མཛད༌པ། 25
25
པ་ཝལ་ ཕེས༌ཏཱས༌ག་སྐུན༌མདུན༌ག་བྱོན༌མ༌ལ།
1ཕེས་ཏཱས་ དཔོན་སློབ་རི་ཉི་ ནོང་སམ་ག་ཚི་ངེ་ རོག་ཀའི་ས་རི་ཡ་གེ་ ཡ་རུ་ཤ་ལེམ་ག་ཏཱན་ བྱོན་མ༌ལ། 2ཉི་ཡ་རུ་ཤ་ལེམ་ག་ བླ་མ་ཆི་ལུ་བ་དང་ ཡ་ཧུ་དི་པ་ག་འགོ་དཔོན་བ་ཀི་ དཔོན་སློབ་ག་ སྐུན་མདུན་ག་བཅག་ཐཱན་ པ་ཝལ་ག་དགྲ་ཨ་ཉི་ ཞུ་ཝ་ལ་ 3པ་ཝལ་ ཡ་རུ་ཤ་ལེམ་ག་ཏཱན་ ལོག་ཉི་ཀུན་ཏིན་གནང་ཉི་ བཀའ་དྲིན་བསྐྱང་ཤོ་ཨ་ཉི་ རོག་ཏེ་བ་ཀི་ དཔོན་སློབ་ག་ཞུ་ཝ༌ལ། རོག་ཏེ་བ་ཀི་ཨ་ནེ་ལ་ པ་ཝལ་ལབ་ཀ་རང་ ཀུབ་སེ་ཕི་ཉི་ཤེ་ལེ་ག་ འཆར་གཞི་ཙ་མ་ཆོ་ཝ༌ལ། 4དག་པ་ཀབ་ཉི་ དཔོན་སློབ་གི་ རོག་ཏེ་བ་ཀ་ གསུངས་མ་ལ་ པ་ཝལ་ ཀའི་ས་རི་ཡ་ག་རང་ཐ༌ལེ། ཉི་རོག་བུ་ ལོག་ཉི་དོ་ཟོ་རང་ ལེང་ཀའི་ས་རི་ཡ་ག་ཏཱན་ བྱོན་མེ་ཨ༌ཉི། 5རོ་ཀི་གསུངས་མ་ལ་ པ་ཝལ་གི་ ངཱད་པ་ཏེ་ཆོ་ནེ་ལ་ རོ་ཀ་དགྲ་ཨ་ཉི་ རྩིས་ཞུ་ཕིད་པེ་དེན་གེ་ ན་ཧ་འགོ་དཔོན་ཚེ་བང་ ཇང་ཀབ་ཉི་ཏབ་ཐུར་ ལེང་དི་ཁེ་ཨ༌ཉི།
6དཔོན་སློབ་ ཡ་རུ་ཤ་ལེམ་ག་ནོང་ཡེན་ཕང་ ཨུ་ཉུ་མང་གི་ནེ་ལ་ ནོང་སེ་ཕང་དབ་ཏུར་བཞུགས་ཐཱན་ ལོག་ཉི་ཀའི་ས་རི་ཡ་ག་ཏཱན་ བྱོན་མ༌ལ། ཉི་ནམ་ནིང་དག་པ་ཀབ་ཉི་ རོག་དྲང་དཔོན་ག་ ཁྲི་ཐུང་ཀ་བཞུགས་ཐཱན་ དམག་མི་བ་ཀ་ པ་ཝལ་ རོ་ཀ་སྐུན་མདུན་ག་ཕའི་ཨ་ཉི་ བཀའ་གནང་མ༌ལ། 7པ་ཝལ་ ཁྲིམས་ཁང་ནང་ཀ་ཕ་དེན་གེ་ ཡ་རུ་ཤ་ལེམ་གེ་ཨུ་ཁཱན་ ཡ་ཧུ་དི་པ་བ་ རོ་ཀ་ཀོ་ལོ་ལོ་ཛོམ་ཐཱན་ ཉི་རོག་ཏེ་བ་ཀི་ རོ་ཀ་དགྲ་ཨ་ཉི ཆཱས་མང་པུ་ཐུར་ ཡེག་པ༌ལ། དག་པ་ཀབ་ཉི་ རོག་ཏེ་བ་ཀི་ ཁུངས་ཀེ་བེ་མར་བ༌ལ།
8པ་ཝལ་གི་ རོག་ཏེན་སྐྱབས་ཨ་ལེ་དེན་གེ་ ཨོ་ཐེན་ཞུ་ཝ་ལ་ ཇི་གི་ཡ་ཧུ་དི་པ་ག་ བཀའ་ཁྲིམས་གེ་ གེ་བ་ལའི་ཨ་ཝ་མཱན༌ཅ། མཆོད་ཁང་ག་མ་ཙང་མ་ ཅོད་པ་བུ་མཱན༌ཅ། ཉི་ཀའི་སར་ག་ ངོ་ལོག་པ་བུ་མཱན་ཅ་ཨ༌ཉི།
9དཔོན་སློབ་ཕེས་ཏཱས་གི་ ཡ་ཧུ་དི་པ་བ་ ཤོ་ནང་ཕེ་ལེ་བི་ལེ་ མིག་པ་ཕི་ཉི་ པ་ཝལ་ག་ ཇི་མ་ལ་ ཇི་གི་ན་ག་རྩིས་ཞུ་ ཡ་རུ་ཤ་ལེམ་ག་ ཕིད་པེ་དེན་གེ་ ནཱན་ཡ་རུ་ཤ་ལེམ་ག་ དི་ལེ་ག་ སེམས་ཅ་སྨོ་ཨ༌ཉི།
10དག་པ་ཀབ་ཉི་ པ་ཝལ་གི་ཞུ་ཝ་ལ་ ཇང་ཡ་རུ་ཤ་ལེམ་ག་ མ་དི༌ལ། ཇང་རོམ་ག་ཁྲིམས་ཁང་ག་ ཐིང་མ༌ཅ། ཉི་ཇ་ག་རྩིས་ཞུ་ ཐ་ག་རང་ཕིད་པེ་ཁེ༌ལེ། ནཱན་གི་མཁྱེན་ཅ་ ཇི་གི་ཡ་ཧུ་དི་པ་བ་ཀ་ ཧང་རང་ནོད་པ་མཱན༌ཅ། 11ཇི་གི་ཤི་ལེ་ཁེ་ཝ་ག་ལའི་ ཨ་ཝ་ཆོ་ནེ་ལ་ ཇ་ག་སྐྱིད་སྡུག་གཟིགས་གནང་ཤོ་ཨ་ཉི་ མ་ཞུ༌ལ། དག་པ་ཀབ་ཉི་ ཇི་གི་ཧང་རང་ མ་ཨ་ཝ་ཆོ་ནེ་ལ་ ཨི་བི་གི་རང་ ཇང་རོག་ཏེ་བ་ཀ་ ག་དང་ག་སྤྲོད་པེ་མ་ཆོག༌པ། ཨུ་ཉུ་མ་ནེ་ལ་ ཇི་གི་དཔོན་ཆི་ལུ་ཀའི་སར་ག་ སྐུན་མདུན་ག་བཅག་པེ་དག༌ཉི།
12ཉི་དཔོན་སློབ་གི་ ཨོ་ཐ་ཀོར་གེ་ རོ་ཀ་ནོ་ཝང་ཨ་ཁཱན་བ་ཀབ་ཉི་ ཏུན་ཆ་ཨན་ཐཱན་ པ་ཝལ་ག་ གསུངས་མ་ལ་ ནཱན་གི་ ཀའི་སར་ག་སྐུན་མདུན་ག་ བཅག་པེ་ཨ་ཉི་གི་ཝ༌ལ། ཉི་ལ་ ནཱན་ཀའི་སར་ག་ སྐུན་མདུན་ག་རང་དི་ཨ༌ཉི༎
པ་ཝལ་ དཔོན་ཨ༌གིརི༌པཱས༌ག་སྐུན༌མདུན༌ག་བྱོན༌མ༌ལ།
13ནོང་ཉིག་ཙིང་སམ་ཕང་ག་ཚི་ངེ་ དཔོན་ཨ་གིརི་པཱས་དང་ རོ་ཀ་ཨུ་ས་བར་ནི་ཀི་ ཕེས་ཏཱས་ རུ་མེ་ག་དེན་གེ་ ཀའི་ས་རི་ཡ་ག་བྱོན་མ༌ལ། 14ཨ་གིརི་པཱས་དང་བར་ནི་ཀི་ ནོང་སམ་ཕང་ཕིཤི་ཕང་ ཉ་ག་བཞུགས་ཅ་ཨ་ཉི་ ཕེས་ཏཱས་གི་ པ་ཝལ་ག་རྩིས་ཞུ་ག་ཀོར་གེ་ དཔོན་ཀབ་ཉི་ཏུན་ཆ་ཨ་ཉི་ གསུང་གྲོས་མཛད་པ༌ལ། ཕེས་ཏཱས་གི་ གསུངས་མ་ལ་ ཕི་ལི་ཀཱས་དཔོན་སློབ་ཨ་ཉི་ ཆོ་ལེ་གང་ཀ་ བཙོན་ག་ཁེ་ཁཱན་ སོ་ངོ་ཐུར༌ཅ། 15ཇང་ཡ་རུ་ཤ་ལེམ་ག་ དི་ལ་ཀབ་ཉི་ བླ་མ་ཆི་ལུ་བ་དང་ ཡ་ཧུ་དི་པ་ག་སོ་ངོ་ཆི་ལུ་བ་ ཇ་ག་བཱརང་ཀ་ཤེག་ཐཱན་ ཨོ་ཉ་སོ་ངོ་ག་དགྲ་ཨ་ཉི་ མང་པུ་ཐུར་ཡེག་ཆོ༌ཝ། ཉི་རོག་ཏེ་བ་ཀི་ཨ་ནེ་ལ་ ཇི་གི་རོག་ཤི་ལེ་ཁེ་ཝ་ག་ ཁྲིམས་ཀེ་ཤོ་ཨ་ཉི་གི་ཝ༌ལ། 16དག་པ་ཀབ་ཉི་ ཇི་གི་ རོག་ཏེ་བ་ཀ་ཡེག་པ་ ཨ་ཧ་རོ་མི་ག་ ཁྲིམས་ལུགས་དང་ཏུ་ཉི་ རྩིས་ཞུ་ཕིད་ཉི་ ཁུངས་མ་ཀེ་བེ་གོ་མ་ སོ་ངོ་ཤེ་ལེ་ཆོག་པུ་མཱན༌ཅ། གོ་རང་ ཅོན་ཆོ་ཁཱན་གི་ རོག་ཏེན་ག་ སྐྱབས་ཨ་ལེ་དེན་གེ་ ཅོན་ཏག་ཁཱན་བ་ཀབ་ཉི་ པ་ཏོང་རུམ་ཉི་ རྩིས་ཞུ་ཕིད་པེ་ག་ གོ་སྐབས་བིན་ཅ་ཨ༌ཉི།
17ཉི་རྩིས་ཞུ་ཕིད་པེ་དེན་གེ་ ཡ་ཧུ་དི་པ་བ་ ཡ་རུ་ཤ་ལེམ་གེ་ ཐ་ཀའི་ས་རི་ཡ་ག་ ཤེག་པ་ཐུར་ག་རང་ ཇི་གི་དོ་ཟོ་དོ་ཟོ་ ཨ་ལེ་གོད་ཉི་ ནམ་ནིང་ད་བུ་རང་ ཇང་དྲང་དཔོན་ག་ རྐང་ཁྲི་ཐུང་ཀ་ལང་ཐཱན་ ཨོ་ཉ་སོ་ངོ་ ཁྲིམས་ཁང་ནང་ཀ་ཀེ་ཤོ་ཨ་ཉི་ བཀའ་བི༌ཝ། 18དག་པ་ཀབ་ཉི་ ཡ་ཧུ་དི་པ་བ་ཀི་ ག་ཐིང་ཐཱན་ རོ་ཀ་དགྲ་ཨ་ཉི་ ཡེག་ཅ་ཨ་ཉི་ ཇི་གི་མི་ཝ་ཆོ་ཝ་ པ་ཝལ་གི་ ལའི་ཆི་ལུ་ཐུར་རང་ ངཱད་པ་ཨོ་ཕེ་ལ་ཨ་ཉི་ དག་པ་ཀབ་ཉི་ ཇི་གི་མི་ཝ་དང་ཏུ་ཉི་ ལའི་ཧང་རང་ ངཱད་པ་མཱན་ཆི། 19རོག་ཏེ་བ་ཀི་ ཡེག་ཁཱན་ཤོ་ རོག་ཏེ་བ་ཀ་ ཆོས་ག་ཀོར་གེ་དང་ སོ་ངོ་ག་མིང་ ཡི་ཤུ་དག་ཁཱན་ག་ཀོར་གེ་གི་ཝ༌ལ། དག་པ་ཀབ་ཉི་ པ་ཝལ་གི་ ཨ་ནེ་ལ་ ཡི་ཤུ་གཤགས་པ་གེ་ ལོག་ཉི་བཞེངས་པ་ཨ་ཉི་ཡེག༌ལ། 20ཨོ་ཐ་རྩིས་ཞུ་ ཧང་ཏེན་ཕིད་པེ་གི་ལ་སྨོ་ མ་སེ་ལཱན་ ཇི་གི་པ་ཝལ་ག་ཇི་མ་ ན་ག་ཨོ་ཐ་རྩིས་ཞུ་ཕིད་པེ་དེན་གེ་ ནཱན་ཡ་རུ་ཤ་ལེམ་ག་ དི་ལེ་སྨོ་ཨ༌ཉི། 21དག་པ་ཀབ་ཉི་ པ་ཝལ་གི་ དཔོན་ཆི་ལུ་ཀའི་སར་ག་ སྐུན་མདུན་ག་ ཀུན་ཏི་ཨ་ཉི་ཡེག་ཉི་ དཔོན་ཆི་ལུ་ག་སྐུན་མདུན་ག་ ཀེ་བེ་མར་བ་སག་པུ་ བཙོན་ག་ཙུག་ཉི་ ཐའི་ཨ་ཉི་ཡེག་པ་ཨ༌ཉི།
22ཉི་ཨ་གིརི་པཱས་གི་ ཕེས་ཏཱས་ག་གསུངས་མ་ལ་ ཨོ་ཐ་སོ་ངོ་གི་ ཧང་ཡེག་པེ་ཅ་གི་ལ་སྨོ་ ཇི་གི་བུ་ ཉཱན་པེ་ཁེ་ལེ་ལ་ཨ༌ཉི།
ཕེས་ཏཱས་གི་ ལན་གནང་ཉི་ ནམ་ནིང་སྙན་གསེང་ཅོ་ཨ་ཉི་ གསུངས་མ༌ལ༎
པ་ཝལ་གི་ ཨ༌གིརི༌པཱས་ཀབ༌ཉི་ གསུང༌གྲོས་མཛད༌པ༌ལ།
23ནམ་ནིང་ག་ནོང་ཀ་ ཨ་གིརི་པཱས་དང་ རོ་ཀ་ཨུ་ས་བར་ནི་ཀི་ གནམ་མེད་ས་མེད་ ཕྱོགས་སྒྲིག་ཀེ་ཉི་ ཕེབས་པ༌ལ། རོག་ཉིག་ཙིང་དམག་མི་ག་ འགོ་དཔོན་བ་དང་ ཀའི་ས་རི་ཡ་ག་ སོ་ངོ་ཆི་ལུ་བ་ཀབ་ཉི་ ཁྲིམས་ཁང་ནང་ཀ་ བྱོན་མ༌ལ། ཉི་ཕེས་ཏཱས་གི་ དམག་མི་བ་ཀ་ པ་ཝལ་ ཁྲིམས་ཁང་ག་ནང་ཀ་ཀེ་ཤོ་ཨ་ཉི་ བཀའ་གནང་མ༌ལ། 24ཕེས་ཏཱས་གི་ གསུངས་མ་ལ་ ཨ་གིརི་པཱས་དང་ ཐ་ག་ཨའི་ཀབ་ཉི་ཛོམ་ཁཱན་ སོ་ངོ་ཐམས་ཅན་གི་ ཨོ་ཐ་སོ་ངོ་ཐོང་མ༌ཅ། ཐ་ག་ཡ་ཧུ་དི་པ་དང་ ཡ་རུ་ཤ་ལེམ་ག་ ཡ་ཧུ་དི་པ་བ་ཀི་ ཤ་དར་ཕི་ཉི་ ཇ་ག་ཡེག་ལ་ ཨོ་ཐ་སོ་ངོ་ཁེ་པ་ མ་ཤེ་ལཱན་ ཐ་ལེ་མང་ཕ་ཨ༌ཉི། 25དག་པ་ཀབ་ཉི་ ཇི་གི་ཞིབ་དཔྱད་ཕི་ཉི་ གོད་པ་ཀབ་ཉི་ རོ་ཀི་ཤེ་ལེ་ཁེ་ཝ་ག་ ཧང་རང་ཨ་ཝ་མ༌ལ། ཉི་རོ་ཀི་ རོག་ཀའི་སར་ག་ སྐུན་མདུན་ག་ ཀེ་ཤོ་ཨ་ཉི་ ཞུ་ཝ་ཨ་དེན་གེ་ ཇི་གི་རོག་ ཀའི་སར་ག་ སྐུན་མདུན་ག་ཏཱན་ ཀུན་ཏི་ལེ་ཨ་ཉི་ གྲོས་ཐག་ཆོད་པ༌ཅ།
26དག་པ་ཀབ་ཉི་ ཨ་ཧ་དཔོན་ཆི་ལུ་ག་ཏཱན་ ཇི་གི་ཨོ་ཐ་སོ་ངོ་ རོ་ཀ་སྐུན་མདུན་ག་ ཀུན་ཏི་ཝ་ག་དེན་ཐ་ ཧང་འབྲི་ཤོ་ཡ། རོ་ཀི་ལའི་ངཱད་པ་ལ་ ཧང་རང་མ༌ལ། ཨོ་ཉི་ཨ་དེན་གེ་ ཇི་གི་རོག་ ན་ཧ་བ་ཐམས་ཅན་ག་ གུབ་ཀ་ཕ་ཝ༌ཅ། ཉི་ཙོ་རང་ ཨ་གིརི་པཱས་ ན་ག་སྐུན་མདུན་ག་ཕ་ཝ༌ཅ། ཧང་ཡ་དག་ནེ་ལ་ ཨ་ཤི་ རོ་ཀ་ཞིབ་དཔྱད་ཕིན་ཆུམ་དེན་གེ་ ཇི་གི་ཧང་ཐུར་འབྲི་བེ་ དེན་ཁུངས་ཤོ་དུ་དག་ཉི་ མི་ཝ༌ཅ། 27ཧང་ཡ་དག་ནེ་ལ་ བཙོན་པ་གི་ ཧང་ངཱད་པ་ཅ་གི་ལ་སྨོ་ ཨོ་ཉ་ཀོར་གེ་ ཏེན་ཏེན་ཨ་ཉི་ མ་འབྲི་བ་སག་པུ་ ཀའི་སར་ག་སྐུན་མདུན་ག་ ཀུན་ཏི་ལེ་ག་ ལེག༌པུ་མང༌གི་ཨ༌ཉི་མི༌ན།
Currently Selected:
མཛད༌པ། 25: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
