མཛད༌པ། 21
21
པ་ཝལ་ ཡ༌རུ༌ཤ༌ལེམ༌ག་ བྱོན༌མ༌ལ།
1ཨ་ཤི་ཨེ་ཕི་སཱས་ག་ སོ་ངོ་ཆི་ལུ་བ་ཀ་ དི་ཝ་ན་ཨ་ཉི་ཡེག་ཐཱན་ ཨ་ཧ་བ་གྲུ་ག་ནུབ་ཉི་ ཐྲང་ཉི་རང་ མཚོ་བར་ཀ་ཆོ་ཁཱན་ ཀོས་དག་ས་ག་ཏཱན་དི༌ཝ། ཉི་ནམ་ནིང་ད་བུ་ ཨ་ཧ་བ་ རོ་དྲཱས་དག་ས་ག་ཤེག་ཐཱན་ པ་ཏྲ་ར་དག་ས་ག་ཏཱན་དི༌ཝ། 2པ་ཏྲ་ར་གེ་ ཨ་ཤི་ ཕོ་ནི་ཀེ་དི་ལེ་ཅམ་ཁཱན་ གྲུ་ཆི་ལུ་ཐུར་ཁྲབ་ཉི་ ཨོ་ཉ་གྲུ་ག་ནུབ་ཉི་དི༌ཝ། 3ཉི་ཨ་ཧ་བ་ གྲུ་ག་དིན་ཅ་ཨ་ཉི་ སའི་པརཱས་ཐོང་མེ་རེ་ས་ག་ སག་པུ་ཤེག་ཏེན་གེ་ ལྷོ་ཕྱོགས་ལོ་ཀེ་ཨ་ཉི་ སི་རི་ཡ་ག་ཏཱན་དི༌ཝ། ཉི་གྲུ་གེ་ རོང་ཤོ་ལེ་དེན་གེ་ ཨ་ཧ་བ་ ས་ཆ་ཏྲུ་རོས་དག་ས་ག་ནོང༌མ།
4ཏྲུ་རོས་ག་ ཨ་ཤི་སློ་མ་ཚེ་བང་ཁྲབ་ཉི་ ཨའི་རོག་ཏེ་བ་ཀབ་ཉི་ ནོང་ཟུམ་ཆོ༌ཝ། དམ་པའི་ཐུགས་ཉིད་ག་ ཐུང་ཀེ་ཨ་ཉི་ ཉ་ག་སློ་མ་བ་ཀི་ ལུང་བསྟན་ཉི་ ཡེག་ཆོ་ཝ་ པ་ཝལ་ ཡ་རུ་ཤ་ལེམ་ག་ཏཱན་ དི་ལེ་མང་ཕ་ཨ༌ཉི། 5ཉི་ནོང་ཟུམ་ག་ཚི་ངེ་ ཉ་གེ་ ཡ་རུ་ཤ་ལེམ་ག་ཏཱན་ དིན་ཅ་ཨ་ཉི་ མེ་ཝག་ཙ་དང་ ཝག་ཙ་བ་དག་པེ་མ་ཝ་ རོག་ཏེ་བ་ ཐམས་ཅན་རང་ ཨའི་ནུང་མེ་ག་ མཚོ་ནེ་མ་སག་པུ་ཨོ་ཕ། ཉི་མཚོ་ནེ་མ་ག་ ཨ་ཧ་ཏོང་ཟིང་ས་ག་ཏེས་ཉི་ ཨ་ཤི་སྨོན་ལམ་ཏབ་ཐཱན་ ཨ་ཤི་ རོག་ཏེ་བ་ཀ་ ཨའི་དི་ཝ་ན་ཨ་ཉི་ཡེག༌པ། 6ཉི་ཨའི་ གྲུ་ནང་ཀ་ནུབ་ཏེན་གེ་ རོག་ཏེ་བ་ལོག་ཉི་ རང་རང་ས་ཕའི་ག་ཏཱན་དི༌ཝ།
7ཉི་ཨའི་ ཏྲུ་རོས་གེ་ཨུ་ཉི་ ཏྲོ་ལེ་མའིས་དག་ས་ག་ཤེག༌པ། ཉི་ཉ་ག་ ཡུང་ཟི་བ་ཀ་ སྐུ་གཟུགས་བཟང་པོ་ཨ་ཉི་ཡེག་ཐཱན་ ཨའི་རོག་ཏེ་བ་ཀབ་ཉི་ ནོང་ཐུར་ཤ་ཆོ༌ཝ། 8ཉི་ནམ་ནིང་ད་བུ་ ཉ་གེ་ཨ་ཉི་ ཨའི་ཁྲོམ་ཆེན་ ཀའི་ས་རི་ཡ་ག་ཤེག་ཉི་ ཆོས་བཤད་ཁཱན་ཕི་ལིབ་ག་ ཕའི་ག་ཆོ༌ཝ། རོག་ཤོ་ སི་ཁཱན་སོ་ངོ་ཟུམ་ག་པོང་ཀེ་ ཐུར་གི་ཝ་ཆོ༌ཝ། 9ཉི་ལུང་བསྟན་མེ་རེ་ཁཱན་ རོ་ཀ་ཟ་མིན་ཕིཤི་ཆོ༌ཝ། ཉི་རོག་ཏེ་ཕིཤི་རང་ གཉེན་མ་ཕི་ཝ་ཆོ༌ཝ།
10ཨའི་ཉ་ག་ཆོ་ཉི་ ནོང་མང་པུ་ཐུར་ག་ཚི་ངེ་ ཡ་ཧུ་དི་ཡ་གེ་ ལུང་བསྟན་པ་ ཨ་ག་བཱས་དག་ཁཱན་ཐུར་ ཉ་ཤེག༌པ། 11ཉི་ཨའི་ཆོ་ས་ག་ཨུ་ཉི་ པ་ཝལ་ག་ཐེ་མུ་གི་ཨ་ཉི་ རོག་རོག་ཏེན་ག་ བི་དང་ག་དང་ཐིག་ཐཱན་ གསུངས་ཆོ་ཝ་ དམ་པའི་ཐུགས་ཉིད་གི་ གསུངས་ལ་ ཡ་རུ་ཤ་ལེམ་ག་ ཡ་ཧུ་དི་པ་བ་ཀི་ ཨོ་ཐ་ཐེ་མུ་ཆུ་ཁཱན་ སོ་ངོ་ཁེ་པ་ ཙུང་ཉི་ཐིག་ཐཱན་ རོ་མི་བ་ཀ་ ག་དང་ག་སྤྲོད་པེ་ཨ༌ཉི། 12ཨོ་ཐ་ཆཱས་ ན་ཐ་དེན་གེ་ ཉ་ག་ཆོ་ཁཱན་སློ་མ་བ་དང་ ཨའི་ཐམས་ཅན་རང་དོམ་ཉི་ པ་ཝལ་ག་ཞུ་ཝ་ ནཱན་ཡ་རུ་ཤ་ལེམ་ག་ཏཱན་ མ་བྱོན་ཤོ་ཨ༌ཉི།
13དག་པ་ཀབ་ཉི་ པ་ཝལ་གི་ གསུངས་ཆོ་ཝ་ ན་ཧ་བ་ ཧང་ཨ་ཉི་གེབ་ཉི་ ཇ་ག་སེམས་ཤོག་པེ་ གཱན་ཅ་ཡ། ཇང་གཙོ་བོ་ཡི་ཤུ་ག་དེན་གེ་ ཡ་རུ་ཤ་ལེམ་ག་བཙོན་ག་ དི་ལེ་ག་ཐུར་ཤ་མང་གི་ཝ་ ཤི་ལེ་ག་བུ་གྲ་སྒྲིག་ཅ་ཨ༌ཉི། 14ཨ་ཤི་ རོ་ཀ་སེམས་འགྱུར་བེ་ མར་བེ་ལ་ཨ་ཉི་ སེ་དེན་གེ་ ཨ་ཤི་ རོག་ཁག་པེ་ནོར་ཐཱན་ཞུ་ཝ་ གཙོ་བོ་ག་ ཐུགས་བཞེད་དང་ཏུ་ཉི་ ཇུང་ཆེན་ཨ༌ཉི༎
པ་ཝལ་ ཡ༌རུ༌ཤ༌ལེམ༌ག་ཕེབས༌པ༌ལ།
15ཉི་ཨོ་ཉ་ཚི་ངེ་ ཨ་ཧ་བ་ཅམ་ཐཱན་ ཡ་རུ་ཤ་ལེམ་ག་ཏཱན་དི༌ཝ། 16ཀའི་ས་རི་ཡ་ག་ སློ་མ་ཚེ་བང་ ཨ་ཧ་བ་ཀབ་ཉི་ ཏབ་ཐུར་ཨུན་ཐཱན་ རོག་ཏེ་བ་ཀི་ ཨའི་མ་ན་སོན་ག་ ཕའི་ག་ཆོ་ལེ་ག་དེན་གེ་ རིག་ཉི་བུ༌ཝ། ཉི་རོག་ཤོ་ སའི་པརཱས་གེ་གི་ཝ་ཆོ༌ཝ། ཉི་གོ་དང་པ་ དད་པ་ཨ་ཁཱན་བ་ཀ་པོང་ཀེ་ སློ་མ་ཐུར་བུ་གི་ཝ་ཆོ༌ཝ། 17ཨའི་ཨུན་ཅ་ཨ་ཉི་ ཡ་རུ་ཤ་ལེམ་ག་ ཡུང་ཟི་བ་ གནམ་མེད་ས་མེད་ ཤོ་ནང་ཕེ༌ཝ།
18ནམ་ནིང་ད་བུ་ པ་ཝལ་ ཨ་ཧ་བ་ཀབ་ཉི་ ཡ་ཀུབ་རུ་མེ་ག་བྱོན༌མ། ཉི་སོ་ངོ་ཆི་ལུ་བ་བུ་ ཐམས་ཅན་རང་ ཡ་ཀུབ་ག་ཕའི་ག་ ཛོ་མ་ཆོ༌ཝ། 19པ་ཝལ་གི་ རོག་ཏེ་བ་ཀ་ སྐུ་གཟུགས་བཟང་པོ་ཨ་ཉི་ ཞུན་ཐཱན་ དཀོན་མཆོག་གི་ རོ་ཀ་ཐུང་ཀེ་ཨ་ཉི་ ཡ་ཧུ་དི་པ་མང་གི་ཁཱན་ སོ་ངོ་བ་ཀ་པོང་ཀ་ ཧང་ཏེན་ཕྱག་ལཱ་མཛད་ཉི་ གནང་མ་གི་ལ་སྨོ་ ཨོ་ཉ་ཀོར་གེ་ ཐམས་ཅན་རང་ རོ་ཀི་རོག་ཏེ་བ་ཀ་ ཞུ་ཝ༌ལ།
20རོག་ཏེ་བ་ཀི་ ཨོ་ཐ་ཆཱས་ ན་ཐ་ཉི་ དཀོན་མཆོག་ག་ བསྟོད་པ་ཕུལ་བ༌ལ། ཉི་རོག་ཏེ་བ་ཀི་ པ་ཝལ་ག་ཞུ་ཝ་ལ་ ཀོ་ཏ་ ཡ་ཧུ་དི་པ་བ་ སྟོང་ཕྲག་སྟོང་ཕྲག་ཨ་ཉི་ དད་པ་ཨ་ཁཱན་རི་ཝ་ག་ ནཱན་གི་མཁྱེན༌མེ། ཉི་རོག་ཏེ་བ་ཀི་ མོ་ས་ག་བཀའ་ཁྲིམས་ཁེ་པ་ གནམ་མེད་ས་མེད་ ཁག་ཆི་ལུ་གི་ལ་ཨ་ཉི་མི་ན། 21ཉི་བཱརའ་སོ་ངོ་བ་ཀ་ པོང་ཀ་ཆོ་ཁཱན་ ཡ་ཧུ་དི་པ་བ་ཀ་ ནཱན་གི་མོ་ས་ག་ བཀའ་ཁྲིམས་འགྲུབ་ཕེ་ག་ ཁག་ཆི་ལུ་མང་གི་ཨ་ཉི་ ཡེན་བི་ན་ཨ་ཉི་ རོག་ཏེ་བ་ཀི་ ན་ཐ་ཝ༌ལ། ནཱན་གི་ རོག་ཏེ་བ་ཀ་ཝག་ཙ་བ་ ཤ་ཅཱད་པེ་མ་ཁེ་ལ་ ཡང་ན་ལ་ ཡ་ཧུ་དི་པ་ ལུགས་སྲོལ་དང་ཏུ་ཉི་ ཨ་ལེ་མ་ཁེ་ལ་ཨ་ཉི་ ཡེན་བི་ན་ཨ་ཉི་ རོག་ཏེ་བ་ཀི་ཡེག༌ལ། 22ཉི་ཨོམ་ ཨ་ཤི་ཧང་ཨ་ཝ་དྲག་པེ་ཡ། རོག་ཏེ་བ་ཀི་ ནཱན་བྱོན་མ་ལ་ཨ་ཉི་ ཐེ་རི་བ་རི་རང་སེ༌ལེ།
23ཨོ་ཉི་ཨ་དེན་གེ་ ནཱན་གི་ ཧང་ཨ་ལེ་ཁེ་ལེ་གི་ལ་སྨོ་ ཨ་ཤི་ན་ག་ཡེག༌པེ། ཨ་ཧ་སོ་ངོ་ཕིཤི་གི་ དཀོན་མཆོག་ག་ སྐུན་མདུན་གེ་ ཁས་བླངས་ཨ་ཝ༌ཅ། 24ནཱན་བུ་ རོག་ཏེ་བ་ཀབ་ཉི་ མཆོད་ཁང་ག་བྱོན་ཐཱན་ ཙང་མ་ཅོད་པེ་ག་ མཆོད་པ་ཕུལ༌ཤོ། རོག་ཏེ་བ་ཀ་ ཀེརེག་ཏོང་ཏྲེག་པ་ག་ངེ་ལོང་ ནཱན་གི་གནང༌ཤོ། ཉི་ཤ་ ཐམས་ཅན་གི་ ན་ག་ཀོར་གེ་ ན་ཐ་ཁཱན་ཁེ་པ་ དེན་པ་མང་གི་ཝ་ལ་ ནཱན་ནཱན་ཏེན་གི་བུ་ མོ་ས་ག་ བཀའ་ཁྲིམས་ག་ ཆ་གནས་ཐ་ན་ཨ་ཉི་སེ༌ལེ།
25ཡ་ཧུ་དི་པ་མང་གི་ཁཱན་ དད་པ་ཨ་ཁཱན་བ་ཀི་ ཧང་ཨ་ལེ་ཁེ་ལེ་གི་ལ་སྨོ་ ཨོ་ཉ་ཀོར་གེ་ ཨ་ཤི་ཡི་གུ་འབྲི་ཉི་ ཀེ་བ༌ཅ། སྐུ་ག་མཆོད་པ་ཕུལ་ཁཱན་ ཟེ་ཟ་ལེ་མང་ཕ་ ཞི་ཇ་མེ་མང་ཕ་ ཉི་ངང་ཇུ་ཉི་ཤེ་ཁཱན་ སེམས་ཅན་ག་ཤ་ ང་མེ་མང་ཕ། ཉི་ལུས་འབྲེལ་མ་ཙང་མ་ཁེ་པ་ སྤང་མེ་ཁེ་ལེ་ཨ༌ཉི༎
པ་ཝལ་ཙུང་མ༌ལ།
26རོག་ཏེ་བ་ཀི་ གསུངས་མ་དང་ཏུ་ཉི་ པ་ཝལ་གི་ ནམ་ནིང་དག་པ་ཀབ་ཉི་ རོག་ཏེ་ཕིཤི་ རིག་བུན་ཐཱན་ ཙང་མ་ཅོད་པེ་ག་ མཆོད་པ་ཕུལ་བ༌ལ། ཉི་གེ་ རོག་མཆོད་ཁང་ནང་ཀ་བྱོན་ཐཱན་ ཙང་མ་ཅོད་པེ་ག་མཆོད་པ་ ཧ་ལ་འགྲུབ་ཕེ་གི་ལ་སྨོ་ ཨོ་ཉ་ཀོར་གེ་ གསུངས་མ༌ལ། ཉི་མཇུག་དུས་ག་ནོང་ཀ་ རོག་ཏེ་བ་ ཐམས་ཅན་ག་དེན་གེ་ མཆོད་པ་ཕུལ་བེ་གི་ལ་དག་ཉི་བུ་ གསུངས་མ༌ལ།
27ནོང་ཟུམ་ད་སུར་ མ་དི་ལེ་གོ་མ་ ས་ཆ་ཨེ་ཤི་ཡ་ག་ཆོ་ཁཱན་ ཡ་ཧུ་དི་པ་ཚེ་བང་གི་ པ་ཝལ་ མཆོད་ཁང་ནང་ཀ་ ཐོང་མ་ཀབ་ཉི་ སོ་ངོ་ཐམས་ཅན་རང་ རོ་ཙིག་པེ་བི་ཉི་ ཉི་རོག་ཏེ་བ་ཀི་ པ་ཝལ་ཙུང་མ༌ལ། 28རོག་ཏེ་བ་ཀི་ ཤ་དར་ཕི་ཉི་ ཡེག་པ་ལ་ ཨིས་རེལ་ག་སོ་ངོ་བ་ ཨ་ཧ་རུམ༌ཅོ། ཨོ་ཐ་སོ་ངོ་གི་ ཨོ་ག་རང་གི་ནེ་བུ་ ཨ་ཧ་སོ་ངོ་དང་ མོ་ས་ག་བཀའ་ཁྲིམས་ ཉི་ཨོ་ཐ་མཆོད་ཁང་ག་ དགྲ་ཨ་ཉི་ཡེན་བི་ན། ཉི་གིརིག་བ་ མཆོད་ཁང་ནང་ཀ་ནུ་ཕེ་བི་ཉི་ ཨ་ཧ་དམ་པའི་མཆོད་ཁང་བུ་ མ་ཙང་མ་ཅོད་པ་ཨ༌ཉི། 29རོག་ཏེ་བ་ཀི་ ཨོ་ཐེན་ཡེག་པེ་དེན་ཐ་ཤོ་ ཨེ་ཕི་སཱས་ག་སོ་ངོ་ ཏྲོརོ་ཕི་མཱས་དག་ཁཱན་ཁེ་པ་ པ་ཝལ་ཀབ་ཉི་ ཁྲོམ་ཆེན་ཡ་རུ་ཤ་ལེམ་ག་ ཐོང་མ་ཨ་དེན་གེ་ པ་ཝལ་གི་ རོག་མཆོད་ཁང་ནང་ཀ་ རིག་ཉི་བུན་ཆོ་དུ་དག་པ་གི་ གི་ཝ༌ལ།
30ཨོ་ཐ་ཆཱས་གི་ཨ་ཉི་ ཡ་རུ་ཤ་ལེམ་ག་ སོ་ངོ་ཐམས་ཅན་རང་ རོ་ཙིག་པ༌ལ། ཉི་རོག་ཏེ་བ་ ཐམས་ཅན་རང་ ཏབ་ཐུར་ག་ཇུག་དི་ཉི་ པ་ཝལ་ཙུང་ཐཱན་ མཆོད་ཁང་ནང་ཀེ་ ཕིས་ཀ་ཏཱན་ ཇག་ཉི་བུ་ཝ༌ལ། ཉི་ཨོ་ཉ་ཐྲེ་ཀེ་རང་ མཆོད་ཁང་ག་ཀོ་བ་དམ་པ༌ལ། 31རོག་ཏེ་བ་ཀི་ པ་ཝལ་ བཀྲོངས་མེ་ཅམ་ཅ་ཨ་ཉི་ ཡ་རུ་ཤ་ལེམ་ག་ཆོ་ཁཱན་ རོ་མི་ག་ དམག་དཔོན་གི་ ཇིཝ་སུབ་ཉི་ ཁྲོམ་ཆེན་ ཐམས་ཅན་རང་ ཆ་པ་ཅ་ཨ་ཉི ན་ཐ་ཝ༌ལ། 32ཨོ་ཉ་ཐྲེ་ཀེ་རང་ རོ་ཀི་འགོ་དཔོན་བ་དང་ དམག་མི་བ་རིག་ཉི་ སོ་ངོ་ཛོམ་ས་ག་ཏཱན་ ཇུག་ཉི་དི་ཝ༌ལ། སོ་ངོ་བ་ཀི་ རོག་ཏེ་བ་ ཨོ་ཕ་ཐོང་མ་ཀབ་ཉི་ རོག་ཏེ་བ་ཀི་ པ་ཝལ་ཀོང་མེ་ག་ནོར་བ༌ལ།
33དམག་དཔོན་གི་ པ་ཝལ་ཙུང་ཐཱན་ ལྕགས་ཐག་ཉིག་ཙིང་གི་ཨ་ཉི་ ཐིག་ཅོ་དག་ བཀའ་གནང་མ༌ལ། ཉི་གེ་ པ་ཝལ་ཤོ་ ཨི་བི་གི་ལ་སྨོ་ ཉི་རོ་ཀི་ ཧང་ཨ་ཝ་གི་ལ་སྨོ་ ཨོ་ཉ་ཀོར་གེ་ རོ་ཀི་སོ་ངོ་བ་ཀ་ ཇི་མ༌ལ། 34ཚེ་བང་གི་ ཤ་དར་ཕི་ཉི་ ཧང་ཐུར་ཡེག་པ༌ལ། ཉི་ཚེ་བང་གི་ ཨོམ་ཆང་ བཱརའ་ཧང་ཐུར་ཡེག་པ༌ལ། གནམ་མེད་ས་མེད་ ཟིང་པ་ཨ་དེན་གེ་ ངོ་མ་ཨ་ཉི་ ཧང་ཇུང་མ་གི་ལ་སྨོ་ ཨོ་ཉ་ཀོར་གེ་ དམག་དཔོན་གི་ སེ་ལེ་མར་བ༌ལ། ཨོ་ཉི་ཨ་དེན་གེ་ པ་ཝལ་དམག་མི་བ་ཀ་ དམག་ཁང་ནང་ཀ་ རིག་ཉི་བུའི་དག་ཉི་ བཀའ་གནང་མ༌ལ། 35ཉི་པ་ཝལ་ ཏབ་ཏང་ག་ཕེབས་པ་ཀབ་ཉི་ སོ་ངོ་བ་ཀི་ རོ་ཀ་ ག་དང་ཤང་པེ་ གོད་པ་ཨ་དེན་གེ་ རོག་དམག་མི་བ་ཀི་ ཕུ་ཉི་བུ་ལེ་ཁེ་ཝ༌ལ། 36ཉི་རོག་ཏེ་བ་ཀ་ ཚིང་ཁོན་ཁཱན་ སོ་ངོ་བ་ཀི་ ཤ་དར་ཕི་ཉི་ཡེག་པ་ལ་ དཱན་ཤེ་ དཱན་ཤེ་ཨ༌ཉི༎
པ་ཝལ་གི་ སོ༌ངོ༌བ༌ཀ་གསུངས༌མ༌ལ།
37པ་ཝལ་ དམག་ཁང་ནང་ཀ་ བུ་ལེ་ཅམ་པ་ཀབ་ཉི་ རོ་ཀི་དམག་དཔོན་ག་ གསུངས་མ་ལ་ ཇི་གི་ན་ག་ ཧང་ཐུར་ཞུ་ལེ་རེ་བེ་སྨོ་ཨ༌ཉི།
དམག་དཔོན་ ཡིད་ཆི་ཉི་ཇི་མ་ལ་ ནཱན་གི་ གིརིག་ག་ལོ་སེ་ལེ་སྨོ། 38ནཱན་ཨི་ཇིབ་ག་ སོ་ངོ་མང་གི་སྨོ། ཨེ་ཧེ་ནེང་ཅམ་ཀ་ ཨོ་ཉ་སོ་ངོ་གི་ གཞུང་ཀ་ངོ་ལོག་པེ་རིག་ཉི་ ངོ་ལོག་པ་ 4000 ས་ཏོང་པ་གེ་ལེང་ རིག་བུ་ཝ་དག༌ཉི།
39པ་ཝལ་གི་ ལན་གནང་ཉི་ ཨོ་ཉ་སོ་ངོ་ཇང་མང་གི། ཇང་ཤོ་ ཡ་ཧུ་དི་པ་གི༌ལ། ཉི་རྒྱལ་ཁབ་ཀི་ལི་ཀི་ཡ་ག་ཆོ་ཁཱན་ ཁྲོམ་ཆེན་ཁག་ཆི་ལུ་ ཀྲར་སཱས་དག་ཁཱན་ག་ སོ་ངོ་གི༌ལ། ཇང་ཨོ་ཐ་སོ་ངོ་བ་ཀབ་ཉི་ ཆཱས་ཨ་ལེ་གནང་ཉི་ བཀའ་དྲིན་བསྐྱང་ཤོ་ཨ་ཉི་ གསུངས་མ༌ལ། 40དམག་དཔོན་གི་ དྲིག་པེ་ཨ་ཉི་ གསུངས་མ་ཨ་དེན་གེ་ པ་ཝལ་ ཏབ་ཏང་ཐུང་ཀ་ བཞེངས་ཐཱན་ སོ་ངོ་བ་ཙང་ཀེན་ ཆོ་ལེ་བི་ལེ་དེན་གེ་ རོ་ཀ་ཕྱག་ཝག་ཉི་གནང་མ༌ལ། ཁུ་སིམ་ཀིན་རི་དེན་གེ་ རོ་ཀི་རོག་ཏེ་བ་ཀ་ ཡ་ཧུ་དི་པ་ལོ་ ཧི་བུརུ་གེ་ཨ་ཉི་ གསུངས་མ༌ལ་
Currently Selected:
མཛད༌པ། 21: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
