མཛད༌པ། 22
22
1ཇ་ག་ཨ་ཏ་ཀོ་ཏ་བ་དང་ ཨ་པ་བ་ སྙན་གསེང་ཉི་གནང༌ཤོ། ཧང་ཇུང་མ་གི་ལ་སྨོ་ ཇི་གི་ན་ཧ་ སེ་ཉི་ཞུ་ལེ་དག་ཉི་ པ་ཝལ་གི་ཞུ་ཝ༌ལ། 2པ་ཝལ་གི་ རོག་ཏེ་བ་ཀ་ལོ་གེ་ཨ་ཉི་ གསུང་གྲོས་མཛད་པ་ ཐོང་མ་ཀབ་ཉི་ རོག་ཏེ་བ་ལག་ཏང་ ཙང་ཀེན་ཆོ་ཝ་རི་ཝ༌ལ། ཉི་གེ་ པ་ཝལ་གི་གསུངས་མ་ལ་
3ཇང་ཡ་ཧུ་དི་པ་གི༌ལ། ཉི་ཇ་ག་ཀེ་ས་ཤོ་ ཀི་ལི་ཀི་ཡ་ག་ ཁྲོམ་ཆེན་ཀྲར་སཱས་དག་ཁཱན་གི༌ལ། དག་པ་ཀབ་ཉི་ སློབ་དཔོན་ ག་མ་ལི་ཨེལ་ག་ ཕརའ་ཁེ་སློབ་ཕྲུག་ཨ་ཉི་ ཇང་ཨོ་ཐ་ཁྲོམ་ཆེན་ག་རང་ ཟོག་པ་གི༌ལ། ཉི་རོ་ཀི་ ཨ་ཧ་ཕ་མ་བ་ཀ་ བཀའ་ཁྲིམས་ག་ཀོར་གེ་ ཇ་ག་ལེག་པུ་ཨ་ཉི་ ཡེན་གནང་མ་ཨ་དེན་གེ་ ཨོ་མ་ ན་ཤི་ཨ་ཝ་པུརུས་ཀིན་ཨ་ཉི་ ཇི་གི་བུ་ དཀོན་མཆོག་ག་ཀོར་གེ་ བརྩོན་འགྲུས་ཀེ་ཆོ༌ཝ། 4ཨོ་ཐ་ཡི་ཤུ་ག་ ལམ་ག་དང་ཁཱན་ ཐམས་ཅན་ག་ ཇི་གི་མ་ལེག་པ་ཨ༌ཝ། ཉི་ཚེ་བང་ཏ་ ཤེ་ལེ་བུ་ཤེ༌ཝ། ཇི་གི་ཕེ་ཝག་ཙ་དག་པེ་མ་ཝ་ མེ་ཝག་ཙ་དག་པེ་མ་ཝ་ཙུང་ཐཱན་ བཙོན་ཁང་ག་ཙུག༌པ། 5བླ་མ་གོང་མ་དང་ ཚོགས་འདུ་ཆི་ལུ་ག་ སོ་ངོ་ཆི་ལུ་ཐམས་ཅན་གི་ ཇ་ག་ཨོ་ཐ་ཆཱས་ག་ འཛོམས་དཔང་ཨ་ལེ་རེ༌བེ། ད་མཱས་ཀཱས་ག་ཆོ་ཁཱན་ ཡི་ཤུ་པ་བ་ ཡ་རུ་ཤ་ལེམ་ག་ཕཱན་ཐཱན་ ཁྲིམས་ཀེ་བེ་དེན་གེ་ ལྕགས་ཀེ་ཉི་ཕའི་དག་ཉི་ ད་མཱས་ཀཱས་ག་ཆོ་ཁཱན་ ཡ་ཧུ་དི་པ་ ཨ་ཏ་བོ་ཉིང་བ་ཀ་ཏཱན་ རོག་ཏེ་བ་ཀི་ ཡི་གུ་བ་ ཀེ་ཁཱན་ཁེ་པ་ ཇ་ག་ག་དང་ག་ གནང་མ་ཆོ༌ཝ།
6ཇང་དི་ཉི་ ད་མཱས་ཀཱས་ག་ ཤེག་པེ་ཅམ་པ་ཀབ་ཉི་ ངབ་ཀ་ཆུ་ཚོད་སོང་ཉིག་ཙིང་ཕང་ག་ ཡིད་ཀ་རྣམ་ཏོག་མ་ཝ་ ཞིང་ཁམས་གེ་དོང་ ཇ་ག་ཀོ་ལོ་ལོ་ འོད་ཟེར་ཆར༌བ། 7ཇང་ས་ག་ཐང་ཇོང༌མ། ཉི་ཨོ་ཐེན་གསུངས་མ་ག་ གསུང་སྐད་ཐུར་ ན་ཐ་ཝ་ ཤ་ཝུལ་ ཤ་ཝུལ་ ནཱན་གི་ ཇང་ཧང་ཨ་ཉི་ མ་ལེག་པ་ཨན་ཅ་ཡ་ཨ༌ཉི།
8ཉི་ཇི་གི་ལན་མཇལ་ཉི་ ནཱན་ཨི་བི་ཡ་ གཙོ་བོ་ཨ་ཉི་ ཞུ་ལ་ཀབ་ཉི་ རོ་ཀི་ཇ་ག་ ཇང་ཤོ་ ནཱན་གི་མ་ལེག་པ་ཨ་ཁཱན་ ནཱས་རཱད་ག་ ཡི་ཤུ་གི་ལ་ཨ་ཉི་ གསུངས་ཆོ༌ཝ། 9ཇང་ཀབ་ཉི་ཆོ་ཁཱན་ སོ་ངོ་བ་ཀི་ ཨོ་ཉ་འོད་ཟེར་ཤོ་ཐོང༌མ། དག་པ་ཀབ་ཉི་ རོག་ཏེ་བ་ཀི་ ཨོ་ཉ་ཀཱན་ཤོ་ ན་ག་མ་ཐཱན་ཤི།
10ཇི་གི་ཞུ་ཝ་ གཙོ་བོ་ ཇི་གི་ ཧང་ཨ་ལེ་ཁེ་ལེ་ཡ་དག༌ཉི།
གཙོ་བོ་གི་ ལན་གནང་ཉི་གསུངས་མ་ ག་བ་ཝུན་ཐཱན་ ད་མཱས་ཀཱས་ག་ཏཱན་དི། ཉི་ཉ་ག་ ནཱན་གི་ ཧང་ཨ་ལེ་ཁེ་ལེ་གི་ལ་སྨོ་ ཨོ་ཉ་ཀོར་གེ་ཡེག་པེ་ཨ༌ཉི།
11ཨོ་ཉ་འོད་ཟེར་ག་ཤུག་ཀི་ཨ་ཉི་ ཇ་ག་མིང་གི་ ཐོང་མེ་མར་བ་རི༌ཝ། ཉི་ཇང་ཀབ་ཉི་ཆོ་ཁཱན་བ་ཀི་ ཇ་ག་ག་དང་གེ་ཙུང་ཉི་ ཇང་ད་མཱས་ཀཱས་ག་ཏཱན་ རིག་ཉི་བུ༌ཝ། 12ཨོ་ཉ་ཁྲོམ་ཆེན་ག་ ཆོས་སེམས་ཆོ་ཁཱན་ སོ་ངོ་ག་མིང་ ཧ་ན་ནི་ཡ་དག་ཁཱན་ཐུར་ཆོ༌ཝ། རོ་ཀི་མོ་ས་ག་ བཀའ་ཁྲིམས་ག་ ཆ་གནས་ཐཱན་ཆོ༌ཝ། ཉི་ཉ་ག་ཆོ་ཁཱན་ ཡ་ཧུ་དི་པ་བ་ཀི་ རོ་ཀ་གནམ་མེད་ས་མེད་ གུས་ཞབས་ཨན་ཆོ༌ཝ། 13རོག་ཇང་ཆོ་ས་བྱོན་ཉི་ ཐིང་ཐཱན་གསུངས་ཆོ་ཝ་ ཀོ་ཏ་ཤ་ཝུལ་ ནཱན་གི་ ཨོམ་ལོག་ཉི་ཐོང་ཤོ་ཨ༌ཉི། ཨོ་ཉ་ཐྲེ་ཀེ་རང་ ཇི་གི་ཐོང་མེ་རེ༌བ།
14རོ་ཀི་ཇ་ག་གསུངས་ཆོ་ཝ་ ཨ་ཧ་ཕ་མ་བ་ཀ་ དཀོན་མཆོག་གི་ ནཱན་གི་ རོ་ཀ་ཐུགས་བཞེད་ཀོར་གེ་ སེ་ལེ་དེན་གེ་ ཐམས་ཅན་གེ་ དྲང་པུ་ཆོ་ཁཱན་ཁེ་པ་ མཇལ་བེ་དེན་གེ་ ཉི་རོ་ཀི་གསུངས་ཁཱན་ཁེ་པ་ ཉཱན་པེ་དེན་གེ་སི་ཝ་གི༌ལ། 15སོ་ངོ་ཐམས་ཅན་ག་གུབ་ཀ་ ནཱན་གི་ རོ་ཀ་འཛོམས་དཔང་ཨ་ཉི་ ནཱན་གི་ཐོང་ཁཱན་དང་ ན་ཐ་ཁཱན་ ཐམས་ཅན་རང་ ཡེག་པེ་ཁེ༌ལེ། 16ཉི་ཨོམ་ནོང་ཉི་ཁུངས་མཱན༌ཅ། ག་ཐིང་ཤོ་ ཉི་གེ་ ཁྲུས་གསོར་ཞུའི། ཉི་གཙོ་བོ་ག་མཚན་ཞུ་ཉི་ ན་ག་སྡིག་པ་བ་ ཟིག་ཉི་གེམ་ཤོ་ཨ༌ཉི།
17ཨོ་ཉ་ཚི་ངེ་ ཇང་ཡ་རུ་ཤ་ལེམ་ག་ཏཱན་ལོག་ཐཱན་ མཆོད་ཁང་ག་དི་ཉི་ སྨོན་ལམ་ཞུ་ལེ་གང་ཀ་ ཇི་གི་མཇལ་ཁ་ཉོང༌པ། 18ཨོ་ཉ་མཇལ་ཁ་ནང་ཀ་ གཙོ་བོ་གི་ ཇ་ག་ཨོ་ཐེན་གསུངས་མ་ དོ་ཟོ་ཨ་ཉི་ ཡ་རུ་ཤ་ལེམ་ཐུབ་ཐཱན་དི། ཧང་ཡ་དག་ནེ་ལ་ ཐ་ག་སོ་ངོ་བ་ཀི་ ཇ་ག་ཀོར་གེ་ཡེ་ཁཱན་ དེན་པ་ག་ དད་པ་མ་ཨ་ལ་ཨ༌ཉི།
19དག་པ་ཀབ་ཉི་ ཇི་གི་ཞུ་ཝ་ གཙོ་བོ་ རོག་ཏེ་བ་ཀི་སེན་ཅ་ ཡ་ཧུ་དི་པ་ཆོས་འཛོམས་དྲང་རང་ ཇི་གི་ན་ག་དད་པ་ཨ་ཁཱན་བ་ བཙོན་ག་ཙུག་ཉི་ཀོང༌མ། 20ཉི་ན་ག་འཛོམས་དཔང་ཨ་ཁཱན་ ཨིས་ཏི་ཕ་ནཱས་བཀྲོངས་མ་ཀབ་ཉི་ རོག་བཀྲོངས་ཁཱན་བ་ཀ་ཁ་ཨ་ཉི་ ཇང་བུ་ཨོ་ཉ་ག་ཐིང་ཉི་ ཉི་རོག་ཏེ་བ་ཀི་ རོག་བཀྲོངས་ཅ་ཨ་ཉི་ ཇང་རོག་ཏེ་བ་ཀ་ ཁ་མུང་ཙུང་ཉི་ ཆོ་ཝ་ཆོ་ཝ་ཨ༌ཉི།
21དག་པ་ཀབ་ཉི་ གཙོ་བོ་གི་ ཇ་ག་གསུངས་མ་ ཡ་རུ་ཤ་ལེམ་ཐུབ་ཐ་ཉི་དི། ཧང་ཡ་དག་ནེ་ལ་ ཇི་གི་ནཱན་ཐ་རིང་ས་ག་ ཡ་ཧུ་དི་པ་མང་གི་ཁཱན་ སོ་ངོ་བ་ཀ་པོང་ཀ་ ཀུན་ཏི་ལེ་ཨ༌ཉི།
22ཨོ་ཐ་ཆཱས་སག་པུ་ སོ་ངོ་བ་ཀི་ རོ་ཀི་གསུངས་ཁཱན་ག་ ཉཱན་པ༌ལ། ཉི་གེ་ སོ་ངོ་བ་ཀི་ ཤ་དར་ཕི་ཉི་ཡེག་པ་ལ་ ཨུ་ཐུ་ད་བུ་སོ་ངོ་ འཛམ་གླིང་ག་མ་ཐའི། དཱན་འཛམ་གླིང་ག་ ཆོ་ལེ་ག་མ་རུང་ཁཱན་ སོ་ངོ་གི་ལ་ཨ༌ཉི། 23རོག་ཏེ་བ་ཀི་ ཤ་དར་ཕི་ཉི་ རོག་ཏེ་བ་ཀ་ ཁ་མུང་ཕེག་གེམ་ཐཱན་ ས་ཕུར་ཙི་ ངམ་ཐུང་ཀ་ཏཱན་ ཡ་ཕ༌ལ།
24ཉི་སོ་ངོ་བ་ཀི་ པ་ཝལ་ག་ཡོར་ཀེ་ ཧང་ཨ་ཉི་ ཤ་དར་ཕི་ཝ་གི་ལ་སྨོ་ སེ་ལེ་དེན་གེ་ པ་ཝལ་ནང་ཀ་ཕཱན་ཐཱན་ ཀོང་ཤོ་ཨ་ཉི་ དམག་མི་བ་ཀ་ བཀའ་གནང་མ༌ལ། 25དམག་མི་བ་ཀི་ རོག་ཀོང་མེ་ག་དེན་གེ་ ཐིག་ཅ་ཨ་ཉི་ པ་ཝལ་གི་ ཨོ་ཉ་ར་ག་ཆོ་ཁཱན་ འགོ་དཔོན་ག་ ཇི་མ་ལ་ ཁྲིམས་གེ་གེ་བ་ལའི་ ཨ་ཝ་ལ་ཨ་ཉི་ ཁུངས་མ་ཀེ་བེ་གོ་མ་ རོ་མི་ག་ མི་ཁུངས་ཆོ་ཁཱན་སོ་ངོ་ ཀོང་མེ་ཆོག་པེ་སྨོ་ཨ༌ཉི།
26འགོ་དཔོན་གི་ ཨུ་ཐུ་ད་བུ་ ན་ཐ་དེན་གེ་ དམག་དཔོན་ཆོ་ས་དིན་ཐཱན་ ཞུ་ཝ་ལ་ ནཱན་གི་ ཧང་ཨ་ལེ་ཅམ་པ་ཅ་ཡ། ཨོ་ཐ་སོ་ངོ་ཤོ་ རོ་མི་ག་མི་ཁུངས་ཆོ་ཁཱན་ སོ་ངོ་གི་ཝ་ལ་ཨ༌ཉི།
27ཉི་དམག་དཔོན་ པ་ཝལ་བཞུགས་ས་བྱོན་ཐཱན་ ཇ་ག་ཡེག་ཅོ་ ནཱན་རོ་མི་ག་ མི་ཁུངས་ཆོ་ཁཱན་ སོ་ངོ་གི་ལ་སྨོ་ཨ་ཉི་ ཇི་མ་ཀབ་ཉི་ པ་ཝལ་གི་ ལན་མཇལ་ཉི་ གི་ལ་ཨ་ཉི་ གསུངས་མ༌ལ།
28ཉི་དམག་དཔོན་གི་ གསུངས་མ་ལ་ ཏི་རུ་མང་པུ་བིན་ཐཱན་ཤ་ ཇང་རོ་མི་ག་ མི་ཁུངས་རི་ལེ་རེ་བ་ཨ༌ཉི། དག་པ་ཀབ་ཉི་ པ་ཝལ་གི་གསུངས་མ་ལ་ ཇང་ཏ་ ཀེ་དེན་ཐུར་གེ་ག་ཏཱན་ རོམ་ག་མི་ཁུངས་ཆོ་ཁཱན་ སོ་ངོ་གི་ལ་ཨ༌ཉི།
29པ་ཝལ་ རོ་མི་ག་མི་ཁུངས་ཆོ་ཁཱན་ སོ་ངོ་གི་ལ་ཨ་ཉི་ ན་ཐ་ཝ་ཐུར་ག་རང་ རོ་ཀ་དྲི་ཝ་ཇི་མེ་ཅམ་ཁཱན་ དམག་མི་བ་ རོ་ཀེ་ཚིང་སིག་ཉི་ དི་ཝ༌ལ། དམག་དཔོན་བུ་ ཡོང་ཁེ་ཝ༌ལ། ཧང་ཡ་དག་ནེ་ལ་ རོ་ཀི་པ་ཝལ་ ཐིག་ཉི་ཆུ་མ་ཆོ་ཝ༌ལ༎
པ་ཝལ་ཚོགས༌འདུ་ཆི༌ལུ༌ག་གུབ༌ཀ།
30ནམ་ནིང་དག་པ་ཀབ་ཉི་ དམག་དཔོན་གི་ པ་ཝལ་ཐིག་པ་གེ་ཕེག་ཐཱན་ ཡ་ཧུ་དི་པ་བ་ཀི་ ཧང་ཨ་ཉི་ རོ་ཀ་དགྲ་ཨན་ཅ་གི་ལ་སྨོ་ སེ་ལེ་དེན་གེ་ བླ་མ་ཆི་ལུ་བ་དང་ ཚོགས་འདུ་ཆི་ལུ་ ཏབ་ཐུར་ཛོམ་ཤོ་ཨ་ཉི་ བཀའ་གནང་མ༌ལ། ཉི་རོ་ཀི་པ་ཝལ་ རོག་ཏེ་བ་ཀ་གུབ་ཀ་ ཀེ་བ༌ལ།
Currently Selected:
མཛད༌པ། 22: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
