ mí dòonún ɛ́ temu wi yán. Á lɔ́ ɓɔn kɛ́ á yí dũ bòo lɛ á mii khɛ́ hɔ́pe bòo lɛ wɔ́ bòo hũn wɛ̀.

Bòo lɛ wɔ́ Emayiise wṹn lɔ̀n bòo

Mar 16.12-13

13Ɛ́ lépe wu-cóoní sɔ zɔn, ɛ́ Yiezu kɛ̀ránzɛ̀ɓɛ̀ nìɛ ɓɛ̀ ɲu dɔ̀ ɛ́ zɔn lɔ́ vaá-vɛ lóo dɔ̀ lɛ ɛ́ ɓɛ́ nɛ Emayiise lɛ niirɔ́ àá Zerizalɛɛmu ɛ́ iè kílónɓɛ̀ pírú àá dìcóoní. 14Ɛ́ hɔ́ bòo lɛ wɔ́ khie sáarɛ míkùi iè pe ɛ́ ɓɛ́ bòo bie. 15Ɛ́ hɔ́ lɛ ɛ́ ɓɛ́ dìkìmú kɛ́ ɓɛ́ ɛ́ wũ̀aní, ɛ́ Yiezu kùusɔ ɛ́ van lúwiniɛ ɓà ǹ, à páaniɛ bɔ̀ lè wṹn àá ɓɛ́. 16Ɛ́ ɓɛ́ lò loo ɔ, kɛ́ bòo dɔ̀ ɛ́ lɛ́ ɛ́ ɓɛ́ yá ɔ̀ dũń wɛ̀. 17Ɛ́ Yiezu ɛ́ zɔn ɓɛ̀ dìenin nɛ làa: «Hɔ̀ iè ńɓùo ɛ́ mí ɛ́ vɛ kɛ́ mi khɛ́ lɔ̀n?» Ɛ́ ɓɛ́ yòó dɛ̃̀ ɛ́ hũn yáa míkùi. 18Á nìcóoní lɛ yèrè ɛ́ ɓɛ́ nɛ Keleopaasi ɛ́ zɔn ɔ̀ dìenin nɛ: «Hɔ̀ iè kɔ̀pe kɔ̀ dòonún hɔ̀ Zerizalɛɛmu hũn ɛ́ temu yí dũ hɔ bòo lɛ ɛ́ wɔ́ hɔ́pe wihĩ́ lɛ khie hũn?» 19Á zɔn ɓɛ̀ dìenin nɛ hɔ iè ńɓùo temu wɔ́? Ɛ́ ɓɛ́ zɔn kɔ̃́niɛ ɔ̀ nɛ làa: «Hɔ̀ bòo lɛ wɔ́ á Nazarɛɛte Yiezu ǹ lɛ hũn iè Dɔfĩn bɔ̀háanírɔ. Piè bòo lɛ á hàarí wóò wé àá hɔ́ lɛ á hàarí wóò bie ɛ́ hàarí pànkɛ́ wi. Ɛ́ Dɔfĩn míte ǹ ɛ́ zɛ̃́niɛ hɔ̀ ɛ́ ɓɛ́ nìnbirìe ɓɛ́kùi ɛ́ mɔn. 20Kɛ́ ɓɛ́ kè hándíe àá ɓɛ́ khɛ̃́ndàariè hándíe ɛ́ lɛ́ ɛ́ ɓɛ́ ɓaa ɔ̀ ɛ́ lɔ́ lìe nɛ á fɔ́ɓán à ɓé. Ɛ́ ɓɛ́ khie ɓáa ɔ̀ lè ɓáalén dãanù lɔ̀n. 21Ké hṹn tĩì ɛ̀ kè nɛ ape te hɔ Yizarayɛɛle ɛ́ mii fuenínin. Kɛ́ lɛ den iè pehɔ̀ wihĩ́ bɔ̀nbɔ̀tĩlán zoòni, lɛ ɛ́ hɔ́pe bòo sɔ ɛ́ dàa wɔ́. 22Hɔ̀ ɛ́ bɔn kɛ́ ɓɛ́ hã́a dɔ̀ kè tĩ́ihṹ ɛ́ khɛ́ bòo dɔ̀ lɛ pɔniɛ kie. Ɓɛ̀ dũmua hĩ́nà van lè búi lɔ̀n ɲɛ̀nbín dùdù, 23kɛ́ ɓɛ́ yí vɛ mi piè nìheemu wɛ̀. Ɛ́ ɓɛ́ khũ̀a ɓɛrɛ ɓen bie lɛ́ kìe ǹ ie ɓɛ́ mɔn mɛlɛkɛɓɛ dɔ̀ lɛ ɛ́ bie lɛ́ ɓá ǹ iè yìe wi. 24Ɛ́ kè ńkɔhĩ́ nìɛ ɓɛ̀ yìɛní dɔ̀ ɛ́ hĩ́nà van lè búi hũn, ɛ́ van mɔn kɛ́ hɔ́ kɛ dɛ̃̀ kɛ̀a bòo lɛ ɛ́ ɓɛ́pe hã́a khɛ́, kɛ́ ápe ɛ́ ɓɛ́ yí mi wɛ̀.» 25Ɛ́ Yiezu zɔn bie lɛ́ ɓà ǹ nɛ làa: «Nìnbirìe lɛ hɛciri mí, mí hɛ́ yáà vṹn dɛsĩ̀ hɔ̀ bòo lɛ ɛ́ Dɔfĩn bɔ̀háaníriè ɛ́ sɛ̃̀nɛ́hã̀ khɛ́ míkùi ǹ wɛ̀! 26Hɔ̀ sũǹ hṹn yí fɔ́ɓán à Kirisa, ɛ̀ lɔ̀n be kɛ̀amu vé à dàá zɔ mí ɓàarɔ́ hũn?» 27À khie múnkɛa hɔ̀ bòo lɛ ɛ́ wɛ̃́ piè bòo hũn, lè Dɔfĩn bienù vɛ̃hṹ míkùi hũn, ɛ́ ɓɛ́ hɔ́ fìi àá ɔ́ Moyiize vɛ̃hɛ̃, ɛ́ dàa van lɔ́ ɓɛ́ Dɔfĩn bɔ̀háaníriè vɛ̃hɛ̃ míkùi hũn. 28Ɛ́ bòo lɛ ɛ́ ɓɛ́ van lúwi lè lóo lɛ ɛ́ ɓɛ́ kɛ̀ránzɛ̀ɓɛ̀ nìɛ ɓɛ̀ ɲu sɔ ɛ́ vaá-vɛ hũn, ɛ́ Yiezu hṹn mii pɛ̃́un khíi lan. 29Ɛ́ ɓɛ́ ɓɔ́nɓɔ́niɛ ɔ̀ ǹ nɛ làa: «Kansí àá kie, hɔ̀ zĩ́ihṹ ɛ́ dɛ̃, ɛ̀ hũ̀nún àá fĩ́i ɛ̀ hɔ̀ sí hĩ.» Á làa zɔn kɛsí àá ɓɛ́. 30Á síɛ kɛsí mii dí àá ɓɛ́, á khie mɔ̀ hɔ̀ búrú, à dɔ́ Dɔfĩn bɛrikɛ, á ɓùenkɛa hɔ̀ ɛ́ khie lɛ́ ɓà ǹ. 31Ɛ́ peɓɛ̀ yìe ɛ́ den hɛrɛ ɛ́ ɓɛ́ dũnɛ a, kɛ́ á den vũnun peɓɛ̀ yìe hũn. 32Ɛ́ ɓɛ́ khie ɛ́ bie ɓán hũn nɛ làa: «Hɔ̀ lɛ á dàa hṹn khɛ́ àá kie lè wṹn lɔ̀n, ɛ́ lè Dɔfĩn bienù ɛ̀ munkɛ ɛ̀ lɛ́ kiè ǹ ɛ́ ké tĩɛ̀ sũn hṹn yí wɛ kɛ̀a wɛrɛ?» 33Ɛ́ ɓɛ́ síɛ hĩ́nà mù lɔ̀n ɛ́ khũ̀a van Zerizalɛɛmu. Ɛ́ ɓɛ́ van yú ɓɛ́ kɛ̀ránzɛ̀ɓɛ̀ pírú àá nìcóoní kɛ́ ɓɛ́ koo ɓánlɔ̀n àá ɓá ńkɔhĩ́ lɛ kɛ́. 34Ɛ́ ɓɛ́ bie lɛ́ ɓɛ́ kɛ̀ránzɛ̀ɓɛ̀ nìɛ ɓɛ̀ ɲu sɔ ǹ nɛ: «À Ɲunsɔ ɛ́ vìé àá bɔ̀bín, à Simɔn ɛ́ mɔn ɔ̀.» 35Ɛ́ ɓɛ́ kɛ̀ránzɛ̀ɓɛ̀ nìɛ ɓɛ̀ ɲu sɔ ɛ́ ɓiɛ̀ khie bie hɔ́ bòo lɛ wɔ́ lé wṹn lɔ̀n ɛ́ lɛ́ ɓà ǹ. Ɛ̀ ɓɛ̀ lò bie lɛ́ ɓà ǹ nɛ ɓɛ́ dũnɛ-à lè yìi lɛ á ɓùenkɛa hɔ̀ búrú ɛ́ lɛ́ ɓá ǹ hũn.

Bòo lɛ ɛ́ Yiezu dàa zɛ̃́niɛ míte àá mí kɛ̀ránzɛ̀ɓɛ̀

Mat 28.16-20; Mat 16.14-18; Zãn 20.19-23; Bɔw 1.6-8

36Ɛ́ hɔ́ lɛ ɛ́ ɓɛ́ ɛ́ bie kɛ̀amu, ɛ́ Yiezu míte ǹ ɛ́ ɓen zɔn dɛ̃̀ peɓɛ̀ tĩ́ihṹ à nɛ làa: «Nɛ hũn-wiɛ̀ ɛ̀ kań àá miɛ!» 37Ɛ́ peɓɛ̀ bɔ́hĩ́ hɛ̀ lɔ́ iè hɔ̀ lɛ ɛ́ ɓɛ́ tĩì ɛ̀ ɓɛ̀ nɛ a iè ńɓɔrɔ. 38Kɛ́ Yiezu den zɔn khɛ́ lɛ́ ɓà ǹ nɛ làa: «Mí wiɛ dàa hũn yerɛ? Mì wiɛ dàa hɛciri kańkɛa kɛ̀amu? 39Mì húi niǹ níhĩ́ àá niǹ zehĩ́; hɔ̀ iè ǹpe lò! Mì ɓen hɛ mi ǹ húi. Ńɓɔrɔ yí dàa tɛkɛ̀a àá hũà kɛ̀a bòo lɛ ɛ́ mí dàa loo kɛ́ ńpe dàa hɔ lò.» 40Á bie hɔ̀ à zɛ̃́niɛ mí níhĩ́ àá mí zehĩ́ ɓà ǹ. 41Ɛ́ ɓɛ́ hɛ̀ tĩɛ̀ wan wan. Kɛ́ hɔ́ lɛ ɛ́ hɔ́ den hɛ̀ yòokɛa peɓɛ̀ lɔ̀n, ɛ́ ɓɛ́ yí dàń ɔ́ ɛ́ yí dɛsĩ̀ nin wɛ̀. Ɛ́ Yiezu ɛ́ zɔn ɓɛ̀ dìenin nɛ làa: «Mí dàa bòo lɛ ɛ́ dí hũ̀nún?» 42Ɛ́ ɓɛ́ ɓùerɛ cɔ lɛ tɛ̃un ɛ́ khie lɛ́ à ǹ. 43Á fɔ́-á ɛ́ yòó lɛ̀ peɓɛ̀ yìe hũn. 44À khie khɛ́ lɛ́ ɓà ǹ nɛ làa: «Pɛ̃̀hṹ lɛ ɛ́ ń hṹn wi àá miɛ, ɛ́ ń bie lɛ́ miɛ ǹ nɛ hɔ bòo míkùi lɛ wɛ̃́ niǹ bòo hũn à Moyiize làndɛ́ vɛ̃hṹ hũn, àá ɓɛ́ Dɔfĩn bɔ̀háaníriè vɛ̃hɛ̃ hũn, àá hɔ́ Yanbehĩ́ vɛ̃hṹ hũn, ɛ́ fɔ́ɓán ɛ̀ hɔ̀ wé, ɛ́ hɔ́ lò ɓiɛ̀ iè hɔ̀pe temu wɔ́.» 45Á wo lɛ́ ɛ́ peɓɛ̀ bɔ̀dũmunù ɲunù hɛ́rɛ, ɛ́ ɓɛ́ wo dũnɛ Dɔfĩn bienù vɛ̃hṹ bòo lɛ ɛ́ lé bie ɲún. 46Á wo zɔn bie lɛ́ ɓà ǹ nɛ làa: «Lɛ iè hɔ̀ bòo lɛ wɛ̃́ lé Dɔfĩn bienù vɛ̃hṹ hũn: à Kirisa, ɛ́ fɔ́ɓán à lɔ̀n be fúu ɛ̀ vɛ hí, à vìé lé hɔ́ húmú hũn hɔ̀ sítĩnlɔ́ bɔ̀nbɔ̀tĩlán zɔn. 47Ɛ̀ piè yèrè lɔ̀n, ɛ̀ dàá ɓɛ́ hɔ́ fìi àá Zerizalɛɛmu, ɛ́ fɔ́ɓán ɛ̀ hɔ̀ buie hɔ cɛ̃̀mɛ̀náa míkùi hũn nɛ ɓɛ nìnbirìe ɓɛ́kùi zɛ̀ní ɓɛ́ tĩɛ̀ ɛ̀ ɓɛ̀ fùansí ɓɛ́ bɔ̀koohɛ̃ wénlɔ́n, ɛ̀ Dɔfĩn ɛ̀ dé sɛ́wɛ́rí lɛ́ ɓà ǹ peɓɛ̀ bɔ̀koohɛ̃ bòo hũn. 48Ɛ́ mí wo mɔn hɔ̀pe bòo sɔ sí míkùi mìte ǹ àá mí kùrú yìe. 49Ɛ́ ǹpe niǹte ǹ ɛ́ ɓén tɔn lè Mɛkɛ̃n-Sãanu lɛ ɛ́ kìe Yàá Dɔfĩn ɛ́ lɛ́ mí ɲunù nɛ mí ɓén lɛ́ miɛ ǹ. Kɛ́ mípe ɛ́ fɔ́ɓán ɛ̀ mì kansí lè lóo hũn fúu kɛ́ yí bòo lépe Mɛkɛ̃n-Sãanu sɔ ɛ́ ɓɛrɛ síɛ lɛ́ hɔ́ pànkɛ miɛ ǹ.»

Yiezu khũ̀á viɛnù hɔ̀ hóohũn bòo

Mar 16.19-20; Bɔw 1.9-11

50Ɛ́ Yiezu ɛ́ khie fɔ́ ɓɛ́ ɛ́ dàa lɔ́ van lè viì dɔ̀ lɛ ɛ́ wi Betani lóo sɛnù, à hooniɛ mí níhĩ́ à dúɓɛa ɓà ǹ. 51Ɛ́ bòo lɛ á ɓɛ̀ dúɓɛ́nin, á síɛ hĩ́nà lɔ́ peɓɛ̀ tĩ́ihṹ, ɛ́ Dɔfĩn fɔ́ à ɛ́ dàa cɔ́ van yòó hɔ́ hóohũn. 52Ɛ́ ɓɛ́pe kɛ̀ránzɛ̀ɓɛ̀ ɛ́ khie dɛ̃̀ ɛ̀ ɓɛ̀ ɓàaniɛ ɔ̀ ǹ, ɛ̀ ɓɛ̀ khie khũ̀a síɛ van Zerizalɛɛmu kɛ́ ɓɛ́ hɛ̀ wɛ ɓɛ́te àá bɔ̀bín. 53Ɛ́ ɓɛ́ hṹn wóò kań Dɔfĩn zũ-bɛhɔ́ fúu, ɛ̀ ɓàaní hɔ́pe Dɔfĩn.

Currently Selected:

Liike 24: bwj

Highlight

Copy