Marike 16
16
Yiezu vìerɔ́ bòo
Mat 28.1-8; Lik 24.1-12; Zãn 20.1-10
1Ɛ́ bòo lɛ ɛ́ ɓɛ́ Zuifuɓɛ ńvũùnín sí ɛ́ van khie vɔ́, á Makedala Maari àá Zaake ɓà nín Maari àá Salome ɛ́ yɛ̀ yurɔ́ lɛ tũnù tĩ ɛ́ nɛ ɓɛ́ vɛ kóo Yiezu nìheemu lɔ̀n. 2Ɛ́ lé hɛtii zɔǹ ɲɛǹbín dù dù, ɛ́ ɓɛ́ hĩ́nà kãa lè búi kɛ́ lé wurù ɛ́ wo síɛ ɛ́ hɛ̀. 3Ɛ́ ɓɛ́ lɔ́ ɛ́ dìekɛ ɓán lè wṹn lɔ̀n ɛ́ nɛ làa: «Á wo iè wieni ɛ́ te lè sɛ́nlè ɛ́ mii vɛ bíríkɛ ɛ̀ lé lé búi ɲunù ɛ̀ lɛ́ kiè ǹ?» 4Ɛ́ ɓɛ́ ɛ̀ húi viɛní, ɛ̀ lè sɛ̃̀nlè lɛ lò ié sɛ̃̀n-bɛhɔ́ ɛ́ bíríkɛa khie bɔ̀sí. 5Ɛ́ ɓɛ́ van zɔn lè búi hũn ɛ́ zɔn mɔn zufìɛ wì-cíì dɔ̀ kɛ́ á kɛsí peɓɛ̀ ńdóonín, kɛ́ á zɔn pɔnkɔ̀-puè, ɛ́ ɓɛ́ hɛ̀ zɛ́rɛ. 6Á zufìɛ sɔ ɛ́ zɔn bie lɛ́ ɓà ǹ nɛ làa: «Mì bí zán wɛ̀. À iè Nazarɛɛte Yiezu lɛ ɛ́ ɓɛ́ ɓáa lè ɓáalén dãanù lɔ̀n ɛ́ mí ɛ́ cɛ̀. À ɛ́ vìé, à mí hũ̀nún wɛ̀. Lɛ iè lè viì lɛ ɛ́ ɓɛ́ hṹn daaniɛ piè nìheemu hũn. 7Mì lan vɛ bie lɛ́ á Piɛre ǹ àá piè kɛ̀ránzɛ̀ɓɛ̀ lɛ kɛ́ ǹ nɛ á mii dí mí híɛhɔ́ ɛ̀ vɛ hɔ Kalile. Sí iè viì lɛ ɛ́ mí ɓén vɛ mi-ɛ hũn kɛ̀a bòo lɛ á dàa khɛ́ hɔ́ ɛ́ lɛ́ miɛ ǹ.» 8Ɛ́ ɓɛ́ hã́a sɔ ɛ́ zɔn lɔ́ lé búi hũn ɛ́ lɔ́ ɛ́ zè cɔ́ kɛ́ ɓɛ́ hɛ̀ ɛ́ zɛ̀kɛ, ɛ́ hɛ̀ bɔ̀dũmunù vṹnun míkùi. Ɛ́ ɓɛ́ yɛ̀rɛ́ yí dàń bòo dɔ̀ ɛ́ yí bie lɛ́ nìnbírɔ dɔ̀ ǹ wɛ̀, iè hɔ̀ lɛ ɛ́ ɓɛ́ hɛ̀ zɛrɛ àá bɔ̀bín.
Yiezu ɛ́ zɛ̃́niɛ míte àá Makedala Maari
Mat 28.9-10; Zãn 20.11-18
[ 9Ɛ́ hɔ́ lɛ ɛ́ Yiezu ɛ́ vìé lɔ́ vɔ́, ɛ́ lé hɛtii zɔǹ ɲɛǹbín dù dù, á wɔ́ á Maari lɛ ɛ́ lé hɔ́ Makedala lóo iè pe á van zɛ̃́niɛ míte nin vɔ́. À Maari sɔ iè pe hṹnu lɛ ápe Yiezu ɛ́ hàarí ɲɛun ɓɛ̀ ńɲíkĩ́nìɛ hùuɲu ɛ́ líeniɛ nin. 10Ápe Makedala Maari ɛ́ hĩ́nà van bie hɔ̀ ɛ́ lɛ́ ɓɛ́pe lɛ hṹn wóò bè Yiezu máahṹ ǹ. Ɓɛ̀pe ɛ́ den hṹn wíríkɛ kɛ́ ɓɛ́ ɛ́ cãamɛkɛ. 11Kɛ́ hɔ́ lɛ ɛ́ ɓɛ́ ɲɛ́ ɛ̀ Maari nɛ a vìé, ie mí mɔn ɔ̀, ɛ́ ɓɛ́ yí dɛsĩ̀ hɔ́pe lɛ á bie ǹ wɛ̀.
Yiezu ɛ́ zɛ̃́niɛ míte àá mí kɛ̀ranzɛ̀ɓɛ̀ nìɛ ɓɛ̀ ɲu dɔ̀
Lik 24.13-35
12Ɛ́ hɔ́ khie lɔ́ yán, ɛ̀ Yiezu ɛ́ van zɛ̃́niɛ míte mí kɛ̀ránzɛ̀ɓɛ̀ bìɛ ɲu dɔ̀ ǹ kɛ́ ɓɛ́ bɔ̀ lè wṹn ɛ́ vaá-vɛ hɔ maa, kɛ́ á den wɔ́ míte àá nì-ɓuɛ̀. 13Ɛ́ ɓɛ́ kɛ̀ránzɛ̀ɓɛ̀ bìɛ ɲu sɔ ɛ́ khie khũ̀a ɓɛrɛ ɛ́ ɓen bie hɔ̀ lɛ́ ɓɛ́lɛ kɛ́ ǹ, kɛ́ ɓɛ́ lò ɓiɛ̀ ɛ́ yí dɛsĩ̀ ɓà ǹ wɛ̀.
Yiezu ɛ́ míte ɛ̀ zɛ̃́ní àá mí kɛ̀ranzɛ̀ɓɛ̀ pírú àá nìcóoní
Mat 28.16-20; Lik 24.36-49; Zãn 20.19-23; Bɔw 1.6-8
14Ɛ́ pehɔ̀ vɛ vénlén, ɛ̀ Yiezu ɛ́ den van zɛ̃́niɛ míte àá ɓɛ́pe mí kɛ̀ránzɛ̀ɓɛ̀ pírú àá nìcóoní, kɛ́ ɓɛ́ kɛsí ɛ́ dí. Á fun àá ɓɛ́, peɓɛ̀ ńbídɛsĩ̀nlɔ́ àá peɓɛ̀ tĩɛ̀ lìirɔ́ bòo hũn, iè hɔ̀ lɛ ɛ́ ɓɛ́ yí dɛsĩ̀ ɓɛ̀pe nìnbirìe lɛ ɛ́ bie lɛ́ ɓà ǹ nɛ ɓɛ́ mɔn ɔ̀ kɛ́ á vìé wɛ̀. 15Á khie bie lɛ́ ɓà ǹ nɛ làa: «Mì lan vɛ lé dímíɲɛ́ vuò míkùi hũn, ɛ̀ vɛ buie le Bentĩnu ɛ̀ lɛ́ ɓɛ́ nìnbirìe ɓɛ́kùi ǹ. 16Kɛ́ á lɛ ɛ́ dũmuasɛ̃̀, ɛ́ lɛ́ míte ɛ́ ɓɛ́ líiniɛ hɔ̀ ɲumu hũn, á ɛ́ fuen. Àlɛ ɛ́ yí dɛsĩ̀, ɛ́ Dɔfĩn tĩcĩ̀nín ɛ́ síɛ ɓàasɔ lɔ̀n. 17Ɛ́ lɛ iè hɔ̀ bòo lɛ ɛ́ temu ɓén lɛ́ ɛ́ ɓɛ́ dàá dũń ɓɛ́pe nìnbirìe lɛ ɛ́ dũmuasɛ̃̀: niǹ yèrè lɔ̀n ɛ́ ɓɛ́ wóo ɓén ɲɛ ɓɛ ńɲíkĩ́nìɛ, ɛ̀ ɓɛ̀ lò wóo ɓén bie hɔ níi bɔ̀fĩɛ̀. 18Hɛ̀rí kɛ́ ɓɛ́ zɛ̃nkɛa hóohĩ́ ǹ ɓɛ́ níhĩ́ hũn, tàá kɛ́ ɓɛ́ ɲun bɔ̀ɲuriè dɔ̀ lɛ ɛ́ dɛ̀ nìnbírɔ ɛ́ ɓé, ɛ́ bòo dɔ̀ ɛ́ yá wé ɓɛ́ wɛ̀. Ɛ̀ ɓɛ̀ wóo ɓén bè ɓɛ́ níhĩ́ ɓɛ̀ dɔriè lɔ̀n ɛ́ ɓɛ́ dɔriè sɔ ɛ́ wɛ.»
Yiezu khũ̀á viɛnù hɔ̀ hóohũn bòo
Lik 24.50-53; Bɔw 1.9-11
19Ɛ́ hɔ́ lɛ ɛ́ Ɲunsɔ Yiezu ɛ́ bie hɔ̀pe sí ɛ́ lɛ́ ɓà ǹ vɔ́, ɛ́ Dɔfĩn ɛ́ mɔ̀ à ɛ́ dàa cɔ́ van yòó hɔ́ hóohũn, á van yòó kɛsí hɔ́pe Dɔfĩn ńdóonín. 20Ɛ́ ɓɛ́ kɛ̀ránzɛ̀ɓɛ̀ ɛ́ wo khie cɔ́ ɛ́ van ɛ́ lè Bentĩnu ɛ̀ buie viì míkùi. Ɛ́ Ɲunsɔ ɛ́ hṹn ɓɛ̀ sĩiní hɔ́ tɔnlɔ́ sɔ hũn, à hṹn lɛ́ ɛ́ ɓɛ́ ɛ́ hɔ̀ yéréké bòo ɛ̀ wé, ɛ́ dàá zɛ̃́ní kɛ́ lé Bentĩnu lɛ ɛ́ ɓɛ́ ɛ́ buie ɛ́ iè bɔ̀berà.]
Currently Selected:
Marike 16: bwj
Highlight
Share
Compare
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
