མཛད༌པ། 23
23
1པ་ཝལ་གི་ ཚོགས་འདུ་ཆི་ལུ་ག་ ཚོགས་པ་བ་ཀ་ཏཱན་ ཐེ་རེ་རེ་ཨ་ཉི་གཟིགས་ཐཱན་ གསུངས་མ་ལ་ ཇ་ག་ཨ་ཏ་ཀོ་ཏ་བ་ ཇ་ག་ཚེ་ག་ ཇི་གི་ཧ་ལ་རང་གི་ནེ་བུ་ དཀོན་མཆོག་ག་ སྐུན་མདུན་ག་ སེམས་ལེག་པུ་མི་ཉི་ ཨོ་ཐ་ནོང་སག་པུ་ ཆོ་ཝ་ཅ་ཨ༌ཉི།
2ཡ་ཧུ་དི་པ་བླ་མ་གོང་མ་ ཧ་ན་ནི་ཡ་དག་ཁཱན་གི་ པ་ཝལ་ག་ར་ག་ཆོ་ཁཱན་ སོ་ངོ་བ་ཀ་བཀའ་གནང་ཉི་ གསུངས་མ་ལ་ རོ་ཀ་ཞལ་ག་ དེན་ཇ་ཀི་ཕི་ཨ༌ཉི། 3ཉི་པ་ཝལ་གི་ ཧ་ན་ནི་ཡ་ག་ཏཱན་ གསུངས་མ་ལ་ དཀོན་མཆོག་གི་ ན་ག་བུ་ དེན་ཇ་ཀི་ཕིན་གནང༌མེ། ནཱན་ཤོ་ ཙིག་པ་ག་ཚོན་བ་ལིང་མིན་ སོག་ཐ་ཁཱན་ ད་བུ་ཐུར་གི༌ལ། མོ་ས་ག་ བཀའ་ཁྲིམས་དང་ཏུ་ཉི་ ཁྲིམས་ཅཱད་པེ་དེན་གེ་ ནཱན་བཞུགས་པ༌ཅ། དག་པ་ཀབ་ཉི་ ནཱན་གི་ རོག་ཏེ་བ་ཀ་ ཇ་ག་ནོ་ཝང་ག་ དེན་ཇ་ཀི་ཕི་ཨན་གསུངས་ཉི་ ནཱན་ནཱན་ཏེན་གི་རང་ མོ་ས་ག་བཀའ་ཁྲིམས་གེ་ གེ་བ་ལའི་ཨ་ན་ཨ༌ཉི།
4པ་ཝལ་ག་ ར་ག་ཆོ་ཁཱན་ སོ་ངོ་བ་ཀི་ རོ་ཀ་ཡེག་པ་ལ་ དཀོན་མཆོག་ག་ བླ་མ་གོང་མ་ག་ཏཱན་ ན་ག་ཞུ་ཐང་ ཨོ་ཐེན་གི་ལ་སྨོ་ཨ༌ཉི།
5པ་ཝལ་གི་ ལན་གནང་ཉི་ གསུངས་མ་ལ་ ཨ་ཏ་ཀོ་ཏ་བ་ ཇི་གི་རོག་ བླ་མ་གོང་མ་གི་ལ་ཨ་ཉི་ མ་སེ་ཝ་ཆོ༌ཝ། ཧང་ཡ་དག་ནེ་ལ་ གསུང་རབ་གེ་ཤོན་ཅ་ ན་ཧ་ཐུང་ཀེ་ དབང་ཁཱན་བ་ཀ་ཀོར་གེ་ ངན་པ་མ་ཡེག་ཅོ་#23:5 ཤོན་དི་ཝ་ག་དཔེ་ཆ་ 22:28ཨ༌ཉི།
6པ་ཝལ་གི་ ཚོགས་འདུ་ཆི་ལུ་ག་ ཚོགས་པ་ཚེ་བང་ ས་དུ་ཀི་པ་དང་ ཚེ་བང་ཤོ་ ཕ་རི་སི་པ་གི་ཝ་ལ་ཨ་ཉི་ མཁྱེན་དེན་གེ་ རོ་ཀི་གསུང་སྐད་ཤུག་ཨ་ཉི་ གསུངས་མ་ལ་ ཨ་ཏ་ཀོ་ཏ་བ་ ཇ་ག་ཕ་མ་བ་པུརུས་ཀིན་ཨ་ཉི་ ཇང་བུ་ ཕ་རི་སི་པ་རང་གི༌ལ། ཉི་ཇི་གི་ སོ་ངོ་ཤི་ཝ་གེ་ གསོན་པོ་ཨ་ཉི་ཝུ་ལེ་དག་ཉི་ དད་པ་ཨ་ཝ་ཨ་དེན་གེ་ ཇང་ཐ་ག་ ཀ་ལུ་ཏཱད་པ་ཅ་ཨ༌ཉི།
7རོ་ཀི་ ཨོ་ཐེན་གསུངས་མ་ཀབ་ཉི་ ཕ་རི་སི་པ་དང་ ས་དུ་ཀི་པ་བ་ མ་ཆ་མ་རི་ཝ༌ལ། ཉི་ཚོགས་འདུ་ཆི་ལུ་བུ་ མ་ཆ་མཱན་ ཁ་ཉིག་ཙིང་རི་ཝ༌ལ། 8ཧང་ཡ་དག་ནེ་ལ་ ས་དུ་ཀི་པ་བ་ཀི་ སོ་ངོ་ཤི་དེན་གེ་ གསོན་པོ་ཨ་ཉི་ཝུ་ལུ་མཱན༌ཅ། ཞིང་ཁམས་ག་འཐེན་པ་མཱན༌ཅ། ཉི་རྣམ་ཤེས་བ་བུ་མཱན་ཅ་ཨ་ཉི་ དད་པ་ཨན་ཅ་གི་ཝ༌ལ། དག་པ་ཀབ་ཉི་ ཕ་རི་སི་པ་བ་ཀི་ ཨོ་ཐ་བ་ ཐམས་ཅན་རང་ཅ་ཨ་ཉི་ དད་པ་ཨན་ཅ་གི་ཝ༌ལ། 9ཨོ་ཉི་ཨ་དེན་གེ་ ཨོ་ཐ་བ་ ལག་ཏང་ཟིང་པ་རི་ཝ༌ལ། བཀའ་ཁྲིམས་ག་ སློབ་དཔོན་ཚེ་བང་ ཕ་རི་སི་པ་གི་ཝ་ཆོ་ཝ༌ལ། ཉི་རོག་ཏེ་བ་ཀི་ ག་ཐིང་ཐཱན་ གསུངས་མ་ལ་ ཨ་ཤི་ ཨོ་ཐ་སོ་ངོ་གི་ ཧང་རང་ངཱད་པ་ ཐོང་མུ་མ༌ལ། ཞིང་ཁམས་ག་འཐེན་པ་གི་ ཡང་ན་ལ་ རྣམ་ཤེས་གི་ རོག་ཀབ་ཉི་ གསུང་གྲོས་མཛད་པ་ ཨོ་ཕེ་ལ་ཨ༌ཉི། 10རོག་ཏེ་བ་ ཤག་རུམ་ཉི་ ལག་ཏང་ལག་ཏང་ མ་དྲིག་པ་རི་ཉི་ ཉི་སོ་ངོ་ཚེ་བང་གི་ པ་ཝལ་ཉ་ཏ་ཇང་པ༌ལ། ཉི་ཚེ་བང་གི་ ཐེང་ཏ་ཇང་པ༌ལ། སོ་ངོ་བ་ཀི་ ཏེང་ཏེང་པ་ཕིན་ཅ་ཨ་ཉི་ པ་ཝལ་ཤེད་ཉི་ ཇོང་དུ་དག་པ་གི་ དམག་དཔོན་གི་ དམག་མི་བ་ཀ་ བཀའ་གནང་ཉི་ གསུངས་མ་ལ་ དོང་དིན་ཐཱན་ པ་ཝལ་ སོ་ངོ་བ་ཀ་ ག་དང་གེ་ཤོན་ཐཱན་ དམག་ཁང་ནང་ཀ་ཏཱན་ རིག་ཉི་བུའི་ཨ༌ཉི།
11ཨོ་ཉ་ངེ་རི་ གཙོ་བོ་གི་ པ་ཝལ་ག་ མཇལ་ཁ་གནང་ཐཱན་ གསུངས་མ་ལ་ ཡོང་མ་ཁེ་ ནཱན་གི་ ཡ་རུ་ཤ་ལེམ་ག་ སོ་ངོ་བ་ཀ་ ཇ་ག་ཀོར་གེ་ ཡེག་པ་པུརུས་ཀིན་ཨ་ཉི་ རོམ་ག་བུ་ ནཱན་གི་ ཇ་ག་ཀོར་གེ་ འཛོམས་དཔང་ ཨ་ལེ་ཁེ་ལེ་ཨ༌ཉི༎
པ་ཝལ་བཀྲོངས༌མེ༌ག་ འཆར༌གཞི་ཙ༌མ༌ལ།
12ནམ་ནིང་བེད་པེ་དག་པ་ཀབ་ཉི་ ཡ་ཧུ་དི་པ་ཚེ་བང་གི་ པ་ཝལ་བཀྲོངས་མེ་ག་ འཆར་གཞི་ཙ་མ༌ལ། ཉི་པ་ཝལ་ མ་བཀྲོངས་མ་སག་པུ་ རོག་ཏེ་བ་ཀི་ ཧང་རང་མ་ཟ་ལ་ ཉི་ཧང་རང་ མ་ཇ་མ་ཨ་ཉི་ ན་ཟ་ཝ༌ལ། 13རོག་ཏེ་བ་དོམ་གེ་ 40 ཕང་ ཟང་ཀེན་ཅ་གི་ཝ༌ལ། 14ཨོ་ཉ་གེ་ རོག་ཏེ་བ་ བླ་མ་ཆི་ལུ་བ་དང་ སོ་ངོ་ཆི་ལུ་བ་ཀ་ སྐུན་མདུན་ག་ བཅག་ཐཱན་ཞུ་ཝ་ལ་ ཨ་ཤི་པ་ཝལ་ མ་ཤེ་ཝ་སག་པུ་ ཨ་ཧ་བ་ ཧང་རང་མ་ཟ་ལ་ ཉི་ཧང་རང་མ་ཇ་མ་ཨ་ཉི་ ན་ཟ་ཝ༌ཅ། 15ནའི་བླ་མ་ཆི་ལུ་བ་དང་ ཚོགས་པ་བ་དོམ་ཉི་ དམག་དཔོན་ག་གསུངས་ཤོ་ པ་ཝལ་ག་ཀོར་གེ་ ཞིབ་དཔྱད་ལེག་པུ་ཨ་ཉི་ ཕི་ལེ་དེན་གེ་ རོག་ལོག་ཉི་རང་ ཐ་ཚོགས་འདུ་ཆི་ལུ་ག་ གུབ་ཀ་ཀེ་ཤོ་ཨ༌ཉི། པ་ཝལ་ ཐ་ཏ་ཕཱན་ཅ་ཨ་ཉི་ ཨ་ཤི་དཱན་ལབ་ཀ་རང་ ཤེན་ཐ་ལེ་དག༌ཉི།
16དག་པ་ཀབ་ཉི་ ཨོ་ཐ་འཆར་གཞི་ག་ཀོར་གེ་ པ་ཝལ་ག་ཚཝ་གི་ ན་ཐ་ཉི་ ཉི་རོག་ དམག་ཁང་ག་དིན་ཐཱན་ པ་ཝལ་ག་ཞུ་ཝ་ལ་ 17ཉི་པ་ཝལ་གི་ དམག་མི་ག་ འགོ་དཔོན་ཐུར་རཱན་ཐཱན་ གསུངས་མ་ལ་ ཨོ་ཐ་ཡམ་ལང་ དམག་དཔོན་ག་ སྐུན་མདུན་ག་ནུང༌ཤོ། རོ་ཀི་ རོ་ཀ་ཆཱས་ཁག་ཆི་ལུ་ཐུར་ ཞུ་ལེ་ཅ་དང་ཨ༌ཉི།
18འགོ་དཔོན་གི་ པ་ཝལ་ག་ཚཝ་ དམག་དཔོན་ཆོ་ས་ག་ སྐུན་མདུན་ག་བུན་ཐཱན་ ཞུ་ཝ་ལ་ བཙོན་པ་པ་ཝལ་གི་ ཇང་རཱན་ཐཱན་ ཨོ་ཐ་ཡམ་ལང་ ན་ག་སྐུན་མདུན་ག་ རིག་ཉི་བུའི། ཧང་ཡ་དག་ནེ་ལ་ རོ་ཀི་ན་ག་ཧང་ཐུར་ ཞུ་ལེ་ཅ་དང་ཨ༌ཉི།
19དམག་དཔོན་གི་ ཡམ་ལང་ག་ ག་དང་གེ་ཙུང་ཉི་ ཟུར་ཀ་ཏཱན་བུན་ཐཱན་ ཇི་མ་ལ་ ནཱན་གི་ ཇ་ག་ཧང་ཡེག་པེ་ཅ་ཡ་ ཡེག་ཅོ་ཨ༌ཉི།
20ཨོ་ཉ་ཡམ་ལང་གི་ ཞུ་ཝ་ལ་ པ་ཝལ་ག་ཀོར་གེ་ ཨོམ་ཆང་རང་ དྲི་ཝ་མང་པུ་ ཇི་མེ་ཆོ་ཝ་པུརུས་ཀིན་ཅོད་ཉི་ པ་ཝལ་ ནམ་ནིང་ཚོགས་འདུ་ ཆི་ལུ་ག་གུབ་ཀ་ ཀེ་ཤོ་ཨ་ཉི་ ཡ་ཧུ་དི་པ་ཚེ་བང་གི་ ན་ག་ཞུ་ལེ་ག་ ཏུན་ཆ་ཨ་ཝ༌ཅ། 21དག་པ་ཀབ་ཉི་ རོག་ཏེ་བ་ཀི་ ཞུ་ཁཱན་ག་ སྙན་མ་གསེང༌ཅོ། སོ་ངོ་ 40 གེ་ལག་པ་གི་ ཀུབ་སེ་ཕི་ཉི་ པ་ཝལ་ཤེ་ལེ་དེན་གེ་ ལབ་ཀ་གུམ་ཉི་ཆོ་ཝ༌ཅ། རོག་ཏེ་བ་ ཐམས་ཅན་གི་ པ་ཝལ་ མ་ཤེ་ཝ་སག་པུ་ ཧང་རང་མ་ཟ་ལ་ ཉི་ཧང་རང་མ་ཇ་མ་ཨ་ཉི་ ན་ཟ་ཝ༌ཅ། ཉི་ཨོམ་ རོག་ཏེ་བ་ཀི་ཞུ་ཁཱན་ཁེ་པ་ ནཱན་གི་སྙན་གསེང་པ་ཨན་མི་ཉི་ རོག་ཏེ་བ་ ཕྲིག་ཀིན་ཅབ་ཉི་ ཆོ་ཝ་ཅ་ཨ༌ཉི།
22ནཱན་གི་ རོག་ཏེ་བ་ཀ་ འཆར་གཞི་ག་ཀོར་གེ་ ཇ་ག་ཡེག་པ་ཨ་ཉི་ ཨི་བི་ག་རང་ མ་ཡེག་ཅོ་ན་ཨ་ཉི་ དམག་དཔོན་གི་ ཡམ་ལང་ག་ བཀའ་གནང་ཐཱན་ ཀུན་ཏི་ཝ༌ལ༎
པ་ཝལ་ ཀའི༌ས༌རི༌ཡ༌ག་ ཀུན༌ཏི༌ཝ༌ལ།
23ཉི་དམག་དཔོན་གི་ རོ་ཀ་འགོ་དཔོན་ཉིག་ཙིང་རཱན་ཐཱན་ བཀའ་གནང་ཉི་ ཐི་ནོང་ངེ་རི་ ཆུ་ཚོད་དགུ་ག་ ཀའི་ས་རི་ཡ་ག་ དི་ལེ་དེན་གེ་ དམག་མི་ 200 ཅམ༌ཅོ། ཉི་ཨོམ་ཆང་རང་ ཀུར་ཏ་ཐུང་ཀ་ལང་ཁཱན་ དམག་མི་ 70 དང་ ཀྲིང་ཀང་གི་ཕྱད་མདའ་ཕི་ཁཱན་ དམག་མི་བུ་ 200 རིག་བུ་ལེ་ག་ཅམ༌ཅོ། 24པ་ཝལ་ དཔོན་སློབ་ཕི་ལི་ཀཱས་ག་ སྐུན་མདུན་ག་ལེག་པུ་ཨ་ཉི་ ཤེག་པེ་དེན་གེ་ རོ་ཀ་དེན་གེ་བུ་ ཀུར་ཏ་བ་ ཕྲིག་ཀིན་ཨན་ཅམ་ཉི་ ཐའི་ཨ་ཉི་གསུངས་མ༌ལ། 25ཉི་དམག་དཔོན་གི་ དཔོན་སློབ་ག་ཏཱན་ ཨོ་ཐ་ཡི་གུ་འབྲི་བ༌ལ།
26གནམ་མེད་ས་མེད་ གུས་ཞབས་ཨ་ཁཱན་ དཔོན་སློབ་ཕི་ལི་ཀཱས་ག་ཏཱན་ ཇང་ཀོལོཝ་དི་ཡཱས་ལུ་སི་ཡཱས་གི་ སྐུ་གཟུགས་བཟང་པོ་ཨ་ཉི་ཞུན༌ཅ།
27ཡ་ཧུ་དི་པ་ཚེ་བང་གི་ ཨོ་ཐ་སོ་ངོ་ཙུང་མ་ཆོ༌ཝ། ཉི་ཇང་ ཇ་ག་དམག་མི་བ་ཀབ་ཉི་ ལེ་ལ་ཤེག་ཉི་གོད་པ་ཀབ་ཉི་ རོག་ཏེ་བ་ཀི་ རོག་ཤེ་ལེ་ཅམ་པ་ཆོ༌ཝ། དག་པ་ཀབ་ཉི་ རོག་རོ་མི་ག་ མི་ཁུངས་ཆོ་ཁཱན་ སོ་ངོ་གི་ཝ་ལ་ཨ་ཉི་ ཇི་གི་སེ་དེན་གེ་ ཇང་དང་ ཇ་ག་དམག་མི་བ་ཀི་ རོ་ཀ་སྲོག་རྒྱབ་ཨ༌ཝ། 28རོག་ཏེ་བ་ཀི་ རོ་ཀ་ཧང་ཨ་ཉི་ ཨུ་ཉུ་ད་བུ་ ཨ་ཝ་གི་ལ་སྨོ་ སེ་ལེ་དེན་གེ་ ཇི་གི་རོག་ རོག་ཏེ་བ་ཀ་ ཚོགས་འདུ་ཆི་ལུ་ག་ གུབ་ཀ་ཀེ༌བ། 29རོག་ཏེ་ཡ་ཧུ་དི་པ་བ་ཀ བཀའ་ཁྲིམས་ག་ཀོར་གེ་ ཏབ་མ་ཉམ་པ་ ཤོ་ཝ་གི་ཝ་ལ་ཨ་ཉི་ ཇི་གི་སེ༌ཝ། དག་པ་ཀབ་ཉི་ རོ་ཀི་རོག་བཙོན་ག་ ནུ་ཕེ་ཁེ་ཝ་ག་ ལའི་ཧང་རང་ཨ་ཝ་མ༌ལ། ཉི་རོག་ཤེ་ལེ་ཁེ་ཝ་ག་ལའི་བུ་ ཧང་རང་ཨ་ཝ་མ༌ལ། 30རོག་ཏེ་བ་ཀི་ པ་ཝལ་ཤེ་ལེ་ག་ འཆར་གཞི་ཙ་མ་ཀོར་གེ་ ཇི་གི་སེ་ཝ་ཐུར་ག་རང་ ཇི་གི་རོག་ ན་ག་སྐུན་མདུན་ག་ཏཱན་ ཀུན་ཏིན༌ཅ། ཉི་ཇི་གི་ ཨོ་ཉ་ཡ་ཧུ་དི་པ་བ་ཀ་ ཡེག་པ་ཅ་ པ་ཝལ་ཀབ་ཉི་ རྩིས་ཞུ་ཕིད་པེ་ཏེ་ཆོ་ནེ་ལ་ རོག་ཏེ་བ་ཀི་ ན་ག་སྐུན་མདུན་ག་ བཅག་ཅོ་ཨ༌ཉི།
31དམག་དཔོན་གི་ བཀའ་གནང་མ་དང་ཏུ་ཉི་ ཨོ་ཉ་ངེ་རི་རང་ དམག་མི་བ་ཀི་ པ་ཝལ་བུ་ཉི་ ཁྲོམ་ཆེན་ཨན་ཏྲི་པ་ཏྲིས་ག་ ཤེག་པ༌ལ། 32ནམ་ནིང་དག་པ་ ཀུར་ཏ་ཀབ་ཉི་ ཆོ་ཁཱན་སོ་ངོ་བ་ཀི་ པ་ཝལ་ཀའི་ས་རི་ཡ་ག་ཏཱན་ བུ་ཉི་བྱོན་མ༌ལ། དག་པ་ཀབ་ཉི་ རོག་ཏེ་བ་ཀ་ བཱརའ་དམག་མི་བ་ཤོ་ ལོག་ཉི་དམག་ཁང་ག་ལོག་པ༌ལ། 33རོག་ཏེ་བ་ ཀའི་ས་རི་ཡ་ག་ཤེག་ཏེན་གེ་ དམག་དཔོན་གི་ ཀེ་ཁཱན་ཡི་གུ་དང་ པ་ཝལ་ དཔོན་སློབ་ཕི་ལི་ཀཱས་ག་ སྤྲོད་པ༌ལ། 34དཔོན་སློབ་གི་ ཨོ་ཉ་ཡི་གུ་ལྷག་ཐཱན་ ནཱན་ཨོ་གེ་ཡ་ཨ་ཉི་ ཇི་མ་ཀབ་ཉི་ པ་ཝལ་གི་ ཞུ་ཝ་ལ་ ཇང་ཀི་ལི་ཀི་ཡ་གེ་གི་ལ་ཨ༌ཉི།
35དཔོན་སློབ་གི་ པ་ཝལ་ག་གསུངས་མ་ལ་ ན་ག་དགྲ་བྱང་ཕིཤི་བ་ ཤེག་པ་ཀབ་ཉི་ ནཱན་གི་ ཡེག་པེ་ཆོ་ཁཱན་བ་ ཇི་གི་ཉཱན་པེ་དག༌ཉི། ཉི་གེ་ དཔོན་སློབ་གི་ པ་ཝལ་ ཧེ་རོད་ག་ ཕོ་བྲང་ག་ཆོ་ཁཱན་ བཙོན་ཁང་ག་ཙུག་ཉི་ཐའི་ཨ་ཉི་ བཀའ་གནང་མ༌ལ༎
Currently Selected:
མཛད༌པ། 23: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
