མཛད༌པ། 24
24
པ་ཝལ་ ཀ་ལུ་ཏཱད་པ༌ལ།
1ནོང་ལྔ་ག་ཚི་ངེ་ བླ་མ་གོང་མ་ ཧ་ན་ནི་ཡ་དང་ སོ་ངོ་ཆི་ལུ་བ་ ཉི་ཁྲིམས་ག་ཀོར་གེ་མཁྱེན་ཁཱན་ ཏར་ཏུལ་ལཱས་དག་ཁཱན་བ་ པ་ཝལ་ག་དགྲ་ཨ་ཉི་ རྩིས་ཞུ་ཕིད་པེ་དེན་གེ་ དོང་དཔོན་སློབ་ག་ སྐུན་མདུན་ག་བྱོན་མ༌ལ། 2རོག་ཏེ་བ་ ཛོམ་ས་ག་རཱན་ཐཱན་ ཏར་ཏུལ་ལཱས་གི་ པ་ཝལ་ག་ཀོར་གེ་ ཨོ་ཐེན་ཞུ་ཝ་ལ་ གུས་ཞབས་ཨ་ཁཱན་ དཔོན་སློབ་ཕི་ལི་ཀཱས། ཨ་ཧ་སོ་ངོ་བ་ སྐྱིད་པུ་ཨ་ཉི་ ཆོ་ལེ་ཉོང་ཁཱན་ཁེ་པ་ ན་ག་བཀའ་དྲིན་གི༌ལ། ཉི་ཨུ་ཉུ་མ་ཚཱད་པ་ ནཱན་གི་ སྐྱིད་སྡུག་གཟིགས་པ་ཨ་དེན་གེ་ ཨ་ཧ་རྒྱལ་ཁབ་ གོ་མ་གེ་ལག་ཉི་ ཡར་རྒྱས་དི་ཝ༌ཅ། 3ཨོ་ཐ་བ་ ཐམས་ཅན་ག་དེན་གེ་ ཨ་ཧ་དགའ་ཚོར་ཆི་ལུ༌ཅ། 4ཉི་ཨོམ་ཆང་རང་ ཐ་ག་ ཐུགས་ཚེར་ཐཱན་རང་གི་ནེ་བུ་ ཇི་གི་ཆཱས་ཁམ་ཐུར་ཉིག་ཙིང་ ཞུ་ཁཱན་ཁེ་པ་ སྙན་གསེང་ཉི་གནང་ཤོ་ ཨ་ཉི་ཞུན༌ཅ།
5རོག་ཤོ་ ནཱས་རི་པ་དག་ཁཱན་ ཆོས་ལུགས་ག་ འགོ་དཔོན་གི༌ལ། ཉི་རོག་ཤོ་ གནམ་མེད་ས་མེད་ ཏབ་མ་ཉམ་པ་ ཅོད་ཁཱན་གི༌ལ། ཉི་རོ་ཀི་ འཛམ་གླིང་རྒྱལ་ཁབ་ ཨོ་ག་རང་གི་ནེ་བུ་ ཡ་ཧུ་དི་པ་བ་ཀ་པོང་ཀ་ གནམ་མེད་ས་མེད་ ཇིཝ་ལང་པེ་བི་ཝ་ག་ ཨ་ཤི་ཐོང༌མ། 6ཉི་ཨུ་ཉུ་མ་ཚཱད་པ་ རོ་ཀི་མཆོད་ཁང་བུ་ མ་ཙང་མ་ཅོད་པེ་གོད་ཆོ༌ཝ། དག་པ་ཀབ་ཉི་ རོ་ཀི་ཨུ་ཉུ་ད་བུ་ཨ་ལེ་ ཨ་ཤི་མ་བིན་ཤི། 7-8ཨ་ཤི་ ཨོ་ཐ་སོ་ངོ་ག་ཀོར་གེ་ ཞུ་ཁཱན་ཁེ་པ་དེན་པ་གི་ལ་སྨོ་ མང་གི་སྨོ་ རོ་ཀ་ཏཱན་ དྲི་ཝ་ཇིམ་ནེ་ལ་ ནཱན་ནཱན་ཏེན་གི་རང་ མཁྱེན་མེ་ཨ༌ཉི།
9བཱརའ་ཡ་ཧུ་དི་པ་བ་ཀི་ ཏེར་ཏུ་ལཱས་ག་ ཁ་ཨ་ཉི་ཡེག་པ་ལ་ རོ་ཀི་ཡེག་ཁཱན་ ཐམས་ཅན་རང་ དེན་མེ་ཨ༌ཉི།
10དཔོན་སློབ་གི་ པ་ཝལ་ག་ཏཱན་ ག་ཐིང་ཐཱན་ཞུའི་ཨ་ཉི་ ག་ར་ལ་ཀབ་ཉི་ པ་ཝལ་གི་ ཞུ་ལེ་གོ་ཙུག་པ་ལ་ དྲག་ཤོས་ ནཱན་ཡ་ཧུ་དི་པ་བ་ཀ་ དྲང་དཔོན་ཨ་ཉི་ ཉིང་མང་པུ་ཐུར་ དི་ཝ་ལ་དག་ཉི་ སེ་ཝ་ཨ་དེན་གེ་ ཇི་གི་ཇང་ཏེན་ག་ཀོར་གེ་ ཆཱས་ཐྲང་ཉི་ཞུ་ལེ་ཉོང་ཉི་ ཇང་གནམ་མེད་ས་མེད་ ཤོ་ནང་ཕེ་ཝ༌ཅ། 11མགུར་མ་ཞུ་ལེ་དེན་གེ་ ཇང་ཡ་རུ་ཤ་ལེམ་ག་དི་ཉི་ ནོང་སོང་ཉིག་ཙིང་ཤ་དི་ཝ་དག་ཉི་ ནཱན་ནཱན་ཏེན་གི་རང་མཁྱེན༌མེ། 12ཇི་གི་མཆོད་ཁང་ག་ ཨི་བི་ཀབ་ཉི་རང་ རྩོད་པ་མ་ཕིན་ཤི། ཉི་ཡ་ཧུ་དི་པ་ཆོས་འཛོམས་ག་བུ་ ཨི་བི་ག་རང་ ཇིཝ་ལང་པེ་མ་རིག་ཅི་ ཡང་ན་ལ་ ཁྲོམ་ཆེན་ག་བུ་ ཨི་བི་ག་རང་ ཇིཝ་ལང་པེ་རིག་པ་མཱན༌ཅ། 13རོག་ཏེ་བ་ཀི་ ཇི་གི་ཨ་ན་ཨ་ཉི་ ཡེག་ཁཱན་ཆཱས་བ་ཀ་ ཁུངས་ཀེ་བེ་མར༌བ།
14དག་པ་ཀབ་ཉི་ ཇི་གི་ན་ག་ ཨོ་ཐ་ཆཱས་ཐུར་ཞུ་ལེ་ རོག་ཏེ་བ་ཀི་ ཆོས་ལུགས་ཨ་ཉི་ཆིན་ཁཱན་ ཡི་ཤུ་ག་ལམ་ག་ ཕྱག་ཞུ་ཁཱན་གི་ཝ་ཨ་དེན་གེ་ ཇི་གི་ཨ་ཧ་ཕ་མ་བ་ཀ་ དཀོན་མཆོག་ག་ གསོལ་ཝ་ཏབ༌ཅ། ཉི་བཀའ་ཁྲིམས་དང་ ལུང་བསྟན་པ་བ་ཀ་ དཔེ་ཆ་ནང་ཀ་འབྲི་ཁཱན་ ཐམས་ཅན་ག་ ཇི་གི་དད་པ་ཨན༌ཅ། 15རོག་ཏེ་བ་ཀི་ དཀོན་མཆོག་གི་ སོ་ངོ་ལེག་པུ་དང་མ་ལེག་པ་ ཉིག་ཙིང་རང་ ཤི་ཝ་གེ་གསོན་པོ་ཨ་ཉི་ ཝུན་གནང་མེ་ཨ་ཉི་ རེ་ཆ་ཨ་ཝ་པུརུས་ཀིན་ཨ་ཉི་ ཇི་གི་བུ་ དཀོན་མཆོག་ག་ རེ་ཆ་ཨ་ཉི་ དད་པ་ཨན༌ཅ། 16ཨོ་ཉི་ཨ་དེན་གེ་ ཧ་ལ་རང་གི་ནེ་བུ་ དཀོན་མཆོག་ག་ སྐུན་མདུན་ག་དང་ སོ་ངོ་བ་ཀ་གུབ་ཀ་ ཇ་ག་སེམས་ཀི་ དེན་པ་གི་ལ་ཨ་ཉི་མི་ཁཱན་ཤ་ ཇི་གི་ཨ་ལེ་མིག་པ་ཕིན༌ཅ།
17ཉིང་མང་པུ་ཐུར་ག་ཚི་ངེ་ ཡ་རུ་ཤ་ལེམ་ག་ཆོ་ཁཱན་ ཇ་ག་སོ་ངོ་བ་ཀ་ སྦྱིན་པ་ཕི་ལེ་དེན་གེ་དང་ དཀོན་མཆོག་ག་ མཆོད་པ་ཕུལ་ལེ་དེན་གེ་ ཇང་ཡ་རུ་ཤ་ལེམ་ག་ ལོག་ཉི་དི་ཝ་གི༌ལ། 18རོག་ཏེ་བ་ཀི་ ཇང་མཆོད་ཁང་ནང་ཀ་ ཐོང་མ་ཀབ་ཉི་ ཇི་གི་ཙང་མ་ཅོད་པེ་ག་ མཆོད་པ་ཕུལ་ཉི་ཆུ་མ་ཆོ༌ཝ། ཨུ་ཉུ་གང་ཀ་ ཇ་ག་ཀོ་ལོ་ལོ་ སོ་ངོ་མང་པུ་ཛོ་མ་མཱན་ཆི་ ཉི་ཇིཝ་བུ་ཟིང་པ་མཱན་ཆི། 19དག་པ་ཀབ་ཉི་ ས་ཆ་ཨེ་ཤི་ཡ་གེ་ཨུ་ཁཱན་ ཡ་ཧུ་དི་པ་ཚེ་བང་ ཨོ་ཉ་ག་ཆོ༌ཝ། ཉི་རོག་ཏེ་བ་ ཐ་ཨོ་ཕེ་ཁེ་ཝ་ཐུར་གི༌ལ། ཇི་གི་ཧང་ཐུར་ ངཱད་པ་ཏེ་ཆོ་ནེ་ལ་ རོག་ཏེ་བ་ཀི་ ཇ་ག་དགྲ་ཨ་ཉི་ རྩིས་ཞུ་ཕིད་པེ་རེ༌བེ། 20ཡ་ཧུ་དི་པ་ ཚོགས་འདུ་ཆི་ལུ་གི་ ཇི་གི་ངཱད་པ་ག་ ཧང་ཐོང་མ་གི་ལ་སྨོ་ ཨོ་ཉ་ཀོར་གེ་ ཨོ་ཐ་སོ་ངོ་བ་ཀ་ཇིམ་ཉི་ བཀའ་དྲིན་བསྐྱང༌ཤོ། 21དག་པ་ཀབ་ཉི་ ཇང་རོག་ཏེ་བ་ཀ་ སྐུན་མདུན་ག་ཐིང་མ་ཀབ་ཉི་ ཇི་གི་ཤ་དར་ཕི་ཉི་ ཆཱས་ཐུར་ཞུ་ཝ་ ཇི་གི་ཤི་ཝ་གེ་ གསོན་པོ་ཨ་ཉི་ཝུ་ལེ་ཨ་ཉི་ དད་པ་ཨ་ཝ་ཨ་དེན་གེ་ ཇང་ཐི་ནོང་ ན་ཧ་སྐུན་མདུན་ག་ ཐིང་མེ་ཁེ་ཝ་ན་ཨ༌ཉི།
22ཕི་ལི་ཀཱས་གི་ ཡི་ཤུ་ག་ལམ་ག་ཀོར་གེ་ གོ་མ་གེ་རང་ མང་པུ་ཐུར་ མཁྱེན་མ་ཆོ་ཝ༌ལ། རོ་ཀི་རྩིས་ཞུ་ཕིད་པེ་ནོར་ཐཱན་ དམག་དཔོན་ ལུ་སི་ཡཱས་ མ་ཤེག་པ་སག་པུ་ནོང་ཤོ་ རོག་ཤེག་ཏེན་གེ་ཤ་ ཇི་གི་ཨི་བི་དེན་ལ་སྨོ་ གོད་པེ་དག་ཉི་གསུངས་མ༌ལ། 23ཉི་གེ་ རོ་ཀི་འགོ་དཔོན་ཐུར་ག་ པ་ཝལ་ བཙོན་ཁང་ནང་ཀ་ནུང༌ཤོ། དག་པ་ཀབ་ཉི་ དམ་དམ་ཨ་ཉི་མ་ཐའི། ཉི་རོག་ཚཱས་ཁཱན་བ་ བི་ལེ་དེན་གེ་ རོ་ཀ་ཇ་རོ་བ་ བཙོན་ཁང་ག་ཨུ་ཉི་ རོག་རུ་མེ་ག་བི་ན་ཨ་ཉི་ བཀའ་གནང་མ༌ལ།
24ནོང་སམ་ཕང་ཕིཤི་ཕང་ག་ཚི་ངེ་ ཕི་ལི་ཀཱས་དང་ རོ་ཀ་གསང་ཡུམ་ དྲུ་སིལ་ལ་དག་ཁཱན་ ཕེབས་པ༌ལ། ཉི་རོ་ཀ་གསང་ཡུམ་ཤོ་ ཡ་ཧུ་དི་པ་གི་ཝ་ཆོ་ཝ༌ལ། པ་ཝལ་ རའི་ཨ་ཉི་གསུངས་ཉི་ པ་ཝལ་གི་ཡི་ཤུ་ཁིརིས་ག་ དད་པ་ཨ་ཝ་ཀོར་གེ་ གསུང་བཤད་ཅ་ཨ་ཉི་ རོག་ཉིག་ཙིང་གི་ ཉཱན་པ༌ལ། 25དག་པ་ཀབ་ཉི་ པ་ཝལ་གི་ སེམས་ཐྲང་པེ་ཁེ་ཝ་ཀོར་གེ་དང་ བཟོད་པར་སྒོམ་པེ་ཁེ་ཝ་ཀོར་གེ་ ཉི་དཀོན་མཆོག་གི་ འཛམ་གླིང་ག་ཁྲིམས་ ཧང་ཏེན་ཅཱད་པེ་གི་ལ་སྨོ་ ཨོ་ཉ་ཀོར་གེ་ བཤད་པ་ཀབ་ཉི་ ཕི་ལི་ཀཱས་ཡོང་ཁེན་ཇོང་ཉི་ གསུངས་མ་ལ་ ཨོམ་ ནཱན་ཇོང་ཤོ་ ཇ་ག་དུས་ཙུན་ཆོ་ལ་ཀབ་ཉི་ ཇི་གི་ནཱན་ ལོག་ཉི་ར་ལེ་ཨ༌ཉི། 26པ་ཝལ་གི་ རོ་ཀ་ནང་སུབ་ག་དུ་ཨ་ཉི་ རོ་ཀི་རེ་ཆ་ཨ་ཝ་ཨ་དེན་གེ་ རོ་ཀི་ལོག་ཉི་ལོག་ཉི་རང་ པ་ཝལ་ རོ་ཀ་སྐུན་མདུན་ག་རཱན་ཐཱན་ རོག་ཀབ་ཉི་ ཆཱས་ཨ་ཝ༌ལ།
27ཨོ་ཐེན་ཨ་ཉི་རང་ ཉིང་ཉིག་ཙིང་ཆཱན་ཉི་ ཉི་ཨོ་ཉ་ཚི་ངེ་ ཕི་ལི་ཀཱས་ག་ཚབ་ དཔོན་སློབ་ཨ་ཉི་ པར་ཀི་ཨཱས་ཕེས་ཏཱས་དག་ཁཱན་ཁེ་པ་ ཤེག་པ༌ལ། དག་པ་ཀབ་ཉི་ ཕི་ལི་ཀཱས་གི་ ཡ་ཧུ་དི་པ་བ་ ཤོ་ནང་ཕེ་ལེ་བི་ལེ་དེན་གེ་ པ་ཝལ་བཙོན་ཁང་ག་རང་ ཐུབ་ཐ་ཝ༌ལ༎
Currently Selected:
མཛད༌པ། 24: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
